Иегова Юмо дене молан палыме лияш кӱлеш?

КУЗЕ шонеда, илышдам иктаж-мо саемден кертеш мо? Шуко еҥын ойлымыжо почеш нунын илышышт Юмым пален налмылан кӧра саемын. Тиде шинчымаш тыланда пайдам кызытат, ончыкыжымат конда.

Иегова Юмо, Библийын Авторжо, мемнан деч тудым пален налмынам вуча. Псаломым мурышо возен: «Тек палат: Тыйын лӱмет — Господь [«Иегова», УТ], да чыла мландылан Кӱшылсӧ Юмо Ик Тый гына улат». Юмо умыла: тудын нерген шинчымашым налмаш лач мыланна пайдам конда. Тудо манеш: «Мый, Иегова, тыйын Юмет улам, мыйын туныктымашем тыланет пайдале». Кӱшылсӧ Иегова Юмым палымаш мыланна могай пайдам конда? (Псалом 82:19; Исаия 48:17).

Мутлан, Юмо илыш нелылыкым сеҥаш полшышо шинчымашым пуа, шӱм-чон тынысым да ончыкылыклан пеҥгыде ӱшаным пуа. Тыгак Иеговам сайрак пален налмылан кӧра ме шуко еҥым тургыжландарыше йодыш-влаклан вашмутым пален налына. А еҥ-влакын могай йодышышт лектеш?

Илышдан смыслже уло мо?

Айдеме тукым науко да технике шотышто кугу кӱкшытыш шуын гынат, еҥ-влак ожнысо семынак илыш дене кылдалтше йодыш-влакым пуэдат: молан мый илем? Могай ончыкылык мыйым вуча? Илышемын могай смыслже? Нине йодыш-влаклан айдеме вашмутым пален ок нал гын, илышыштыже тудо чынжымак пиалан огеш лий. Шукышт тиде шонымаш дене келшат. Илыш смысл шотышто 1997-ше ийыште Германийыште йодыштмаш эртарыме лийын. Йодыштмо еҥ-влак гыч пелыжлан чӱчкыдын але южгунам чучын, пуйто илышын смыслже уке. Очыни, тендан кундемыштат еҥ-влак тыгакак шонат.

Кунам айдемын илыш смыслже уке, илышыже пустаҥеш да ончыкылыклан тудлан планым ышташ йӧсӧ. Илыш пуста ынже лий манын, еҥ-влак карьерым ышташ да пояҥаш тыршат. Туге гынат тиде нунылан чын пиалым огеш кондо да илышышт пустан чучеш. Тидын верч южыштын илаш кумылышт йомеш. Тыге ик мотор самырык ӱдырамаш дене лийын. Тудын нерген «Интернэшнл геральд трибюн» газетыште возеныт. Тудо моткоч поян ешыште кушкын. Туге гынат тудо шкенжым пиалдымын чучын да илышын смыслжым ужын огыл. Сандене тудо снотворныйым йӱын да колен. Очыни, теат паледа тыгай еҥ-влакым, кӧ пиалдымылан кӧра шкем шке пуштын.

Южо еҥ-влак шотлат, пуйто науко чыла илыш йодышлан вашмутым пуэн кертеш. Ик немыч журналыште тыге возымо: «Науко шуко мом умылтарен кертеш, но духовный да нравственный шотышто айдеме тукымым виктарен огеш керт. Эволюций нерген теорий да вес научный теорий-влак лыпландарымашым да ончыкылыклан пеҥгыде ӱшаным огыт пу». Научный шымлымаш-влак мыланна илыш дене кылдалтше пӱртӱс цикл ден процесс-влак нерген палдарат. Но науко умылтарен огеш керт, молан ме илена да могай ончыкылык мемнам вуча. Научный йодыш-влакым гына шымлен, илыш смысл нерген йодыш-влаклан вашмутым она му. «Зюддойче цайтунг» газетыште возымо дене келшышын, кызыт еҥ-влаклан виктарымаш ожнысо жап деч чотрак кӱлеш.

Чылажымат ыштыше гына мемнам кӱлеш семын виктарен кертеш. Тудо еҥ-влакым ыштен, сандене тудо палышаш, молан ме илена. Библий умылтара: Иегован шонымыжо почеш еҥ-влак мландым темышаш да тудын верч тыршышаш ыльыч. Еҥ-влак чыла пашаште Юмын койышыж-влакым ончыктышаш ыльыч, мутлан, чын ыштымым, уш-акылым да йӧратымашым. Кунам ме пален налына, молан Иегова мемнам ыштен, ме илышын чын смыслжым умылен налына (Тӱҥалтыш 1:26—28).

Мом ышташ лиеш?

Очыни, те тыгай йодыш-влаклан вашмутым кычал муын огыдал: молан мый илем? могай ончыкылык мыйым вуча? илышын могай смыслже? Библий Иегова дене сайрак палыме лияш каҥашым пуа. Иисус каласен: «Курымашлык илыш — тиде Тыйым, ик чын Юмым, да Тыйын колтымо Иисус Христосым палымаш». Тыгак Библий Юмылан йӧрышӧ койыш-влакым шукемдаш тарата, поснак йӧратымашым. Эше тудо мемнам Юмын Кугыжанышын вуйлатыме тӱняштыже илашлан уло вийым пышташ тарата. Тыге ыштеда гын, илышдан чын смысл лектеш да ончыкылыклан пеҥгыде ӱшанда лиеш. Тылеч посна те илыш йодышда-влаклан вашмутым муыда (Иоаннын 17:3; Экклезиаст 12:13).

Тиде тыланда могай пайдам конден кертеш? Айста пален налына, кузе Ханс * лӱман пӧръеҥлан тиде полшен. Ханс Юмын улмыжлан ӱшанен гынат, тиде тудлан пайдам конден огыл. Хансын илышыже наркотик да мотоцикл-влак дене кылдалтме лийын. Тыгак тудо яжарланен да закон-влакым пудыртен илен. «Мыйын илышем пуста лийын. Мый пиалан лийын омыл», — тудо шарналтен ойла. Коло вич ияш наре лиймыж годым Ханс Юмо нерген шукырак пален налаш шонен пыштен да Библийым тӱткын лудаш тӱҥалын. Иегова нерген шукырак пален налмеке да илышын смыслжым умылымеке, Ханс илышыжым вашталтен, тынеш пурен да Иегован Таныкше лийын. Пытартыш лу ий тудо кечыгут служитлыше улеш. Тудо ойла: «Иеговалан служитлымаш — эн сай илыш корно. Тидым нимо дене таҥастараш огеш лий. Иегова дене палыме лийын, мый илышемын смыслжым пален налынам».

Конешне, еҥ-влакым илыш смысл нерген гына огыл йодыш-влак тургыжландарат. Кажне кечын илыш начаремеш, сандене еҥ-влак тыгак вес йодышлан вашмутым пален налнешт.

Молан ойго-влак лиедат?

Ойго дене тӱкнымӧ годым айдеме йодеш: «Молан тыге лийын?» Айдеме тыгай йодышлан чын вашмутым кычал муэш гын, ойгыжым сеҥен кертеш, а кычал ок му гын — орланаш да торжа лияш тӱҥалеш. Мутлан, теве мо Бруни дене лийын.

Бруни лӱман ӱдырамаш ойла: «Икмыняр ий ончыч мыйын изи падырашем колен. Тидын верч илышемын смыслже йомын. Мый Юмылан ӱшаненам, сандене лыпландарымашым кычал муашлан священник деке каенам. Тудо мыланем каласен, пуйто Юмо мыйын Зузанна ӱдыремым шкеж дек кавашке налын да тудо суксо лийын. Тидым колын, мый Юмым ужмышудымо лийынам». Бруни икмыняр ий орланен илен. Тудо ойлымым умбакыже шуя: «Ту жапыште Иегован Таныкше улшо ик ӱдырамаш мыйым лыпландарен. Юмылан шыдешкаш амал уке манын, тудо мыланем Библий гыч шонымашым ончыктен. Иегова Зузаннам шкеж дек кавашке налын огыл да ӱдырем суксыш савырнен огыл улмаш. Чыла айдеме сулыкан улеш, сандене тудо черланен. Зузанна колымаш омо дене мала да вуча, кунам Иегова тудым ылыжта. Тыгак мый пален налынам: Юмо еҥ-влакым рай мландыште курымеш илашлан ыштен да вашке тудо шке шонымашыжым шукта. Кунам мый Иеговам сайрак пален налынам, мый тудын дек лишылрак лийынам да чонем лыпланаш тӱҥалын» (Псалом 36:29; Апост. пашашт 24:15; Римлян-влаклан 5:12).

Миллион дене еҥ тӱрлӧ амаллан кӧра орлана: ешыште лекше проблеме, сар, шужымаш да пӱртӱс вий ден лийше эҥгеклан кӧра. Библий гыч пален налме Бруни ӱдырамашым лыпландарен. Тудо пален налын: ойго лекмаште Иегова титакан огыл, еҥ-влак орланышт манын, тудын нигунамат кумылжо лийын огыл да пеш вашке тудо осалым пытара. Ойгын утыр-утыр шукеммыже «пытартыш кечылаште» илымынам ончыкта. Илышнан сай могырыш вашталтме жап пешак лишне (2 Тимофейлан 3:1—5; Матфейын 24:7, 8).

Кузе Юмо дене палыме лияш

Ханс ден Бруни Юмылан ӱшаненыт, но нуно тудын нерген, каласаш лиеш, нимомат пален огытыл. Но кунам нуно Иегова нерген чын шинчымашым налашлан жапым ойыраш тӱҥалыныт, шке йодышышт-влаклан вашмутым налыныт. Тиде нунылан чон тынысым да ончыкылыклан пеҥгыде ӱшаным пуэн. Тыгакак миллион дене Иегован вес служитлышыж денат лийын.

Иеговам пален налашлан эн ончыч Библий шымлымым тӱҥалаш кӱлеш. Библийым шымлен, ме пален налына, могай тудо да мом тудо мемнан деч вуча. Икымше курымышто илыше еҥ-влак тыгакак ыштеныт. Лука историк да врач палдара: Верийыште (Греций) илыше иудей-влак Павел ден Сила деч «шомакым кугу кумыл дене колыштыныт да, тиде чынак тыге мо манын, Возымашым кече еда шымленыт» (Апост. пашашт 17:10, 11).

Тыгак икымше христиан-влак, пырля погынен, вашлиймаш-влакым эртареныт (Апост. пашашт 2:41, 42, 46; 1 Коринфян-влаклан 1:1, 2; Галат-влаклан 1:1, 2; 2 Фессалоникысе-влаклан 1:1). Тачат Иегован Таныкше-влак тыге ыштат. Тыгай вашлиймаш-влак еҥ-влаклан Иегова дене йолташ лияш да тудлан куан дене служитлаш полшат. Танык-влак дене кыл кучымаш эше вес пайдамат конда. Иегован Таныкше-влак Юмын гаяк койыш-влакым кушташ тыршат, сандене нунын дене лишыл кыл кучымаш тыланда Иеговам сайрак пален налаш полша (Еврей-влаклан 10:24, 25).

Те каласеда: «Ик Личность нерген гына пален налашлан тынар шуко вийым пышташ кӱлеш мо?» Мутат уке, кӱлеш. Вет илышыштат тыге лиеда: иктаж-могай цельыш шуашлан шуко вийым пыштыман. Шоналтыза, спортсмен-влаклан кӱкшытыш шуашлан мыняр тыршыман! Мутлан, Жан-Клод Кили — Олимпий модмаште шӧртньым налше француз ечызе умылтарен, мо полша тӱнямбалысе таҥасымаште сеҥыше лияш: «Таҥасымаш деч лу ий ончычак тыланда ямдылымым тӱҥалман да ий еда кажне кечын тренировкылан шуко жапым ойырыман». Те кажне кечын тынар шуко вий ден жапым пытареда, а таҥасымаш лу минут коклаште веле эртен кертеш! А мыняр шуко суапым те налыда, кунам Иеговам пален налашлан жапым ойыраш тӱҥалыда!

Утыр-утыр пеҥгыдемше кыл кучымаш

Кажне айдеме илышын чын смыслжым пален налнеже. Сандене те илышыштыда чын смыслым муын огыдал гын, але пален налнеда, молан ойго-влак лиедат, тунам Иеговам сайрак пален налаш тыршыза. Тудын нерген шинчымашым налын, тендан илышда сай могырыш вашталтеш.

Ме иктаж-кунам Иегова нерген чылажымат пален налын кертына мо? Уке. Юмылан шуко ий служитлыше-влакат эре иктаж-мом уым пален налыт. Юмо нерген шинчымашым налмаш мыланна пиалым конда да тудын деке эше чотрак лишемда. Теат апостол Павелын мутшо дене келшеда докан. Тудо возен: «Юмын поянлыкше, уш-акылже да шинчымашыже мучашдыме! Тудын судшо тергаш лийдыме‚ Тудын корныжо шымлаш лийдыме! „Кӧ Господьын кӧргӧ шонымыжым пала? Кӧ Тудлан каҥаш пуышо лийын?“» (Римлян-влаклан 11:33, 34).

[Сноско]

[Вставка]

Еҥ-влак ожнысо семынак илыш дене кылдалтше йодыш-влакым пуэдат: молан мый илем? могай ончыкылык мыйым вуча? илышын могай смыслже?

[Вставка]

«Кунам мый Иеговам сайрак пален налынам, мый тудын дек лишылрак лийынам».

[Вставка]

«Иеговалан служитлымаш — эн сай илыш корно. Тидым нимо дене таҥастараш огеш лий. Иегова дене палыме лийын, мый илышемын смыслжым пален налынам».