Jehova​—OMukuru ngwa pwa okutjiukwa

Hapo mape ya kutja u hepa otjiṋa otjinanḓengu mehupo? Indu tji u nondjiviro onḓiṱi ohunga na Mukuru, okutja tjiri u hepa otjiṋa ho. Omena raye? Mena rokutja ovandu ovengi va muna kutja, okutjiwa Mukuru watjiri ku ve etera ouwa mehupo nai nu nga aruhe.

Jehova Mukuru, ngu ri Omutjange wOmbeibela, u vanga kutja tu mu tjiwe. Omutjange wEpsalme wa tja: “Ve tjiue, kutja Ove erike, ngu nena indi Jehova;: ingui Uokombanda kombanda jehi arihe.” Eye u tjiwa kutja maku tu etere ouwa indu tji twe mu tjiwa nu wa tja: “OwAmi Muhona Ndjambi woye, ngu mbi vanga okukuhonga ihi tji tji ri ombatero kove.” Hapo ouwa waye mbu tu muna indu tji twa tjiwa Jehova Mukuru wokombandambanda?​—Epsalme 83:19, EEP; Jesaja 48:17.

Ouwa umwe mbu tu muna, okumuna ombatero komauzeu ngu tu muna, okukara nomaundjiro woruyaveze nokukara nohange momuinyo. Ku nao, okutjiwa Jehova nawa ku tu vatera okukara noumune warwe ohunga nomauzeu ovandu ngu ve muna ndino. Omauzeu ngo ooyeṋe?

Hapo ondando yoye yokuhupa oyaye?

Nandarire kutja ounongo woviungura wa takavara, ovandu ngamba ve pura omapuriro otja inga: ‘Ongwaye tji mbi ri kombanda yehi? Ouye mbwi wa hungama pi? Hapo ondando yokuhupa oyaye?’ Indu omundu tje hi nokumuna omaziriro nge ri wo, ehupo re kari kara nondando. Hapo ovandu ovengi ve kara nouzeu mbwo? Ongonḓononeno ndja tjitwa moGermany mozombura nḓa 1990 ya raisa kutja ovandu ovengi ve muna kutja ehupo kari nondando. Ngahino ovandu momaturiro woye ve noumune mbwo wina.

Tji u hi nondando mehupo, ko kara nomuhunga ku mo toorere ko omikambo. Ovandu ovengi ve kondja okusetika ondovi ndjo nomahongero wokombanda poo noutumbe. Posi yokutja, okurimuna ourike ku ve kongorera. Tji u hi nondando mehupo, ko kara nomuhunga nu ko vanga okuhupa. Otja kongoramambo ndji International Herald Tribune, otjiṋa ho otji tja tjitwa komukazendu umwe omutanda “ngwe kurira moutumbe.” Nangarire kutja we kurira monganda ndja ri noviṋa ovingi, eye ee rimunu ourike na munu kutja ehupo re kara ri nondando. Eye wa nwa ozopela zokurara nu we ku vazewa aa ṱu. Ngahino mo tjiwa varwe mbaave rimunu ourike nu mba ṱa momuano otja imbwo.

Hapo wa rora okuzuva ovandu amave tja, ounongo wovimemwa mau yenene okuturaera oviṋa avihe ohunga nehupo? Ongoramambo yOtjindoitji ndji pita otjivike atjihe indji Die Woche ya tja: “Nandarire kutja ounongo wovimemwa mape ya au hungire ouatjiri, owo kau tjiti kutja ovandu ve kare noupanga ouwa ku na Mukuru. Ounongo wovimemwa oukoto kau tu huhumiṋa nu kau tu pe ondjeverero.” Owo u kahurura omuano mbu kayenda po moviutwa ongondoroka na eṱe, mbu tjita kutja tu kare nomuinyo. Posi yokutja, ounongo wovimemwa kau yenene okuturaera kutja pe ya vi tu kare kombanda yehi nu ouye wa hungama pi? Indu tji twa ṱaṱere kounongo wovimemwa uriri, omapuriro wetu ohunga nondando yehupo kamaaye zirwa. Ku nao, ongoramambo ndji o-Süddeutsche Zeitung ya raisa kutja, “ovandu ovengi ve hepa okuraisirwa omuhunga.”

Mukuru ngu ri Omuute, nu ongu ma yenene okutupa omuhunga otja imbwo. Mena rokutja ongwa uta ovandu okuza kombutiro, eye ma tjiwa kutja ongwaye tji tu ri mba. Ombeibela i kahurura kutja Jehova wa uta ovandu ve urise ehi nokuritjevera. Ovandu aave sokuhorera ku Jehova mokuraisa ovikaṋena vye, tjimuna ousemba, ounongo norusuvero moviṋa avihe mbi mave tjiti. Indu tji twa zuu nawa kutja omena raye Jehova tje tu uta, tu zuva nawa kutja ongwaye tji tu ri mba.​—Genesis 1:26-28.

Ovikwaye mbi mo yenene okutjita?

Hapo tjike indu morukapitaveze tji u hi na wa muna omaziriro komapuriro nga: ‘Ongwaye tji mbi ri kombanda yehi? Ouye mbwi wa hungama pi? Hapo ondando yehupo oyaye?’ Ombeibela i ku rakiza kutja u tjiwe Jehova nawa. Ku nao, Jesus wa tja: “Nomuinyo waaruhe okwo ngwi okutja owo ve tjiwe Ove, ngu u ri Ndjambi watjiri, nokutja ve tjiwe Jesus Kristus ngu wa hinda.” Ove wina mo tunduuzwa okukurisa ovikaṋena tjimuna orusuvero nokukondja okuhupa kehi yOuhona wa Mukuru, mbu mau ye ku nanwa i Jesus otjOmbara. Ku nao, ove mo kara nondando mehupo nomaundjiro omawa woruyaveze. Nu omapuriro nga ye ku kendisa, mape ya aye zirwa.​—Johanes 17:3; Omuzuvarise 12:13.

Hapo omaziriro komapuriro ngo, maye ku ṱunu pu pe ṱa pi? Hans wa ri umwe wovarumendu mba ṱunwe i omaziriro ngo. * Ozombura nḓa kapita ongamburiro ye mu Mukuru kaya ri nomasa nu kai eta ondanaukiro mehupo re. Hans wa suverere ovipurukise novakazendu ovakorondu, aa tjiti ozondjito ozombi nokukavira outopatopa. Eye wa tja: “Ehupo kaari ndji tjatere nu kaari hee otjiṋa.” Tja ri notjiwondo ape tjozombura 25, Hans wa toora omukambo wokutjiwa Mukuru na utu okulesa Ombeibela ye nawa. Tja uta okutjiwa Jehova nawa nokuzuva kutja ondando yehupo oyaye, wa tjita omarundurukiro mehupo re nu wa papitisiwa otja umwe wOvahongonone va Jehova. Eye wa rira omuzuvarise woruveze aruhe oure wozombura omurongo nḓa kapita. Eye wa tja: “Okukarera Jehova otjiṋa otjiwa tji u hi na mosasaneke na tjarwe, nu kwe ndji pa ondando mehupo.”

Otjiperi kutja ondando yehupo katjiṋa atjiyerike tji tji kendisa ovandu ovengi. Otja ozongaro mouye tji maze yende amaze rire ozombi, ovandu ovengi mouye ve uta okurikenda notjiṋa tjarwe.

Omena raye otjiṋa ho tji tja tjitwa?

Indu oumba tji wa tjitwa, omundu ngwa muna oumba potuingi u pura epuriro ndi: Omena raye otjiṋa ho tji tja tjitwa? Eziriro kepuriro ndo, ondi tjita kutja omundu ma yenene okutjinda ouzeu mbwa munu. Ndoovazu omundu ngwa munu ouzeu ka munine eziriro ekahuke, u kara nombameno momuinyo. Ngatu tare kotjihorera tja Bruni.

Bruni wa tja: “Ozombura nḓa kapita mba zepaisa okanatje kandje okakazona. Ami ee kambura mu Mukuru, ku nao mba kapaha omahuhumiṋino okuza komupristeri. Eye we ndji raera kutja Mukuru wa toora Susanne okutwara keyuru, okukarira omuengeli. Ami mba hahizire oviṋa avihe mehupo randje nu mba tondere Mukuru mena rokutja wa toora okanatje kandje.” Bruni wa kara nomuhihamwatima mbwo oure wozombura ozengi. “Nu umwe wOvahongonone va Jehova we ndji raisira okuza mOmbeibela kutja kape nepu ndi mari tjiti kutja mbi tonde Mukuru. Jehova ka toorere Susanne okutwara keyuru neye kamuengeli. Mena rokutja kaari ohomonena, opa zokuvera. Susanne wa rara meyendo nu undja kutja Jehova me mu pendure. Ami wina mbe rihonga kutja Jehova wa uta ovandu kutja ve hupe nga aruhe, moparadisa kombanda yehi nu ihi matji tjitwa moruyaveze rwopopezu. Tji mba uta okutjiwa kutja Jehova omundu ngu ri vi, mba tumbuka popezu na ye nomuhihamo wandje wa uta okuwa pehi.”​—Epsalme 37:29; Oviungura 24:15; Ovaroma 5:12.

Ovandu ovengi va ṱunwa i yomauzeu momuano umwe poo omukwao tjimuna ouzeu wawo oveni, ovita, ondjara poo omaumba tjimuna omanyinganingiro wehi. Bruni wa pupurukwa momuinyo indu tje rihonga kutja Jehova kangwa sokupewa ondjo komauzeu ayehe ngu tu muna, mena rokutja kaari nondando ye kutja ovandu ve mune omauzeu nu moruveze rwatjimanga ma kaisa po omauzeu ayehe ngu tu muna. Ouvi mbu ryamena ko komurungu mbwi otjiraisiro tjokutja tu hupa “momayuva omasenina” wouye mbwi. Ouye oupe mbu tu zera u ri popezu.​—2 Timoteus 3:1-5; Mateus 24:7, 8.

Okuuta okutjiwa Mukuru

Hans na Bruni aave kambura mu Mukuru, posi yokutja kava ri nondjiviro onyingi ohunga na ye. Indu tji va kondja okumutjiwa nawa, ongondjero yawo kaari omungandjo. Owo va muna omaziriro nge ri wo komapuriro omananḓengu ngu tu kara na wo ndino. Iho tje ve pa ohange momuinyo nomaundjiro omawa woruyaveze. Iho tja tjitwa kovakarere va Jehova ovingi.

Okukonḓonona Ombeibela ku tu vatera okutjiwa Jehova na imbi mbye undjira ko ku eṱe. Ovandu tjiva meserewondo etenga va tjita nao. Lukas wa tja ovakambure mombongo ya Berea, “owo iyave puratene kembo raNdjambi nonḓero onene, nu pevapa reyuva iyave konḓonona Omatjangwa okutjiwa kutja imbi Paulus mbi ma hungire ovyo ouatjiri poo indee.”​—Oviungura 17:10, 11.

Ovakriste veserewondo etenga wina aave woronganene mozombongo. (Oviungura 2:​41, 42, 46; 1 Ovakorinte 1:1, 2; Ovagalate 1:​1, 2; 2 Ovatesalonika 1:1) Iho tji tjitwa ndino wina. Ozombongarero zOvahongonone va Jehova ze vatera ovandu okutumbuka popezu na Jehova nokumukarera nondjoroka. Okukara pu nOvahongonone va Jehova, maku ku etere ouwa warwe wina. Mena rokutja ovandu kouṱiṱiṱiṱi ve uta okusana ku Mukuru ngu ve rikotamena ko, Ovahongonone va Jehova ve raisa ovikaṋena tjimuna ovye. Ku nao, okuworongana pu nOvahongonone va Jehova, maku ku vatere okutjiwa Jehova nawa.​—Ovaheberi 10:24, 25.

Hapo iho matji munika tjimuna ongondjero onḓeu okutjiwa Omundu umwe uriri? Otjiperi kutja pe hepa ongondjero. Hapo ko hepa okutjita ongondjero tji mo vanga otjiṋa kaaṋi ho? Ripura nongondjero omunyande womanyando ndje tjita, tji me rikuturise orutu. Otjotjihorera, Jean-Claude Killy wa France ngwa taara ongoldo momanyando wokupepera wo-Olympic nge isanewa kutja o-ski wa tja nai ohunga nokurira omunyanda omuwa: “Ove mo sokuuta ozombura omurongo komurungu woruveze, ngunda otjitjitwa ho aatji hi ya uta nu u sokuripura na tjo eyuva arihe . . . Ove u sokuripurira ko nu u sokuungurira ko eyuva arihe oure wombura.” Oruveze nongondjero aihe ndjo, ondji hepwa okukara notjirarakaneno motjikara tjozominute omurongo uriri. Ongondjero ndji matu tjiti okutjiwa Jehova kamungandjo.

Oupanga mbu kurira ko

Ouṋe ngu ha vanga okukara norupa motjiṋa otjinanḓengu mehupo? Ke po. Indu tji wa munu kutja ehupo roye kari nondando, poo tji mo vanga okutjiwa kutja ongwaye omauzeu tji ye tu wira, kondja nomasa okutjiwa Jehova, Mukuru watjiri. Indu tji we mu tjiwa, ehupo roye mari runduruka okurira ewa nga aruhe.

Hapo mape ya atu isa okurihonga ohunga na Jehova? Imba mbe mu karera oure wozombura ozengi, ve tjaterwa i imbi mbi ve rihonga ohunga na ye oure wozombura ozengi, na imbi mbi ve rihonga nai. Okurihonga oviṋa otja imbyo, ku tu pa ondjoroka nu ku tjita kutja tu tumbuke popezu na ye. Ngatu zemburuke omambo womuapostele Paulus, indu tja tja: “Ounene woviari vyaNdjambi, tjiri, ouhasanekwa! Ounongo nondjiviro yaNdjambi, tjiri ovihavazewa! Owaṋi ngu ma sora okuteza ozombanguriro ze? Owaṋi ngu tjiwa ouripura waMuhona? Owaṋi ngu ma yenene okumupa ozondunge?’ ”​—Ovaroma 11:33, 34.

[Omambo wokehi]

 [Omambo omananḓengu pomukuma 5]

Ovandu ngamba ve pura omapuriro otja inga: ‘Ongwaye tji mbi ri kombanda yehi? Ouye mbwi wa hungama pi? Hapo ondando yokuhupa oyaye?’

 [Omambo omananḓengu pomukuma 6]

“Tji mba uta okutjiwa kutja eye omundu ngu ri vi, mba tumbuka popezu na ye”

 [Omambo omananḓengu pomukuma 7]

“Okukarera Jehova otjiṋa otjiwa tji u hi na mosasaneke na tjarwe,nu kwe ndji pa ondando mehupo”