•  Lo tso ngadha dhi lo 2

•  Mungu dzá lo nǎ bbo na mana kʉ ná lo 3-5

  •  Hotuba 3

  •  Kiroho nǎ Mali 4

  •  Biblia zødha 5

•  Abbʉ ni lu lod’radha dhi njí dho 6-14

  •  Lo nga le nga nari 7

  •  Ndrŭ ronga le ngʉ be nari 8

  •  Longa le ddi ndrŭ dho nari 9

  •  Ni u ná lo nanga ni tú nari 10

  •  Hotuba 11

  •  Ri nǎ lo 12

  •  Lod’radha dhi chu 13

  •  Ngbaribbai ma le ka le njínji Video ma, Vichapo ma na na nari 14

•  Wakristo dhó maisha 15-16

•  Biblia le jifunza kutaniko nǎ nari 16

•  Lo tso dyadha dhi lo 17

•  Ma le ndrŭ má nari ndirigoti shauri 18

•  Saa 19

•  Mwangalizi wa muzunguko dhó ziara 20

•  Asamble dhi yenga ddo 21

•  Ukumbusho dhi yenga ddo 22

•  Mukristo dhó maisha ndirigoti lod’radha dhi njí dhi njudha dhi mwangalizi 23

•  Mukristo dhó maisha ndirigoti lod’radha dhi njí dhi njudha dhi prezida 24

•  Mushauri musaidizi 25

•  Sale segondere nǎ le adi nji ná kipindi 26

•  Video 27

1. I maagizo si kipindi kʉ djó ná ndrŭ krʉ tsotso ko Mukristo dhó Maisha ndirigoti Lod’radha dhi njí dhi Njudha dhi ngana. Ledhó kipindi le tayarisha nari njí ringani le zø Mukristo dhó maisha ndirigoti lod’radha dhi njí dhi njudha dhi buku d’ra fø kipindi djo ná lo ma, i maagizo d’ra fø kipindi djo ná lo ma na. Wahubiri krʉ tsó le ka le nziri kpa é volotere wanafunzi dhó kipindi njidha dho. Njudha na adi si krʉ ddo ró ná ngbà jiri ná nja kpa ka ndima njí kipindi njati kpa u Biblia nǎ mafundisho ndirigoti kpadhó maisha tso nju Wakristo adi dyø ná kanuni na ngbà ró. Maisha ndirigoti Lod’radha dhi njí dhi Njudha dhi mwangalizi dho ringani ndi tilo nga kʉ muhubiri ndirigoti ngbà jiri ndi nga kipindi njidha tso ná le na ndirigoti ndi d’ra le ká kʉ tayari nì ma nari le dho. Fø lo ringani ke nji nì Biblia nǎ longaddi fø le dho ná le kʉ ná ngana (inga nì kʉ Yova dzá Dimu ná gø dhi ndrŭ kʉ ná ngana). Kpa dho ringani ndima njí nzá d’e batiso ba ná muhubiri dho ri adi ngani ndi njí ná lo.—od sura 8 paragrafu 8.

2. Miniti ddikpa. Krʉ yenga ddo ró, dyi ma, sala ma na goti Mukristo dhó maisha ndirigoti lod’radha dhi njí dhi njudha dhi prezida si loti njudha nǎ ndrŭ si dyø ná programu djo. Prezida ka ndi tilo kutaniko nǎ ndrŭ ka ndima si faida ba bbo nǎ ro ná lo djo.

 3. Hotuba: Miniti 10. Hotuba djǒ ma, ri nǎ bbo na mana kʉ ná aro inga gbo kʉ ná lo ma na adi si Mukristo dhó Maisha ndirigoti Lod’radha dhi njí dhi Njudha dhi Buku nǎ ro. Fø hotuba ka ndi bbʉ nari kʉ mzee inga bblo maendeleo nji ná mutumishi wa huduma. Njati programu djó Biblia zødha nǎ le dhǒ Biblia nǎ ddikpa ø kitabu ró, ri tso ngadha dho le ka le dhǒ ddikpa video ndrŭ dho. Hotuba bbʉ ná ke si ngbaribbai ma video nǎ kʉ ná lo tso nju lo djǒ na nari dho. Ro, ri kʉ bblo ke tilo plan djó le dho njudha dhi buku nǎ ná lo krʉ djo. Ndirigoti njati saa u ritso ngbà ró, ringani ke njinjí bblo njudha dhi buku djó kʉ ná ji na ndiro ndi tu nja lo nanga d’e. Ke ka ndi tilo nja lo djo maddi njati ri tso gbani ngbà njudha dhi buku djó kʉ ná lo na ró.

 4. Kiroho nǎ Mali: Miniti 10. Iri kʉ nga le dhu ndrŭ tso ndirigoti logoti ndrŭ ngʉ nǎ ná sehemu, ngadhi lo tso ngadha dhi lo ro ndirigoti ngadhi lo tso dyadha dhi lo ro. I sehemu ka ndi njí nari kʉ mzee inga bblo maendeleo nji ná mutumishi wa huduma. Ringani i sehemu ongoza ná ke dhu aro kʉ ngadhudha krʉ. Ndirigoti ke ka ndi vʉ zø le ka le zø inga nzá le ka le zø ná andiko. Komatere bbʉ ná ndrŭ dho ringani ndima njiri segonde 30 inga fø nga tsena.

 5. Biblia zødha: Miniti 4. I kipindi ka ndi njí nari kʉ le-djo. Mwanafunzi dho ringani ndi zø i sehemu nǎ le dho ná andiko ngadhi lo tso ngadha dhi lo ro ndirigoti ngadhi lo tso dyadha dhi lo ro. Njudha dhi prezida ka ndi kó wanafunzi tsotso ndima zønga lo le ndi nari bbai, ndrŭ ka ndima famu ri ná chulu, pʉlʉpʉlʉ, bblo, ndima di ndima dhó sauti thí ø nga ndima zø ná saa na, ndima di ndima nanga chʉ ngbà thonga nari bbai nga ndima zø ná saa na ndirigoti ndima zø lo lo le adi ti nari bbai. Biblia zødha dhi kipindi ka ndi é dʉ inga njari e da nari dho, Mukristo dhó maisha ndirigoti lod’radha dhi njí dhi njudha dhi mwangalizi ka ndi ddinga wanafunzi dhó uwezo djo fø kipindi ndi bbʉ kpa dhona ná saa na.

6. Miniti 15. I sehemu dhi kusudi kʉ ndi kó krʉ ndrŭ tsotso ndima ba ufundi lod’radha ndirigoti longaddidha dhi njí dho. Ngbà ri ka ró, wazee dho le ka le bbʉ wanafunzi dhó kipindi maddi. Wanafunzi krʉ dho ringani ndima njínji Longaddidha inga Aji ndrŭ dhi broshua nǎ ro ndima ba ná somo na, fø somo e Mukristo dhó maisha ndirigoti lod’radha dhi njí dhi njudha dhi buku nǎ kipindi kuso. Nja saa na, le ka le dho ddinga ndrŭ si loti djo ná sehemu programu nǎ. Fø kipindi ka ndi njí nari kʉ muzee inga bblo maendeleo nji ná mutumishi wa huduma.—Anja  paragrafu 15 ngbaribbai ma le ka le ongoza ddinga le loti ná sehemu nari djo ndi tilo ro.

 7. Lo nga le nga nari: I kipindi ka ndi njí nari kʉ isɨ inga kpetsi kʉ ná mwanafunzi. Rie le-djo dho le bbʉ fø kipindi ró, lo ke d’ra dho nari ka ndi é kpetsi ke ndirigoti kipindi nji nari é le-ve ró, lo le d’ra dho nari ka ndi é isɨle inga kpadhó familia nǎ ndrŭ. Mwanafunzi ma, lo rr ná ke ma na ka ndima di gʉna inga ndima tøni røna. Nja ni chu lo bbo fø kipindi ma, ri nǎ lo ma na djo d’e, anja  paragrafu 12 ndirigoti  13.

 8. Ndrŭ ronga le ngʉ be nari: I kipindi ka ndi njí nari kʉ isɨ inga kpetsi kʉ ná mwanafunzi. Rie le-djo dho le bbʉ i kipindi ró, ringani lo ke d’ra dho nari é kpetsi ke, ró rie le-ve i kipindi nji ró, ringani lo le d’ra dho nari é isɨle. (km-SW 5/97 paje 2) Mwanafunzi ma, lo ke d’ra dho ná le ma na ka ndima di gʉna inga ndima tøni tø. Mwanafunzi ka ndi dhǒ ngbaribbai ma le ka le be ndrŭ ronga b’lo le tielo ro nari goti nari.—Nja ni chu lo bbo fø kipindi ma, ri nǎ lo ma na djo d’e, anja  paragrafu 12 ndirigoti  13.

 9. Longa le ddi ndrŭ dho nari: I kipindi ka ndi njí nari kʉ isɨ inga kpetsi kʉ ná mwanafunzi. Rie le-djo dho le bbʉ i kipindi ró, ringani lo ke d’ra dho nari é kpetsi ke, ró rie le-ve i kipindi nji ró, ringani lo le d’ra dho nari é isɨle. (km 5/97 p. 2) Mwanafunzi ma, lo ke d’ra dho ná ke ma na ka ndima di gʉna inga ndima tøni tø. Fø kipindi ka ndi dhǒ b’lo tso le ngae ná funzo na le ra anzi nari. Ri nzá ngani le po lo tso ngadha dhi lo inga lo tso dyadha dhi lo ri. Fø le ka le njiri rie mwanafunzi njínji fø somo na dhé ri ró. Ngbà mai ri ka ndi kaka ro, ri nzá ngani le zø paragrafu krʉ ri.

 10. Ni u ná lo nanga ni tú nari: Njati rie hotuba ró, ringani kpetsi mwanafunzi njiri. Ro, njati rie onyesho ró, kpetsi inga isɨ kʉ ná mwanafunzi ka ndi njiri ngbà. Rie le-djo dho le bbʉ fø kipindi ró, lo ke d’ra dho nari ka ndi é kpetsi ke ndirigoti rie kipindi nji nari é le-ve ró, lo le d’ra dho nari ka ndi é isɨle inga kpadhó familia nǎ ndrŭ. Mwanafunzi dho ringani ndi bbʉ d’ʉ kʉ ná jibu ndirigoti nyodyu dhi ri ndi loti djo ná lo djǒ djo ndidhó le bbʉ ná referase dhori nari bbai. Mwanafunzi ka ndi vʉ ndi ká loti referase dhi kichapo djo ti inga nzɨ ma nari.

 11. Hotuba: Fø kipindi ka ndi njí nari kʉ le-djo ndirigoti ri le ka le njí kutaniko nǎ le adi hotuba bbʉ nari bbai. Njati rie Aji ndrŭ dhi broshua nǎ Nyongeza A ró hotuba dyʉ ndi ri ró, ringani mwanafunzi dhǒ ngbaribbai ma le ka le njínji fø verse na lod’radha dhi njí kana nari. Loroji na, ke ka ndi tu ngbá saa djo ma le ka le njínji ddikpa verse na nari nanga ma, ri na mana ma, ngbaribbai ma le ka le kó ndrŭ tsotso ndima famu fø verse d’e nari ma na. Njati rie Aji ndrŭ dhi broshua nǎ ddikpa somo ró hotuba dyʉ ndi ri ró, mwanafunzi dho ringani ndi li ndi thí ngbaribbai ma le ka le njínji fø somo na lod’radha dhi njí kana nari djo. Ke ka ndi tilo somo ya kwanza nǎ kʉ ná loroji djo inga ndi tilo fø somo nǎ kʉ ná nja verse djo rie ngbà ri ka ró.

   12. Ri nǎ lo: I paragrafu ma, ri goti ro kʉ ná ri ma na nǎ lo tso gbani gba, “Lo tso le nga nari” ma, “Ndrŭ ronga le ngʉ be nari” ma na nǎ lo na. Rie nzá le dho mwanafunzi ka ndi njí ná nja lo ri ró, ringani ke dhó muradi é ndi d’ra sʉsʉ ndirigoti bbo na mana kʉ ná lo ndima lo ti na ná ke dho Biblia nǎ ro, ndirigoti ndi po luti ndima si loti djo ná lo ke dho. Mwanfunzi dho ringani ndi vʉ nì djo ndrŭ loti fø saa djo ndirigoti ngbà ka ndi lø ndrŭ thí ronga ndima dhó eneo nǎ ná lo. Ke ka ndi vʉ ndi ká ka ndi tilo kodhó longaddidha dhi no nǎ vichapo inga video djo ti ma nari. Ndi djǒ nǎ ndi lø ná lo ndi d’rae nari rɨngana, mwanafunzi dho ringani ndi nji kpakpanga ndi é lotidha dhi ufundi na, føri kʉ li le le dyu li ndrŭ ro nari ma, le adi loti nari bbai le loti nari ma na.

   13. Lod’radha dhi chu: Mwanafunzi dho ringani ndi vʉ ndi ká si lod’ra ngbaribbai ma nari ndima bbá eneo nǎ hali ró ro. Loroji na:

1.  (1) Nyumba kwa nyumba le lod’ra nari: Le ka le d’ralo nyumba kwa nyumba—le ronga na, telephone chulu, inga barua chulu—ndirigoti ya kwanza le tielo na ná le ronga le ngʉ be nyumba kwa nyumba le lod’ra ro nari chulu.

2.  (2) Nzá le kpe ro le lod’ra nari: Føri kʉ nì ni adi ti ná lo ró ro ni lod’radha tsonga nari. Njaro ni ka ni d’ra Biblia nǎ ngaddidha njí dhi ngana ni nju na ná ndrŭ ma, darasa nǎ ma, ni kuso lu kʉ ná ndrŭ ma, motogari nǎ ni kʉ na ná ndrŭ ma, inga nja ngana ni nju na nidhó njí dhi ngana ni ra ro ná ndrŭ ma na dho.

3.  (3) Bí ndrŭ kʉ ná ngalu le lod’ra nari: Føri kʉ, prezatware na le lod’ra nari ma, ndrŭ dhó njí dhi ngalu le lod’ra nari ma, chu lu le lod’ra nari ma, ndima nyǒ ndrŭ adi djé ná ngalu le lod’ra nari ma, parking djolu le lod’ra nari ma, ngbà ndrŭ ka ndima bani ná nja nga lu le lod’ra nari ma na.

 14. Ngbaribbai ma le ka le njínji Video ma, Vichapo ma na na nari: Mwanafunzi kʉ nǎ ná hali ró ro, ke ka ndi nja ndi ká ka ndi dhǒ video inga ndi bbʉ broshua nari. Njati mwanafunzi dhó kipindi nǎ é video inga njati ke vʉri ndi dhǒ video ró, ke ka ndi tilo video djo nzá ndi dho ri dhǒ ro.

15. Dyi goti, fø sehemu nǎ miniti 15 kana le nji ná kipindi ka ndi kó lo rr ná ndrŭ tsotso ndima njinjí Mungu dzá lo na. Rie nzá d’i maagizo bbʉni ri ró, i sehemu nǎ kipindi ka ndi njí nari kʉ muzee inga bblo maendeleo nji ná mutumishi wa huduma. Ri nǎ é kutaniko dhó mahitaji ró, kutaniko dhó mahitaji ka ndi njí nari kʉ muzee. Njati ddikpa sehemu nǎ é ddinga le loti nǎ ná kipindi ró, kipindi le bbʉ dho ná le-djo ka ndi njinjí ri nǎ le bbʉ ná ngadhudha ma, nja ngadhudha ma na na kipindi ndi ongoza nari kana. Kedho ringani ndidhó lo tso ngadha é dʉ, ndiro ndi ba saa ndi tilo bbo na mana kʉ ná lo djo ndirigoti kutaniko nǎ ndrŭ ma tilo ro ddi d’e. Njati rie nga le dhu ndrŭ tsó nǎ ná sehemu ma kʉ ddi ró, ri kʉ bblo nga le dhu tso ná ke dji estrade djo ngbà ri ka ró, nga ndi e di ná nga nǎ ro ke loti ri.

  16. Biblia le jifunza kutaniko nǎ nari: Miniti 30. Fø kipindi ka ndi njí nari kʉ mzee. (Vʉ wazee dhó hesabu tso vʉni ná kutaniko nǎ, ngbà ri ka ró, bblo maendeleo nji ná mutumishi wa huduma ka ndi njí fø kipindi nji.) Wazee dhó baraza ka ndi vʉ ie i kaka ndi ddá chutso Biblia le jifunza kutaniko nǎ nari dho nari. U tso le u ndi ddá chutso Biblia le jifunza kutaniko nǎ nari dho ná ke dho ringani ndi ongoza ri bblo pli kʉ ná chu na, ndi b’o saa ronga, ndi tilo bbo na mana kʉ ná andiko djo ndirigoti ndi kó ndrŭ krʉ tsotso ndrŭ nja ndima jifunza ná lo dhi faida d’e. Ngbà tso uni ndima ongoza fø sehemu ná kpa ka ndima ba ndima tsotso ka ndi kó ná lo ngbaribbai ma le adi ngadhudha ma, jibu ma na kʉ nǎ ná sehemu ongoza nari ndima zø nari nǎ ro. (w23.04 paje. 24, kisanduku). Njati rie b’lo yenga ddo dho le kpee ná lo sini ri ró, ri nzá ngani le tilo ki bbo ri. Ngbà ri ka ró, le ka le vʉ njonjo kʉ ná kpa ndima ddá chutso Biblia le jifunza kutaniko nǎ nari dho ndirigoti le vʉ njonjo kʉ ná ndrŭ paragrafu zødha dho. Njati Mukristo dhó maisha ndirigoti lod’radha dhi njí dhi njudha dhi prezida pori le ngʉ Biblia le jifunza kutaniko nǎ nari nanga dʉ ró, chutso ddá ná ke ka ndi nja ngbaribbai ma ndi ka ndi ngʉ ri nanga dʉ nari. Ke ka ndi vʉri nzɨ le zø nja paragrafu.

17. Miniti 3. Mukristo dhó maisha ndirigoti lod’radha dhi njí dhi njudha dhi prezida ka ndi ngʉ njudha nǎ le tielo djo ná bbo na mana kʉ ná lo djolu. Ke ka ndi tilo gosi ná yenga ddo kana le si loti djo ná lo djo maddi. Rie nì saa kʉ ró, ke ka ndi d’ra gosi ná yenga ddo kana si kipindi nji ná ndrŭ ró dho d’ra. Rie nga d’ilo kʉ ri ró, prezida ka ndi njí matangazo ndirigoti ke ka ndi zø nja barua lo tso dyadha dhi sehemu nǎ. Loroji na, lod’radha dhi njí dhi programu ndirigoti usafi dhi programu nzá le ka le d’ra estrade djó ro ri, ro ri le ka le li matangazo dhi tablo djo. Njati matangazo ma, barua ma na le zø ná saa é nga ró, prezida ka ndi nziri kipindi kʉ djó Wakristo dhó maisha dhi sehemu nǎ ná le-djoi ngʉ ndima dhó saa nanga ngʉ. (Anja  paragrafu 16 ndirigoti  19). Njudha tso ringani le dya dyi na ndirigoti sala na.

18. Wanafunzi dhó kipindi krʉ goti Mukristo dhó maisha ndirigoti lod’radha dhi njí dhi njudha dhi prezida ka ndi tilo chøchø minite ddikpa bblo mwanafunzi nji ná lo djo ndirigoti ndi bbʉ shauri ke dho le bbʉe ná somo nǎ ro. Prezida nzi mwanafunzi ndi njí kipindi ná saa na, ri nzá ngani ke d’ra ngbá somo djo ma mwanafunzi njinjí nari ri. Ro, mwanafunzi dhó kipindi goti ndirigoti b’lo prezida po bblo ke nji ná lo nari goti, prezida ka ndi d’ra mwanafunzi e njinjí djó ná somo, ndirigoti ke ka ndi d’ra addudho ma ndirigoti ngbaribbai ma mwanafunzi njieri bblo nari. Inga nyodyu na ke ka ndi d’ra addudho ma mwanafunzi dho si ngani ndi njiri ki bblo luti nari. Prezida ka ndi tilo kipindi nǎ nja sehemu djo maddi njati ke njari føri ka ndi kó mwanafunzi tsotso inga lo rr ná ndrŭ tsotso ró. Kpakpa ka ndi li mwanafunzi ná nja shauri le ka le bbʉ njudha goti ddiro mwanafunzi kʉ ná ngana Broshua Aji ndrŭ, buku Shule ya huduma inga broshua Longaddidha chulu. Fø shauri ka ndi é mwanafunzi nji njí djo ná somo djo inga nja somo djo maddi.​—Ndiro ni chu lo bbo Mukristo dhó maisha ndirigoti lod’radha dhi njí dhi njudha dhi prezida dhó njí djo ndirigoti mushauri musaidizi dhó njí djo d’e, anja  paragrafu 19,  24 ndirigoti  25.

19. Ddikpa kipindi dho ma nzá ddi ringani le nji ndi ridho le li ná saa djolu ri. Mukristo dhó maisha ndirigoti lod’radha dhi njí dhi njudha dhi prezida dhó komatere dho ma nzá ddi ringani ndi njí saa nga djolu ri. Ngbà mai Mukristo dhó maisha ndirigoti lod’radha dhi njí dhi njudha dhi buku dho krʉ sehemu le ka le nji kana ná saa ro, ri nzá ngani le ti lo ki bbo rie kipindi le nji bblo ndirigoti ri dho le li ná saa kana ró ri. Njati njudha dhi nja sehemu njí saa bbo ró, Maisha ndirigoti lod’radha dhi njudha dhi prezida inga mushauri musaidizi ka ndi bbʉ shauri nga nja ndrŭ kʉ ná nga na. (Anja  paragrafu 24 ma,  25 na.) Njudha krʉ dho ringani ndi njini saa ddi na miniti 45 kana, føri tsu ndi nǎ dyi ma, sala ma na krʉ.

20. Njati kutaniko é mwangalizi wa muzunguko dhó ziara na ró, programu ka ndi da Mukristo dhó Maisha ndirigoti Lod’radha dhi njí dhi Njudha dhi Buku ridho nari bbai. Ro, njí le ka le njí ná nja lo ki kʉ ena: Biblia le jifunza kutaniko nǎ nari le ka le bbabbá ndirigoti ri le ka le njie nǎ ná miniti 30 kana mwangalizi ka ndi bbʉ ndidhó hotuba. Mwangalizi dhó hotuba njí, Mukristo dhó maisha ndirigoti lod’radha dhi njí dhi njudha dhi prezida si b’lo ndrŭ nji ná programu dzá dʉnga nji, ke ka ndi tilo gosi ná yenga dhi programu djo, ke ka ndi zø matangazo, ndi zø barua rie nì ri kʉ ri ró ndirigoti ndi nzi mwangalizi hotuba bbʉdha dho. Hotuba goti, mwangalizi ka ndi dya programu tso ndi vʉ ná dyi na. Ke ka ndi nzi d’i le-djo lo tso dyadha dhi sala njidha dho. Mwangalizi wa muzunguko dhó ziara dhi saa na nzá le ka le njí sale segondere nǎ njudha ri. Njati fø kutaniko nǎ é d’i luga dhi grupe ró, kpa ka ndima njí ndima dhó njudha njí dhé. Ro, kpa ka ndima gba ndima tso ndrŭ na nja ndima rr mwangalizi wa muzunguko dhó hotuba d’e.

21. Asamble dhi yenga na nzá le ka le njí njudha ri. Ri ngani le nonga ndrŭ dho nari kʉ fø yenga ddo dhi programu ndrŭ ka ndima jifunza ddi ddiro inga ndima dhó familia nǎ.

22. Ukumbusho é yenga ddo kana ró, Mukristo dhó maisha ndirigoti lod’radha dhi njí dhi njudha nzá le ka le njí ri.

23. Wazee dhó baraza ka ndi vʉ ddikpa mzee ndi é Mukristo dhó maisha ndirigoti lod’radha dhi njí dhi njudha dhi mwangalizi. Ke dho ringani ndi liri njudha kpeni bblo ndirigoti ri njini i maagizo ridho nari bbai. Ringani kpa di loti bí ina mushauri musaidizi na. Mukristo dhó Maisha ndirigoti Lod’radha dhi njí dhi Njudha dhi Buku si b’lo ró, Mukristo dhó maisha ndirigoti lod’radha dhi njí dhi njudha dhi mwangalizi dho ringani ndi kpe bi aro kana le si nji ná njudha dhi programu théi. Føri tsu ndi nǎ, wanafunzi dhó kipindi ma, wazee dhó baraza utso ndima e njudha dhi prezida ná kpa dho le bbʉ ná kipindi ma, nga kʉ wanafunzi ná kpa dhó kipindi ma na. (Anja  paragrafu 3-16 ma,  24 na.) Mwanafunzi djo ndi kipindi bbʉ ná saa na, ringani ke ddinga mwanafunzi dhó cho ma, ke chu ná lo ma, kipindi ká tilo addu djo nari ma na djo. Ringani ke ddinga fø lo djo njudha nǎ nja sehemu ndi bbʉ ndrŭ djo ná saa djo maddi. Ringani kipindi le bbʉ ndrŭ dho yenga gbo kipindi ndrŭ si nji ná ddo njí. Nja le ndó kipindi wanafunzi dho d’e le adi njínji Utumishi na Maisha ya Mukristo​—Karatasi ya Mugao (S-89) dhi fomu na. Mukristo dhó maisha ndirigoti lod’radha dhi njí dhi njudha dhi mwangalizi dho ringani ndi li njudha dhi programu lu matangazo dhi tablo djo. Wazee dhó baraza ka ndi vʉ d’i muzee inga d’i mutumishi wa huduma ndi kó ke tsotso d’e. Ro, wazee dhé ka ndima ndó nga kʉ wanafunzi dhó kipindi ná kipindi ndrŭ dho.

24. Krʉ yenga ddo ró, ddikpa mzee ka ndi é Mukristo dhó maisha ndirigoti lod’radha dhi njí dhi njudha dhi prezida. (Nga wazee kʉ bí ná ngana bblo maendeleo nji ná mutumishi wa huduma ma ka ndi é ddi njudha dhi prezida.) Prezida dho ringani ndi tayarisha lo tso ngadha dhi lo ndirigoti lo tso dyadha dhi lo. Ke ka ndi nzi kipindi nji ná ndrŭ ndima si estrade djo, ndirigoti wazee e bí nga ró, ke ka ndi njí njudha nǎ nja kipindi, loroji na, video djo tilo ngadhi komatere ro ná kipindi. Kipindi krʉ sini nari goti ke ka ndi bbʉ dʉ kʉ ná komatere. Wazee dhó baraza ka ndi vʉ ngbà kaka ná mzee nja ndi é njudha dhi prezida d’e. Ngbà ka fø njí dho ná wazee ka ndima é njudha dhi prezida bí ina. Ngbà hali u ritso ri ró, Mukristo dhó maisha ndirigoti lod’radha dhi njí dhi njudha dhi mwangalizi ka ndi é njudha dhi prezida bí ina nja wazee djolu. Njati ddikpa mzee kaka ndi ddá chutso Biblia le jifunza kutaniko nǎ nari dho ró, føri pori ke kaka ndi é njudha dhi prezida maddi. Anonga nari kʉ, njudha dhi prezida kʉ ná muzee dho ringani ndi dhǒ jidha, ndi d’ra bblo wanafunzi nji ná lo ndirigoti ndi bbʉ shauri kipindi nji ná kpa dho. Prezida dho ringani ndi é krr ndiro njudha sini bblo saa na d’e. (Anja  paragrafu 17 ndirigoti  19.) Njati prezida jiri ngbà ndirigoti njati didha dhi nga é ni ró, le ka le li d’i mikro estrade djo ndiro prezida tilo ri tso ró kipindi nji ná kpa da estrade djo ndima tilo d’i mikro tso ró ná saa na. Ndirigoti prezida ka ndi vʉri ndi di estrade djó mesa tso ro Biblia zødha dhi kipindi dhi saa na ndirigoti Abbʉ ni lu lod’radha dhi njí dho dhi sehemu dhi saa na. Føri ka ndi liri nzɨ le vi saa ro.

25. Ngbà ri ka ró, ri kʉ bblo le vʉ bblo adi hotuba bbʉ ndirigoti b’lo bbʉ ri cho bí ná muzee ndi é mushauri musaidizi. Mushauri musaidizi dhó njí kʉ ndi bbʉ shauri ngbà ri ka ró wazee ma, watumishi wa huduma ma na dho ndima nji ná kipindi dho, føri tsu ndi nǎ Mukristo dhó maisha ndirigoti lod’radha dhi njí dhi njudha nǎ ndima nji ná kipindi ma, krʉ ndrŭ dho ndima bbʉ ná hotuba ma, Dzamu dhi Munara ndima ongoza nari ma, ndima zø ri nǎ paragrafu ndrŭ njí nari ma inga ndima ddá chutso Biblia le jifunza kutaniko nǎ nari ma na. (Anja  paragrafu 19.) Njati kutaniko nǎ bblo adi longaddi ná wazee é bí ró, krʉ cho ró kpa ka ndima vʉ ndima kana kaka fø njí dho ná ddikpa mzee nja ndi é mushauri musaidizi d’e. Ri nzá ngani mushauri musaidizi di shauri bbʉ krʉ kipindi goti ri.

26. Wanafunzi dhó hesabu é bí ró, kutaniko ka ndi liri wanafunzi njí kipindi sale segondere nǎ. Sale segondere nǎ le adi nji ná kipindi krʉ dho ringani bblo chu lo ná mushauri é thé, ngbà ri ka ró rie muzee. Ngbà ri ka ná ngana, bblo maendeleo nji ná mutumishi wa huduma ka ndi é mushauri. Wazee dhó baraza ka ndi vʉ musaidizi ndirigoti kpa ka ndima vʉ mushauri thika ká le ka le di øø ma nari nanga. Mushauri dho ringani ndi dyø  paragrafu 18 nǎ kʉ ná maagizo. Kiroho nǎ mali tso dyani ró, le ka le pori wanafunzi rá sale segondere na. Ndirigoti kpa ka ndima ngʉ ndima e di ná ngana fø njudha nǎ ya mwisho mwanafunzi njí ndidhó kipindi nari goti.

27. Vʉ le vʉ ná video le ka le dhǒ njudha dhi saa na. Yenga ddo kana kʉ ná njudha dhi video ka ndi é JW Library® djó ndirigoti ri le ka le telesharje elektroniki dhi njonjo kʉ ná no chulu.

© 2023 Watch Tower Bible asnd Tract Society of Pennsylvania

S-38-LND 11/23