ISAMBILILO 8
Uzye Leza Wapanzile Insi Kuti Ciye Uli?
1. Uzye cali uli pa kuti uyi utandike?
Leza wazumilizya antu kulaiteeka pa kuti yalole ukuti yatange yasisyepo intazi zya yantu
Uyi watandikiile papa kwene pano Satana wasomvile antu ya nkoleelo. Pa kutampa, Satana wali umungeli musuma sana, nomba atatwalilile ukwikala umu cumi. (Yoane 8:44) Watandiike ukukumbwa kuti nawe yamupepa wakwe vino Leza akapepwa. Satana wasomvile Eva nu kumulyombeleka kuti amuvwila kuluta Leza. Lino Eva wakanyile ukumvwila Leza, Adamu nawe wamulondeliile. Cintu cii cino Adamu wacisile calenzile kuti kuye ucuzi ni imfwa.—Welengini Utandiko 3:1-6, 19.
Papa kwene pano Satana wanenyile Eva ukukana-umvwila Kaumba, apano nu kupondokela uteeko wakwe Leza kwatampiile. Lyene na antu ingi yaakaana uteeko wakwe Leza, wako vino Satana wacisile. Ali cino Satana lyene wayela “kateka wa nsi.”—Welengini Yoane 14:30; 1 Yoane 5:19.
2. Uzye tungati Leza atayaumvile ningo?
Vyonsi vino Leza wapanga vyaya ningo sana. Antu na angeli yano Leza wapanzile yali ampomvu sana cakuti, iyatemwa, ndi yumvwilile Leza kwaula ni mpuso. (Malango 32:4, 5) Lino Leza watuumvile, watupeezile na amaka yakuisoolwela ukucita ivintu visuma nanti viipe. Uuntungwa uu uno Leza watupeela, ungatwazwa ukulangizya vino twatemwa Leza.—Welengini Yakobo 1:13-15; 1 Yoane 5:3.
3. Ngu mulandu ci uno Leza wazumilizizya ucuzi kufika ndakayi?
Kufuma sile umu Edeni, Yeova wazumilizya ukupondokela ukateeka wakwe. Uzye mumanyile cino wacitila vii? Cino wacitila vii a pakuti antu yalole ukuti ndi yakuiteeka ineco, ukwaula Leza, pasi kuno yangaya. (Kasambilizya 7:29; 8:9) Mukwayi lyene ni myaka 6,000 kufuma pali Adamu yapita, kapya fwensi kwene twazana ni cisinka. Mauteeko ya antu yonsi yafilwa ukumala inkondo, upondo, lufyengo na malwala.—Welengini Yelemiya 10:23; Loma 9:17.
Kuteeka kwako Leza kutaya wa kuteeka kwa yantu, pano antu ndi yakuteekwa na Leza yakaikala ningo. (Ezaya 48:17, 18) Likwene sile Leza wasya afumyepo mauteeko yonsi a yantu. Antu aasoolola ukutekwa na Leza, aliyo sile alaikala pano nsi.—Ezaya11:9.—Welengini Danieli 2:44.
Tambini vidyo ya kuti U Mulandu ci Uno Leza Atalesezya Ucuzi?
4. Uzye pa nsita yii lino Leza atali aonone aipe, twakulacita vyani?
Satana walanzile ati fwe yantu tutatemwa Yeova; tukamuombela sile pa mulandu wa kuti akatupeela ivintu visuma. Uzye mungacita uli pa kuti mulange ukuti vino walanzile ivya ufi? Ikwene yii ali nsita ino tungalangizya uno twasoolola ukututeeka, nampo nga a Leza nanti antu. Nomba vino tukacita umu umi witu ali vino vingalanga ndi cakuti tukulonda Leza nanti antu.—Welengini Yobo 1:8-12; Mapinda 27:11.
5. Tungacita uli pa kuti tusoolole Leza ukuya kateeka witu?
Ivintu vino tukaacita vikalangizya ndi ca kuti tukalonda kuti Leza Atuteeka
Pa kusoolola Leza ukuya kateeka witu, tufwile ukusambilila izwi lyakwe Leza, Baibolo, pa kuti tumanye ukupepa kwa cumi. Ndi twamanya ukupepa kuko, tulinzile ukukulondela. (Yoane 4:23) Lyene pa kukaana ukuteeka kwakwe Satana, tulinzile ukusenka uku vikanza vyamiteekele ya mpanga, nu ku nkondo, wako vino Yesu wacisile.—Welengini Yoane 17:14.
Satana akaomvya amaka yakwe ukusenula ivintu viipe pa kuti vyaloleka uti ivisuma. Nga twakaana ivintu vivyo, limwi anji nanti amu lupwa yangaatuseka nanti ukutukaanya. (1 Petulo 4:3, 4) Nomba fweeneco tulinzile ukusoolola ivya kucita. Uzye tutange tutemwe ukuya na anji yano yatemwa Leza? Uzye tutange tumvwile masunde yakwe Leza asuma? Ndi twacita vii, alino tulalangizya apaswe ukuti Satana u waufi; na vino walanzile ukuti ndi catala tungavilwa ukuombela Leza, uufi utupu.—Welengini 1 Kolinto 6:9, 10; 15:33.
Leza watutemwa wakwe cimwi. Acino twasininkizizya ukuti nanti ciye uli, alafumyapo uyi nu ucuzi. Antu yonsi aataila ukuti vintu vii vilacitika, aliyo alaipakizya uumi usuma pano nsi amanda pe.—Welengini Yoane 3:16.
