Au tubu di sada huta di Roma. Godang do halak na pogos disi. Susa do ngolu disi. Dang hutanda ise omakku jala dang pola kompak au dohot bapa. Gabe gelandangan ma au.

Tikki marumur sappulu taon, nungnga huboto manakko. Jala tikki marumur 12 taon, lari ma au sian jabu. Jotjot do au dialap bapa sian kantor polisi. Ai jotjot do au marbada dohot akka halak. Sogo do rohakku mamereng sude halak. Tikki marumur 14 taon, lao ma au sian jabu. Marnarkoba ma au jala tinggal di dalan. Ala dang adong inganakku modom, husegai ma pintu ni mobil jala disi ma au modom. Monogotna i, hulului ma pancur lao marsuap.

Lam malo do au manakko​—mulai sian mancopet tas sampe mambongkar apartemen dohot villa di tikki borngin. Ditanda akka halak ma au halak na jahat. Dung i diajak ma au asa dohot gabe anggota geng ni pareman. Dung i gabe boi ma au mangarampok bank. Ala garang au, gabe dihabiari do au di geng i. Tu dia pe au lao sai huboan do pistol. Molo modom pe au hubahen do pistol di toru ni bantalhu. Nungnga huulahon be marbada, marnarkoba, manakko, mandok hata na so patut, dohot seks na so patut. Buronan do au. Jotjot do au kaluar masuk penjara.

Dung kaluar au sian penjara, lao ma au tu jabu ni tantekku. Dang huboto nungnga gabe Saksi Jahowa hape tantekki dohot akka gellengna. Diajak nasida ma au tu parpunguan. Ala penasaran, dohot ma au. Dung sahat di Bale Harajaon hundul ma au di jonok ni pintu masuk asa boi huida ise na masuk dohot kaluar. Jala huboan do pistolhu tikki i.

Mulai sian i muba ma ngolukku. Huingot dope tikki i, hira na di planet na asing do au huhilala. Burju do akka Saksi manjalang au. Senyum do nasida. Jala boi dope hubayakkon songon dia burju ni nasida tu au. Tarida do i sian bohi ni nasida. Beda hian do on sian akka halak na hujuppangi saleleng on!

Marsiajar Bibel ma au. Lam godang na huparsiajari lam muba ma au. Hona do tu rohakku hata na disurat di Poda 13:20: “Gabe marbisuk do manang ise na mardongan tu halak na marbisuk, alai gabe marjea do manang ise pe na mardongan tu halak na oto.” Huboto ma, ikkon hupadao do dirikku sian geng ni pareman i. Dang mura mangulahon on. Alai ala diurupi Jahowa do au, marhasil ma au.

Muba ma au. Marsitutu do au asa dang marisap be dohot marnarkoba. Hupangkas ma obukku, dang markurabu be au, jala dang olo be au mandok hata na so patut. Mulai sian on ma au paubahon pangalahokku.

Maol do au fokus marsiajar Bibel, alana dang pola lomo rohakku manjaha dohot marsiajar. Alai lam leleng, lam holong ma rohakku tu Jahowa. Muba ma rohakku. Mulai ma panggora ni rohakku pasingotton au. Alai olo do au marmetmet ni roha. Sukkun-sukkun do rohakku, ‘Tutu do naeng disesa Jahowa akka dosakku?’ Tarapul do rohakku tikki manjaha taringot Raja Daud. Olo do Jahowa manesa dosana na balga i.​—2 Samuel 11:​1–12:​13.

Asing ni i, borat do huhilala marbarita na uli sian jabu tu jabu. (Mateus 28:19, 20) Mabiar do au atik boha pajuppang dohot halak na hea hubalbali najolo i. Alai lam leleng, moru do biarhi. Gabe las do rohakku mangurupi akka halak mananda Bapakta na di surgo, Debata na sai rade manesa dosa.

Molo dang marsiajar Bibel hian, nga mate ra au! Ai godang do donganku najolo i mate manang dipenjara saonari. Alai au, tabo do ngolukku jala adong do janji na hupaima-ima. Marsiajar do au asa serep marroha, burju jala dang hatop-hatop muruk. Boi ma au denggan mardongan dohot akka halak na hutanda. Dung i pajuppang ma au dohot sahalak borua na bagak, i ma si Carmen. Menikah ma hami. Jala las do rohanami mangurupi akka halak marsiajar Bibel.

Saonari dang manakko be au. Sipata lao dope au tu bank, alai dang na lao manakko, lao paiasson bank i do!