• ANU KI EL NASE: 1963

• PAÍS KI EL NASE: INGLATÉRA

• SE VIDA NA PASADU: TINHA UN BON TRABADJU

MODI KI ÉRA NHA VIDA ANTIS:

N nase na Croydon, na sul di Londris, ami é kel sestu fidju di kes 9 fidju di nha pai ku nha mai. Nha pai ku nha mai éra di San Visenti, un ilha di Karibi. Nha mai ta baba pa un igreja Metodista. Nbóra N gostaba di studa i prende kuzas novu, N ka tinha ninhun interesi na prende kuzas sobri Deus. N ta kustuma pasaba féria di skóla bera di un lagu ki ta fikaba pértu di nha kaza, ta lé txeu livru ki N ta npristaba na bibliotéka.

Alguns anu dipôs ki N tirmina skóla, N disidi ma N kria djudaba kes algen ki mesteba di ajuda. N kumesa ta djuda kes algen ki ta mora na rua, kes algen ki é difisienti i kes algen ki ten difikuldadi na prende. Dipôs, N ba faze un kursu na ária di saúdi. Kantu N tirmina universidadi, pa nha surpréza N konsigi txeu trabadju inportanti. I pamodi kel-li, N ta kunpraba txeu kuza karu. Dja ki N tinha nha própi nogósiu i N ta fazeba piskiza sobri kes kuza ki ta kontise na sosiadadi, úniku kuza ki N mesteba éra nha konputador i internet. N ta viajaba pa otus país i N ta fikaba la pa alguns simana. I tudu bês N ta fikaba na un otel ki N gostaba más txeu. Asi, N ta pruvetaba pa N odja kes lugar bunitu, uza kes lugar di relaxa i jináziu pa N pode fikaba sénpri en fórma. Pa mi kel-li ki éra vida. Má nunka N para di pensa na kes algen ki tinha un vida difísil.

MODI KI BÍBLIA MUDA NHA VIDA:

Duránti txeu anu N fika ta pergunta: ‘Pamodi ki nu sta li i kal ki é obijetivu di vida?’ Má nunka N tenta atxa respósta na Bíblia. Un dia, na anu 1999, nha irman más pikinoti ki txoma Margaret, ki bira un Tistimunha di Jeová ben vizita-m djuntu ku un se amiga ki tanbê éra Tistimunha di Jeová. I se amiga mostra ma el ta preokupaba ku mi. N kaba pa seta studa Bíblia ku kel amiga di nha irman, má nha prugrésu ka foi faxi, pamodi nha trabadju i stilu di vida ki N ta lebaba ta tomaba mi txeu ténpu.

Na metadi di anu 2002, N muda pa sudésti di Inglatéra. La, N konsigi studa na un universidadi pa N pode ten más diplóma. Tanbê la, N kumesa ta bai Salon di Reinu sénpri, djuntu ku nha fidju. Sikrê N gostaba di bai universidadi, nha studu di Bíblia djuda-m ntende midjór kes prubléma di vida i kal ki éra soluson pa es. N da kónta ma kel ki sta na Mateus 6:24 é verdadi. El ta fla ma nu ka pode ser skravu di dôs sinhor. N tinha ki disidi, ô sirbi Deus ô rikéza. N sabia ma N tinha ki disidiba kuzê ki éra más inportanti na nha vida.

Un anu antis, N ta baba manenti studa Bíblia djuntu ku un grupu di Tistimunhas di Jeová ki ta studaba livru Existe um Criador Que Se Importa com Você?. * N pasa ta ten sertéza ma nos Kriador Jeová, é úniku ki ten soluson pa tudu prublémas di mundu. Má na universidadi, es ta inxinaba nos ma nu ka meste di Deus na nos vida. N fika xatiadu. Dipôs di dôs mês, N larga universidadi i N disidi da más ténpu pa kuzas spritual.

Kel testu di Bíblia ki djuda-m muda nha stilu di vida é Provérbios 3:5, 6: ‘Kunfia na Jeová di tudu bu korason; ka bu kunfia na bu própi ntendimentu. Lenbra di el na tudu bus kaminhu, i el ta bira-u bus kaminhu rétu.’ Prende sobri nos Deus ki ta ama-nu é mutu más midjór di ki kalker rikéza ô fama ki mundu pode oferese-u. Kantu más N ta prendeba sobri vontadi di Jeová pa Téra i kuzê ki Jizus faze pa el da se vida pa nos, N ta fikaba ku más gana di da nha vida pa nos Kriador. N batiza na abril di 2003. Dipôs di kel-li, N kumesa ta leba un vida kada bês más sinplis.

BENSONS KI N RESEBE:

Nha amizadi ku Jeová é más inportanti di ki kalker otu kuza. Kantu N konxe-l N xinti un pas déntu mi di verdadi i N xinti filís. Tanbê N sta kontenti pamodi N ta sta djuntu ku amigus ki ta ama Jeová.

Ti inda N gosta di prende, má gósi N sta más kontenti ku kel ki N ta prende na Bíblia i na runions. N gosta di pâpia ku otus algen sobri kes kuza ki N ta kridita na el. Kel-li bira kel kuza más inportanti na nha vida, pamodi N ta djuda pesoas odja modi ki es pode ten un vida midjór gósi i ten un speransa sábi di ben vive na un mundu novu. Désdi junhu di 2008, ami é pionera i nha vida é mutu más filís gósi di ki antis. N atxa un obijetivu na vida i N ta agradese Jeová pamodi kel-li.

• ANU KI EL NASE: 1973

• PAÍS KI EL NASE: ÁUSTRIA

• SE VIDA NA PASADU: TA PUSTABA DINHERU

MODI KI ÉRA NHA VIDA ANTIS:

N kria na un sidadi pikinoti di Áustria, ki txoma Braunau. Pesoas di kel lugar éra txeu riku i kuazi ka tinha krimi la. Nha família éra katóliku i N kriadu na kel relijion li.

Kontise un kuza na nha vida kantu N staba pikinoti ki afeta-m txeu. Na anu 1984, kantu N tinha uns 11 anu, N ta lenbra ma N staba ta juga bóla ku un di nhas midjór amigu. I na kel mésmu dia el móre na un asidenti di karu. Mórti di nha amigu pô-m ta sufri txeu. Mésmu duránti txeu anu dipôs ki el móre, inda N ta perguntaba kuzê ki ta kontise ku nos óras ki nu móre.

Kantu N tirmina skóla, N bira iletrisista. N ka tinha prubléma ku dinheru sikrê mi éra visiadu na juga i na pusta dinheru. Tanbê N ta gastaba txeu ténpu ku disportu. I N kumesa ta gosta txeu di obi múzika heavy metal i punk rock. Nha vida éra sô bai pa diskotéka i féstas. Sénpri N ta djobeba maneras di satisfaze nhas dizeju, i N ta lebaba un vida mariadu. Má N ta xintiba un vaziu déntu mi.

MODI KI BÍBLIA MUDA NHA VIDA:

Na anu 1995, un Tistimunha di Jeová ki dja staba algen grandi konku na nha pórta i el da-m un livru ki ta daba respósta di Bíblia pa kel pergunta li: “Kuzê ki ta kontise óras ki nu móre?” N seta kel livru pamodi mórti di nha amigu inda staba ta inkomoda-m. N lé kel livru interu, ka sô kel kapítlu ki ta pâpia di mórti!

Kes kuza ki N lé, responde kes pergunta ki N tinha sobri mórti. Má, N prende txeu otus kuza. Dja ki mi éra katóliku, N tinha más fé na Jizus di ki na Deus. Má dipôs di analiza dretu kuzê ki Bíblia ta fla, N pasa ta ten un amizadi fórti ku Pai di Jizus, Jeová Deus. N fika dimiradu kantu N prende ma Jeová ta preokupa ku kada un di nos i ma el krê pa nu ser se amigu. (Mateus 7:7-11) N prende ma Jeová ten sentimentus i ma el ta kunpri sénpri se palavra. Kel-li pô-m ta gosta txeu di kes profesia di Bíblia i studa-s pa N odja modi ki es sta ta kunpri. Tudu kel-li poi nha fé na Jeová ta bira más fórti.

Lógu N da kónta ma Tistimunhas di Jeová, éra kel úniku relijion ki staba interesadu na djuda pesoas ntende kuzê ki Bíblia ta fla. N ta djobeba na nha Bíblia katóliku tudu kes testu ki N ta odjaba na publikasons di Tistimunhas di Jeová. I kantu más N ta piskizaba, más N ta daba kónta ma dja N atxaba verdadi.

Nha studu di Bíblia inxina-m ma Jeová ta spéra pa N obi ku se leis. Kuzê ki N lé na Efésios 4:22-24, djuda-m odja ma N tinha ki bandona kel ‘manera di ser antigu’, ki staba ‘di akordu ku kel konportamentu ki N tinha antis’ i ma N tinha ki ‘bisti di kel manera di ser novu ki kriadu sima Deus ta krê.’ Pur isu, N bandona kel stilu di vida mariadu ki N tinha antis. Tanbê, N odja ma N tinha ki para di pusta dinheru, pamodi kel-li ta poba mi ta ser ganansiozu i ta ama dinheru. (1 Coríntios 6:9, 10) N sabia ma pa N fazeba kes mudansa li, N tinha ki larga kes amigu ki N tinha i ranja novus amigu, ki sima mi krê agradaba Deus.

Ka foi fásil faze kes mudansa li. Má, N kumesa ta sisti runions di Tistimunhas di Jeová na Salon di Reinu i N kumesa ta faze novus amigu na kongregason. Tanbê N kontinua ta studa Bíblia mi sô ku txeu kuidadu. Faze kes kuza li, pô-m ta para di obi kes tipu di múzika ki N ta obiba i skodje otus tipu di múzika. Tanbê N muda kes obijetivu ki N tinha na vida i nha manera di bisti i di konpo. I na anu 1995, N batiza i N bira un Tistimunha di Jeová.

BENSONS KI N RESEBE:

Gósi dinheru é ka kel kuza más inportanti na nha vida. N ta xatiaba faxi, má gósi N sta más kalmu. Tanbê, N ka sta xinti preokupadu ku futuru sima antis.

N sta txeu kontenti pamodi N ta faze párti di un grupu di pesoas na mundu interu ki ta sirbi Jeová. I alguns di es ta sirbi Jeová ku lialdadi sikrê ku prublémas. I ami é filís, pamodi gósi N ta uza nha ténpu i nha forsa ka pa N satisfaze nhas dizeju, má pa N adora Jeová i djuda otus algen.

• ANU KI EL NASE: 1963

• PAÍS KI EL NASE: INGLATÉRA

• SE VIDA NA PASADU: KA STABA KONTENTI KU VIDA

MODI KI ÉRA NHA VIDA ANTIS:

N nase na Inglatéra má kantu N tinha 7 anu di idadi nha família muda pa Austrália. Nu ba mora na un lugar ki tinha txeu turista, na Queensland. Sikrê nha família ka éra riku sénpri nu tinha kel ki nu mesteba.

Sikrê N tinha tudu kuza ki N mesteba kantu mi éra mininu, N ka éra filís di verdadi i N ka staba kontenti ku nha vida. Nha pai ta bebeba dimás. N ka gostaba mutu di nha pai pamodi el ta bebeba dimás i el ta maltrataba nha mai. Foi sô dipôs ki N da kónta kuzê ki el pasa kantu el baba trópa na Malázia ki N kumesa ta ntende pamodi ki el ta konportaba di kel manera la.

N kumesa ta bebe dimás kantu N staba na liseu. Ku 16 anu N larga skóla i N bai trópa. N kumesa ta uza dróga i N fika visiadu na sigaru. N bira ta bebe kada bês más txeu, ka sô fin di simana má tudu dia.

Kantu N tinha uns 20 anu N kumesa ta duvida si Deus ta izisti. N ta pensaba: ‘Si Deus ta izisti mê pamodi ki el ta dexa algen ta sufri i móre?’ Ti N skrebe un poezia ta kulpa Deus pa tudu kuza mariadu ki ta kontise na mundu.

N sai di trópa ku 23 anu. Dipôs N trabadja na txeu lugar diferenti. I ti N viaja pa stranjeru duránti un anu, má kel-li ka pô-m ta xinti midjór. N ka tinha ninhun obijetivu ô ninhun méta na vida. Nada ka ta interesaba mi. Pa mi, tinha un kaza, un bon trabadju ô subi di postu ka tinha valor. Úniku kuza ki ta poba mi ta xinti midjór éra bebida ku múzika.

N ta lenbra dretu kantu N xinti gana di atxa un obijetivu na vida. N staba na Pulónia ta vizita kel kanpu di trabadju forsadu terível di Auschwitz. Dja N leba sobri txeu kuza mariadu ki kontise la. Má sta la i odja tamanhu di kel kanpu, mexe txeu ku mi. N ka ta konsigi ntendeba modi ki pesoas ta konsigi ser runhu ku kunpanheru di kel manera li. N ta lenbra ta anda na kel kanpu ku lágua na odju ta pergunta: ‘Pamodi?’

MODI KI BÍBLIA MUDA NHA VIDA:

Na anu 1993, kantu N volta pa Austrália, N kumesa ta lé Bíblia ta djobe respóstas pa nhas pergunta. Poku ténpu dipôs, dôs Tistimunha di Jeová konku na nha pórta i es konvida-m pa N bai sisti un kongrésu ki staba ta fazedu na un stádiu pértu di nha kaza. N disidi bai.

Dja N baba kel stádiu la alguns mês antis pa N ba sisti un jogu, má anbienti ka tinha nada aver ku kel di kongrésu. Tistimunhas di Jeová éra idukadu, es ta bistiba dretu i ses fidjus ta konportaba dretu. N fika dimiradu ku kuzê ki N odja na óra di almosu. Txeu Tistimunha di Jeová almusa djuntu na kanpu, má kantu es volta pa ses lugar, N ka konsigi odja nen un lixu na txon! Tanbê kes algen ta parseba ma es éra filís i es tinha pas. I kel-li éra un kuza ki sénpri N kria. N ka ta lenbra di kuzê ki fladu na kes diskursu na kel dia, má konportamentu di kes Tistimunha di Jeová nunka N ka ta skese.

Na kel dia di noti, N lenbra di nha primu ki ta leba Bíblia i dja studaba txeu relijion. Uns anu antis, el fla-m ma Jizus inxina ma nu pode sabe kal ki é relijion verdaderu através di kuzas ki es ta faze. (Mateus 7:15-20) N pensa ma N devia peloménus tenta ntende pamodi ki Tistimunhas di Jeová éra diferenti. I pa primeru bês na nha vida N xinti speransa ma N podia ten un vida filís.

Na kel otu simana, kes dôs Tistimunha di Jeová ki konvidaba mi pa kongrésu ben nha kaza otu bês. Es oferese-m un studu di Bíblia i N seta. Tanbê N kumesa ta sisti runion djuntu ku es.

Sima N ba ta studa Bíblia, kuzas ki N ta pensaba sobri Deus ba ta muda. N prende ma el é ka kulpadu pa maldadi ku sufrimentu i ma el ta fika tristi óras ki pesoas ta faze kuzas mariadu. (Génesis 6:6; Salmo 78:40, 41) N staba disididu na faze nha midjór pa N ka mágua Jeová. N kria poba se korason kontenti. (Provérbios 27:11) N para di bebe dimás, N dexa di fuma i N para di faze konportamentu seksual mariadu. I na marsu di anu 1994, N bira un Tistimunha di Jeová.

BENSONS KI N RESEBE:

Gósi mi é filís di verdadi i N ka ta bebe más pa N rezolve nhas prubléma. Envês di kel-li, N prende lansa nha karga na Jeová. — Salmo 55:22.

Dja ten 10 anu ki mi é kazadu ku un mudjer bunita ki txoma Karen, ki tanbê é Tistimunha di Jeová. I mi é padrastu di Nella, ki é un jóven inkrível. Nos tudu três nu gosta txeu di sta na pregason i djuda otus algen prende verdadi sobri Deus. Gósi dja N atxa un obijetivu na vida.