An Pagmansay kan Bibliya

“Peligrosong mga Sports”—Dapat Mo Daw Purbaran?

“SA PANAHON TA NGUNYAN, PADAKUL NIN PADAKUL SATO AN HABO NANG MAGIN MIRON SANA IMBES MINALAMPAW NA MAN KITA SA MGA EROPLANO PARA MAG-PARACHUTE, MAG-RAPPEL SA MGA BUKID, MAG-KAYAK SA NAGRARAGASANG MGA BUSAY ASIN MAGLANGOY KAIBA NIN MGA PATING.”—AN SABI KAN DIYARYONG WILLOW GLEN RESIDENT.

MAHIHILING sa komentong iyan an nauuso ngunyan sa sports. An pagigin popular na marhay ngunyan kan mga aktibidad arog kan skydiving, ice climbing, paragliding, asin BASE jumping * nagpapahiling na gustong-gusto kan mga tawo na ibugtak an sadiri sa mga sitwasyon na puwedeng magsapeligro sa buhay ninda. May mga naggagamit man nin mga snowboard, mountain bike, skateboard, asin in-line skate para maaraman kun sagkod sain an kaya ninda paagi sa pagsakat sa tukadon na marhay na mga bukid saka sa halangkawon na mga ampas asin paglampaw hali sa haralangkaw na lugar. Arog kan sinabi kan magasin na Time, an marikas na nagigin popular na “peligrosong mga sports” (extreme sports)—mga kawat kun sain ibinubugtak kan mga partisipante sa dakulang peligro an sadiri ninda—nagpapahiling na gustong-gusto kan minilyon na tawo na ibugtak an sadiri ninda sa “simbolikong sagkudan, na diyan naghaharalo-halo an peligro, kakayahan, saka takot para mamati kan mga weekend warrior (mga parakawat sa kada katapusan kan semana) asin kan mga propesyonal na atleta na nalalampasan ninda an mga limitasyon ninda.”

Alagad, an pagigin popular kan mga sport na ini igwa man nin dakulang karibay. Padakul nin padakul an naiirido pag an mga sport na ligtas man kuta ginigibo nang extreme. Sa Estados Unidos kan 1997, naglangkaw nin labing 33 porsiyento an mga dinara sa emergency room na nairido sa pag-skateboard, 31 porsiyento sa pag-snowboard, asin 20 porsiyento sa pagsakat sa mga bukid. Mas grabe pa an resulta pag-abot sa ibang mga sport, arog kan hiling-hiling sa naglalangkaw na bilang kan mga nagagadan sa mga extreme sport. Aram man kan mga nagpapartisipar sa mga sport na ini an peligrong dara kaiyan. Sarong babayi na nagpapartisipar sa extreme na pag-ski an nagsabi: “Pirming nasa isip ko an kagadanan.” Sinabi man nin sarong propesyonal na snowboarder na kun “dai ka naaano, buot sabihon, dai mo ginigibo an pinakamakakaya mo.”

Nasa isip an mga impormasyon na ini, ano an dapat na magin pagmansay nin sarong Kristiyano sa pagpartisipar sa arog kaiyan na mga aktibidad? Paano kita tinatabangan kan Bibliya na magdesisyon kun baga dapat kitang makikabtang sa mga extreme sport? Makakatabang sato na masimbag an mga hapot na iyan kun pag-iisipan ta kun ano an pagmansay nin Diyos sa kabanalan nin buhay.

An Pagmansay nin Diyos sa Buhay

Sinasabi kan Bibliya na si Jehova “an burabod nin buhay.” (Salmo 36:9) Apuwera sa paglalang sato, inaataman niya man kitang marhay paagi sa pagtao sato kan mga kaipuhan ta para ikaugma an buhay. (Salmo 139:14; Gibo 14:16, 17; 17:24-28) Kaya rasonable sanang isipon na inaasahan niya na iingatan ta an may kabuutan niyang itinao sato. An mga tugon saka prinsipyo na itinao niya sa nasyon nin Israel makakatabang sato na masabutan an katotoohan na iyan.

Hinahagad kan Katugunan ni Moises na gumibo nin mga pag-iingat an saro para protektaran an buhay kan iba. Kun dai iyan ginibo asin may buhay na nawara, an saro na may magigibo kuta para malikayan an trahedyang iyan ibibilang na nagkasala sa dugo. Halimbawa, ipinagbuot sa sarong kagsadiri nin harong na lagan nin barandilya an palibot kan patag na bubungan kan bago niyang harong. Kun dai niya iyan gigibuhon, puwedeng magkasala sa dugo an saiyang pamilya kun may saro na mahulog hali sa bubungan asin magadan. (Deuteronomio 22:8) Kun an sarong torong baka dai inaasahan na suagon an sarong tawo tapos nagadan ini, dai papanimbagon an kagsadiri kan torong baka. Pero, kun midbid na peligroso an torong baka saka pinatanidan na man an kagsadiri alagad dai niya iyan binantayan nin tama tapos may sinuag iyan, ibibilang na nagkasala sa dugo an kagsadiri kan torong baka, asin puwede siyang gadanon. (Exodo 21:28, 29) Dahil mahalagang marhay ki Jehova an buhay, mahihiling sa saiyang Katugunan an dakulang pagpapahalaga sa pag-ingat saka pagprotektar sa buhay.

Nasabutan kan maimbod na mga lingkod nin Diyos na an mga prinsipyong ini aplikado man sa pagbugtak kan sadiri sa peligro. Sa sarong istorya sa Bibliya, sinabi ni David na gustong-gusto niyang makainom “nin tubig hali sa kalot na istakan nin tubig na yaon sa . . . Betlehem.” Nasa kontrol kaidto kan mga Filisteo an Betlehem. Kan madangog iyan kan tulo sa mga suldados ni David, pinirit nindang makalaog sa kampo kan mga Filisteo, tapos nagkua sinda nin tubig sa kalot na istakan nin tubig sa Betlehem, dangan dinara ninda iyan ki David. Ano an nagin reaksiyon ni David? Dai niya ininom an tubig, imbes, iinula niya iyan sa daga. Sinabi niya: “Dai ko nanggad ini magigibo huling may pagkatakot ako sa sakuyang Diyos! Iinumon ko daw an dugo kan mga lalaking ini na isinapeligro an saindang buhay? Huli ta isinapeligro ninda an saindang buhay para madara ini.” (1 Cronica 11:17-19) Para ki David, dai nanggad niya magigibo na isapeligro an buhay kan iba para sa personal na kagustuhan niya.

Kaagid man kaiyan an nagin reaksiyon ni Jesus kan, posibleng marhay na sa sarong bisyon, tinentaran siya kan Diyablo na lumampaw sa tore kan pader kan templo para mahiling kun poprotektaran siya kan mga anghel tanganing dai siya maano. Sinabi ni Jesus: “Dai mo pagpurbaran si Jehova na saimong Diyos.” (Mateo 4:5-7) Iyo, nasabutan ni David asin ni Jesus na sala sa paghiling nin Diyos na ibugtak an sadiri o an iba sa dai kinakaipuhan na peligro na puwedeng ikapahamak kan buhay nin tawo.

Nasa isip an mga halimbawang iyan, tibaad maihapot ta, ‘Paano ta masasabing extreme o peligroso an sarong sport? Dawa an normal na klase nin paglilibang, na bako man peligroso, puwedeng gibuhon na extreme, kaya paano ta maaaraman kun baga mapartisipar kita diyan o dai?’

Sulit Daw na Purbaran Iyan?

Makakatabang sato na masimbag iyan kun onesto tang eebalwaron an ano man na aktibidad na iniisip tang partisiparan. Halimbawa, puwede tang ihapot sa satong sadiri, ‘Gurano kadakul an naaaksidente sa sport na ini? Igwa daw ako kan pagsasanay o kagamitan na pamprotektar na kaipuhan para mayong maraot na mangyari sako? Ano an mangyayari sako kun mahulog ako o mapasala nin paglampaw o kun magpalyar an safety equipment ko? Sadit na aksidente lang daw iyan, o posibleng marhay na mairido ako nin grabe o magadan?’

An pagbugtak kan sadiri sa dai kinakaipuhan na peligro para makapaglibang puwedeng makaapektar sa mahalagang marhay na relasyon ki Jehova nin sarong tunay na Kristiyano pati man sa pagigin kuwalipikado niya sa espesyal na mga pribilehiyo sa kongregasyon. (1 Timoteo 3:2, 8-10; 4:12; Tito 2:6-8) Malinaw na dawa pag naglilibang, marahay na isip-isipon kan mga Kristiyano an pagmansay kan Kaglalang sa kabanalan nin buhay.

[Nota sa Ibaba]