Jehovah Lubanga ma Opore me Angeya

TIKA twero bedo ni itye ka keng gin mo ma pire tek adada i kwo? Ka itye ki ngec manok keken i kom Lubanga, ci ngene kene ni itye ka keng gin meno. Pingo? Pien, ngeyo Lubanga ma oweko kicoyo Baibul-li keliwa adwogi mabeco, dok meno aye gin ma dano milion mapol dong guniang. Wanongo adwogi mabeco meno i kare-ni, ki bene i anyim.

Jehovah, Lubanga ma oweko kicoyo Baibul-li mito ni wange en maber. Laco jabuli ocoyo ni: “Wek gunge ni, in keni aye ma nyingi Rwot [Jehovah], in aye Ngat Mamalo Twal ma loyo wi lobo-ni ducu.” En ngeyo ni wan aye wanongo adwogi maber ka wangeye. En owaco ni: “An a Rwot Lubangawu amito pwonyowu wek wubed maber.” Adwogi mabeco ango ma wanongo ka wangeyo Jehovah, Lubanga Mamalo Twal?​—Jabuli 83:18; Icaya 48:17.

Adwogi acel maber aye ni wanongo tira ka watye ka wok ki i peko mo keken, wabedo ki gen pi anyim mamwonya, ki dong wic ma opye mot. Medo i kom meno, ka wangeyo Jehovah maber ci wabedo ki neno matir i kom jami ma tye ka nyweno wi dano mapol i kare-ni i wi lobo lung. Jami ango?

Kwoni mono tye ki tyen lok?

Kadi bed diro me tet odongo i rwom ma lamal, dano mapol i kare-ni pud peya gunongo lagam pi lapeny mogo ma pigi tego, calo: ‘Ngo ma bitimme i koma i anyim? Tyen lok me kwo mono tye?’ Ka ngat moni pe onongo lagam matir, ci pe bibedo ki tyen lok me kwo. Tika dano ducu gingeyo meno? Kwed mo ma kitimo i Germany i mwaka 1990 ki wiye nyuto ni nucu pa jo ma kipenyogi-ni ducu onongo pol kare giwinyo calo kwogi pe ki tyen lok. Gwok meno aye kit ma dano ma i kabedowu bene giwinyo kwede.

Ka ngat moni pe tye ki tyen lok me kwo, ci pe twero keto yub mucwiny pi anyim. Jo mapol gitamo ni me yubbe maber pi anyim, myero ginong tic ma culle bup nyo gigwok lim madwong pi anyim. Ento tye jo mogo ma cwinygi pe twero pye mot pien pud peya gunongo tyen lok me kwo. Dok jo mukene wigi nywene adada ma ginongo ni dong konye pe me medde ki kwo. Meno aye gin mutimme i kom dako mo ma onongo mwonya adada. Ma lubbe ki gajeti me International Herald Tribune, dako-ni odongo i gang mulony adada dok onongo tye ki jami me kom ducu ma iye mito.” Kadi bed ni kwone onongo rwomme lamal, ento kare ducu en onongo winyo calo etye kene, dok kwone pe ki tyen lok. I nino mo acel, en omwonyo yat nino madwong ci kinonge ma dong oto woko. Gwok in bene ingeyo jo mogo ma onongo gibedo kickic dok guto malit adada.

Tika dong iwinyo ka jo mogo giwaco ni cayan twero miniwa ngec ducu ma gudo kwowa? Gajeti mo me Germany ma kilwongo ni Die Woche owaco ni: “Kadi bed lok me cayan tye kakare, ento pe miniwa ngec me dini dok pe nyutiwa gin matir ki marac. Pwony ni jami ducu gucakke pigi kengi-ni pe miniwa ngec ducu, dok ngec ma cayan miyo i kom jami ma wanenogi i lobo-ni pe twero miniwa kwecwiny ki wic ma opye mot.” Kwed ma lucayan gutimo miniwa ngec mapol i kom jami makwo, ki jami mogo ma timme i lobo, me labolle kit ma kot yubbe kwede ki dong jami mogo ma weko kwo bedo tye i lobo. Kadi bed kumeno, cayan pe twero titiwa tyen lok muweko watye kwo nyo gin ma bitimme i komwa i anyim. Ka ni wajenge i kom lok me cayan keken, ci pe wabinongo lagam ma tittiwa tyen lok me kwo. Dong kit ma gajeti me Süddeutsche Zeitung onyuto kwede, man oweko dano “gimito tira ki tela kare ducu.”

Dong anga mukene ma twero miniwa tira meno mapat ki Lacwec? Kit macalo en aye oketowa i lobo, nongo en ngeyo pingo ecweyowa. Baibul waco ni Jehovah ocweyo dano wek gunywal gupong lobo, dok gugwok bene lobo maber. I gin mo keken ma gitimo, dano myero gulub kite, me labolle, ngolokop atir, ryeko, ki mar. Ka waniang tyen lok muweko Jehovah ocweyowa, ci wabiniang bene tyen lok me kwo.​—Acakki 1:26-28.

Gin Ango ma Itwero Timone?

Ngo ma myero itim ka pud peya inongo lagam mucwiny i kom lapeny magi: ‘Ngo ma bitimme i koma i anyim? Tyen lok me kwo mono tye?’ Baibul cuko cwinyi ni omyero inge Jehovah maber. Ki lok ada, Yecu owaco ni: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.” Kicuko cwinyi bene me dongo kit pa Lubanga, tutwalle mar, ki dok me mine i te Ker pa Lubanga ma Yecu aye Kabakane. Ka itimo meno, ibibedo ki tyen lok me kwo ki gen pi anyim mamwonya. Man bikonyi me nongo lagam ma obedo ka nyweno wii-ni.​—Jon 17:3; Latitlok 12:13.

Lagam pi lapeny magi bigudi nining? Me niang kit ma lagam pi lapeny magi twero gudi kwede, nen kong labol pa Hans. * Mwaki mogo mukato angec, en onongo tye ki niye mo manok i kom Lubanga, ento niye meno pe ogudo kwone kulu. Hans onongo maro tic ki yadi mogo calo jayigi-ni, tim tarwang, turo cik ki dong ngwec ki pikipiki. Hans owaco ni, “Kwona onongo pe tye ki tyen lok, dok onongo pe atye ki yomcwiny me ada.” I kare ma Hans tye ki mwaka 20 ki wiye, en omoko tamme me ngeyo Lubanga maber, dok ocako kwano Baibul i yo matut. Ma ngecce i kom Lubanga omedde dok oniang tyen lok me kwo, en oloko kwone ci onongo batija macalo Lacaden pa Jehovah. En dong otiyo pi Jehovah pi kare malac pi mwaki 10. En owaco atir ka maleng ni: “Tic pi Jehovah aye yo me kwo maber loyo. Pe tye gin mo keken ma watwero porone kwede. Ngeyo Jehovah oweko anongo tyen lok me kwo.”

Ngene kene ni pe nongo lagam pi tyen lok me kwo keken aye ocungo wi dano mapol. Pi jami maraco ma tye ka medde i lobo, oweko jo mapol bene gimito nongo lagam pi lapeny mukene ma pire tek.

Pingo Jami Maraco Timme?

Ka peko opoto, jo ma peko meno opoto i komgi polle gibedo ki lapeny acel: Pingo gin man otimme? Kerowa me lweny ki peko polle cung i kom nongo lagam matir pi lapeny meno. Ka ngat moni pe onongo lagamme, ci en medde ki winyo arem, dok twero bedo ki keccwiny. Me labolle, nen kong gin mutimme i kom Bruni.

Bruni owaco ni, “Mwaki mogo mukato angec, nyara oto woko, onongo atye ki niye i kom Lubanga, pi meno ayenyo kwecwiny ki bot padi me kanicawa. En owacca ni Lubanga aye olwongo Susanne i polo, dok en dong tye lamalaika kunnu. To meno pe oturo cwinya keken, ento cwinya onongo dong dag Lubanga adada pien ni en aye okwanyo nyara.” Bruni omedde ki bedo ki aremcwiny pi mwaki mapol. En omedde ni “Lacaden pa Jehovah mo onyutta ki i Baibul ni pe myero adag Lubanga. Jehovah pe olwongo Susanne i polo, dok ni en pe tye lamalaika. Two ma en obedo kwede obino macalo adwogi me roc ma dano ducu gitye kwede. Susanne tye ka nino mot i bur lyel, dok tye ka kuro kare ma Jehovah bicere iye. Apwonyo bene ni en onongo ocweyo dano ni gubed pi naka i lobo paradic, dok ni gin meno dong cok timme. Ma aniang kit mabeco ma Lubanga tye kwede, anyikke cok bote, dok motmot, aremcwiny ma atye kwede ocako rweny.”​—Jabuli 37:29; Tic pa Lukwena 24:15; Jo Roma 5:12.

Dano milion mapol gitye ka kemme bene ki pekki mapatpat: lweny, kec, peko ma poto atura, nyo pekki ma gudo ngat acel acel. Bruni onongo kwecwiny i kare ma okwano ki i Baibul ni pe myero wakok i kom Lubanga pi jami maraco ma timme i komwa, ni Lubanga onongo pe oyubo ni dano guden can, ki dok ni cokcok-ki en bigiko jami maraco ducu. Ki lok ada, medde pa jami maraco nyuto ni watye ka kwo “i kare me agikki” me lobo man marac-ci. Lubanga dong cok kelo alokaloka ma bigiko jami maraco ducu.​—2 Temceo 3:1-5; Matayo 24:7, 8.

Cako Ngeyo Lubanga

Hans ki Bruni onongo gitye ki ngec mo olo i kom Lubanga. Onongo gitye ki niye i kom Lubanga kadi bed pe gingeye maber. I kare ma gukwanyo kare me nongo ngec matir i kom Jehovah, gunongo adwogi maber. Gin gunongo lagam matir pi lapeny ma pigi tego i kwo. Man oweko gubedo ki wic ma opye mot ki gen pi anyim maber. Gin meno bene otimme i kom dano milion mapol ma dong gitye ka tic pi Jehovah i kare-ni.

Ngeyo Jehovah cakke ki keto cwinywa me kwano Baibul, man weko waniang gin ma en mito ni watim. Meno aye gin ma jo mogo i cencwari me acel gutimo. Luka ma onongo tye daktar ki lacoc me tekwaro ocoyo ni kacokke pa Lujudaya ma i Berea, i lobo Grik, ‘gujolo lok ma Paulo gin ki Cira gutito botgi ki cinggi aryo, kun gingiyo Ginacoya ma yam gicoyo nino ducu pi neno ka lok ducu tye kit meno ada.’​—Tic pa Lukwena 17:10, 11.

Lukricitayo me cencwari me acel onongo bene gicokke kacel. (Tic pa Lukwena 2:41, 42, 46; 1 Jo Korint 1:1, 2; Jo Galatia 1:1, 2; 2 Jo Tecalonika 1:1) Meno bene tye ka timme wa i kare-ni. Lucaden pa Jehovah gicokke kacel wek gikony luwotgi me nyikke cok ki Jehovah ki dok me nongo yomcwiny i tic pi Lubanga. Ribbe kacel ki Lucaden pa Jehovah bene keliwa adwogi mukene maber. Dano gitwero lubo kit pa Lubanga ma giworo i nge kare mo, pi meno, Lucaden pa Jehovah bene gitute me poro kit Jehovah. Dong ka waribbe ki Lucaden mukene, ci bikonyowa bene me ngeyo Jehovah maber.​—Jo Ibru 10:24, 25.

Tika iwinyo calo obedo tic matek tutwal me ngeyo Ngat acel keken? Mitte ni watute matek gire. Meno aye pe kit ma itute kwede matek me timo gin ma imito cobone? Tam kong kit ma lutuku gitutte kwede me nongo pwonnye muromo. Me labolle, Jean-Claude Killy, latuku Olympic me France ma oloyo midila me jabu mapol i pyem ngwec i wi pee owaco ni wek ibed latuku mucwiny ma ngene i lobe mapatpat: “Omyero icak pwonnye pi pyem me Olympic ma pud odong mwaki apar, igo pulan pi mwaki mapol, dok ibed ka tam iye nino ducu. . . . Omyero iyub tammi, dok ipwonnye nino ki nino pi mwaki magi ducu.” Man obedo kit ma dano giyelle kwede pi pyem ma twero tero dakika apar keken! Ento tam kong i kom adwogi mabeco ma wanongo ka wangeyo Jehovah.

Wat ma Jing Nino ki Nino

Anga ma mito ni ekeng gin mo ma pire tek? Pe tye ngat mo. Pi meno, ka iniang ni pe itye ki tyen lok me kwo, nyo imito niang pingo jami maraco timme, ci mok tammi me ngeyo Jehovah, Lubanga ma oweko kicoyo Baibul-li. Pwonyo lok i kome twero kelo alokaloka mabeco dok marii pi naka.

Tika wabigiko pwonyo lok i kom Jehovah? Jo mogo ma dong gutiyo pire pi mwaki mapol pud gitye ki ur i kom jami mapol ma gipwonyo i kom Jehovah ki jami mukene manyen ma gimedde ki pwonyone nino ducu. Pwonyo jami meno keliwa yomcwiny dok weko wanyikke cok bote. Wabed wunu ki tam acel calo pa Lakwena Paulo ma ocoyo ni: “Lonyo pa Lubanga dwong ma okato kare! Ryekone kacel ki ngecce tut twatwal! Lok ma en ngolo tere pe tatte, niang i kite tek! ‘Anga ma ngeyo tam pa Rwot? Anga ma yam miye tam’”​—Jo Roma 11:33, 34.

[Lok ma tye piny]

 [Boro buk]

Jo mapol pud gipenyo lapeny ma pire tek magi: ‘Ngo ma bitimme i koma i anyim? Tyen lok me kwo mono tye?’

 [Boro buk]

“Ma aniang kit mabeco ma Lubanga tye kwede, anyikke cok bote”

 [Boro buk]

“Tic pi Jehovah aye yo me kwo maber loyo. Pe tye gin mo keken ma watwero porone kwede. Ngeyo Jehovah oweko anongo tyen lok me kwo”