Pamodi ki un mudjer debe obi ku se maridu?
Pamodi ki un mudjer debe obi ku se maridu?
‘Kabésa di mudjer é ómi’. — 1 CORÍNTIOS 11:3.
1, 2. (a) Kuzê ki apóstlu Polu skrebe sobri kel prinsípiu di autoridadi ki Jeová da? (b) Ki perguntas ki nu ta ben responde na kel studu li?
JEOVÁ ki da kel órdi ki apóstlu Polu pâpia di el kantu el skrebe ma ‘kabésa di tudu ómi é Kristu’ i ‘kabésa di Kristu é Deus.’ (1 Cor. 11:3) Sima nu odja na kel otu artigu, Jizus ta atxaba ma éra un priviléjiu i un alegria obi ku se Kabésa, Jeová Deus, i tanbê ma kabésa di ómi na kongregason é Jizus Kristu. Jizus ta trataba algen ku bondadi, ku karinhu, el ta mostraba konpaxon i el ta preokupaba ku interesi di otus algen. Kes ómi na kongregason debe faze mésmu kuza ku otus algen, prinsipalmenti pa ses mudjer.
2 Má i mudjer? Ken ki é ses kabésa? Apóstlu Polu skrebe ma ‘kabésa di mudjer é ómi’. Má modi ki mudjer debe nkara kes palavra li di apóstlu Polu? Kel prinsípiu li tanbê ta aplika sikrê maridu é ka Tistimunha di Jeová? Má obi ku maridu, ki é kabésa, krê fla ma mudjer ta fika kaladu i ma el ka ta da ninhun opinion óras ki es ta toma un disizon na família? Modi ki mudjer pode ganha ruspetu di se maridu?
‘N ta faze-l un ajudanti’
3, 4. Pamodi ki ten un xéfi di família na kazamentu é bon?
3 É Jeová ki disidi kenha ki ta sérba kabésa di família. Dipôs ki Jeová kria Adon, el fla: ‘É ka bon pa ómi kontinua el sô. N ta faze-l un ajudanti, pa konpleta-l.’ Dipôs ki Eva kriadu, Adon fika txeu kontenti pamodi el tinha un ajudanti i kunpanhera i pur isu el fla: ‘Kel-li é osu di nhas osu i karni di nha karni.’ (Gén. 2:18-24) Adon ku Eva tinha xansi di ser pai ku mai di un família di algen perfeitu li na Téra i es ta viveba pa tudu ténpu na un paraízu.
4 Pamodi nos primeru pai ku mai ka obi ku Deus, es perde xansi di vive pa tudu ténpu na Jardin di Éden. (Lé Romanos 5:12.) Má Deus kontinua ta dexa ómi ser kabésa di mudjer. Óras ki maridu ta kunpri se papel dretu i mudjer ta obi ku se maridu, kel-li ta traze bons rezultadu i filisidadi na kazamentu. Es ta ten kel mésmu alegria ki Jizus ta xinti pamodi el ta obi ku se kabésa, Jeová. Antis di Jizus ben Téra, el ‘ta staba sénpri kontenti na frenti [di Jeová].’ (Pro. 8:30) Dja ki nos é inperfeitu, ka ten ninhun ómi ki ta konsigi ser un kabésa perfeitu i ninhun mudjer ki ta konsigi obi ku maridu di manera perfeitu. Óras ki maridu ku mudjer ta sforsa pa faze ses midjór pa es kunpri ses papel na kazamentu, es ta ser filís sikrê es é inperfeitu.
5. Pamodi ki un kazal debe obi ku kel konsedju ki sta na Romanos 12:10?
5 Pa un kazal ser filís, es meste sigi kel konsedju di Bíblia li: ‘Ku kel amor sima di irmon, nhos ten amizadi fórti pa kunpanheru. Nhos ser primeru na da ónra pa kunpanheru.’ (Rom. 12:10) Tanbê, maridu ku mudjer meste sforsa txeu pa ‘trata kunpanheru ku bondadi, pa mostra konpaxon di korason i pa púrdua kunpanheru sénpri’. — Efé. 4:32.
Óras ki un maridu ô mudjer ka ta sirbi Jeová
6, 7. Kal ki ta ser rezultadu si un mudjer ta obi ku se maridu ki ka ta sirbi Jeová?
6 I si bu maridu ô bu mudjer ka ta sirbi Jeová? Txeu bês é maridu ki ka ta sirbi Jeová. Na kel kazu li, modi ki se mudjer debe trata-l? Bíblia ta fla: ‘Abo, mudjer, obi ku bu maridu, asi, si el ka seta palavra, el ta ganhadu sen palavra, através di konportamentu di se mudjer, pamodi el odja ku se odju bu konportamentu puru djuntu ku ruspetu di korason.’ — 1 Ped. 3:1, 2.
7 Palavra di Deus ta fla ma mudjer debe obi ku maridu sikrê el é ka Tistimunha di Jeová. Se bon konportamentu pode poi se maridu ta pensa pamodi ki el sta konporta si. I pamodi kel-li, maridu pode kumesa ta kria interesi pa kuzas ki se mudjer ta kridita na el i ti el pode seta verdadi.
8, 9. Si un maridu ka muda pamodi bons kualidadi di se mudjer, kuzê ki kel mudjer pode faze?
8 Má, i si un maridu ki é ka Tistimunha di Jeová ka muda? Bíblia ta insentiva mudjer pa mostra kes bon kualidadi na tudu momentu, sikrê alvês pode ser difísil. Pur izénplu, na 1 Coríntios 13:4 nu ta lé: ‘Amor ten paxénxa’. Un mudjer ki ta sirbi Deus ta faze dretu óras ki el ta kontinua ta konporta ‘ku tudu umildadi i brandura, ku paxénxa,’ i ta suporta kel situason ku amor. (Efé. 4:2) Ku ajuda di spritu santu di Deus nu ta konsigi mostra kes kualidadi ki ta agrada Jeová sikrê na situason difísil.
9 Apóstlu Polu skrebe: ‘Pa tudu kuza N ten forsa pamodi kel ki ta da-m puder.’ (Fil. 4:13) Spritu santu di Deus ta djuda maridu ku mudjer ki ta sirbi Deus faze txeu kuza ki di otu manera es ka ta konsigiba. Pur izénplu, si bu maridu ô bu mudjer trata-u mariadu bu pode xinti gana di faze mésmu kuza. Má, Bíblia ta da kel konsedju li pa tudu kenha ki ta krê sirbi Deus: ‘Ka nhos paga ningen mal ku mal. Pamodi sta skrebedu: “Vingansa é di meu; mi ki ta diskonta, é Jeová ki fla.”’ (Rom. 12:17-19) Tanbê, 1 Tessalonicenses 5:15 ta da kel konsedju li: ‘Nhos toma kuidadu pa ningen ka paga mal ku mal, má nhos sforsa sénpri pa ben di kunpanheru i di tudu algen.’ Ku ajuda di spritu santu di Jeová nu ta konsigi faze kuzas ki si éra sô di nos pa nos nu ka ta konsigi fazeba. Pur isu, é inportanti nu ora pa spritu santu di Deus da-nu kel ki nu meste!
10. Modi ki Jizus lida ku kes kuza mariadu ki pesoas fla i faze-l?
10 Jizus da un bon izénplu di kuzê ki nu debe faze óras ki algen fla-nu ô faze-nu algun kuza mariadu. 1 Pedro 2:23 ta fla: ‘Kantu es ta insultaba el, el ka ta insultaba tanbê. Kantu el staba ta sufri, el ka ta amiasaba, má el ta ntregaba se kabésa na mô di Kel ki ta julga ku justisa.’ Nu ta insentivadu pa nu imita se izénplu. Ka nu dexa mau konportamentu di otus algen prujudika-nu. Tudu kes ki ta sirbi Deus debe obi ku kel konsedju li: ‘Nhos ten konpaxon i umildadi. Ka nhos paga mal ku mal, nen insultu ku insultu.’ — 1 Ped. 3:8, 9.
Mudjer pode da ses opinion?
11. Mudjeris ki ta sirbi Deus ta faze párti di ki priviléjiu inportanti?
11 Obi ku maridu ki é kabésa krê fla ma mudjer ta fika kaladu i ma el ka ta da ninhun opinion na kazamentu, na asuntus ki ten aver ku família ô na kalker otu asuntu? Klaru ki nau. Jeová ta da txeu priviléjiu ka sô pa ómi má tanbê pa mudjer. É basta nu pensa na kel grandi priviléjiu ki kes 144 mil ten di ser rei i saserdóti ku Jizus na Séu, óras ki el ben governa Téra! Kel nunbru li tanbê ta inklui mudjeris. (Gál. 3:26-29) Nton, Jeová ta da mudjeris ónra óras ki el ta da-s trabadju inportanti pa es faze.
12, 13. Da un izénplu ki ta mostra ma mudjeris ta profetizaba.
12 Pur izénplu, na ténpu ki Bíblia skrebedu, mudjeris ta profetizaba. Joel 2:28, 29 ta fla: ‘N ta ben baza nha spritu riba tudu tipu di algen, i nhos fidjus matxu ku fémia ta ben profetiza. . . . I ti riba di nhas skravu ku nhas skrava N ta ben baza nha spritu na kes dia.’
13 Di kes 120 disiplu di Jizus ki staba na un sala na Jiruzalen na Pentikósti di anu 33, staba ómis ku mudjeris. Spritu di Deus baza riba di tudu es. Pur isu, Pedru podia pâpia di profesia di Joel i aplika-l tantu pa kes ómi i pa kes mudjer. Pedru skrebe: ‘É kel-li ki fladu através di proféta Juel: “I na ténpu di fin,” Deus fla, “N ta ben baza nha spritu riba di tudu tipu di algen, i nhos fidju matxu ku fidju-fémia ta ben profetiza. . . ; na kel ténpu, N ta ben baza nha spritu ti na nhas skravu i nhas skrava, i es ta ben profetiza.”’ — Atos 2:16-18.
14. Ki trabadju ki kes mudjer na ténpu di apóstlu sforsa pa faze?
14 Na ténpu di apóstlu, mudjeris ta pregaba notísias sábi di Reinu di Deus i tanbê es djuda di otus manera. (Luc. 8:1-3) Pur izénplu, apóstlu Polu fla ma Febe ‘ta sirbiba na kel kongregason ki ta fikaba na Senkrea’. Kantu Polu manda mantenha pa se kolégas di trabadju, el pâpia di txeu mudjer fiel, sima ‘Trifena ku Trifoza, ki éra mudjeris ki ta trabadjaba duru na Sinhor.’ Tanbê el pâpia di ‘Pérsidi, ki es kreba txeu, pamodi el ta trabadjaba duru na Sinhor.’ — Rom. 16:1, 12.
15. Ki kuza inportanti mudjeris di nos ténpu sta ta faze?
15 Na nos ténpu, maioria di kes más di 7 milhon di algen ki ta prega notísias sábi di Reinu di Deus na mundu interu é mudjeris di tudu idadi. (Mat. 24:14) Txeu di es ta trabadja pa ténpu interu, es é misionáriu ô es ta faze párti di família di Betel. Salmista Davidi kanta: ‘É Jeová ki ta da órdi; mudjeris ki ta pâpia di notísias sábi é un grandi izérsitu.’ (Sal. 68:11) Kes palavra li é verdadi. Jeová ta da valor pa kuzê ki mudjeris ta faze pa prega notísias sábi i pa faze se vontadi. Kel órdi ki ta fla ma mudjeris ki ta sirbi Deus debe obi ku ses maridu, di sertéza ka krê fla ma es ten ki obi i fika kaladu.
Dôs mudjer ki ka fika kaladu
16, 17. Modi ki izénplu di Sara ta mostra ma mudjeris ka debe fika kaladu na kazamentu?
16 Si Jeová ta da mudjeris txeu priviléjiu, nton maridus ka debe pâpia ku ses mudjer antis di es toma kalker disizon inportanti? Si es faze si, es ta mostra ma es ten sabedoria. Bíblia ta pâpia di alguns mudjer ki pâpia ô aji sikrê ses maridu ka pidi-s opinion. Nu ben odja dôs izénplu.
17 Sara, ki éra mudjer di Abraon, kontinua ta fla-l pa el manda Agar ku se fidju pa es bai ses kaminhu pamodi es mostra falta di ruspetu pa se fidju. ‘Má Abraon fika txeu kasábi’. Má Deus ka fika. Jeová fla Abraon: ‘Ka bu fika tristi ku kuzê ki Sara fla di kel rapás i di bu skrava. Obi kuzê ki el fla-u’. (Gén. 21:8-12) Abraon obi ku Jeová i el faze kuzê ki Sara pidi-l.
18. Ki disizon Abigail toma?
18 Pensa tanbê na Abigail, mudjer di Nabal. Kantu Davidi staba ta fuji di kel rei siumentu, Saul, el pasa algun ténpu pértu di ribanhus di Nabal. Envês di el panha algun kuza di kel ómi riku li, Davidi ku se ómis proteje se propriadadi. Má Nabal ‘éra brutu i el tinha mau konportamentu’, i el ‘insulta’ kes ómi di Davidi. El éra un ‘ómi ki ka ta sirbiba’ i ki ‘ka tinha juís.’ Davidi ku se ómis pidi-l kumida. Nbóra es pidi-l ku edukason, Nabal ka da-s. Modi ki Abigail reaji kantu el da kónta di kuzê ki kontise? Sen fla Nabal nada, el bai faxi i el ‘panha 200 pon, dôs jaru grandi di vinhu, sinku ovelha ki dja staba priparadu, sinku seá di gran toradu, 100 tórta di pasa i 200 tórta di figu séku’ i el da Davidi ku se ómis. Kuzê ki Abigail faze éra dretu? Bíblia ta fla: ‘Jeová fri Nabal i el móre’. I dipôs di un ténpu, Davidi kaza ku Abigail. — 1 Sam. 25:3, 14-19, 23-25, 38-42.
‘Un mudjer ki ta papiadu ben di el’
19, 20. Kuzê ki ta poi un mudjer ta merese ilojiu di verdadi?
19 Bíblia ta ilojia mudjer ki ta faze kuzas di manera di Jeová. Livru di Provérbios ta ilojia ‘un mudjer kapás’. El ta fla: ‘Se valor é mutu más txeu di ki koral. Se maridu ta kunfia na el di korason, i el ka ten falta di nada ki ten valor. El ta rekonpensa-l ku bondadi, ka ku maldadi, pa tudu dia di se vida.’ Tanbê el ta fla: ‘El ta abri se bóka ku sabedoria; Lei di bondadi sta na se língua. El ta kontrola kes trabadju na se kaza, i el ka ta kume pon di prigisa. Se fidjus ta labanta i ta ilojia-l; se maridu ta labanta i el ta ilojia-l tanbê.’ — Pro. 31:10-12, 26-28.
20 Kuzê ki ta poi un mudjer ta merese ilojiu di verdadi? Provérbios 31:30 ta fla: ‘Aparénsia pode ngana i bunitéza dipôs pode kaba. Má mudjer ki ta ruspeta Jeová ta papiadu ben di el.’ Un mudjer ki ta ruspeta Jeová ta ntende ma é inportanti ruspeta kel ki Jeová da responsabilidadi pa ser xéfi di família. ‘Kabésa di mudjer é ómi,’ sima ‘kabésa di tudu ómi é Kristu,’ i ‘kabésa di Kristu é Deus.’ — 1 Cor. 11:3.
Mostra gratidon pa prezenti di Deus
21, 22. (a) Ki motivu kes ki é kazadu ten pa agradese Deus pa kel prezenti di kazamentu? (b) Pamodi ki nu debe mostra ruspetu pa kes ki ten autoridadi? (Odja kuadru na pájina 17.)
21 Kes ki sta kazadu ten txeu motivu pa mostra ses gratidon pa Deus. Es pode ten un vida filís djuntu. Es pode agradese Deus pa ses kazamentu inda más txeu pamodi el ta da-s xansi di sta unidu i uza ses vida pa sirbi Jeová. (Rute 1:9; Miq. 6:8) Jeová, ki faze kazamentu, sabe tudu kel ki un kazal meste pa es ser filís. Pur isu, nhos faze kuzas sénpri di manera di Jeová i ‘alegria ki ta ben di Jeová ta ser nhos fortaléza’, sikrê na es mundu xeiu di prubléma. — Nee. 8:10.
22 Un maridu ki ta sirbi Deus i ki ta ama se mudjer sima el ta ama se kabésa, ta kuida i ta mostra amor pa se família. Un mudjer ki é fiel pa Deus ta merese ilojiu pamodi el ta apoia se maridu i el ta ruspeta-l di korason. I más inportanti inda, ses kazamentu ta da ónra pa Jeová.
Bu ta lenbra?
• Kal ki é kel prinsípiu di autoridadi ki Jeová da?
• Pamodi ki un kazal debe da ónra pa kunpanheru?
• Modi ki un mudjer ki ta sirbi Deus debe trata se maridu ki é ka Tistimunha di Jeová?
• Pamodi ki un maridu debe pidi opinion di se mudjer antis di el toma un disizon inportanti?
[Perguntas di studu]
[Kuadru]
Pamodi ki nu debe mostra ruspetu pa kes ki ten autoridadi?
Jeová disidi kenha ki debe ten autoridadi i modi ki es debe uza-l. I kel-li ta djuda ka sô kes anju má ómis tanbê. Di kel manera li ta da-s xansi di uza ses liberdadi di skodje pa sirbi Deus ku pas i union i da-L ónra. — Sal. 133:1.
Kristons skodjedu ku spritu santu ta rekonhese ma Jizus é kabésa di kongregason i es ta ruspeta se autoridadi. (Efé. 1:22, 23) Pamodi Jizus ta ruspeta autoridadi di Jeová, ta ben txiga ténpu ki ‘própi Fidju tanbê ta poi se kabésa dibaxu di Kel ki poi tudu kuza dibaxu di el, asi pa Deus ser tudu kuza pa tudu algen.’ (1 Cor. 15:27, 28) Tanbê, tudu kes ki ta sirbi Jeová, debe mostra ruspetu pa kes ki Deus da autoridadi na família i na kongregason! (1 Cor. 11:3; Heb. 13:17) Si nu faze si, nu ta resebe bensons i aprovason di Jeová. — Isa. 48:17.
[Dizenhu]
Orason pode djuda un mudjer mostra kualidadis ki ta agrada Deus
[Dizenhus]
Jeová ta da valor pa kuzê ki mudjeris ta faze pa apoia interesis di Reinu