“Evbagbẹn nọhuanrẹn hia keghi re ne Osanobua yẹrike.”—2 Timoti 3:16, New World Translation.

Ọ gha rhie ewanniẹn ye avbe inọta kpataki ni dekaẹn arrọọ.—Itan 2:1-5.

Ọ gha rhie adia nọ gia hẹnhẹn egbe yan ne ọmwa, nọ dekaẹn vbene a ya yin hẹ vbe ẹdẹgbegbe.—Psalm 119:105.

Ọ gha rhie ayayẹro ọghe ẹmwata ne ọmwa, nọ dekaẹn arrọọ vbe odaro.—Rom 15:4.

Ẹẹn, rhunmwuda emwi eha:

• Odẹ ne ẹmwẹ ni rre Baibol ya gua egbe ro keghi kpa ọmwa odin. Ọwara ukpo 1,600 ẹre a ya gbẹn e Baibol. Odẹ orhunmwu 40 ughughan ẹre a loo ro ya gbọẹn. Nibun vbuwe iran ma kue rẹn egbe hiehie. Ọrheyerriọ, te ẹmwẹ nọ rre Baibol, ke omuhẹn ya sẹ ufomwẹ wa ye gua egbe ro, vbene ọ na mwẹ uhunmwuta ọkpa!

• Okha ọghe ẹmwata. Avbe ọtokha ọghe emwa nagbọn wa rherhe gbe gue udemwẹ ọghe emwa iran. Nọ ya lughaẹn, emwa ni gbẹn e Baibol keghi ta ẹmwata vbekpae emwi ne iran gbẹnnẹ yotọ ni dekaẹn abakuru ọghe iran kevbe ọghe ivbi ẹvbo ọghe iran.—2 Krọnikol 36:15, 16; Psalm 51:1-4.

• Ẹmwẹ akhasẹ nọ mwẹ amusẹ. E Baibol keghi tae yotọ wẹẹ a gha guọghọ e Babilọn nẹdẹ rua. Ọ ghi rre odẹ ukpo 200 ne Baibol ta ẹmwẹ akhasẹ na, ọ na wa gele sunu vberriọ zẹẹ. (Aizaia 13:17-22) Ẹi re vbene Babilọn khian ya de hẹ ọkpa ẹre ọ giere, uhiẹn, ọ na vbe sunu ye eni ọmwa nọ khian khọn rẹn muotọ!—Aizaia 45:1-3.

  Avbe ẹmwẹ akhasẹ ọvbehe nibun ni rre Baibol wa mwẹ amusẹ zẹvbe na wa ya tae yotọ zẹẹ. Ẹi re erriọ khẹke ne Ẹmwẹ Ọghe Osanobua gele gha ye ra?—2 Pita 1:21.