Wan Kwestin

?Olsem wanem? ?Jisas i soem respek mo kaen fasin taem i tok long mama blong hem long kakae blong mared long Kena, no nogat?—Jon 2:4.

I no longtaem afta we Jisas i baptaes, hem mo ol disaepol blong hem oli go long wan kakae blong mared long Kena. Mama blong hem tu i stap. Taem waen i finis, Meri i talem long Jisas se: “Olgeta oli no moa gat waen nao.” Jisas i ansa long mama blong hem se: “Woman. ?From wanem yu yu putum samting ya long mi? [“?Mi mi gat wanem bisnes wetem yu?,” NW ] Taem blong mi i no kam yet ya.”—Jon 2:1-4.

Long taem blong yumi, sipos wan man i singaot mama blong hem se “woman” mo i talem long hem se, “?mi mi gat wanem bisnes wetem yu?” ating bambae yumi ting se hem i no gat respek nating mo hem i stap daonem mama blong hem. Be man we i tingting olsem, i no stap tingbaot kalja blong ol man long taem blong Jisas mo fasin blong olgeta blong toktok. Samting we bambae i givhan long yumi, i blong traem kasem save long kaen toktok ya we oli stap yusum long taem blong Baebol.

Long saed blong tok ya “woman,” buk ya Vine’s Expository Dictionary of Old and New Testament Words i talem se: “Taem oli talem tok ya long wan woman, hem i no wan tok blong stretem hem no blong tok strong long hem. Be hem i wan tok we oli yusum blong soem se oli laekem hem mo blong soem respek.” I gat sam narafala buk we oli agri wetem tingting ya. Buk ya The Anchor Bible i talem se: “Hemia i no wan tok blong stretem hem no blong tok nogud long hem, mo i no blong soem se Jisas i no laekem mama blong hem. . . . Jisas i yusum tok ya oltaem. Hem i wan tok blong soem respek we hem i yusum taem hem i toktok long ol woman.” The New International Dictionary of New Testament Theology i eksplenem se: “Jisas i yusum tok ya blong singaot mama blong hem, hemia nomo, i no gat wan narafala mining blong hem we i no soem respek.” Mo buk blong Gerhard Kittel, Theological Dictionary of the New Testament, i talem se fasin blong yusum tok ya ‘woman’ olsem, “i no blong tok nogud no blong daonem narafala.” Taswe, taem Jisas i singaot mama blong hem se “woman” yumi no mas ting se hem i stap tok nogud long mama blong hem mo i no kaen long hem.—Matiu 15:28; Luk 13:12; Jon 4:21, 19:26; 20:13, 15.

?Olsem wanem long tok ya, “?mi mi gat wanem bisnes wetem yu?” Hemia wan toktok we ol man Jiu oli yusum oltaem mo i stap plante taem lelebet long Baebol. Olsem nao, long 2 Samuel 16:10, Deved i toktok blong blokem Abisae blong i no kilim Simei i ded, hem i talem se: “!Yutufala i no gat bisnes long samting ya! [“?Ol pikinini blong Jeruia, mi mi gat wanem bisnes wetem yufala?,” NW ] ?Sipos hem i stap singaot trabol i kam long mi from we Hae God i bin talem long hem blong hem i mekem olsem, hu i gat raet blong blokem hem?” Bakegen, long 1 King 17:18 yumi ridim stori blong wan wido woman blong taon ya Jarefat we i faenemaot se boe blong hem i ded. Woman ya i talem long Elaeja se:” !Man blong God! ?From wanem yu mekem samting ya long mi? [“?Man blong trufala God, mi mi gat wanem bisnes wetem yu?,” NW ] ?Weswe? !Ating yu kam long ples ya blong talemaot ol sin blong mi long God, blong mekem pikinini blong mi i ded!”

Ol eksampol ya long Baebol oli soemaot se taem man i yusum toktok ya “?mi mi gat wanem bisnes wetem yu?” i no from we hem i gat flas tingting no from we hem i ting rabis long narafala. Be man i yusum blong soem se hem i no wantem joen long samting we narafala i wantem hem blong mekem, no blong soem se hem i gat wan tingting we i defren olgeta. ?Taswe, toktok we Jisas i talem long Meri i minim wanem?

Taem Meri i talem long Jisas se, “Olgeta oli no moa gat waen nao,” hem i no stap talem nomo long Jisas se waen i finis. Hem i wantem tu we Jisas i mekem wan samting blong stretem trabol ya. Jisas i yusum toktok ya blong ol man Jiu, blong soem se bambae hem i no mekem samting we Meri i wantem. Mo tu, toktok ya, “taem blong mi i no kam yet ya,” i givhan long yumi blong luksave from wanem hem i mekem olsem.

Stat long taem we Jisas i tekem baptaes mo tabu spirit i makemaot hem long 29 K.T., hem i savegud samting we Jeova i wantem hem blong mekem olsem Mesaea. Hemia se, bambae hem i mas stap tru long Jeova gogo kasem we hem i ded, i laef bakegen, mo Jeova i leftemap hem i go antap long heven. Jisas i talem se: “Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli go fri.” (Matiu 20:28) Taem ded blong Jisas i kam klosap, hem i soemaot samting ya i se: “Naoia, taem i kamtru finis.” (Jon 12:1, 23; 13:1) Taswe, long naet  bifo we hem i ded hem i prea, se: “Papa. Taem blong mi i kamtru finis. Mi mi Pikinini blong yu, mo mi wantem blong yu leftemap nem blong mi, blong mi mi save leftemap nem blong yu.” (Jon 17:1) Mo bakegen, taem ol man oli kam long Getsemane blong holem Jisas, hem i wekemap ol aposol blong hem we oli stap slip, i talem long olgeta se: “Taem i kam finis blong man ya i letem mi, mi Pikinini blong Man, mi go long han blong ol man nogud.”—Mak 14:41.

Long taem blong mared ya long Kena, Jisas i jes statem wok blong hem olsem Mesaea mo “taem” blong hem i no kam yet. Faswan samting long laef blong hem i blong mekem wanem we Papa blong hem i wantem, long stret rod mo long stret taem we Papa blong hem i talem. I no gat man i save blokem hem. Jisas i toktok stret blong soemaot samting ya long mama blong hem, be hem i tok wetem respek mo kaen fasin. Taswe Meri i no sem from toktok blong boe blong hem mo hem i no ting se Jisas i stap daonem hem. Defren olgeta, Meri i kasem save long mining blong tok blong Jisas nao hem i talem long ol man blong wok long mared ya, se: “Yufala i mas mekem olsem we hem i talem.” Jisas i lesin long mama blong hem, ale hem i mekem faswan merikel blong hem afta we hem i kam Mesaea—hem i tanem wota i kam gudfala waen. Long taem ya, Jisas i soemaot we hem i save skelemgud ol samting, from we hem i mekem samting we Papa blong hem i wantem mo long semtaem hem i tingbaot mama blong hem.—Jon 2:5-11.

[Tok blong pija long pej 31]

Jisas i gat kaen fasin taem hem i toktok long mama blong hem be hem i tok stret tu