•   Binenwa bya Ñanjilo 2

•  Byabulēme bya mu Kinenwa kya Leza 3-5

  •  Mwisambo 3

  •  Byabupeta bya ku Mushipiditu 4

  •  Butangi bwa Bible 5

•  Wiibidije Mwa Kusapwila 6-14

  •  Mwa Kushilwila Mīsambo 7

  •  Muswelo wa Kulondelela Kusangela 8

  •  Mwa Kulongela Bana ba Bwanga 9

  •  Mwa Kushintulwila Nkulupilo Yobe 10

  •  Mwisambo 11

  •  Myanda ya mu Kipindi 12

  •  Miswelo ya Busapudi 13

  •  Mwa Kwingidijija Mavideo ne Mabuku 14

•  Būmi bwa Bene Kidishitu 15-16

  •  Kifundwa kya Bible kya Kipwilo 16

•  Binenwa bya Mfulo 17

•  Kufwija’ko ne Madingi 18

•  Kitatyi 19

•  Bupempudi bwa Mutadi wa Kipindi 20

•  Yenga wa Kitango 21

•  Yenga wa Kivulukilo 22

•  Mutadi wa Kupwila kwa Būmi ne Mwingilo 23

•  Mwimaniji wa Kupwila kwa Būmi ne Mwingilo 24

•  Mudingidi Mukwashi 25

•  Tulasa Tukwabo 26

•  Mavideo 27

1. Buno bulombodi bukakwasha bonso bapebwa bipindi ku kupwila kwa Būmi ne Mwingilo. Bono’ba bafwaninwe kutanga bulombodi butala bipindi byobapelwe monka mobilombwedilwe mu Kabuku ka ku Kupwila Būmi ne Mwingilo ne mu buno bulombodi, kumeso kwa kuteakanya kipindi. Basapudi bonso bafwaninwe kukankamikwa kupityija bipindi bya bana ba masomo. Bantu bakwabo bapwilanga netu kyaba kyonso babwanya kupita’ko shi betabije bufundiji bwa mu Bible ne kukwatañanya būmi bwabo na misoñanya ya bwine Kidishitu. Mutadi wa Kupwila kwa Būmi ne Mwingilo ukesambila na muntu ke musapudipo usaka kushilula kupityija bipindi pa bisakibwa bilombwa, ne kumuyukija shi i mufwaninwe. Yewa umufundijanga Bible ufaninwe kutanwa’po (nansha mbutwile wandi mwitabije). Bisakibwa bilombwa i bimo byonka na byobya bilombwanga muntu usaka kwikala musapudi wa kubulwa kubatyijibwa.—od shap. 8 mus. 8.

2. Munite umo. Yenga ne yenga, shi lwimbo ne milombelo bibafule, mwimaniji wa Kupwila kwa Būmi ne Mwingilo ukalangula kyumwa kya bantu kya kwivwana mpangiko ilonda’ko. Mwimaniji ukata mutyima ku myanda ikamwena’mo kipwilo bininge.

 3. Mwisambo: Minite dikumi. Mutwe wa mwanda ne mwadijo udi na myanda mikatampe ibidi nansha isatu i bitūlwe mu Kabuku ka ku Kupwila Būmi ne Mwingilo. Uno mwisambo ukapebwa mukulumpe nansha mwingidi wa mingilo wa bwino. Shi ku mpangiko ya butangi bwa Bible bwa mu yenga kushilula na mukanda mupya wa mu Bible, mukashilula na kutala video ya mwine mukanda’wa. Muneni ukokeja kukwatañanya myanda ya mu video na mutwe wa mwanda. Inoko, kafwaninwepo kwilwa kwisambila pa myanda itelelwe mu kabuku. Ne kadi, shi kukidi kitatyi, ukengidija senene bifwatulo, bibadilwa mu myanda ya kuvungulula. Ubwanya kubweja’ko myanda ya mu bingidilwa bikwabo enka shi myanda’ya ikwasha pa kuvungulula mwanda udi mu mwadijo.

 4. Byabupeta bya ku Mushipiditu: Minite dikumi. Kano i kakipindi ka bipangujo ne malondololo ka kubulwa ntwelelo nansha mvuyo. Kakapityijibwa na mukulumpe nansha mwingidi wa mingilo wa bwino. Muneni ukepangula bevwaniki bipangujo byonso bibidi. Kadi ukatala shi bilomba nansha kebilombepo kutanga mavese atelelwe. Boba bapebwa kunena bakalondolola mu masekonde 30 ne kwika.

 5. Butangi bwa Bible: Minite iná. Kino kipindi kya bana ba masomo kikapebwa mwanā masomo mwana-mulume. Mwanā masomo ukatanga myanda imupelwe pampikwa ntwelelo nansha mvuyo. Mwimaniji wa kupwila ukata nakampata mutyima ku kukwasha bana ba masomo batange pambulwa kilubo, bivwanikwa biyampe, kwampikwa kushishikita, na kukoma buluji senene, na kuleulula diwi, na kwitūkija kufwaninwe, ne na kunena munenenwanga. Bipindi bimo bya kutanga mu Bible byobikalanga bīpi bikwabo nabyo bilampe, mutadi wa Kupwila kwa Būmi ne Mwingilo ufwaninwe kuta mutyima ku bwino bwa bana ba masomo paebabila bino bipindi.

6. Minite dikumi ne itano. Kitungo kya kino kipindi i kupa bonso mukenga wa kwiibidija mu mwingilo ne kwibakwasha balumbulule bwino bwabo bwa kwisamba ne manwa abo a kusapula ne kufundija. Bakulumpe nabo bakokeja kupebwa bipindi bya bana ba masomo ponso pobimweka’mba bidi na mvubu. Mwanā masomo ense ukabandaula kifundwa kya kumudingidila’po kimupelwe, ekale i kya mu boloshile Kutanga ne Kufundija nansha Sanswa Bantu kidi mu tuboko (parenthèses) ku mfulo kwa kipindi kyandi mu Kabuku ka ku Kupwila Būmi ne Mwingilo. Kyaba kimo, pa kino kipindi pakanza kutūlwa kipindi kya mīsambo. Kino kipindi kikapityijibwa na mukulumpe nansha mwingidi wa mingilo wa bwino.—Tala  musango 15 wisambila pa mwa kupityijija kipindi kya mīsambo.

 7. Mwa Kushilwila Mīsambo: Kino kipindi kya bana ba masomo kibwanya kupityijibwa na mwanā masomo mwana-mulume nansha mwana-mukaji. Mwanā masomo ne mwisambi nandi bafwaninwe kwikala bonso bana-balume nansha bana-bakaji, bakeshila shi enka i ba mu kisaka kimo. Bakokeja kupityija kipindi bashikete nansha kwimana.—Pa kuyukila’ko bivule bitala myanda ya mu kino kipindi ne miswelo ya busapudi, tala  musango 12 ne  13.

 8. Muswelo wa Kulondelela Kusangela: Kino kipindi kya bana ba masomo kibwanya kupityijibwa na mwanā masomo mwana-mulume nansha mwana-mukaji. Mwanā masomo ne mwisambi nandi bafwaninwe kwikala bonso bana-balume nansha bana-bakaji. (km 6/97 p. 2) Bakokeja kupityija kipindi bashikete nansha kwimana. Mwanā masomo ufwaninwe kulombola bya kunena pa kulondelela kusangela kwamwekele mu mīsambo yapityile.—Pa kuyukila’ko bivule bitala myanda ya mu kino kipindi ne miswelo ya busapudi, tala  musango 12 ne  13.

 9. Mwa Kulongela Bana ba Bwanga: Kino kipindi kya bana ba masomo kibwanya kupityijibwa na mwanā masomo mwana-mulume nansha mwana-mukaji. Mwanā masomo ne mwisambi nandi bafwaninwe kwikala bonso bana-balume nansha bana-bakaji. (km 6/97 p. 2) Mwanā masomo ne mwisambi nandi bakokeja kushikata nansha kwimana. Kino kipindi i kya kumwena’ko kya kifundwa kya Bible kyendejibwa kala. Kebilombepo kwikale ntwelelo nansha mvuyo poso enka shi ye kifundwa kya kudingidila’po mwanā masomo. Kebidipo na mvubu kutanga na diwi ditunduke misango yonso idi mu kipindi kyopityija, nansha byobwanya kulonga kino.

 10. Mwa Kushintulwila Nkulupilo Yobe: Shi kino kipindi kikapityijibwa bu mwisambo, nabya kikapebwa mwanā masomo mwana-mulume. Shi kikapityijibwa bu kya kumwena’ko, nabya kibwanya kupityijibwa na mwanā masomo mwana-mulume nansha mwana-mukaji. Mwanā masomo ne mwisambi nandi bafwaninwe kwikala bonso bana-balume nansha bana-bakaji, bakeshila shi enka i ba mu kisaka kimo. Mwanā masomo ufwaninwe kuleta malondololo adi padi tō kadi na bunwa ku kipangujo kidi bu mutwe wa mwanda, na kwingidija myanda idi mu bya kunyemena’ko byobamupele. Mwanā masomo shi usakile, ubwanya ne kwingidija dibuku dya kunyemena’ko papityija kipindi.

 11. Mwisambo: Kino kipindi kya bana ba masomo kikapityijibwa na mwanā masomo mwana-mulume, kadi ukanenwa bu mwisambo mu kipwilo. Shi mwisambo wimanine pa kakipindi ka mu mbwejo A ya mu boloshile Sanswa Bantu, mwanā masomo ukalombola patōkelela muswelo wa kwingidija vese (nansha mavese) mu busapudi. Kimfwa, ubwanya kulombola i kitatyi’ka kyotubwanya kwingidija vese’wa, shintulwilo ya vese, ne muswelo wa kulanguluka na muntu pa vese’wa. Shi mwisambo wimanine pa kakipindi ka mu kifundwa kya mu boloshile Sanswa Bantu, mwanā masomo ukesambila bininge pa mwa kwingidijija kakipindi’ka mu busapudi. Ubwanya kwisambila pa kimfwa kiletelwe mu kakipindi 1 ka kifundwa, nansha kwisambila pa mavese makwabo a mu kifundwa shi kulonga namino kudi na mvubu.

   12. Myanda ya mu Kipindi: Myanda idi mu uno musango ne ulonda’ko i ya kwingidija mu kipindi, “Mwa Kushilwila Mīsambo” ne “Muswelo wa Kulondelela Kusangela.” Poso enka shi i kilombolwe mu muswelo mukwabo, kitungo kya mwanā masomo i kusapula bubine bupēla bwa mu Bible bukwatañene na ngikadilo ya mwisambi nandi ne kwala kyalwilo kya mīsambo ilonda’ko. Mwanā masomo ukatonga mwanda ukwatañene na bilongeka ne na bisakibwa bya kwabo. Shi usakile ubwanya kwisambila pa dibuku nansha video ya mu Bingidilwa Byetu bya Kufundija Nabyo. Pa kyaba kya kupityija kya kumwena’ko na binenwa bikwatyile pa mutwe, bana ba masomo bafwaninwe kulombola bwino bwa kwisamba, pamo bwa kuta bantu mutyimau mutyima ne kunena munenenwanga.

   13. Miswelo ya Busapudi: Mwanā masomo ukakwatañanya byonso byobamulombwele kulonga na ngikadilo ya kwabo. Kimfwa:

1.  (1) Ku Njibo ne Njibo: Muno mubadilwa busapudi bwa ku njibo ne njibo—ekale i muntu mwine kwitekuna kaenda kukasapula, nansha kwingidija telefone, nansha mikanda—ne kulondelela kusangela kwamwekele mu mīsambo yapityile na muntu waasapwidile mu busapudi bwa ku njibo ne njibo.

2.  (2) Busapudi bwa Kiponka na Ponka: Mu uno muswelo wa busapudi, mulomba kukwatakanya mikenga ya kwalamuna mīsambo ya bukile-bukya ke busapudi. Mubadilwa kwisambila pa mulangwe wa mu Bisonekwa na muntu omwitana nandi ku kaji, ku masomo, mu kalatye, mu kyendwa-nakyo, nansha ku kifuko kyo-kyonso poenda mu myanda yobe ya bukile-bukya.

3.  (3) Busapudi bwa mu Bantu Bavule: Mu buno busapudi mubadilwa ne kusapula na kaditempa, kusapula mu bifuko bya busunga, kusapula mu bipito, nansha kusapula mu biwanza bya mityi, mu bishīko, ne kokwa konso kutanwa bantu.

 14. Mwa Kwingidijija Mavideo ne Mabuku: Mungya ngikadilo, mwanā masomo ubwanya kutonga kwingidija video nansha dibuku. Shi kipindi kidi na video, nansha’mba shi i mwanā masomo watonga kwingidija video, ufwaninwe kwisambila pa video’ya pampikwa’ko kwiitadija.

15. Pa kupwa kwimba lwimbo, minite 15 mibajinji ya kino kipindi ikekala na kakipindi kamo nansha tubidi tukwasha bevwaniki bengidije Kinenwa kya Leza mu būmi bwabo. Tuno tubipindi tukapebwa bakulumpe nansha bengidi ba mingilo ba bwino, poso’nka popa palombwelwe muswelo mukwabo, ino shi i bisakibwa bya penu, bikapebwa’nka mukulumpe kete. Shi i kipindi kilomba kwisamba na bevwaniki, muneni ubwanya kwipangula bipangujo bikwabo mu bula bwa kipindi kyandi kyonso kutentekela pa bipangujo biletelwe mu kipindi. Ntwelelo yandi ifwaninwe kwikala mīpi mwanda wa ekale’ko na kitatyi kya kwisambila pa myanda mikatampe ne mwanda wa kupa bevwaniki mukenga wa kunena’po. Shi kudi bwipangudi, nabya shi bibwanika, i biyampe yewa wipangulwa alondolwele ku lukala pa kyaba kya kulondololwela pa kyandi kifuko.

  16. Kifundwa kya Bible kya Kipwilo: Minite makumi asatu. Kino kipindi kikapebwa mukulumpe wa bwino. (Kokwa kudi bakulumpe batyetye, bengidi ba mingilo ba bwino babwanya kwingidijibwa.) Kitango kya bakulumpe kifwaninwe kutonga boba babwenye bisakibwa bya kwendeja Kifundwa kya Bible kya Kipwilo. Boba bakatongwa bafwaninwe kubwanya kwendeja’kyo mu muswelo mufwaninwe mwanda wa kulama kitatyi kitungīlwe kifundwa, kukomeneja bisonekwa bikatampe, ne kukwasha muntu ense utanwa’ko amone biyampe kamweno ka myanda ibandaulwa’ya. Bafwaninwe ne kubandaula kitatyi ne kitatyi bulombodi buletelwe bwa mwa kwendejeja bipindi bya bipangujo ne malondololo. (w23.04 p. 24, kapango) Shi myanda ya kubandaula mu yenga ibapu, ke biyampepo kulepeja kifundwa. Shi bibwanika, i biyampe kwikale mwendeji ungi ne mutangi ungi yenga ne yenga. Shi mwimaniji wa Kupwila kwa Būmi ne Mwingilo walombe kwipipija kifundwa, nabya mwendeji ukatala muswelo wa kwipipija’kyo. Ubwanya kutonga kuleka kutangija misango imo.

17. Minite isatu. Mwimaniji wa Kupwila kwa Būmi ne Mwingilo ukavuluja milangwe mikatampe ya mvubu mu byefundwa ku kupwila. Kadi ukalaya bya mu yenga wiya’ko. Shi kukidi kitatyi, ubwanya kutela majina a bana ba masomo bakapityija bipindi yenga wiya’ko. Poso enka shi i kilombolwe mu muswelo mukwabo, mwimaniji ye ukatanga misapu ya mvubu nansha kutangila kipwilo mikanda ya mvubu mu binenwa byandi bya mfulo. Misapu ya kyaba ne kyaba, pamo bwa ya mpangiko ya busapudi ne bukundwe, keifwaninwepo kutangwa ku lukala ino ikalamikwa ku tabulo wa misapu. Shi mwimaniji kadipo na kitatyi kya kuvuya misapu nansha kutanga mikanda mu binenwa byandi bya mfulo, nabya ukalomba batutu badi na bipindi mu kipindi kya Būmi bwa Bene Kidishitu bepipije bipindi byabo shi bikokejika. (Tala  musango 16 ne  19.) Kupwila kukafula na lwimbo ne milombelo.

18. Kupwa kwa kipindi ne kipindi kya bana ba masomo, mwimaniji wa Kupwila kwa Būmi ne Mwingilo ukafwija’ko ne kudingila mwanā masomo kintu kya munite umo mungya kifundwa kya kudingidila’po kyobamupele. Mwimaniji kakatelapo mwanda wa kudingidila’po mwanā masomo pamwita. Inoko, shi mwanā masomo wapu kipindi kyandi, mwimaniji ukamufwija’ko, kupwa ukatela mwanda wadi unenwe kumudingidilwa’po, kadi ukalombola pawaingila biyampe ne kumushintulwila na kanye mwanda waka i biyampe ate mutyima mu kine kifundwa’kya ne mwa kwibilongela. Mwimaniji ubwanya ne kwisambila pa myanda mikwabo ya mu kya kumwena’ko shi wamone amba ibwanya kukwasha mwanā masomo nansha bevwaniki. Shi kupwila kubapu nansha kitatyi kikwabo, madingi makwabo ōbaka a mu boloshile Sanswa Bantu, Kutanga ne Kufundija, nansha a mu dibuku Masomo a Mwingilo akokeja kupebwa mwanā masomo pafula pa mwanda waadi utadilwa’po nansha pa mwanda mukwabo.—Pa kuyukila’ko bivule, tala  musango 19,  24, ne  25 mulombwelwe mwingilo wa mwimaniji wa Kupwila kwa Būmi ne Mwingilo, ne mwingilo wa mudingidi mukwashi.

19. I kutupu wa kudya kitatyi, nansha ke mwimaniji wa ku Kupwila kwa Būmi ne Mwingilo mwine paleta madingi. Nansha Kabuku ka ku Kupwila Būmi ne Mwingilo byokatūngile kala kitatyi kikapityijibwa’mo kipindi ne kipindi, shi myanda ibapu kupityijibwa biyampe, ke biyampepo kubweja’ko myanda mikwabo mwanda’tu wa kufikila pa kitatyi kitūngilwe. Shi mwanā masomo wapityija kitatyi ukemikwa na bwino. Shi kudi badya kitatyi, mwimaniji wa Kupwila kwa Būmi ne Mwingilo nansha mudingidi mukwashi ukebadingidila pafula. (Tala  musango 24 ne  25.) Kupwila konso, ne ñimbo ne milombelo, i nsá 1 ne minite 45.

20. Shi kipwilo kidi na bupempudi bwa mutadi wa kipindi, mpangiko ikapita’nka munenenwe mu Kabuku ka ku Kupwila Būmi ne Mwingilo, bikeshila enka pa bino: Kifundwa kya Bible kya Kipwilo kya mu kipindi Būmi bwa Bene Kidishitu kikapingakanibwa na mwisambo wa mingilo wa minite 30 ukanenwa na mutadi wa kipindi. Kumeso kwa mwisambo wa mingilo, mwimaniji wa Kupwila kwa Būmi ne Mwingilo ukapituluka mu kīpi mu byefundwa ku kupwila kufika pene’pa, ne kulaya bya mu yenga wiya’ko, kunena misapu ya mvubu, kutanga mikanda ya mvubu, ebiya kaite mutadi wa kipindi. Shi mwisambo wa mingilo ubapu, mutadi wa kipindi ukavuya kupwila na lwimbo lwatongele. Ubwanya kunena tutu mukwabo alombele milombelo ya mfulo. Kekukekalapo tulasa tukwabo twa mu ludimi lwa kipwilo mu yenga wa bupempudi bwa mutadi wa kipindi. Kisumpi kibwanya kupwila nansha shi mutadi wa kipindi upempula kipwilo kitala kisumpi’kya. Inoko, kisumpi’kya kikelunga na kipwilo kitatyi kya mwisambo wa mingilo wa mutadi wa kipindi.

21. Yenga omudi na kitango, kekukekalapo kupwila kwa pa kipwilo nansha kumo. Kipwilo kikavulujibwa amba muntu ne muntu nansha kisaka ne kisaka kikabandaula myanda ya ku kupwila kwa mu mwine yenga’wa.

22. Shi Kivulukilo kibaponena mu difuku dya mu bukata bwa yenga (Dya Mwanzo kutūla ku Dya Butano), nabya Kupwila kwa Būmi ne Mwingilo kekukekala’kopo.

23. Kitango kya bakulumpe kikatonga mukulumpe umo wa kwingila bu mutadi wa Kupwila kwa Būmi ne Mwingilo. Uno tutu udi na kiselwa kya kupangika biyampe kuno kupwila ne kutala shi kupitanga mungya buno bulombodi. Ufwaninwe nyeke kwisambila pamo biyampe na mudingidi mukwashi. Enka pomukitambulatambula Kabuku ka ku Kupwila Būmi ne Mwingilo, mutadi wa Kupwila kwa Būmi ne Mwingilo ukatandika bipindi bya myeji ibidi bya ku kupwila kwa mu bukata bwa yenga. Muno mubadilwa bipindi ke bya bana ba masomopo, kimfwa bemaniji ba kupwila kwa mu bukata bwa yenga bene betabijibwanga na kitango kya bakulumpe enka na mobikadile ne ku bipindi bya bana ba masomo. (Tala  musango 3-16 ne  24.) Kitatyi kyapangika bipindi bya bana ba masomo, ufwaninwe kutūla mu ñeni myaka yabo, bwino bwabo, ne kuyuka shi mungya myanda idi mu kipindi bakabwanya kwisamba’yo na bwanapabo. Ukalonga muswelo umo onka ne papangika bipindi bikwabo bya ku kupwila. Kipindi kyo-kyonso, kikapānwa kumeso kwa kitatyi, shi i mafuku matyetye, i mayenga asatu kumeso kwa difuku dikapityijibwa kipindi. Ukebapa’kyo kupityila ku fomu Kipindi kya ku Kupwila kwa Būmi ne Mwingilo Wetu wa Bwine Kidishitu (S-89). Mutadi wa Kupwila kwa Būmi ne Mwingilo ufwaninwe kwikulupija’mba mampangiko a bipindi i malamikwe ku tabulo kulamikwanga bipindi. Kitango kya bakulumpe kibwanya kutonga’ko mukulumpe mukwabo nansha mwingidi wa mingilo mwanda wa kumukwasha. Inoko, bipindi ke bya bana ba masomopo i enka bakulumpe kete babwanya kwingidijibwa mwanda wa kwabanya bino bipindi.

24. Yenga ne yenga, mukulumpe umo ukemanina Kupwila kwa Būmi ne Mwingilo konso. (Kokwa kudi bakulumpe batyetye, bengidi ba mingilo ba bwino babwanya kwingidijibwa.) I aye ukateakanya binenwa bya ñanjilo ne bya mfulo. Uketa ba kupityija bipindi byonso, kadi kukwatañana na bungi bwa bakulumpe, nandi ukokeja kupityija bipindi bikwabo bya ku kupwila, nakampata bipindi bya kutadija video bitupu pampikwa kwisambila’po. Binenwa bya kutundulukila ku kakipindi kakwabo bifwaninwe kwikala bīpi bininge. Kitango kya bakulumpe kikatonga bakulumpe babwenye bisakibwa ba kwingila uno mwingilo wa bu mwimaniji. Bakulumpe ba bwino batongelwe’ba bakekala bemaniji mu bitatyi mu bitatyi. Mungya ngikadilo yomudi’mo, mutadi wa Kupwila kwa Būmi ne Mwingilo ukokeja kwingila bu mwimaniji divule kupita bakulumpe bakwabo ba bwino. Mukulumpe yense ubwenye bisakibwa bya kwendeja Kifundwa kya Bible kya Kipwilo, i mubwanye padi ne bisakibwa bya kwikala mwimaniji wa kupwila. Inoko, yukai’mba, mwingilo wa mwimaniji ulomba ne kufwija’ko bonso na buswe ne kupa bana ba masomo badi na bipindi madingi, shi basakilwa’o. Kadi i aye ufwaninwe kuta mutyima amba kupwila kupwe pa nsá mitungwe. (Tala  musango 17 ne  19.) Shi mwimaniji uswile ne shi ku lukala kudi kyaba, kukabwejibwa mikolo mikwabo ya bwimwa yakengidija pa kwita boba bapityija bipindi kitatyi kyobemana ku mikolo idi ku kineneno. Ne kadi, shi mwimaniji uswile, ukokeja kushikata ku lukala dya ku meza kitatyi kya Butangi bwa Bible ne mu kipindi Wiibidije Mwa Kusapwila. Kulonga namino kukakūla kitatyi.

25. Shi bikokejika, mukulumpe ukapebwa uno mwingilo ufwaninwe kwikala muneni upotolwele kunena. Kiselwa kya mudingidi mukwashi i kudingila bakulumpe ne bengidi ba mingilo pafula shi i kyendele’mo, pobapityija bipindi kampanda, ekale i ku Kupwila kwa Būmi ne Mwingilo, mīsambo ya bantu bonso, kwendeja nansha kutanga Kiteba kya Mulami, nansha Kifundwa kya Bible kya Kipwilo. (Tala  musango 19.) Shi pa kipwilo padi bakulumpe bavule baneni kadi bafundiji ba bwino, nabya mwaka ne mwaka mukashinta mudingidi mukwashi. Kebilombepo mudingidi mukwashi kudingila batutu kupwa kwa kipindi ne kipindi.

26. Bipwilo bikokeja kutūla’ko tulasa tukwabo shi kudi bana ba masomo bavule. Kalasa ne kalasa kafwaninwe kwikala na mudingidi wa bwino, nakampata mukulumpe. Inoko shi i kyendele’mo, mukokeja kwingidija mwingidi wa mingilo wa bwino. Kitango kya bakulumpe kikatonga yewa wa kwingila uno mwingilo ne kukwata butyibi shi bakeshinta nansha kuleka kwishinta uno mwingilo. Mudingidi ufwaninwe kulonda bulombodi budi mu  musango 18. Shi mudi na tulasa tukwabo, bana ba masomo bakenda’mo kupwa’tu kwa kakipindi Byabupeta bya ku Mushipiditu, ka mu kipindi Byabulēme bya mu Kinenwa kya Leza. Bakajokela mu kyumba mudi bantu bonso mwanda wa kulonda kipindi kya mfulo kya bana ba masomo.

27. Kukekala mavideo matongwe kala a kutadija ku kuno kupwila. Mavideo a kupwila kwa mu bukata bwa yenga akatūlwa mu JW Library® kadi abwanya kutadilwa mu bingidilwa bishileshile.

© 2023 Watch Tower Bible and Tract Society of Pennsylvania

S-38-KU 11/23