1. ¿Pje go mbita e Jesús ro tsjaji yo nziyo mbajmo̱, ñe pje go tsjaji?

 Kʼo discípulo e Pedro, e Andrés, e Santiago, ñe e Juan angezeji mi mbajmo̱ji. Mi go ngentrjikʼua ma e Jesús o mbitaji: “xⱥdʼⱥbi añekjua nangeje ra kjakʼobi kʼꞹ ri pabi ntee” b ¿Pje go tsjaakʼo kʼo bʼɇzo? Nu Jñaa e Mizhokjimi mama: “Nu ndajmekʼꞹ o jyɇzi kʼo o tʼøsꞹbi, kjanu o ndꞹntʼꞹbi axꞹtjꞹ angeze” (Mat. 4:​18-​22, Yo dʼayʼo jñaʼa mižokjimi kʼwaja ga tʼopjü kja jñatjo, ro junsʼꞹ kʼua jaga opjꞹjidya). Nu kʼo ro tsjaaji ro potꞹji kʼe bʼɇpji ke mi kjaaji, ngekʼua, nudya a rgo mbaaji trʹee, dya kja rgo mbaaji jmo̱o̱ (Luc. 5:​10). Kja ne padya, nrre mbitazꞹji e Jesús trexe yo ntee ke sʼiyaji yo na kjuana (Mat. 28:19, 20) ¿I natsʹkʹe, ya na paage ntee dya?

2. ¿Pjenga ni jyodʼꞹ ra pa̱ra̱ji ma ra jichiji yo ntee, ñe pje ra mbøxkꞹji ra kjajiyo?

² Bʼꞹma a me mezhe ke i xørge kʼo mama nu Biblia i ya gi nee ri ma nⱥdʼⱥ KjimI. ¿Gi su̱u̱ ri tsjaa kʼo go mama e Jesús? Dya ri su̱u̱. Bʼꞹma ya gi pa̱ra̱ kʼo nee ra mama ma ra kjaaji kʼo nee e Jesús. Na kjuana kʼo mama ne Biblia ke e Pedro ñe kʼo o dyoji o jyɇziji kʼo o trʼozʼꞹji “dabadiji”. E Pedro ñe kʼꞹ nu kjuarma e Andrés dabadiji o tsjaabi ko go mama e Jesús. Nange a bi mezhe ñanto zana ke a bi mba̱ra̱bi e Jesús ke mi ngeje nu Mesías (Juan 1:​35-​42). Xo akjanu, nutsʼkʼe a gi pjechi kjo ngeje e Mizhokjimi Jehová ñe e Jesús, i ma xi gi neeri pjechi. Ni jyodʼꞹ ke ante ke ri tsjaayo, ri kjijñige na joo texe kʼo ri sɇchi. ¿Pje go mbøsꞹ e Pedro, ñe e Andrés ke ro tsjaayo?

3. ¿Pje ma nziyo cosa ra mbøxkꞹji ra kjaji kʼo go mama e Jesús?

³ Kʼo otrʼꞹ o discípulo e Jesús bʼemi mi nee ro tsjaajikʼo, mi pa̱ra̱ji na joo, i dya ro zu̱ji i mi pa̱ra̱ji jargua tsjaajikʼo. Nujyo, me go mbøsꞹ jargua mbaaji ntee. Kja ne artículo ra mbøxkꞹji jarga pjechpʼijikʼo.

4. ¿Pjenga mi pajmo̱o̱ e Pedro?

⁴ E Pedro mi pjexi mbɇjmo̱ ngekʼua ro unꞹ pje ro sii o bʼedyi. Eñe dya ngextjo mi nee ro pɇpji, angeze nrre mi mⱥpⱥ kʼo jmo̱o̱ ma mi paaja (Juan 21:​3, 9-​15). Xo o pjechi ro sʼiya ma mi paaja kʼo ntee. E Jehová, go mbøsꞹ ro tsjaa na jookʼo​(Hech. 2:​14, 41).

5. a) Nzi ga mama kja Lucas 5:​8-​11, ¿pjenga mi su̱u̱ e Pedro? b) Ma na ntee ke ri xøpʼꞹji ra zu̱u̱ nzakja e Pedro, ¿pje ra mbøsʼꞹ?

⁵ Kʼo ra mbøxkꞹji ra jichiji yo ntee nge kʼꞹ ri sʼiyagøji e Jehová. Ma ri su̱ji ra kjajiyo, nu sʼiyaji e Jehová ra mbøxkꞹji. Ma e Jesús o mbita e Pedro ro tsjaa o mbɇjmo̱ yo ntee, go xipji: “Dya ri su̱ge” (xørꞹ Lucas 5:​8-​11). E Pedro dya mi su̱u̱ kʼo ro kjogꞹ ma ro mbɇzhi discípulo. E Jesús kja bi paaja na punkjꞹ jmo̱o̱ ko o zɇzhi e Mizhokjimi, i e Pedro mi kʼo dyⱥtrjo ma o jñanrrakʼo, ngekʼua mi kjijñi ke angeze dya mi søø ro pɇpji nzakja e Jesús. ¿I natsʹkʹe? ¿Gi kjijñige ke me na zʼɇzhi ri nge o discípulo e Jesús? Ma jegakjanu, kʼo ra mbøxkʼꞹ nge, ma mazi ri sʼiya e Jehová, e Jesús ñe yo trʹee, akjanu me ri ñee ri pjøsʼꞹ e Jesús i ra ngetsʼɇ dʼa mbɇjmo̱ntee​(Mat. 22:37, 39; Juan 14:15).

6. ¿Pjenga ri jichiji yo ntee o Jñaa e Mizhokjimi?

⁶ Ra janrraji kʼo pjøxkꞹji ra jichiji yo ntee o Jñaa Mizhokjimi. Daja, ri nee ra kjaaji kʼo o mama e Jesús: “Mokjeji, ri ma xøpꞹji yo ntee” (Mat. 28:19, 20). Kʼꞹ na yeje, ngeje ke yo ntee “me søxiji i dya kjo kjapꞹ nguenda”, me ni jyodʼꞹ ra mba̱ra̱ji kʼo ra tsjaa nu Reino e Mizhokjimi (Mat. 9:​36). E Mizhokjimi Jehová me xo nee ke ra salbaji texe yo ntee, i ñe ra mba̱ra̱ji kʼo na kjuana kʼo nee angeze​(1 Tim. 2:4).

7. Nzi ga mama kja Romanos 10:13-​15, ¿pjenga me na joo ra jichiji yo ntee?

⁷ Kʼo ra mbøxkʼꞹ ri jichi yo ntee, ngeje kʼꞹ ri kjijñige jarga mbøsʼꞹ yo ntee ma ra mba̱ra̱ji. Nu mbɇjmo̱ paa yo jmo̱o̱ ngekʼua ra sii o ra mbøø, i nutskoji “ri paagoji” yo trʹee, ngekʼua ra salbaji in bidaji​(xørꞹ Romanos 10:13-​15; 1 Tim. 4:​16).

8, 9. ¿Pje ni jyodʼꞹ ra mba̱ra̱ na mbajmo̱, ñe pjenga?

⁸ Ma o bʼꞹbʼꞹ e Jesús kja ne Xoñijomꞹ, kʼo Israelita kʼo mi mbajmo̱ji mi jyodʼꞹ ro mba̱ra̱ji pje ma jmo̱o̱ ro mbaaji (Lev. 11:​9-​12). Xo mi jyodʼꞹji ro mba̱ra̱ji ja ro chøtrʼꞹji. Yo jmo̱o̱ jodʼꞹji joreje nu ja ra nga̱ra̱ji ñe nuja bʼꞹbʼꞹ na punkjꞹ pje ra siji. ¿Ni jyodʼꞹ ra mba̱ra̱ji pje ma hora ra ma ngamaji yo jmo̱o̱? Ra nuji pje go mamabi yeje kjuarma, daja ke mi tsjaja kja kʼe isla del Pacífico i kʼꞹ daja mi ngeje misionero. Kʼe kjuarma kʼꞹ mi tsjaja kja ke isla go xipji kʼe misionero, ra xo̱rꞹ ra ma paabi jmo̱o̱ i kʼe misionero go mama: “a na joo, ra e̱kjø a las nueve  ma xo̱rtjo”. Kʼe kjuarma isleño o nrrꞹrꞹ: “Iyo dya nge ma ra neegobi, nge nu hora ma bʼꞹbʼꞹ yo jmo̱o̱”.

⁹ Akjanu kʼo mbɇjmo̱ mi jingua, mi pedyeji nu hora ke rgo chøtrʼꞹji kʼo jmo̱o̱. Xo kʼo discípulo e Jesús mi poji kja templo, kja sinagoga, kja ngumꞹ, kja choma, ngekʼua ro jichiji kʼo ntee o Jñaa e Mizhokjimi (Hech. 5:​42; 17:17; 18:4). I nutskoji xo ni jyongꞹji ra pa̱rgøji pje ma hora søø ra tøtrʼꞹji yo ntee kja in ngumꞹji. Xo ni jyodʼꞹ bʼꞹma ra potꞹji yo hora ngekʼua søø ra tøtrʼꞹji yo ntrʼee ma ra ma nⱥdⱥjikjimi, nzakja kʼo kjaa yo mbajmo̱ ngekʼua ra tøtrʼꞹji na punkjꞹ kʼo ra jichiji yo Jñaa e Yose​(1 Cor. 9:​19-​23).

10. ¿Pje ma herramientas dʼakøji nu organización e Jehová?

¹⁰ Yo mbɇjmo̱ pɇsʼiji texe kʼo herramienta kʼo ni jyodʼꞹji ngekʼua ra søø ra sꞹrꞹji kʼo jmo̱o̱. Xo ñezgøji ri pɇskʼøjiyo. Mi jingua e Jesús o xipji kʼo o discípulo jargua mbaaji bʼɇzo. O xipji kʼo søø ro jñꞹnꞹji ma ro maa zopjꞹji kʼo ntee, i pje ma jñiñi ro moji i pje ro manji (Mat. 10:​5-7; Luc. 10:​1-​11). Nudya, nu organización e Jehová dʼakøji nu kit de enseñanza, ke pɇsʼi yo herramienta ke ni jyongꞹji, nujyo a ro unꞹji nguenda ke me na joo ga mbøxkꞹjiyo, nange xo jitsiji jarga kjapji ma ri nⱥdⱥjikjimi. c Texeyo pjøxkꞹji dya ra su̱ji ma ra zopjꞹji yo ntee (2 Tim. 2:​15).

11. ¿Pjekja ni jyodʼꞹ ra chalaji ngekʼua ra jichiji yo ntee?

¹¹ Ma ri pjexi mbɇjmo̱, dya pje ri su̱u̱, nangeje kja nu trjazapjꞹ dya gi pa̱ra̱ pje ma nrrumꞹ ra kjogꞹ nzakja ma ra e̱je̱ na trjanrrajma ke me na zɇzhi. Yo mbɇjmo̱ntee xo ni jyodʼꞹ dya pje ra su̱ji. Ma kjo ri pjꞹtrʼpꞹji dʼa xørkjimi, i yo ntee pa̱køji ke ri testigoji e Jehová, bʼꞹma ra kjogꞹzꞹji nrrujmꞹ ke nzikja dʼa “trjanrrajma”, nzakja yo oposición ko in bʼedyiji, i nu kʼo ri joji ra nrrengeji i dya ra nee ra dyⱥrⱥji nu Jñaa e Yose. Ya ri pa̱rgojiyo, ke ra kjogꞹzꞹji akjanu, e Jesús o xipji kʼo o discípulo, dyⱥrⱥji kʼo ra xitsʼkʼøji, ra penkʼeji nuja bʼꞹbʼꞹ ntrʼee kʼo mi na sʼoo​(Mat. 10:16).

12. Nzi ga mama kja Josué 1:​7-9, ¿pje ra mbøxkꞹji ra chalaji?

¹² ¿Pje ra mbøxkʼꞹ ngekʼua dya ri su̱ge? Otrʼꞹ ri pa̱rge ke e Jesús nge nu manda nrreze ajensʼe i xitsi jarga kjapji ne bʼɇpji (Juan 16:33; Apoc. 14:14-​16). Dya ri jyɇzi ri xørꞹ nu Jñakjimi ngekʼua ri pa̱ra̱ ke e Jehová mama ke ra mbøkʼꞹ (Mat. 6:​32-​34). Ma mazi ri kreoge e Jehová, dya ri su̱u̱. E Pedro ñe kʼo dyaja discípulo me mi kreoji e Yose ngekʼua go jyɇziji in bʼɇpjiji i go moji ko e Jesús. A gui tsjage akjanu ma gui xipji kʼo in jobi, ñe in bʼedyike mi xørge nu Biblia i gi page kja yo jmurkjimi ko yo testigo e Jehová. Xo ya bi jyɇzge nrrexe kʼo na sʼoo i nudya gi kjaage ja ga nee e Mizhokjimi Jehová. Akjanu ñetse ke gi kreoge e Yose i dya kja i su̱u̱. Ma sido ri kreoge e Tsʼitajensʼe Jehová dya pje ra pitsʼi nangeje e Jehová ra mbøkʼꞹ texe yo paa jango nzi ri bʼꞹnkʼe​(xørꞹ Josué 1:​7-9).

13. Ma ri dyøtꞹ e Jehová ñe ri mbeñe ja ga kjaa kʼo ri xørꞹ, ¿ja rga mbøxkʼꞹkʼo dya ri su̱ge?

¹³ ¿Pje ra mbøxkʼꞹ ngekʼua dya ri su̱u̱? Ri dyøtꞹ e Jehová ke ra mbøxkʼꞹ ngekʼua dya kjo ri su̱ge (Hech. 4:​29, 31). Angeze ra dyⱥrⱥ kʼo i otꞹ i dya ra jyɇtsʼkʼi. Trexe yo paa ra mbøxkʼꞹ. Xo na joo, ri mbeñe jaba mbøsꞹ e Jehová kʼo mi ⱥtⱥ mi jingua. Ñe ri mbeñege jaba mbøxkʼꞹge rgui sɇchi kʼo nrrumꞹ kʼo a bi kjogꞹ i na pjøxkʼꞹdya ngekʼua gi potꞹ jargi mimigedya janzi ga nee angeze. Ma e Jehová o tsjapꞹ ro xo̱gꞹ kʼe nrreje kja kʼe mar Rojo, ngekʼua dya ri su̱ge, søø ra mbøxkʼꞹ ri tsjage o discípulo e Cristo (Éx. 14:13). Ri ñechʼe kja i mꞹbʼꞹ nzakja kʼe salmista ma o mama: “Jehová nge kʼꞹ pjøxkø, dya ra su̱gø. ¿kjo pje ra tsjakø?”​(Sal. 118:6).

14. ¿Pje jitsʼkøji kʼo go kjogꞹ e Masae ñe e Tomoyo?

¹⁴ Nu kʼo xo ra mbøxkʼꞹ nge ma ri kjinkje, jagua mbøsꞹ e Jehová kʼo trʹee ke mi manji ke dya mi søø pje ro tsjaaji, nakʼua dya kja pje go zu̱ji. Ra nuji kʼo go kjogꞹ na kju̱ʼu̱ ke ni chju̱u̱ Masae. Angeze me mi su̱u̱ ro zopjꞹ kʼo trʹee o Jñaa e Mizhokjimi. Kʼꞹ ro ñabi ko dʼa trʹee ke dya mi pa̱ra̱ me mi su̱u̱, mi chenjui ma ro nrresʼe na tjatrʼeje ke me ma nrraa. Kʼo o tsjaa, mazi go xørꞹ o jñaa e Yose i nukʼo go mbøsʼꞹ ke ro sʼiya e Mizhokjimi ñe yo trʹee. Go unꞹ nguenda ke me na zɇzhi yo paa yo ri ka̱ra̱ji i yo ntee me ni jyodʼꞹ ra mba̱ra̱ji kʼo ra tsjaa e Yose. Ngekʼua dya kja go su̱u̱ i go pjexi precursora regular. Akjanu e Mizhokjimi Jehová xo søø ra mbøsꞹ yo kjaa na pjꞹrꞹ ga nⱥdⱥjikjimi ngekʼua dya ra zu̱ji, jaga mama Josué 1:7,9. Ra nuji nu kʼo o kjogꞹ ko ne kju̱ʼu̱ ke ni chju̱u̱ Tomoyo. Kʼe paa ma go mbꞹrꞹ go nⱥdⱥkjimi, go mbedye dʼa nrrinxꞹ kʼꞹ me mi ꞹdʼꞹ i go matrʼꞹ: “¡Dya ri nee ra pa̱rgo yo testigo e Jehová!” i go ngotrʼpa na zɇzhi kʼe ngoxtrʼi. Dya go su̱u̱ e Tomoyo, i go xipji kʼꞹ mi dyojui: “¿I jñanrrayo? Dya pje ro mangø, i ne nrrinxꞹ a mi pa̱ra̱ ke mi ngezgøbi testigo e Jehová. ¡Mi na joo rgua søgø!”. Nudya e Tomoyo a ngeje precursora regular.

15. ¿Ja ga ngeje na ntee kʼꞹ kjaa kʼo ni jyodʼꞹ, ñe pjenga me na mubi para yo ri testigo e Jehová ra kjajikʼo?

¹⁵ Kʼo nee ra mama disciplinado, kʼꞹ kjaa janzi ga xiji kʼo ni jyodʼꞹ ra tsjaa. Dʼa mbɇjmo̱ kʼꞹ pjechi ra pɇpji na joo, ni jyodʼꞹ tsʼirgananga, ra pɇpji asta ma ra nguarꞹ nu faena i dya ra jyɇzi ra mbaa kʼo jmo̱o̱ zø ri bʼꞹbʼꞹ nrrajma. I nutsʼkojidya, xo ra kjaagoji nrrexe kʼo ni jyodʼꞹ ma ri nee ra sɇchiji rganⱥdⱥjikjimi​(Mat. 10:22).

16. ¿Pje ra mbøxkꞹji ra kjaji kʼo ni jyodʼꞹ?

¹⁶ Yo trʹee dya ri nee ra kjaaji ndexe kʼo ni jyodʼꞹ. Ri nee ra kjaatrji chikileje kʼo ni jyodʼꞹ kʼꞹ dya nrra ga zɇzhi. Ma ra kjaji texe kʼo na joo, ni jyodʼꞹ dya ra jɇzi ra kjaaji texe kʼo ni jyodʼꞹ. Ngekʼua ma ri nee ra kjaji kʼo na joo, ni jyongꞹji kjo ra mbøxkꞹji. Ma ra øtꞹji e Mizhokjimi Jehová, angeze ra dyakꞹji nu zɇzhkjimi ngekʼua ra mbøxkꞹji.​(Gál. 5:​22, 23).

17. Nzi ga mama kja 1 Corintios 9:​25-​27, ¿pje go mama e Pablo ke me mi jyodʼꞹ ro tsjaa?

¹⁷ E apóstol Pablo mi kjaa texe kʼo mi jyodʼꞹ ro tsjaa, go mama ke mi jyodʼꞹ ro “yabʼꞹ” in cuerpo ngekʼua ro tsjaa kʼo ma joo (xørꞹ 1 Corintios 9:​25-​27). Xo go xipji kʼo mi ⱥtⱥji e Cristo ke “ro tsjaaji na joo trʼexe kʼo mi jyodʼꞹ ngekʼua ro mbedye na joo texe kʼo mi kjaaji” (1 Cor. 14:40). Ngekʼua ni jyongꞹji ra kjaaji texe kʼo nee i janzi ga mama e Diosi i nujyo chenjui ke dya ra jɇziji ra paaji ntee​(Hech. 2:​46).

18. ¿Pje ra kjaji ngekʼua e Jehová ra mⱥjⱥ?

¹⁸ Dʼa mbɇjmo̱ ñetsʼe ke pɇpji na joo ma paa na punkjꞹ jmo̱o̱. Nutskoji dya søø ra manji ke ri kjaji na joo ngextjo ma rgua ziji o ri pjøsʼꞹji na punkjꞹ ntrʼee ke ra ngichʼiji kja nu organización e Yose (Luc. 8:​11-​15). Ma sido ra ma xøpꞹji yo ntee yo dʼadyo jñaa e Yose, e Jehová, me ra mⱥjⱥ ko nu bʼɇpji ke ri kjaagoji. ¿Pje kja? Nangeje ri ⱥtⱥji e Palesito Jehová ñe e Jesús kʼꞹ ngeje nu trʼii​(Mar. 13:10; Hech. 5:​28, 29).

19, 20. ¿Pje kjakøji ke xi ra jichiji yo ntee yo padya?

¹⁹ Bʼꞹbʼꞹ janzi país ke jɇziji ra paaji jmo̱o̱ janzitrjo zana ma kjɇɇ. Yo mbɇjmo̱ pa̱ra̱ji ke ma a ra nguartjo yo zana ke søø ra mbaaji yo jmo̱o̱, mazi ni jyodʼꞹ ra pɇpjiji na punkjꞹ. I nutskoji, kʼo kjaakøji ke ra xⱥdʼⱥji rga jodʼꞹji kʼo ntee ke nee ra mba̱ra̱ji o Jñaa e Mizhokjimi, nge ke ri pa̱rgøji ke dya kja ra mezhe ra zⱥdʼⱥ kʼe paa ma e Mizhokjimi ra chjotꞹ texe yo na sʼonte. Dya kja ra mezhe yo paa ke søø ra pjøsʼꞹji ra salbaji yo trʹee. I dya ri tsjijñige ke ri tsjageyo ma ri bʼꞹbʼꞹ na joo i dya ri pɇsʼi nrrumꞹ, ngema kja ri ma zopjꞹ yo ntee​(Ecl. 11:4).

²⁰ Ngedya ma xi gi nee ri pa̱rge kʼo nee e Jehová, xørge na punkjꞹ nu Biblia, dya ri su̱u̱ i ri tsjage janzi ga nee e Diosi. Pɇkjedya ko yo kjuarma ke a kjogꞹtrjoji ocho millones ke na paaji ntee kja texe ne Xoñijomꞹ, akjanu ri søø ri jñu “nu mⱥjⱥ je ni ñe̱je̱ kja e Jehová” (Neh. 8:​10). Tsjagedya kʼo mazi ri søø hasta ma ra mama e Jehová ke dya kja ra nⱥdⱥji. Kja nu xørꞹ ke ba e̱je̱, ra nuji jñii kʼo ra mbøxkꞹji ngekʼua xe ra søø ra nⱥdⱥji nu Reino e Mizhokjimi.