Ahendzi Adawurbɔfo Amandzɛɛbɔ

Onyaa Tsirmpɔw Bi Wɔ Asetsena Mu

JESUS kãa dɛ onyim no nguan. (John 10:14) Sɛ nyimpa bi wɔ akoma pa, ɔpɛ asomdwee na ɔdɔ tsenenee a, wɔbɔtwe dɛm nyimpa no akɛka Jesus n’ekyirdzifo no ho. Obi a ɔtse dɛm no benya tsirmpɔw wɔ asetsena mu, dɛ mbrɛ ɔbaa bi a ɔwɔ Belgium nyae no. N’asɛm nye yi:

“Aber a Jehovah Adasefo bɔbɔɔ m’abow mu no nna ndzɛmba ahyɛ mo do papaapa, na nna morodwen ho mpo dɛ muboku moho. M’enyi gyee dza Adasefo no kãe faa mbrɛ ɔhaw ahorow a ɔwɔ wiadze yi mu no efi hɔ no ho, naaso adwen a ɔnye dɛ Nyankopɔn na ɔbɔboa ma yeenya dɛm ɔhaw ahorow no n’ano edur no dze, nna m’enyi nngye ho. Nna megyaa asɔr kɔ mfe awɔtwe osiandɛ nna m’enyi nngye ndabraba a ɔkɔ do wɔ hɔ no ho koraa. Medze moho bɔɔ Adasefo no, mubohun nokwasɛm a ɔnye dɛ sɛ Nyankopɔn nnyi obi n’asetsena mu a, ɔbɛyɛ dzen dɛ dɛm nyimpa no n’asetsena besi no yie.

“Naaso awerɛhosɛm nye dɛ, wɔ Adasefo no hɔn nserahwɛ kakra ekyir no, manntse hɔn nka bio. Mo werɛ howee paa. Nna monom sigyarɛtse nkorkor bɛyɛ 40 (2 packs) da biara na mehyɛɛ ase dɛ moronom ndubɔn so. Nna mepɛ dɛ menye me nanabanyin a oewu no so kasa, ntsi mehyɛɛ ase dɛ miridzi esumansɛm. Iyi ntsi, nna esunsum bɔn ba mo do anafua aber a ɔaka manko no, na nna iyi ma mobɔ hũ! Iyi kɔr do abosoom dodow bi. Sɛ nna odur ewimbir na ɔka mankotsee a, nna m’akoma etu dei.

“Afei, da kor bi, mukotuu mpasar, naaso mammfa kwan a nna metaa fa do no do. Morokɔ no, muhun dɛ worisi dan bi. Anwanwasɛm nye dɛ, muhun nyimpa pii wɔ hɔ. Mebɛɛn hɔ no, muhun dɛ ɔyɛ Jehovah Adasefo na worisi hɔn Ahendzi Asa. Iyi maa mekae aber a Adasefo no bɛseraa me wɔ me fie no. Adwen a ɔbaa me tsir mu nye dɛ, sɛ nkyɛ nyimpa a wɔwɔ wiadze yi mu nyina yɛ hɔn adze tse dɛ dɛm nkorɔfo yi a, nkyɛ ɔbɛyɛ ahomka papaapa.

“Nna me yamu araa nkyɛ Adasefo no asan abɛsera me wɔ me fie bio, ntsi menye hɔn a nna wɔreyɛ dan no ho edwuma no bi kasae. Mobɔɔ Nyankopɔn mpaa, na dadu ekyir no, Ɔdasefo no a odzii kan baa me nkyɛn no sanee baa mo hɔ bio. Ɔkãa dɛ yɛntoa Bible adzesua no do, na medze enyigye peen do. Hɔ ara na ɔtoo nsa frɛɛ me dɛ membra asafo nhyiamu wɔ hɔn Ahendzi Asa do. Megyee too mu. Nna monnkɔr nhyiamu a ɔtse dɛm bi da! Nna medze ber tsentsen ahwehwɛ nkorɔfo a wɔdodɔ hɔnho na wɔwɔ enyigye so. Afei dze, nna mebehyia hɔn!

“Iyi ekyir no, mehyɛɛ ase kɔr nhyiamu a nna wɔyɛ no nyina bi. Adapɛn ebiasa ekyir no, migyaa sigyarɛtsenom. Motoow nwoma nye ndwom a esumansɛm wɔ mu ho cassette a mowɔ no gui, na muhun dɛ esunsum bɔn no rigyaa me haw. Mehyɛɛ ase dɛ medze Bible no mu akwankyerɛ reyɛ edwuma wɔ m’asetsena mu dɛ mbrɛ Jehovah hwehwɛ no. Wɔ abosoom ebiasa ekyir no, mehyɛɛ ase dɛ mereyɛ asɛmpakã edwuma no bi. Abosoom esia ekyir no, wonumaa me. Wonumaa me no, nda ebien ekyir na mehyɛɛ akwampaae boafo edwuma no ase.

“Meda Jehovah ase wɔ ndzɛmba pa a ɔayɛ ama me no nyina ho. Afei dze, menya tsirmpɔw bi wɔ m’asetsena mu. Ampa, Jehovah ne dzin yɛ aban dzendzen na guandɔbea na menya bambɔ wɔ ase. (Mbɛbusɛm 18:10) Metse nka dɛ ɔdwontofo no aber a ɔkyerɛɛw Ndwom 84:10: ‘Wo fie dakordzi ye sen nda apem [wɔ beebi fofor]. Mepɛ dɛ migyina me Nyankopɔn fi ano; sen dɛ mebɛtsena ndzebɔnyɛfo asesee mu.’”

Dɛm ɔbaa a ɔbrɛ noho adze yi nyaa tsirmpɔw wɔ n’asetsena mu. Dɛmara na obiara a ɔdze akoma pa hwehwɛ Jehovah no so benya.