“Ganup do Hita Ikkon Mampartanggung Jawabhon Parniulaotta”

“Alani i, ganup do hita ikkon mampartanggung jawabhon parniulaotta di jolo ni Debata.”—ROM 14:12.

1. Keputusan aha do na ikkon dipartanggung jawabhon tolu doli-doli halak Heber i?

ADONG tolu doli-doli halak Heber na tinggal di Babel. Ikkon dibahen nasida do sada keputusan na berpengaruh tu ngolu ni nasida. Olo do nasida marsomba tu sada patung na balga, songon peraturan di negara i? Manang ikkon barani do nasida menolak i jala gabe disappatton tu api na marnala-nala? Dang sanga si Sadrak, si Mesak, dohot si Abednego martukkar pikkiran taringot i tu na asing. Jala memang dang porlu nasida mangulahon i. Alana, barani do nasida mandok, “Porlu do botoonmu ale rajanami na so olo hami manomba akka debatami. Jala dang olo hami marsomba tu patung mas na binahenmi.” (Daniel 3:1-18) Martanggung jawab do nasida tu keputusan na dibahen nasida.

2. Ise do sebenarna na mambahen keputusan tu si Latus taringot Jesus Kristus? Boi do i mambahen ibana malua sian tanggung jawabna tu keputusan i?

² Onom abad dukkon i, adong ma sahalak gubernur na mambege tuduhan ni akka halak tu sada bawa. Dung dipareso ibana kasus ni bawa i, diboto ibana ma dang marsala hape bawa i. Alai dipangido akka halak do tu gubernur i asa dihukum bawa i. Mulana dang dioloi ibana pangidoan ni akka halak i. Alai ala torus akka halak i mangido i, gabe dang barani ibana bertanggung jawab lao mambahen keputusan jala gabe dioloi ibana ma pangidoan ni nasida. Dung i diccuci ibana ma tanganna jala didok, “Dang dohot au martanggung jawab di parmate ni bawa on.” Dipasahat ibana ma bawa i asa digantungkon tu sada hau. Dang bertanggung jawab ibana tu keputusan na dibahenna i jala dipasombu ibana do gabe halak na asing na mambahen keputusan di ibana. Na sadia pe godang ni aek lao manucci tanganna dang boi paluahon ibana sian tanggung jawabna, ala nungnga dihukum ibana halak na so marsala, i ma Jesus.—Mateus 27:11-26; Lukas 23:13-25.

3. Boasa dang denggan molo tapasombu halak na asing na mambahen keputusan di hita?

³ Boha molo hamu? Tikki ikkon mambahen keputusan, ditiru hamu do doli-doli halak Heber i? Manang dipasombu hamu do halak na asing mambahen keputusan di hamu? Memang dang mura mambahen keputusan. Ikkon manat do tapikkiri i asa boi tabahen keputusan na denggan. Misalna, ikkon dibahen natua-tua do keputusan na denggan tu gelleng ni nasida. Memang dang mura mambahen keputusan molo maol situasina, jala godang na ikkon dipertimbangkon. Nang pe songon i, dang ikkon dohot “akka na ditogu-togu tondi parbadia” lao mangurupi hita mambahen keputusan. (Galatia 6:1, 2) Alana ‘ganup do hita ikkon mampartanggung jawabhon keputusanta di jolo ni Debata’. (Rom 14:12) Bibel pe mandok, “Ganup do halak martanggung jawab tu na diulahon ibana.” (Galatia 6:5) Molo songon i, boha ma carana asa boi tabahen keputusan na denggan di ngolutta? Na parjolo, ikkon taakkui do godang na so boi taulahon. Jala ikkon tapikkirhon ma boha carana mangatasi i.

Kuncina

4. Sian na masa tu si Adam dohot si Hawa, aha ma na boi taparsiajari taringot mambahen keputusan?

⁴ Najolo dibahen si Adam dohot si Hawa do keputusan na so denggan. Dialo nasida do Debata jala diallang nasida parbue ni hau parbinotoan taringot tu na denggan dohot na roa. (1 Musa 2:16, 17) Boasa dang denggan keputusan na dibahen nasida? Bibel mandok, “Sai dipanotnoti borua i ma hau i. Massai denggan do diida ibana hau i, jala bagak do parbuena diida. Gabe diputikkon ibana ma parbue ni hau i jala dipangan. Tikki rap ibana dohot suamina dilehon ibana ma i muse tu suamina. Jala dipangan suamina ma parbue ni hau i.” (1 Musa 3:6) Tikki dibahen ibana keputusan i, holan dirina sandiri do na dipikkirhon ibana. Dung i, dohot ma suamina gabe songon i. Akibatna gabe rarat ma dosa dohot hamatean “tu sude jolma”. (Rom 5:12) Sian keputusan na dibahen si Adam dohot si Hawa, adong na boi taparsiajari taringot jolma. Molo dang diihutton jolma nasehat na sian Debata, pasti dang denggan keputusan na dibahen nasida.

5. Petunjuk aha do na dilehon Jahowa tu hita, jala aha do na ikkon taulahon asa bermanfaat i tu hita?

⁵ Las do rohatta ala dilehon Jahowa do petunjuk tu hita. Didok Bibel do, “Molo manirpang hamu tu kanan manang tu kiri, begeonmuna ma hata sian pudimuna na mandok, “On do dalan i. Ihutton ma i.” (Jesaya 30:21) Marhite Bibel do Jahowa makkatai tu hita. Jadi ikkon taparsiajari do Bibel jala talului ma parbinotoan na sittong sian i. Jala asa boi tabahen keputusan na denggan, ikkon taallang do “sipanganon na karas, sipanganon halak na magodang” i. Jala molo taulahon keputusanta i, gabe tarlatik ma hita lao “mamboto dia na sittong dohot na sala”. (Heber 5:14) Jala boi ma hita gabe tarlatik molo taterappon na taparsiajari sian Bibel.

6. Boha do carana asa boi hati nuranitta mangurupi hita mambahen keputusan na denggan?

⁶ Penting do hati nurani tikki mambahen keputusan. Alana boi do hati nuranitta manguhumi hita jala boi do i “manottuhon na sittong manang na sala” hita. (Rom 2:14, 15) Asa denggan hati nuranitta, ikkon talului do parbinotoan na sittong na sian Hata ni Debata, jala taulahon ma i. Alana molo dang talatik hati nuranita, gabe mura ma hita mangihutton hasomalan dohot adat istiadat. Jala boi do pendapat ni akka halak di lingkunganta mempengaruhi hita lao mambahen keputusan na sala. Aha ma akibatna molo sering hita mangalo aturan ni Debata? Ujungna boi do hati nuranitta i gabe songon na ‘ditutung’. Sarupa ma i songon ruas ni dagingta na hona “bosi na mohop” jala na gabe marhapal. Dang boi be i makkilala manang aha. (1 Timoteus 4:2) Alai molo tarlatik hati nuranitta mangihutton Hata ni Debata, gabe boi ma hati nuranitta i mangurupi hita mambahen keputusan na denggan.

7. Aha ma muse na porlu adong di hita asa boi mambahen keputusan na denggan?

⁷ Jadi asa boi hita mambahen keputusan na denggan, ikkon adong do parbinotoanta taringot Hata ni Debata, jala taulahon ma i. Tikki ikkon mambahen pilihan, unang ma pahatophu hita mambahen keputusan. Alai tabahen ma tikki lao mangalului akka prinsip ni Bibel jala taihutton ma i. Molo ikkon hatop pe hita mambahen keputusan songon si Sadrak, si Mesak, dohot si Abednego, pasti boi do hita mangulahon i molo nungnga adong parbinotoanta taringot Hata ni Debata jala nungnga tarlatik hati nuranitta. Jala molo lam togu do haporseaotta, pasti gabe lam mura do hita mambahen keputusan. Taida ma jo dua contohna.

Ise do na Gabe Donganta?

8, 9. (a) Akka prinsip na dia do na patuduhon ikkon manat hita mamillit dongan? (b) Akka aha ma muse na sarupa songon na mardongan tu halak na so hasea pangalahona?

⁸ Didok Apostel Paulus do, “Unang ma olo hamu dioto-otoi. Molo mardongan hamu tu halak na so denggan, sega do pangalahomuna na denggan i.” (1 Korint 15:33) Didok Jesus do muse tu akka siseanna, “Dang sian portibi on hamu.” (Johannes 15:19) Dung taboto prinsip i, pasti dang olo be hita mardongan tu akka halak na mangulahon seks na so patut, na mangalakkup, panakko, parmabuk, dohot na asing. (1 Korint 6:9, 10) Alai molo lam godang parbinotoanta taringot Hata ni Debata, gabe taboto ma sarupa na mardongan tu nasida do hita molo sering hita manonton akka halak sisongon i di televisi, di komputer, manang tajaha taringot nasida di bukku. Songon i ma tong molo mardongan hita tu akka “halak na munafik” sian Internet.—Psalmen 26:4.

⁹ Boi do hita mardongan tu akka halak na denggan pangalahona alai dang manomba Jahowa? Didok Bibel do, “Di bagasan huaso ni Sibolis do saluhut portibi on.” (1 Johannes 5:19) Nungnga taboto, dang holan akka halak na so denggan pangalahona na so boi tadongani. Jadi na marbisuk do hita molo kompak holan tu halak na manomba Jahowa.

10. Aha do na boi mangurupi hita mambahen keputusan taringot berurusan dohot akka halak di portibi on?

¹⁰ Dang disuru hita asa dang pajuppang manang dang makkatai tu akka halak di portibi on. (Johannes 17:15) Alana pasti pajuppang jala makkatai do hita dohot nasida tikki marbarita na uli, sikkola, manang tikki karejo. Jala molo dang sahaporseaon suami manang istri ni sahalak donganta, pasti ussering do ibana berurusan dohot pasanganna. Alai molo nungnga tarlatik hita mamboto dia na sittong dohot na sala, pasti taboto do molo tung pe pajuppang manang makkatai hita dohot akka halak di portibi on, dang berarti pittor kompak hita tu nasida. (Jakobus 4:4) Jadi ikkon tabahen do keputusan naeng dohot do hita tu kegiatan ekstrakurikuler di sikkola manang na dang, songon pertandingan olahraga dohot acara tarian. Jala naeng ro do hita tu pesta manang acara mangan-mangan na dibahen dongan sakarejotta manang na dang.

Mamillit Karejo

11. Aha do na parjolo ikkon tapikkirhon tikki naeng mambahen keputusan taringot mamillit karejo?

¹¹ Molo taihutton prinsip ni Bibel, boi ma tabahen keputusan na denggan taringot mamillit karejo asa boi hita mangurus anggota keluargatta. (1 Timoteus 5:8) Na parjolo, ikkon tapikkirhon do aha na diulahon di sada karejo. Unang ma tapillit karejo na mangulahon akka ulaon na so sadalan tu Hata ni Debata. Misalna karejo na adong hubunganna tu agama na so sittong, manakko, na berurusan tu darah, manang akka ulaon na asing na so sadalan tu Hata ni Debata. Jala dang olo hita margabus manang manipu, nang pe disuru majikan hita mangulahon i.—Ulaon ni Apostel 15:29; Pangungkapon 21:8.

12, 13. Aha ma muse na ikkon tapikkirhon tikki naeng mamillit sada karejo?

¹² Nang pe dang maralo tu Hata ni Debata sada karejo, adong dope na ikkon tapikkirhon. Misalna, alani karejotta i, gabe terlibat do hita tu akka ulaon na so sadalan tu Hata ni Debata, misalna mangangkat telepon di inganan parjujian? Porlu do tong tapikkirhon sian dia gajitta jala didia inganan karejotta i. Misalna molo adong halak Kristen na karejona kontraktor wiraswasta, olo do ibana mancet sada gareja, hape sarupa songon na mendukung agama na so sittong do i?—2 Korint 6:14-16.

¹³ Boha molo disuru majikanta hita padenggatton tempat ibadah ni agama na so sittong? Molo songon i situasina, porlu do tapikkirhon aha annon tugasta di proyek i. Boha molo karejotta mangalehon jasa na so maralo tu Hata ni Debata? Misalna manaruhon surat tu piga-piga inganan, termasuk tu tempat karejo na so sadalan tu Hata ni Debata? Porlu do taingot prinsip di Mateus 5:45 taringot on. Ikkon tapikkirhon do hati nuranitta molo karejo hita disi. (Heber 13:18) Jadi asa boi hita mambahen keputusan taringot mamillit karejo, ikkon manat do hita marpikkir jala ikkon talatik ma hati nuranitta.

“Di Saluhut Dalanmu Parrohahon ma Ibana”

14. Tikki naeng mambahen keputusan, akka aha ma na ikkon tapikkirhon?

¹⁴ Songon dia ma mambahen keputusan taringot naeng kuliah manang na dang? Manang naeng tajalo do sada perawatan medis manang na dang? Tikki naeng mambahen keputusan manang aha pe, ikkon talului do prinsip ni Bibel na adong hubunganna tusi. Jala berusaha ma hita mangihutton i. Didok Raja Salomo na marbisuk do, “Marhaposan tu Jahowa ma ho sian nasa roham, jala unang ma ho mangasahon pikkiranmu sandiri. Di saluhut dalanmu parrohahon ma Ibana, dung i bahenonna ma tigor akka dalanmu.”—Poda 3:5, 6.

15. Aha do na boi taparsiajari sian halak Kristen di abad na parjolo taringot mambahen keputusan?

¹⁵ Adong do pengaruh ni keputusan na tabahen tu halak na asing jala porlu do tapikkirhon i. Misalna di abad na parjolo, dang diorai be halak Kristen mangallang sipanganon na diorai di Patik ni si Musa. Nungnga boi be nasida mangallang i. Nang pe songon i, songon on ma na didok Apostel Paulus taringot sipanganon naung dipelehon tu akka patung, “Molo gabe tartuktuk do donganki dibahen sipanganon, dang allangokku be i asa unang tartuktuk ibana hubahen.” (1 Korint 8:11-13) Ikkon dipikkirhon halak Kristen di abad na parjolo do hati nurani ni donganna. Jadi unang ma sappe “tartuktuk” halak na asing alani keputusan na tabahen.—1 Korint 10:29, 32.

Mangido Bisuk sian Debata

16. Aha do manfaatna molo martangiang hita sebelum mambahen keputusan?

¹⁶ Porlu do tong hita martangiang sebelum mambahen keputusan. Didok si Jakobus do, “Molo adong sian hamu na hurang bisuk, toktong ma i dipangido tu Debata. Lehononna do i tu ibana jala dang pailaonna ibana. Ai burju do Debata mangalehon tu sude halak.” (Jakobus 1:5) Molo martangiang hita tu Jahowa mangido bisuk sebelum mambahen keputusan, pasti lehononna do i. Tapaboa ma arsak ni rohatta tu Debata jala taihutton ma prinsipna. Dung i boi ma tondi parbadia mangurupi hita mangattusi akka ayat na tajaha. Jala mangurupi hita asa mangingot akka ayat naung tajaha.

17. Boi do halak na asing mangurupi hita mambahen keputusan?

¹⁷ Boi do halak na asing mangurupi hita mambahen keputusan? Boi. Nungnga diparade Jahowa di huria akka halak na togu haporseaonna. (Epesus 4:11, 12) Boi do tasukkun pandangan ni nasida sebelum mambahen keputusan, tarlumobi tikki naeng mambahen keputusan na balga. Ala nungnga berpengalaman nasida jala togu haporseaonna, boi do nasida mangurupi hita mangida akka prinsip na asing. Jala boi do nasida mangurupi hita ‘mamboto dia na urrikkot’. (Pilippi 1:9, 10) Alai ingot ma, unang ma tapasombu gabe halak na asing mambahen keputusan di hita. Ikkon hita do na martanggung jawab mangulahon i.

Pasti Sai Denggan do Hasilna?

18. Molo denggan keputusan na tabahen, gabe boha do hasilna?

¹⁸ Molo nungnga taihutton prinsip ni Bibel tikki mambahen keputusan, jala nungnga manat i tapikkiri, pasti sai denggan do hasilna? I do. Pasti bermanfaat do i tu ari na naeng ro. Alai di mulana, olo do gabe susa hita alani keputusanta i. Misalna, diboto si Sadrak, si Mesak, dohot si Abednego do, boi do gabe mate nasida ala dang olo manomba patung na balga i. (Daniel 3:16-19) Songon i ma muse akka apostel di abad na parjolo. Dung dipaboa nasida tu Sanhedrin ni halak Jahudi na umbiar do nasida tu Debata sian tu jolma, gabe dilissingi do nasida sebelum dipalua. (Ulaon ni Apostel 5:27-29, 40) Asing ni i, boi do “akka na so diharappon di tikki na so panagaman” mambahen dang denggan hasil ni keputusanta i. (Parjamita 9:11) Jadi molo gabe susa hita nang pe nga tabahen keputusan na denggan, pos ma rohatta pasti diurupi Jahowa do hita manaon i. Jala pasti pasu-pasuonna do hita di ujungna.—2 Korint 4:7.

19. Boha do carana asa barani hita martanggung jawab lao mambahen keputusan na denggan?

¹⁹ Ikkon taihutton do prinsip ni Bibel tikki naeng mambahen keputusan. Mandok mauliate do hita ala diurupi Jahowa hita marhite tondi parbadiana. Jala diparade Ibana do akka dongan di huria na togu haporseaonna. Molo taihutton i sude, pasti boi do hita martanggung jawab lao mambahen keputusan na denggan.

Aha do na Diparsiajari Hamu?

• Aha do kuncina asa boi hita mambahen keputusan na denggan?

• Molo togu haporseaotta, aha do manfaat ni i tikki naeng mambahen keputusan hita taringot mamillit dongan?

• Akka aha do na porlu tapikkirhon tikki naeng mangalului karejo?

• Akka aha ma muse na boi mangurupi hita tikki naeng mambahen keputusan?

[Sukkun-Sukkun Parsiajaran]

[Gambar]

Adong do na boi taparsiajari sian na masa tu si Adam dohot si Hawa

[Gambar]

Sebelum mambahen keputusan na rikkot, lului ma prinsip ni Debata taringot i