Yo nⱥdʼⱥji e Reino xits’kʼøji

Go chøtrʼꞹ kʼo go mbøsʼꞹ ro to̱jia

E JESÚS go mama ke pa̱ra̱ kjo ngeji o tsʼime. (Juan 10:14.) Ma da ntee pɇsʼi na mꞹbʼꞹ ke na joo ñe trjꞹmbeñe na joo xo nee texe kʼo na joo, ra nee ra bʼꞹbʼꞹ ko yo ntee ke tɇpiji o trju̱rꞹ e Jesús, ra chøtrʼꞹ ko na joo ngekʼua søø ra mⱥjⱥ rga mimi. Ga kjanu o kjogꞹ na nrrixu kʼꞹ menzumꞹ a Bélgica. Angeze bo mama:

“Ma yo testigo e Jehová go e̱ji kja in nzungø, me mi søxi in mꞹbʼꞹgø jesta mi nee ro pøtrʼꞹtsjɇgø. Ngekʼua me ro mⱥkjø ma go manji ke a ma xojñi ra nguarꞹji yo nrrumꞹ ñe dya kja ra supjreji, pe dya mi kreogø ke nge e Mizhokjimi kʼꞹ søø ro tsjayo. A mi e̱nkjø jñincho kjɇɇ ke dya kja mi pagø kja nitsjimi nangeje dya mi kjaji kʼo mi jichijinu. Zø dya kja mi pagø kja nitsjimi, amboo kja in mꞹbʼꞹgø mi pa̱rgø ke ma kjuana kʼo mi jizhiji yo testigo e Jehová, ke dya søø ra minkʼøji na joo ma e Mizhokjimi dya ra mbøxkꞹji.

”Nudyakʼua, ma o kjogꞹ janzi paa dya kja ro cheji ko yo testigo e Jehová. Dya mi søgø na joo amboo kja in mꞹnkʼø, nange mi kjagø kʼo dya ga joo, ngextrjo dʼa paa mi sꞹtʼꞹ yeje cajetilla trju̱sʼꞹ, xo mi sꞹtʼꞹgø droga. Xo mi nee ro ñagø ko in guelogø ke a bi nru̱u̱, jesta ro magø ko yo sɇrø. ¡Dya ga joo ke ro kjagøyo! Nangeje ma xømꞹ ma mi bʼꞹntsjɇgø mi søgø ke kja in nzungø mi bʼꞹnji yo demonio, me mi su̱gøkʼo. Nujyo o kjogꞹ na punkjꞹ zana, me mi su̱gø ke ro xomꞹ nange yo demonio mi kjakꞹgø kʼo dya ga joo.

”Dʼa nu paa ro penkʼø kja in nzungø, pe ro nzhodʼꞹ kja naño ñiʼi, ñe ro janrragønu ke mi ka̱ra̱ ntee ke mi jyⱥbʼⱥji na ngumꞹ. Me ro kentrjkʼø ke na punkjꞹ ntee mi pɇpjiji. Ma ro ma nuu, ro unꞹ nguenrra ke mi ngeji yo testigo e Jehová ke mi jyⱥbʼⱥji na ngumꞹ nu ja jmꞹrꞹji angezeji. Ro mbenkʼø ma yo testigo e Jehová mi poji kja in nzungø, ro mango ke me na joo ke texe yo ntee ro ka̱ra̱ji janzi mi ka̱ra̱ji angezeji.

”Me mi negø ke nrro ro moji kja in nzungø, ngekʼua ro ñagø ko yo kjuarma ke mi bʼꞹnjinu, xo ro øtʼꞹ e Diosi ke ro mbøxkꞹ. Ngekʼua ma o kjogꞹ dyecha paa go maa kja in nzungø nu testigo ke otrʼꞹ o xitsʼkø ke ro xørꞹ ne Biblia. Angeze o dyøngꞹ ma xi mi nee ro xørꞹ ne Biblia, ñe ro xikø ke ja̱a̱ mi negøkʼo. Nu testigo go xitsʼkø ke na joo ro magø kja yo jmurkjimi, ngekʼua ro xampjagø ñe ro magø. ¡Dya bʼe mi janrragø ntee nzakja angezeji! Me mi nee ro tøtrʼꞹ yo ntee ke me ro mⱥji ro potka sʼiyaji, ñe nudya mi bʼꞹnkø ko angezeji.

”Ndizi kʼe paa dya ri bʼɇzhgø ni ri dʼa jmurkjimi, ngoma ngoma ri pagønu. Ma go kjogꞹ jñii ngoʼo ke ro magø kja jmurkjimi, ro jɇzgø ro sꞹtʼꞹ trju̱sꞹ, xo ro pⱥzgø kja tsañabʼꞹ yo skuama ke mi jñaa astrología ñe yo bʼizhi ke mi nⱥmbʼⱥ e Diablo, nukʼua ro søgø na joo kja in mꞹbʼꞹgø xo dya kja mi ⱥrgø ke ro zonkꞹgø yo demonio. Nudyakʼua, ro minkʼø janzi ga nee e Jehová ñe ro ⱥtkø kʼo ju̱nsʼꞹ kja ne Biblia. Ñe ma go kjogꞹ jñii zana ro maa nⱥdʼⱥ o Jñaa e Yosi kja o ngumꞹ yo ntee ko yo testigo e Jehová. Ma o kjogꞹ jñanto zana ke ro pjꞹrꞹ ro jmurꞹ ko angezeji, ro juibʼi kja nrreje ñe ma go kjogꞹ ye paa ke ro juibʼi kja nrreje ro pjꞹrꞹ ro pɇpji nzakja precursora auxiliar.

”Me ri unꞹgø pøjø e Jehová ke me go mbøxkꞹgø, a ro tøtrʼꞹ kʼo me pjøxkꞹgø ra mⱥjⱥ rga minkʼø, o trju̱u̱ e Jehová je nzikja na torre ke me na zɇzhi, ngekʼua ro unkʼø nguenrra ke e Jehová ra mbøxkꞹgø ñe ra mbøkꞹgø. (Poverbios 18:10). Ri kjinkʼø nzakja e salmista ma go mama: ‘D’a paa kja in nzunge, mazi na joo ke kja dyaja ngumꞹ. Mazi ri nee ra bʼꞹnkʼø kja o ngumꞹ in Diosigø ke nu kʼꞹ ra bʼꞹnkʼø ko yo na sʼonteji‘ .”

Nu ne nrrixu ke mi pɇsʼi na mꞹbʼꞹ ke me na joo o tøtrʼꞹ kʼo go mbøsʼꞹ ro to̱jia. Xo akjanu, bʼꞹbʼꞹ na punkjꞹ ntee ke søø ra tøtrʼꞹkʼo, ma ra pɇsʼi na mꞹbʼꞹ ke me ma joo ñe ra jodʼꞹ e Jehová.