Telebisyon—Maayo ba Kining Himoong Yaya sa Bata?

USAHAY, ang paglingaw sa imong mga anak pinaagi sa pagpatan-aw kanila sa telebisyon samtang nagaatiman ka sa imong mga buhatbuhaton sa balay tingali makapadani kaayo. Apan sa unsang paagi kini makaapektar sa imong mga anak?

“Bisan ang gagmayng mga bata maimpluwensiyahan sa emosyonal nga mga mensahe nga ginasibya sa telebisyon,” nagtaho ang The New York Times. Sa usa ka di pa dugayng pagtuon, ang mga bata nga usa pa ka tuig ang edad gipatan-aw ug mugbong mga salida diin ang usa ka artistang babaye nagpakitag lainlaing reaksiyon sa usa ka dulaan. “Sa dihang nahadlok ang artista sa maong dulaan,” matod pa sa Times, “ang mga bata dili na gustong modula niana ug morag nahadlok, nagkuwalismaot ang nawong, o mihilak. Sa dihang giganahan ang artista sa maong dulaan, ang mga bata mas ganahan usab nga modula niana.”

Dayag nga ang telebisyon makaapektar sa mga bata. Aduna ba kiniy layog-abot nga impluwensiya diha sa mga bata? Si Dr. Naoki Kataoka, propesor sa pediatrics sa Kawasaki Medical College sa Kurashiki, Japan, nakaobserbar ug daghang bata nga hilomon kaayo ug wala kaayoy reaksiyon sa ilang mga nawong. Silang tanan nakatan-aw ug TV o mga video sulod sa taastaas nga yugto sa panahon. Ang usa ka dos-anyos nga batang lalaki dili makaestorya sa mga tawo ug pipila ra ka pulong ang nahibaloan. Siya nagtan-aw ug mga video gikan sa buntag hangtod sa gabii kada adlaw sukad sa usa pa ka tuig ang iyang edad. Human lamang sunda sa iyang inahan ang tambag sa doktor nga ang bata dili na patan-awon ug mga video ug nga siya mismo nga inahan makig-uban kaniya nga ang bokabularyo sa bata anam-anam nga miuswag. Oo, ang mga ginikanan kinahanglang makigkomunikar ug makig-uban sa ilang mga anak.

Si Jehova nga Diyos, ang Tagmugna sa kahikayan sa pamilya, nagpasiugda sa labing maayong komunikasyon ug pagpakig-uban. Dugay na kanhi, giingnan niya ang iyang katawhan: “Isilsil mo kini sa imong anak ug magsulti ka mahitungod niini sa maglingkod ikaw sa imong balay ug sa maglakaw ikaw sa dalan ug sa imong paghigda ug sa imong pagbangon.” (Deuteronomio 6:7) Ang mga ginikanan, dili ang telebisyon, ang labing maayong makatudlo sa ilang mga anak pinaagi sa pulong ug buhat, “subay sa dalan” nga alang kanila.—Proverbio 22:6.