Ị kpam nwa ẹ-ẹga ọkpọọ nya epweji nya Montreal. Ụka kam ri ọya ịrwọnyẹ, adam gbu, pehi ụkụrwọ nya ugbiyegu wuu ju ịnam ụbwọ. Am à ri ọnyị ohyẹẹkpẹ ẹ-ẹpwụ nya anyị ineku ịlẹ kị ma lẹ.

Jaabwọ kam wẹẹ nwa, ọhịhị nyam wuu kpụnịrọ eteji ịnyịịngịrị omile-mile, ẹchị nya okpoko ọdada, abwẹga ọhọhọ, bala o-ju ogu bala aleyi. Ụka kam gu ẹka iwo, m̀ dọmwụ nyọka myị ẹrụ ha alakpara bala angị kaa ya okpoko kpịla angịnyị nyọka ye apyobwuna bwu ẹga nyaa. M̀ kaa me ọnọọkịla ụka lụmẹ-lụmẹ bala ọ-kaa kpụm ịpyọ nyọka họ ang angịnyị ri. Ọọwa lala utoji omile-mile ham.

Ụka kam gu ẹka iwo kụrụ ine wẹẹ, m̀ jẹ́ ijẹẹhị yẹẹyẹẹ ọlẹ kam kaa kpa nu angịnyị ang lẹ. M̀ kaa ra ụka ọchị ụbwọ, ang idoomyi, bala ịmape i-pwuru ịnyà, ọọwa lẹ m kaa haa ị kaa me okpoko ịgọm le, m ya ha angịnyị ra lẹlẹ. Ang ọlẹ ḿ ka họ ḿ ka ye okpoko ahyaahị à kaa hám lẹ. Ụka ọhẹ, m ye okpoko lala $10,000 ẹ-ẹpwụ nya ahyẹẹnụ ookpokpo!

Ụka kam gu ẹka 15, ị kum bwu ube-ụpwụ ọlẹ kam ji, lẹ m̀ kaa nune ụ-ụgbẹyị, ẹga ká angịnyị kaa mwịịnyọ bala ẹpwa nya aligu nyam.

Chajị nya ang ịtịpyọ ịlẹ kam kaa họ, angị chị ugbọhụ kaa wụrụm ka ta ịtọ ẹla. Nyọlẹ kọ tị ri ang nya oyi ḿ kaa kpa ra ka lẹ, ị yam du ka agba ẹnẹnẹhẹ lẹ ka. Ma, m̀ kaa nwụ okpoko ọtụka-ọtụka chajị nya ang ọlẹ kam wẹẹ họ. Chajị nyọle kam kaa ju uhihi nya ọngọngọhẹ ka lẹ, m̀ dọmwụ kaa dụbwọ ye okpoko ha ogu nya angị kaa ya okpoko kpịla angịnyị nyọka ye ọhaju ọtụka-ọtụka. Ọọwa tị tịpyọ lụmẹ, chajị ụka ọhẹ m̀ kaa kpa ọkọnị. I-iwe-ahụrụ ịhyẹ, m̀ kaa họ ụkụrwọ bala ebwo nya aleyi.

M̀ tọ Alibeenu nya iJihova họhẹ-họhẹ ụka kam gu ẹka 17. M̀ ji bala oligu nyam ọnyang ụka ọlẹ kọ dọmwụ jẹ́ ịBayịbụụ bala Alibeenu nya iJihova. Ma, ẹla ọlẹ ká ịBayịbụụ ya u-uhye nya abwọlẹ áhị ka hịhị á hám ka, lẹ m̀ rụ hi oligu nyam ọọwa ka ẹga nya oligu nyam ọnyang ọkịla.

Ang dọmwụ nyọka yẹda ọ-ọhịhị nyam ụka ká oligu nyam ọnyang oheeye domwụ nyọka jẹ́ ịBayịbụụ bala Alibeenu nya iJihova. Ọ ya ọhịhị nyamwụ da, ọ kpụm ịpyọ yẹẹyẹẹ jaabwọ kọ wẹ ka ri ọngọ la dụmwọ bala ọ-kaa dọhụ pịlẹẹ. M̀ ye ọwụrụ-wụrụ nya Alibeenu nya iJihova myị nyọka ká ọjịra-jịra nyaa. Ị dam ọwụraba yẹẹyẹẹ, ị ri angịnyị ịnyịịla bala ọ-la dụmwọ. Ị datị gbaggbang hi alodehe. Ụka kam ri onjwo, alugbiyegu nyam á kaa mẹ ọháha jẹm bala ọ-kpam dụmwọ ka. Ọháha ọlẹ ká Alibeenu nya iJihova mẹjẹ ẹ-ẹga nyam à ri ang ọlẹ kam baba kpangga lẹ. Ụka kị ya ẹla nya ịBayịbụụ ọjẹ́jẹ balam, m̀ ye myị la abwiye-abwiye

Ang ọlẹ kam wẹẹ jẹ́ bwu ịBayịbụụ à chị ọhịhị nyam da pyii lẹ. M̀ wẹẹ nwụlanọ nyọka ka oloyi ọhẹ bala angịkịla nyam chajị kam ka jẹ́-ẹ nwụ uri nya okpokpo ọlẹ kam kpa ẹ-ẹga ọ-da ẹchị nya okpokpo lala $50,000. Ma m̀ ji Ohe obe lụmẹ nyọlẹ kam baa kaka. Angịkịla nyam ka oloyi ọọwa. Ị wu ọngọhẹ nyaa, ị nwụ ọngịkịla.

Jaabwọ kam wẹẹ kịnyaa la ịBayịbụụ ọjẹ́jẹ, m̀ wẹ ka yẹ ẹga ịlẹ kam baba nyọka yẹda ẹ-ẹpwụ nya ọhịhị nyam. Ọ-chụ pwokwita, m̀ jẹ́ ẹla ọlẹ ká ịBayịbụụ ya ụ-ụpwụ nya 1 Ala ịKọrịntị 6:10: “Angị ri aleyi wuu lee angị ri alimajẹ wuu lee angị ri angị nwa ere juwa ya wuu lee angị ri angị juwa do angịnyị ido wuu lee angị ri alagbụrụ wuu lẹ aalẹ, ị́ ka jẹ́-ẹ ri ugu nya ịpyị Adịrahụ nya Ohe Oluhye myị́ kpong-kpong kaka.” Ụka kam wa ọgba ọwẹ, m̀ dọmwụ nyọka jida chajị nyọlẹ kam wẹ ka jẹ́ ang ịtịpyọ lụmẹ-lụmẹ ịlẹ kam họ. M̀ wẹ ka yẹ nyori m̀ baba nyọka ya ọhịhị nyam da gbanggbang.(Ala iRom 12:2) M̀ ri ọlabwẹga, ọlagbama, ọhịhị nyam wuu kpụnịrọ ọnọọkịla omeme.

Ịnyịnyị, m̀ wẹ ka jẹ́ bwu ịBayịbụụ nyori iJihova ri ọlahyẹẹrwẹrwa bala ọ-kaa hịnyọhi. (Ayịsaya 1:18) M̀ raabwọ yẹẹyẹẹ bịlẹ iJihova nyọka dam ụbwọ tụụbwọ hi abwẹla inyogo nyam. Bwula ụbwọ ọdada nya iJihova, m̀ jẹ́ pẹhi abwẹla ịtịpyọ nyam dụmwọ-dụmwọ. Ẹta-ẹdịyẹ ọkpọngchị ọhẹ ọlẹ kam hu ri ọ-ka ye ahụ nyam ọlam-ọlam ụ-ụgbẹyị ọlẹ ká ehile myọnụ ju.

Ụka ọọwa, m̀ gu ẹka 24 bala o-ye ahụ ma anyị ịta lẹ. Lẹẹlẹẹ m baba nyọka mwahị nya ụkụrwọ ọlam-ọlam. Ma ḿ ka ube-upwu gbuu bala ọ-la ọngọlẹ ọ́ ka dam ụbwọ ye ụkụrwọ ka. Myịmyị, m̀ raabwọ yẹẹyẹẹ bịlẹ iJihova. Ọọwa lẹ m mwahị nya ụkụrwọ lẹlẹ. M̀ byi alegbeju ịlẹ kam tịtọ nya ụkụrwọ ka ẹga nyaa nyori m̀ tịtọ nyọka yẹ ọhịhị nyam da bala ọ-họ ụkụrwọ ọlam-ọlam. Ụka ọhẹ, m̀ kaa wụlẹ ya jaa nyori m̀ wẹẹ jẹ́ ịBayịbụụ bala ọ-tịtọ nyọka ri ọngịnyị ọnyịịla. Iru nyaa pwa nyọka yem nya ụkụrwọ. Ụka ohyẹẹkpẹ, m ye ang ịtịpyọ ịlẹ kam họ wuu je ọlẹng ọhẹ, ọọwa lẹ o byim yẹkẹẹ: “Ḿ jẹ́ ang odudu koo, ma ọkịlẹtụ byim nyori am nyị yeng nya ụkụrwọ.” M̀ jẹ́ nyori ọwẹwẹ nya abwọ orịrị nyam à wẹ lẹ. Nyọlẹ kọ nọ chẹẹ, am bala ahụm hu enyi Ohe nya angịhyẹ nya Alibeenu nya iJihova.

M̀ jam la ọhịhị alẹ chajị nyori m̀ kpa ẹla ịmẹjẹ ịlẹpwụ nya ịBayịbụụ họ ụkụrwọ ịnyị. M̀ la ugbiyegu ọnyịịla. Ịnyịnyị, ọ-jẹ́ myị̀myị̀ nyori iJihova hịnyọhi ham lẹ, du kam la irya oleje ocheri-cheri.

M̀ kaa kpa ọhịhị nyam wuu họ ụkụrwọ ha Ohe, da angịkịla ụbwọ nyọka jẹ́ ẹla ká ịBayịbụụ mẹjẹ lala ẹka 14 kẹkpẹ lẹ. Kpangje, ahụm yẹjulam nyọka kpa ọhịhị nyamwụ wuu họ ụkụrwọ ha Ohe ịnyịnyị. Gụ ẹka 30 kẹkpẹ, m̀ jẹ́ da alụkụrwọ nyam angịnyị 22 ụbwọ wẹ ka jẹ́ iJihova. M̀ kaa ka ẹga ọ-kpa ihi ra wẹẹ, ma ḿ kaa kele nyọka họ angịnyị ri kaka. Lẹẹlẹẹ m̀ kaa kele nyọka ya ẹla nya Ohe je alụwa. M̀ tịtọ nyọka ya ang haa: ẹhị ọrịrịị-rịrị nya odehe onyeewe, ụka ọngọngọhẹ ka họ awụlẹ ri kaka.—Eje Ọnyịịla 37:10, 11.