TE RIBOOTI IBUKIA TAAN TATAEKINA TE TAUTAEKA N UEA

E Karekea te Kantaninga ae Tamaroa ni Maiuna

E TAEKINNA Iesu bwa e ataiia ana tiibu. (Ioane 10:14) Ngkana e raoiroi nanon te aomata ao e tangira te rau ao te raoiroi, e na bon anaaki nanona irouia taan rimwin Iesu. E na karekea te aomata anne te kantaninga ae tamaroa ni maiuna n aron te aine temanna i Belgium. Aio rongorongona:

“Ngke a karebwerebwe Ana Tia Kakoaua n au mataroa, ao I a bon rangi n rawawata ao n iangoia bwa N nang bakabureai. I kukurei n te baere a taekinna taani Kakoaua ni kaineti ma katokani kangaanga n te aonnaba ae bati iai te aoraki ma I aki kukurei ngke I ongo ae e irekereke naba iai te Atua. I katoka au taromauri wanua te ririki n nako bwa I ribaa noran te mwamwanaa te aba iai. Ma I noria irouia taani Kakoaua, koauan te baere a taekinna ao I a ataia ae ngaia e boni kangaanga te maiu ngkana akea te Atua i nanoni maium.

“Ma e kananokawaki, bwa imwin okiokirau irouia tabeua te tai, ao e a toki reitakiu ma ngaiia. I namakina te rawawata. I konaa ni mokona uoua te bakete n tebongina ao imwina I a manga drug. I a manga karaoa te tabunea bwa I kan reitaki ma tibuu ae e a tia ni mate. I rangi ni mamaaku ngkana tii ngai n te bong, bwa a niniai taimonio. E riki aei i nanon namwakaina aika bati. Ni katoa tairiki ao I a nanamakina te maroaa ngkana N na tiku tii ngai.

“Ma n te bong teuana I a nako n rianna, ao n toua kawaiu ae kaokoro ma are I tataneiai iai ao I a roko n te tabo ni kateitei teuana ae bubura. I mimi ngke I noriia aomata aika mwaiti ikanne. Ngke I a uakaan riki ao I a noria ae ngaia boni kaain Ana Tia Kakoaua Iehova aika katea te Tabo n Taromauri. I a uringa kawarau ni mwengau irouia taani Kakoaua, ao I iangoia ae e na rangi n tamaroa te aonnaba ni kabutaa ngkana titeboo aroia aomata ni kabane ma naakai.

“I rangi n tangiria bwa a na manga kawarai ni mwengau taani Kakoaua, ngaia are I a taetae nakoia tabeman ake a mwakuri n te tabo n taromauri. I tataro nakon te Atua, ao tebwina te bong imwina, ao e a tei i matan au mataroa te mwaane are I moani kaitiboo ma ngaia mai mwaina. E tuangai bwa ti na reitaanako te reirei n te Baibara ao I kariaia. N te tai naba anne ao e kaoai nakon te bobotaki n te Tabo n Taromauri ao I butimwaea ana kakao. I tuai man nonora aei mai mwaina! I a kamani kakaaeia aomata aika itangitangiri i marenaia ao ni kukurei i nanon te tai ae maan. Ao ngaia bon aikai raoi!

“Imwin anne ao I a kaakaei bobotaki ni kabane. Tenua te wiki imwina, ao I a kaaki te moko. I karenakoi au boki ibukini bwaini karawa ao au katangitang aika irekereke ma te tabunea ao I a namakinna bwa a a aikoa kona n niniai taimonio. I bita maiuu ni kaboraoia ma ana kaetieti Iehova aika n te Baibara ao tenua namwakaina imwina ao I a moana tataekinan te rongorongo ae raoiroi. Onoua namwakaina imwina ao I a bwabetitoaki. Uabong imwini bwabetitoau ao I a moana au bwaiania ae aki katoatai.

“I karabwaa Iehova ibukini baika raraoi ake e a tia ni karaoi ibukiu. I a karekea raoi te kantaninga ae tamaroa ni maiuu. Eng, aran Iehova bon te taua ae korakora ae I karekea iai kamanoau ao katanau. (Taeka N Rabakau 18:10) I namakina raoi are e namakinna te tia areru ngke e korea Taian Areru 84:10: ‘E raoiroi riki tebongina i nanon am katawanang nakon tenga n te tabo teuana! I rinea ae N na tei ni mataroan ana auti Atuau nakon ae N na mamaeka n aia umwanrianna akana buakaka’”

E karekea te kantaninga ae tamaroa ni maiuna te aine ae nimamannei aei. E kona naba n reke anne iroun ane ukoukora Iehova ma te nano ae raoiroi.