Aha do Manfaatna Mananda Jahowa?

HEA do hamu putus asa manang mandele? Pasti hea do molo dang ditanda hamu dope Debata. Boasa boi didok songon i? Alana nungnga marjuta halak na makkilala godang do manfaatna dung marsiajar Bibel nasida jala ditanda nasida Debata. Dung marsiajar Bibel nasida, pittor boi do dihilala nasida manfaatna di tikki i jala boi dope dihilala nasida manfaatna sahat tu ari na naeng ro.

Lomo do roha ni Debata Jahowa asa tatanda Ibana. Panurat psalmen mandok, “Asa diboto nasida Ho do na margoar Jahowa, holan Ho do Natumimbul di saluhut tano on.” Diboto Jahowa do godang manfaatna molo tatanda Ibana. Alani i ma didok Ibana, “Au do Jahowa Debatam, Debata na mangajarhon na denggan tu ho.” Aha haroa manfaatna molo tatanda Jahowa, Debata Natumimbul i?​—Psalmen 83:18; Jesaya 48:17.

Molo tatanda Debata, gabe boi ma taboto songon dia carana menghadapi akka masalah di ngolutta ganup ari. Gabe pos ma rohatta tu janji ni Debata taringot masa depan jala gabe dame ma rohatta. Asing ni i molo takkas tatanda Jahowa, gabe boi ma taboto alus ni sukkun-sukkun na jotjot ro tu roha ni sude jolma di portibi on. Sukkun-sukkun aha ma i?

Aha do Tujuan ni Ngolutta?

Nang pe adong kemajuan teknologi, alai jotjot dope sukkun-sukkun roha ni akka halak, ‘Aha do tujuan ni ngolutta?’ Molo dang diboto sasahalak alus ni sukkun-sukkun i, gabe dang martujuan be ngoluna. Memang godang do halak na makkilala songon i? Adong ma dibahen sada penelitian di Jerman di ujung ni taon 1990. Satonga na dohot tu penelitian i mandok, jotjot do dihilala nasida hira na so martujuan ngolu ni nasida. Olo do ra songon i na dihilala akka halak di ingananmuna.

Molo dang diboto sasahalak aha tujuan ni ngoluna, olo do gabe dang adong cita-cita ni sasahalak. Ujungna dibaen nasida ma pelarian. Berusaha ma nasida asa sukses jala papunguhon godang hepeng. Alai nang pe songon i, tong dope dihilala nasida hira na so martujuan ngolu ni nasida. Jala adong do halak ala dang diboto aha tujuan ni ngoluna, gabe dihilala ibana ma tumagon ibana mate. Songon i ma na dihilala sahalak anak boru. International Herald Tribune paboahon, “Na mora jong do ibana, bagak, jala boi do dapotna sude na dihalomohon rohana.” Alai nang pe sonang hian ngoluna, jotjot do ibana merasa kesepian jala hira na so martujuan ngoluna. Ujungna diallang ibana ma obat tidur jala gabe mate ma ibana. Mungkin hea do dibege hamu halak na asing na mengalami situasi na songon i.

Hea do dibege hamu halak mandok, boi do ilmu pengetahuan paboahon taringot parngoluon? Koran mingguan Jerman na margoar Die Woche paboahon, “Nang pe sittong na didok ilmu pengetahuan taringot hangoluan, alai dang boi i mambahen jonok jolma tu Debata. Molo teori Evolusi, hira na dibaen-baen do i. Jala teori Fisika Kuantum pe, nang pe hira na maju jala sittong idaon, dang boi i mambahen dame pikkiran ni jolma jala dang boi mangapuli nasida.” Boi do memang dipaboa ilmu pengetahuan taringot ragam ni hangoluan, siklus alam, dohot proses na mambahen toktong hita mangolu. Alai dang boi ilmu pengetahuan paboahon aha do tujuan ni ngolutta. Jadi molo bergantung tu ilmu pengetahuan do hita, dang boi taboto tujuan ni ngolutta. Alani i, surat kabar Süddeutsche Zeitung mandok, “Gabe godang ma halak na mangalului petunjuk na sittong.”

Attong ise ma na boi mangalehon petunjuk na sittong i? Holan Debata do! Ala Ibana do na manoppa hita. Tikki ditoppa Ibana jolma, diboto Ibana do aha tujuanna manoppa jolma. Didok di Bibel, ditoppa Jahowa pe jolma asa marpinoppari do nasida jala mangurus tano on. Jala tikki diulahon nasida ulaon ni nasida, ikkon ditiru nasida do sifat ni Debata, contohna adil, marbisuk dohot holong. Molo taboto aha tujuan ni Jahowa manoppa hita, gabe taboto ma tujuan ni ngolutta.​—1 Musa 1:​26-​28.

Aha ma na Porlu Taulahon?

Bibel mandok porlu do tapajonok diritta tu Jahowa. Jesus pe mandok, “On do hangoluan na saleleng ni lelengna, ikkon tandaon ni nasida do Ho Debata na Sasada i, na sittong i dohot Jesus Kristus na sinurum.” Didok Bibel do tong ikkon tatiru do sifat ni Debata, tarlumobi ma holong ni rohana. Jala tabahen ma tujuanta asa boi gabe rakyat ni Harajaon ni Debata. Molo taulahon i, gabe adong ma tujuan ni ngolutta jala gabe pos ma rohatta tu janji ni Debata taringot masa depan.​—Johannes 17:3; Parjamita 12:13.

Toho do adong manfaatna marsiajar Bibel? Taida ma jo pengalaman ni si Hans. * Piga-piga taon naung salpu, dang takkas dope ditanda ibana Debata. Nang pe porsea ibana adong Debata, alai dang diulahon ibana lomo ni roha ni Debata di ngoluna. Lomo do roha ni si Hans marnarkoba, marboru-boru, mambahen onar, jala dohot do ibana tu geng motor. Didok si Hans, “Nang pe huulahon i sude, alai hira na so martujuan do ngolukku”. Dung marumur hira-hira 25 taon ibana, diputusson ibana ma marsiajar Bibel. Dung ditanda ibana Jahowa jala diboto ibana aha tujuan ni ngoluna, muba ma ibana. Tardidi ma ibana gabe sahalak Saksi Jahowa. Gabe perintis do ibana sappulu taon na parpudi on. Takkas do didok si Hans, “Las do roha manomba Jahowa. On ma pilihan na dumenggan. Dang boi on dipatudos tu manang aha pe. Gabe martujuan ma ngolukku ala hutanda Jahowa.”

Alai dang holan taringot tujuan ni ngolutta na dipikkiri akka halak. Ala lam sursar portibi on, gabe ro ma sukkun-sukkun na asing di roha ni akka halak.

Boasa ma Masa on?

Molo ro sitaonon tu hita, olo do pittor ro sukkun-sukkun tu pikkiratta: Boasa ma masa on? Molo taboto alusna boi ma tarapul rohatta. Alai molo dang taboto alusna, gabe torus ma lungun rohatta. Songon i ma na dihilala si Bruni. Taida ma pengalamanna.

Nungnga satonga baya saonari si Bruni. Diceritahon ibana ma, “Piga-piga taon naung salpu, mate ma borukku tikki poso-poso dope ibana. Ala porsea do au tu Debata, lao ma au manjuppangi pastornami asa tarapul rohakku. Alai didok ibana Debata do na mangalap si Susan, asa boi gabe malaikat di surgo. Hira na masursur do hurasa portibi on di parmate ni borukki. Jala gabe jut ma rohakku tu Debata alani na didok pastor i.” Torus ma lungun roha ni si Bruni saleleng piga-piga taon. Didok ibana ma muse, “Dung i pajuppang ma au dohot Saksi Jahowa. Dipatudu nasida ma sian Bibel, dang na dialap Debata hape si Susan. Alani dosa do makana mate jolma. Jala saonari dos songon na modom do si Susan paima dipahehe Jahowa. Huboto ma muse lomo do hape roha ni Debata asa mangolu saleleng ni lelengna hita di Paradeiso di tano on. Jala na lao masa nama i satokkin nai. Dung lam takkas huboto sifat ni Jahowa, gabe lam jonok ma saonari hubunganku tu Ibana. Jala gabe moru ma otik-otik lungun ni rohakki.”​—Psalmen 37:29; Ulaon ni Apostel 24:15; Rom 5:​12.

Marragam do sitaonon na dihilala marjuta halak saonari on. Contohna masalah pribadi, porang, kelaparan, manang bencana alam. Alai songon pengalaman ni si Bruni, gabe moru do lungun ni rohana dung diboto ibana sian Bibel dang Debata hape na mambahen jolma susa. Bahkan marjanji do Debata, dang na lao adong be hajahaton bahenonna di portibi on satokkin nai. Memang lam martamba do taida saonari hajahaton di portibi on. On ma bukti na patuduhon na mangolu “di ari parpudi” do hita. Alai na lao marujung nama i satokkin nai.​—2 Timoteus 3:​1-5; Mateus 24:​7, 8.

Mananda Debata

Najolo, dang takkas ditanda si Hans dohot si Bruni Debata. Nang pe porsea nasida adong Debata, alai dang haru godang hatorangan na diboto nasida taringot Ibana. Dung i dilean nasida ma tikkina lao marsiajar taringot Jahowa. Godang ma manfaat na dihilala nasida sian i. Gabe diboto nasida ma alus ni sukkun-sukkun na jotjot ro tu roha ni nasida. Gabe dame ma roha ni nasida jala gabe pos ma roha ni nasida tu janji ni Debata taringot masa depan. Marjuta do naposo ni Jahowa na hea makkilala songon i.

Asa boi tatanda Jahowa, ikkon tapareso do isi ni Bibel. Alana dipaboa do disi taringot Debata dohot lomo ni rohana. On ma na diulahon halak Kristen di abad na parjolo. Didok si Lukas do taringot halak Jahudi di huria Berea di Junani, “Dijalo nasida do hata ni Debata sian nasa rohana. Ganup ari do dipareso nasida Surat na Badia i lao mangida sittong manang dang na dibege nasida.”​—Ulaon ni Apostel 17:10, 11.

Rap marpungu do tong halak Kristen di abad na parjolo lao manomba Jahowa. (Ulaon ni Apostel 2:​41, 42, 46; 1 Korint 1:​1, 2; Galatia 1:​1, 2; 2 Tessalonik 1:1) Dos songon i ma halak Kristen saonari. Rap marpungu do Saksi Jahowa lao manomba Debata. Alana boi do on mangurupi nasida lam jonok tu Jahowa jala marlas ni roha manomba Ibana. Adong do muse manfaat na asing molo rap marpungu hita manomba Jahowa. Ala boi do jolma secara bertahap maniru sifat ni Debata, berusaha do Saksi Jahowa maniru sifat ni Debata. Jadi molo marpungu hamu rap dohot Saksi Jahowa, boi ma lam takkas ditanda hamu Jahowa.​—Heber 10:24, 25.

Molo menurut hamu, pagodangku do na ikkon taulahon lao mananda Debata? Memang ikkon godang do na taulahon. Alai di sude ulaonta siganup ari memang porlu do usaha. Pikkirhon ma aha na ikkon diulahon sahalak atlet lao marlatik. Contohna, adong ma sahalak atlet ski Prancis na margoar si Jean-Claude Killy na mandapot medali emas di Olimpiade. Didok ibana, “Sappulu taon sebelum pertandingan, nungnga ikkon tapikkirhon i jala marlatik ganup ari.” Godang do na ikkon diulahon ibana. Hape holan 10 menit do pertandingan i. Apalagi ma lao mananda Debata! Godang do na ikkon taulahon. Alana boi do on parohon hangoluan saleleng ni lelengna.

Boi do Torus Tapajonok Diritta tu Debata

Dang adong nanggo sahalak pe na lomo rohana putus asa. Jadi molo dang diboto hamu tujuan ni ngolumuna, jala naeng diboto hamu alus ni sukkun-sukkun na hea ro tu rohamuna, marsiajar Bibel ma hamu asa boi ditanda hamu Jahowa. Molo diulahon hamu i, gabe lam denggan ma ngolumuna saleleng ni lelengna.

Boasa ikkon torus hita marsiajar taringot Jahowa? Godang do halak naung manomba Ibana saleleng marpulu taon. Alai sai adong dope akka na baru na boi diparsiajari nasida taringot Jahowa na mambahen longang roha ni nasida. Molo taulahon on, gabe marlas ni roha do hita jala gabe lam jonok ma hubungatta tu Jahowa. Gabe setuju ma hita tu hata ni Apostel Paulus na mandok, “Bagas situtu do bisukna dohot parbinotoanna! Dang adong na boi mangattusi cara ni Ibana manguhumi, jala dang adong na boi takkas patorakkon akka ulaonna! Songon hata ni na tarsurat i, “Ise ma na mamboto pikkiran ni Jahowa? Ise ma na boi mangalehon poda tu Ibana?’”​—Rom 11:33, 34.

[Surat na di Toru]

[Kutipan]

Jotjot dope sukkun-sukkun roha ni akka halak, ‘Aha do tujuan ni ngolutta?’

[Kutipan]

“Dung lam takkas huboto sifat ni Jahowa, gabe lam jonok ma saonari hubunganku tu Ibana”

[Kutipan]

“Las do roha manomba Jahowa. On ma pilihan na dumenggan. Dang boi on dipatudos tu manang aha pe. Gabe martujuan ma ngolukku ala hutanda Jahowa”