Nsɛm A Akenkamfo Bisa

Aso Jehovah Adasefo gye ndzɛmba nketsenketse a wonya fi bɔgya mu no a?

Nyiano a odzi do yi fi asɛm a wɔakã wɔ Ɔweɔn-Aban, June 15, 2000 dze no mu.

Mbuae no ankasa nye dɛ Jehovah Adasefo nngye bɔgya. Yɛgye dzi paa dɛ obiara nnyi hokwan dɛ ɔyɛ nsesa wɔ Nyankopɔn mbra a ɔfa bɔgya ho no mu mbrɛ ɔbɛyɛ a ɔnye nsusui ahorow bi behyia. Naaso, nsɛm afofor sɔr osiandɛ ndɛ sɛ wɔdze bɔgya si hɔ a wotum yiyi ndzɛmba etsitsir anan bi wɔ mu. Ndzɛmba etsitsir anan yi so wotum kyekyɛ mu yiyi ndzɛmba nketsenketse ahorow bi so wɔ mu. Ansaana Christiannyi bi besi gyinae dɛ bi a ɔbɛgye dɛm bɔgya mu ndzɛmba nketsenketse ahorow yi bi no, ɔsɛ dɛ ɔyɛ pii kyɛn dɛ obosusu ho akɔ ekyir ehu mfaso na esian ahorow a obotum efi mu aba. Dza ɔsɛ dɛ ɔma ohia no paa nye dza Bible no kã fa bɔgya ho nye nkantando a ne gyinae no benya wɔ ɔno nye Adze Nyina Do Tumfo Nyankopɔn ntamu ebusuabɔ no do.

Nsɛntsitsir a ɔwɔ asɛm yi mu no nnyɛ dzen. Dza ɔbɔboa wo ma aatse asɛm yi ase no, susu Bible, abakɔsɛm, nye eduyɛ mu nsɛm bi ho.

Jehovah Nyankopɔn kãa kyerɛɛ Noah dɛ ombu bɔgya dɛ adze tsitsir. (Genesis 9:3, 4) Ekyir yi, mbra a Nyankopɔn dze maa Israelfo no kãa bɔgya a ɔyɛ krɔnkrɔn no ho asɛm dɛ: “Na nyimpa biara a ofi Israel ofi mu, anaa ofi ahɔho a wɔabɔsoɛ hɔn mu no mu a odzi bɔgya biara no; m’enyi bɛsa ɔkra no a odzi bɔgya no.” Nna Israelnyi biara a ɔbɔpow Nyankopɔn no mbra a ɔfa bɔgya ho no botum ama afofor ho egu fĩ; ntsi, Nyankopɔn dze kãa ho dɛ: “Metwa no efi ne man mu akyen.” (Leviticus 17:10) Ekyir yi, wɔ nhyiamu bi a wɔyɛ no wɔ Jerusalem no, asomafo no nye mpanyimfo hyɛɛ dɛ ɔsɛ dɛ yɛtwe hɛnho fi bɔgya ho. Dɛm a ebɛyɛ no ho hia tse dɛ wo ho a ebɔtwe efi nda mu ɔbrasɛɛ nye abosonsɔr ho.​—Asomafo Ndwuma 15:28, 29.

Dɛm aber no, nna obi no ho a ɔbɔtwe efi bɔgya ho no kyerɛ dɛn? Nna Christianfo no nndzi bɔgya biara, dɛ ɔyɛ fofor anaadɛ wɔada; na dɛmara so na wonndzi abowa a woenntwa ne men anaa wɔahyɛ no fõ. Adze fofor a nna ɔnnsɛ dɛ wodzi so nye edziban a wɔdze bɔgya ayɛ. Bɔgya a obi bedzi wɔ dɛm kwan ahorow yi do no tsia Nyankopɔn ne mbra.​—1 Samuel 14:32, 33.

Nna ɔrennhaw tsetsefo no mu pii dɛ wobedzi bɔgya, dɛ mbrɛ yetum hu wɔ Tertullian ne nkyerɛwee ahorow no mu no (mfeha a ɔtɔ do ebien na ebiasa H.B.). Aber a Tertullian rubua sombo a ɔnnyɛ nokwar a wɔdze bɔɔ Christianfo a ɔnye dɛ wodzi bɔgya no, ɔkãa mbusua bi a wɔdze bɔgya a wɔnomee yɛɛ ahyɛmu no ho asɛm. Ɔsan so kaa dɛ “sɛ nna agodzi bi rokɔ do wɔ agoprama kɛse bi do a, nna [binom] a wɔyɛ enyiberfo no twe hɔn a wodzi ɔkogu no bɔgya . . . dze sa etwa yarba.”

Nna dɛm ndzeyɛɛ no nntsen wɔ Christianfo no enyi do (sɛ Romefo binom yɛɛ dɛm dɛ wɔdze resa hɔnho yar mpo a) Tertullian kyerɛwee dɛ: “Yɛmmfa mbowa bɔgya mpo mmfora edziban a yedzi mu.” Romefo no dze edziban a bɔgya wɔ mu sɔɔ Christianfo no hɔn nokwardzi hwɛe. Tertullian san kãa dɛ: “Afei miribisa wo dɛ, sɛ egye dzi paa [dɛ Christianfo] dze suro bɔtwe hɔnho efi mbowa bɔgya ho a, ebɛnadze ntsi na ɔsɛ dɛ inya adwen dɛ hɔn kɔn bɔdɔ nyimpa bɔgya?”

Ndɛ nyimpa kakraabi pɛ na sɛ oduyɛfo bi kã dɛ wɔngye bɔgya a, wobosusu mbra a Adze Nyina Do Tumfo no ahyɛ afa bɔgya ho. Ekyingye biara nnyi ho dɛ Jehovah Adasefo so pɛ dɛ wɔtsena ase kyɛr, naaso woeesi hɔn bo dɛ wobedzi Nyankopɔn ne mbra do ber tsentsen a wɔtse ase. Naaso asɛm yi kyerɛ dɛn wɔ ndɛ eduyɛ mu?

Ofitsi Wiadze Kõ A Otsia Ebien n’ekyir no, bɔgya a wɔtwe ma nkorɔfo buu do, na Jehovah Adasefo hun dɛ iyi nye Nyankopɔn mbra bɔ ebira​—na ndɛ so yɛgye dzi dɛm. Mber rokɔ do no, ayarsa tum sesa. Ndɛ, bɔgya a wɔtwe ma nkorɔfo no mu dodowara nnyɛ dza bɔgya mu ndzɛmba nketsenketse no nyina wɔ mu, mbom no ɔyɛ bɔgya mu ndzɛmba etsitsir: (1) bɔgya mu nkwambowa kɔkɔɔ; (2) bɔgya mu nkwambowa fitaa; (3) bɔgya mu nkwambowa tɛtɛrba; (4) bɔgya mu nsu. Oduyɛfo bi botum egyina yarfo no ne tsebea ɔwɔ mu do akã dɛ wɔmma no bɔgya mu nkwambowa kɔkɔɔ, bɔgya mu nkwambowa fitaa, bɔgya mu nkwambowa tɛtɛrba anaa bɔgya mu nsu. Dɛm bɔgya mu ndzɛmba etsitsir anan a wotum yiyi dze ma obi no ma wotum kyekyɛ bɔgya kor mu ma ayarfo pii. Jehovah Adasefo gye dzi dɛ bɔgya a no mu ndzɛmba nyina wɔ mu anaa no mu ndzɛmba etsitsir anan no mu bi a wɔbɛgye no tõ Nyankopɔn mbra. Dza ohia tsitsir no, dza Bible kã fa bɔgya ho a wodzi do no bɔ hɔnho ban fi esian pii ho a yarba ahorow tse dɛ hepatitis nye AIDS a obi tum nya fi bɔgya mu no so ka ho.

Naaso, osiandɛ wotum yɛ bɔgya ho edwuma yiyi ndzɛmba pii fi mu dze ka ndzɛmba etsitsir anan no ho ntsi, nsɛmbisa ahorow bi soɛr wɔ bɔgya mu ndzɛmba nketsenketse a woyiyi fi ndzɛmba etsitsir anan no mu no ho. Ebɛn kwan do na wɔdze dɛm ndzɛmba nketsenketse yi dzi dwuma, na ebɛnadze na ɔsɛ dɛ Christiannyi susu ho aber a orisi gyinae afa biribi a ɔtse dɛm ho no?

Bɔgya mu ndzɛmba dɔɔ sõ. Bɔgya mu nsu​—ɔha mu nkyekyɛmu 90 yɛ nsu​—no kitsa nkwambowa mu ndur, nkyen, nsu a ɔma nyimpadua n’akwaa yɛ ndzɛmba ho edwuma ntsɛntsɛm a edziban ndur na esikyire so wɔ mu. Bɔgya mu nsu no kitsa ahoɔdzen ndur tse dɛ albumin nye ndzɛmba a ɔma bɔgya no tum da, nye nkwabowa a wɔkõ tsia nyarba ahorow. Hɔn a wɔforafora ndur mu no kyekyɛ bɔgya mu nsu no mu na wɔdze ahoɔdzen ndur a ɔwɔ bɔgya mu nsu no mu no pii dzi dwuma. Dɛ nhwɛdo no, wɔdze bɔgya mu ndur bi a ɔma bɔgya da a wɔfrɛ no factor VIII ma nkorɔfo a hɔn bɔgya nntum nnda a bɔgya taa tu hɔn no. Anaadɛ, sɛ yarba ahorow bi wɔ hɔ a, sɛ ɔka obi a oduyɛfo no botum akã dɛ wɔmfa bɔgya mu nsu a nkwambowa a ɔkõ tsia yarba wɔ mu no mma no. Wɔdze bɔgya mu nsu mu ahoɔdzen ndur fofor dzi dwuma wɔ eduyɛ mu, naaso dza yɛakã ho asɛm yi kyerɛ dɛ mbrɛ wobotum ayɛ bɔgya mu adze tsitsir (bɔgya mu nsu) ho edwuma eyiyi mu ndzɛmba akyekyɛ mu enya afã ahorow. *

Dɛ mbrɛ wotum nya ndzɛmba pii fi bɔgya mu nsu mu no, dɛmara so na wotum yɛ bɔgya mu ndzɛmba etsitsir anan no (bɔgya mu nkwambowa kɔkɔɔ, bɔgya mu nkwambowa fitaa, bɔgya mu nkwambowa tɛtɛrba) ho edwuma yiyi ndzɛmba nketsenketse fi mu. Dɛ nhwɛdo, wotum nya ahoɔdzen ndur a wɔdze sa yar a mbowabambowaba dze ba nye cancer. Wotum yɛ bɔgya mu nkwambowa tɛtɛrba ho edwuma nya edur a wɔdze kũ kur fi mu. Na wɔreyɛ ndur afofor a (annyɛ yie koraa no, ahyɛse no) wonya fi bɔgya mu ndzɛmba bi mu. Wɔmmfa bɔgya mu ndzɛmba etsitsir no bi mmfora dɛm ndur no mu; no mu ndzɛmba no bi na wɔtaa dze fora mu. Aso ɔwɔ dɛ Christiannyi gye bɔgya mu ndzɛmba yi wɔ eduyɛ mu? Yerunntum nnkyerɛ. Bible no mmfa ho nkyerɛkyerɛmu nnto gua, dɛm ntsi ɔwɔ dɛ Christiannyi biara fi nankasa ne tsibowa mu si ho gyinae wɔ Nyankopɔn enyim.

Binom wɔ hɔ a, wɔmmpɛ biribiara a ofi bɔgya mu (sɛ ɔyɛ bɔgya mu ndzɛmba nketsenketse koraa a ɔbɛma oenya nyimpadua mu ahoɔdzen ber tsiabaa mu mpo a, wɔmmpɛ). Dɛm na wɔtse Nyankopɔn n’ahyɛdze a ɔkã dɛ ‘yɛntwe hɛnho mfi bɔgya ho’ no ase. Wɔkyerɛ dɛ ne mbra a ɔdze maa Israelfo no hwehwɛ dɛ ‘wohue’ abowa no bɔgyaa “gu famu dɛ nsu.” (Deuteronomy 12:22-24) Ebɛnadze ntsi na iyi ho hia? Asɛm no nye dɛ, ansaana wɔbɛyɛ bɔgya mu nsu a nkwambowa a wɔkõ tsia nyarba wɔ mu no, bɔgya mu nsu a wɔdze yɛ edur a ɔma bɔgya da, nye dza ɔkeka ho no, ɔhwehwɛ dɛ wɔtwe bɔgya na wɔdze yɛ ho edwuma. Dɛm ntsi Christianfo binom pow ndur a ɔtsetse dɛm, dɛ mbrɛ wɔpow bɔgya a no mu ndzɛmba nyina wɔ mu anaa no mu ndzɛmba etsitsir anan a wɔdze ma no. Ɔsɛ dɛ yɛgye gyinae a wofi hɔn tsibowa mu esi no to mu.

Christianfo binom si gyinae a ɔyɛ soronko. Hɔn so wɔpow bɔgya a no mu ndzɛmba nyina wɔ mu, bɔgya mu nkwambowa kɔkɔɔ, bɔgya nkwambowa fitaa, bɔgya mu nkwambowa tɛtɛrba, anaa bɔgya mu nsu. Naaso wobotum ama kwan ma oduyɛfo dze ndzɛmba nketsenketse a woyi fi bɔgya mu ndzɛmba etsitsir no mu no aayɛ hɔn edur. Wɔ iyi mpo mu no, nsonsonee bi wɔ mu. Christiannyi bi botum agye bɔgya mu nsu a nkwambowa a wɔkõ tsia nyarba wɔ mu, naaso bi a ɔbɛpen anaa ɔremmpen ma wɔmmfa edur bi a bɔgya mu nkwambowa kɔkɔɔ anaa nkwambowa fitaa mu nsu wɔ mu nnwɔ no pandze. Naaso ne nyina mu no, ebɛnadze na ɔbɛma Christianfo binom akã dɛ wobotum agye bɔgya mu ndzɛmba nketsenketse no?

“Nsɛm A Akenkamfo Bisa” a ɔwɔ June 1, 1990 Ɔweɔn-Aban no mu no kãa dɛ, bɔgya mu nsu mu ahoɔdzen ndur (ndzɛmba nketsenketse) fi ɔpemfo no mu kɔ ne ba a ɔhyɛ ne yamu a ɔsor n’akwaa a bɔgya fa mu no mu. Ntsi maame no dze bɔgya mu nsu a wɔkõ tsia nyarba nyina ma ne ba, na ɔma onya nyimpadua mu ahoɔdzen a ɔkõ tsia nyarba no. Ansaana abofra a ɔhyɛ ne maame ne yamu no nankasa no bɔgyaa mu nkwambowa kɔkɔɔ bowie hɔn nda dzi na woewuwu no, nna wɔayɛ adze a ɔdze mframa kɔ nyimpadua mu no ho edwuma ewie. No mu fã kɛse dan apɔwapɔw nketsenketse, na ɔfa no mfunuma no mu kɔ ne maame ne nyimpadua mu, na ɔfora ne nyimpadua mu fĩ no mu ma oyi gu. Christianfo binom botum akã dɛ osiandɛ bɔgya mu ndzɛmba nketsenketse tum fi nyimpa kor mu kɔ nyimpa fofor mu dze nam awosu mu adzeyɛ yi do ntsi, wobotum agye bɔgya mu ndzɛmba nketsenketse a wonya fi bɔgya mu nsu anaa nkwambowa mu no.

Nokwasɛm nye dɛ nsusui nye gyinae ahorow a wofi tsibowa mu si no botum egu ahorow. Aso iyi ma dɛm asɛm no bɛyɛ dza no ho nnhia anaa? Oho. Ɔyɛ enyibersɛm. Naaso ɔyɛ asɛm a no mu da hɔ. Dza yɛakã ho asɛm wɔ etsifi hɔ no kyerɛ dɛ Jehovah Adasefo pow bɔgya a no mu ndzɛmba nyina wɔ mu nye no mu ndzɛmba etsitsir no. Bible no kã kyerɛ Christianfo dɛ ‘wɔntwe hɔnho mfi nam a wɔdze abɔ afɔr ama ehonyi, nye bɔgya, nye mbowa a wɔahyɛ hɔn fõ nye ndwamansɛm ho.’ (Asomafo Ndwuma 15:29) Iyi ekyir no, sɛ ɔba no mu ndzɛmba etsitsir no mu ndzɛmba nketsenketse biara ho dze a, ɔsɛ dɛ ber a Christiannyi biara dze mpaabɔ esusu ho yie ewie no, ofi ne tsibowa mu si nankasa ne gyinae.

Nyimpa pii bɛpen do dɛ wɔbɛgye eduyɛ biara a ɔtse dɛ dza ɔbɛma woenya ahotɔ ntsɛm ato mu a eduyɛ biara a wonyim mpo dɛ akwahosan ho esian wɔ mu a ndur a wɔdze bɔgya ayɛ ka ho. Christiannyi nokwafo bɔ mbɔdzen dɛ obohu ndzɛmba mu akɔ ekyir, na oeenya adwen a ɔfata a onngyina mfaso a obenya wɔ asetsena mu no nkotsee do. Jehovah Adasefo enyi sɔ mbɔdzen a wɔbɔ dɛ wɔbɛma woennya ayarsa a odzi mũ, na wosusu esian nye mfaso a ɔwɔ eduyɛ biara mu no hwɛ. Naaso sɛ ɔba ndur a wɔdze bɔgya ayɛ ho a, wosusu dza Nyankopɔn kã nye mbrɛ ɔfa wɔnye hɔn Nkwamafo no ntamu ebusuabɔ ho no ho yie.​—Ndwom 36:9.

Sɛ Christiannyi bi nya ahotodo a dwontofo no nyae no bi a, ɔbɛyɛ nhyira ama no. Dwontofo no kãa dɛ: “[Jehovah] Nyankopɔn yɛ ewia na kyɛm: [Jehovah] bɛma adom na enyimnyam: Ɔremmfa adze pa biara nnkam hɔn a wɔnantsew tɔɔtsenn. [Jehovah] . . . , nhyiranyi nye nyimpa a ɔtwer wo”!​—Ndwom 84:11, 12.

[Ase Hɔ Asɛm]

[Adakaba]

NSƐM A IBOTUM EBISA DƆKTA NO

Sɛ wɔrebɛyɛ wo oprehyɛn anaa eduyɛ bi a edur a wɔdze bɔgya yɛ ho asɛm botum epue mu a, bisa dɛ:

Aso adɔktafo na anɛɛsefo no nyina nyim dɛ, meyɛ Jehovah Adasefo no mu kor, na mehyɛ dɛ mma wɔmma me bɔgya (bɔgya a no mu ndzɛmba nyina wɔ mu, bɔgya mu nkwambowa kɔkɔɔ, bɔgya mu nkwambowa fitaa, bɔgya mu nkwambowa tɛtɛrba, anaa bɔgya mu nsu) aber a wɔresa me yarba no?

Sɛ bi a bɔgya mu nsu, bɔgya mu nkwambowa kɔkɔɔ, bɔgya mu nkwambowa tɛtɛrba, anaa fitaa na wɔdze yɛɛ edur a wɔdze bɛma wo no a, bisa dɛ:

Ana wɔdze bɔgya mu ndzɛmba etsitsir anan no mu kor yɛɛ edur no. Sɛ dɛm a, ana ebɛkyerɛkyerɛ ndzɛmba a wɔdze yɛe no mu?

Edur a wɔdze bɔgya yɛe dodow ahen na wɔdze bɛma me, na wobesi dɛn dze ama me?

Sɛ me tsibowa ma me kwan ma megye bɔgya mu ndzɛmba nketsenketse yi a, ebɛn eduyɛ mu esian na ɔwɔ mu?

Sɛ me tsibowa remma me kwan ma menngye bɔgya mu ndzɛmba nketsenketse yi a, ebɛn edur fofor na wobotum dze ama me?

Sɛ mususu asɛm yi ho kɔ ekyir wie a, ebɛn aber na membɛkã gyinae a mibesi no ho asɛm nkyerɛ wo?