Baibul ai Baita Diba Ḡaudia
Baibul na Dirava ena hereva, hari ina negai ita baine duruda diba. Eda mauri baita moalelai bona Dirava ena lalonamo baita abia daladia e hadibadamu. Danu ini henanadai e haerelai:
1 Dirava be daika?
2 Dirava be ede ba dibaia toma?
3 Baibul e torea tauna korikorina be daika?
4 Baibul ena hereva saiens dalanai be maoro, eiava?
5 Baibul ena hereva badana be dahaka?
6 Baibul ese Mesia be ede e perovetalaia toma?
7 Baibul ese iseda nega be ede e perovetalaia toma?
8 Dirava ena kerere dainai taunimanima e hisihisimu, eiava?
9 Dahaka dainai taunimanima e hisihisimu?
10 Baibul ese vaira negana be ede e gwauhamatalaia toma?
11 Ta e masemu neganai, dahaka e varamu?
12 Mase taudia bae mauri lou diba, eiava?
13 Baibul ese ḡaukara be ede e herevalaia toma?
14 Moni hekwakwanaidia be ede ba hanai toma?
15 Edena dalai ba moale diba?
16 Edena dalai lalohekwarahi ba haheaukalaia diba?
17 Edena dalai Baibul ese emu ruma bese baine durua diba?
18 Edena dalai Dirava ba raka henia kahi diba?
19 Baibul bukadia lalodiai dahaka mimia?
20 Edena dalai emu Baibul duahiduahi amo heduru bavabi diba?
BAIBUL SIRIDIA BA DAVARI DALANA
Baibul ai buka iboudiai na 66. Bona kaha rua ai e hapararadia: Ginigunana be, Heberu bona Aramia gado Revarevadia (“Taravatu Gunana”), iharuana be, Kristen Grik gado Revarevadia (“Taravatu Matamatana”). Unu buka momo na karoa bona siri ai e haridia. Ina buklet ai siri e toredia neganai, buka ladana murinai e atoa nambana na karoa, bona murina nambana na siri. Heḡereḡere, Genese 1:1 anina na Genese karoa 1, siri 1.
