Айдемын сай койышыж-влакым ужын, тудын дек эше чотрак лишемаш кумылна лектеш, да тыге тудын дене кыл кучымашна пеҥгыдемеш. Иегова денат тыгак. Юмын койышыж-влак нерген шукырак пален налаш тыршен, ме тудын могай улмыжым сайрак пален налына да тудо мыланна эше лишылрак лиеш. Юмын чыла чапле койышыж-влак кокла гыч ныл тӱҥ койышым палемдаш лиеш: тудо виян, уш-акылан, чыным ыштыше да йӧратыше.

«Господь Иегова! Тый кава ден мландым кугу виет... дене ыштенат» (ИЕРЕМИЯ 32:17).

Юмын вийжым тудын ыштымашыж гыч ужаш лиеш. Мутлан, кеҥежым ояр кечын уремыш лекмыда годым те мом шижыда? Кечын ырыктымыжым. Тудо Юмын вийже нерген палдара. А кечын куатше могай? Тудын кӧргыштыжӧ температур Цельсий почеш 15 000 000 градусыш шуэш. Кажне секундышто Кече тынар энергийым пуа, мыняр шуко шӱдӧ миллион ядерный бомбын пудешталтмыж деч лектеш.

Но Сандалыкыште улшо шуко миллиард шӱдыр дене таҥастарымаште Кече изи шӱдыр семын коеш. Шанчыеҥ-влакын шонымышт почеш эн кугу шӱдыр-влак кокла гыч иктыже — UY Щита. Тудын радиусшо Кечын радиусшо деч 1 700 наре пачаш кугурак. UY Щита манме шӱдырым Кечын олмышкыжо шындаш гын, тудо Мландым нелын колта да Юпитерын орбитыжым петыра. Тидлан кӧра ме Иеремиян каласымыжым — Иегова Юмо кава ден мландым (Сандалыкнам) кугу вий дене ыштымыжым — сайрак умылен кертына.

Юмын вийже деч мыланна могай пайдаже? Мемнан илышна Юмын ыштымыж деч шога. Мутлан, Кечын энергий ден Мландын ресурсшо деч. Тыгак Юмо шке вийжым посна еҥ-влаклан полшашлан кучылтын кертеш. Кузе? Мутлан, Иисус Христос тӱрлӧ чудым ыштен кертше манын, икымше курымышто Юмо тудлан шке вийжым пуэн. Библийыште ойлалтеш: «Сокыр-влак ужыт, окшак-влак коштыт, проказе черан-влак эрнат, чокрак-влак колыт, колышо-влак ылыж кынелыт» (Матфейын 11:5). А таче Юмо шке вийжым кузе кучылтеш? «Тудо нойышылан вийым пуа» манын, Библийыште возымо. А эше тушто ойлалтеш: «Нуно, кӧ Иеговалан ӱшанат, угыч вийым налыт» (Исаия 40:29, 31). Иегова мыланна илыш нелылыкым чытен лекташлан шке кӱдыратле вийжым пуаш ямде (2 Коринфян-влаклан 4:7). Тендан верч тыршыше да тыланда шке куатле вийжым пуэн кертше дене йолташ лиймыда шуэш мо?

«Юмо, пашат-шамыч могай кугу улыт! Тый чылажымат кугу уш-акыл дене пӱренат [ыштенат, УТ]» (ПСАЛОМ 103:24).

Мыняр шукырак Юмын ыштымашыже-влак нерген пален налына, тунар шукырак тудын уш-акылжылан ӧрына. Мутлан, биомиметика (але биомимикрия) манме науко уло. Тиде науко дене кылдалтше шанчыеҥ-влак, Иегован ыштымашыже-влакым шымлен, тӱрлӧ изобретенийым шонен луктыт але уэмдат — клей гыч тӱҥалын самолётын конструкцийже шумеш.

Юмын уш-акылжым айдемын капшын кузе ышталтмыже сайрак ончыкта. Ончен лектына, кузе ава кӧргыштӧ аза кушкеш. Йочан илышыже ик тӱланыше клетке гыч тӱҥалеш, кушан чыла генетический инструкцийым пуртымо. Тиде клетке шкеж гаяк шуко клеткылан шеледалтеш. Но ик жапыште клетке-влак икте-весе деч ойыртемалташ тӱҥалыт. Тыгела, 200 наре тӱрлӧ клетке лектеш. Мутлан, вӱр, нерве да лу клетке-влак. Вашке тӱрлӧ орган формироватлалтеш да пашам ышташ тӱҥалеш. У илыш иланыме деч вара индеш тылзе эртымеке, миллиардле клетке гыч шогышо аза шочеш. Айдеме капын уш-акыл дене ышталтмыжым ужын, шукышт Библийыште тыгай возымо дене келшат: «Моктем Тыйым, ӧрмашан мый ышталтынам» (Псалом 138:14, У Сугынь, 1986).

Юмын уш-акылже деч мыланна могай пайдаже? Мыланна пиалан лияшлан мо кӱлмым Ыштышына сайын пала. Юмын келге шинчымашыж ден умылымашыже уло, да шке уш-акылан каҥашыже-влакым тудо мыланна шке Мутшо гоч, Библий гоч, пуа. Мутлан, Библийыште тыгай каҥашым возымо: «Весылан ӧпкеда уло гын, титакшым кудалтыза» (Колоссян-влаклан 3:13). Тиде каҥаш пайдам конда мо? Конда. Шанчыеҥ-влакын шымлымашышт ончыктат: проститлен моштышо еҥ-влак сайрак малат да кугу давлений, депрессий да вес чер-влак дене шагалрак орланат. Азапланыше йолташ семын Юмо мыланна поро да пайдале каҥашым пуаш эре ямде (2 Тимофейлан 3:16, 17). Тендан тыгай йолташ лийже манын, кумылда уло мо?

«Юмо чын судым йӧрата» (ПСАЛОМ 36:28).

Юмо эре чын ышта. Чынак, «чын Юмо осалым ыштен огеш керт да Чылакертше чын огылым ыштен огеш керт!» (Иов 34:10). Тудын лукмо пунчалже-влак эре чын улыт. Теве мом Иегова нерген псаломым мурышо каласен: «Тый еҥ-шамычлан чын судым ыштет» (Псалом 66:5). Иегова шӱмым ужеш, сандене кеч-могай чояланымашым тудын деч шылташ ок лий. Тудо чыным шоя деч вигак ойырен кертеш да еҥ-влакын ыштымашышт шотышто чын иктешлымашым ышта (1 Самуила 16:7). Юмо тӱняште лиедыше чын огыл ыштымым да кажне осал пашам ужеш. Тудын сӧрымыж почеш осалым ыштыше-влак мланде ӱмбалне пытарыме лийыт (Притчи 2:22).

Но Юмо торжа судья огыл. Тудо айдемым наказатлаш амалым гына огеш кычал, а мӧҥгешла, чаманымашым ончыкташ эре йӧным кычалеш. Библийыште возымо дене келшышын, Иегова поро кумылан да чаманыше. Тудо осалым ыштыше-влакымат проститлаш ямде. Но Юмын йодмыжо почеш нуно шке ыштымыштлан уло шӱм дене ӧкынышаш улыт. Чын ыштымаш тыгай лийшаш огыл мо? (Псалом 102:8; 2 Петрын 3:9).

Юмын чын ыштымашыж деч мыланна могай пайдаже? Апостол Петрын каласымыж дене келшышын, Юмо чыла еҥым ик семын онча да «тудлан лӱдын кумалше да чын почеш ыштыше еҥ, кеч-могай калык гыч лийже, Юмылан келша» (Апост. пашашт 10:34, 35). Юмын чын ыштымыжлан пеҥгыдын ӱшанаш лиеш. Тудо еҥ-влакым огеш ойыркале. Кеч-могай айдеме Юмын служитлышыже лийын кертеш, вет тудо айдемын расыжым, национальностьшым, образованийжым але социальный положенийжым огеш ончо.

Юмын чын ыштымашын нормыжым умылашлан тудо мыланна совестьым пуэн. Библий дене келшышын, совесть — тиде шӱмыштына возымо закон, кудо мыланна умылаш полша, ме чын ыштена але уке (Римлян-влаклан 2:15). Совесть мыланна кузе полшен кертеш? Чын почеш туныктымо совесть чын огыл да уда паша деч кораҥаш тарата. А кунам йоҥылышым ыштена, совестьна ыштымылан ӧкынаш да шкенам вашталташ тарата. Юмо шкежат чын ыштыше улеш, мемнамат чын ышташ кумыл дене ыштен. Тидым умылымаш мемнам тудын дек эше чотрак лишемда.

«Юмо улеш йӧратымаш» (1 ИОАННЫН 4:8, У Сугынь, 1986).

Юмын ныл тӱҥ койышыжо уло: тудо йӧратыше, уш-акылан, виян да чын ыштыше, но йӧратымаш койышыж нерген гына Библийыште возымо: «Юмо улеш йӧратымаш». Молан? Чынжымак, иктаж-мом ышташлан Иегова шке вийжым кучылтеш да тудын чыла ыштымашыже чын да уш-акыл дене негызлыме. Но чылажымат ышташ тудым лач йӧратымаш тарата. Иегова кеч-момат йӧратымаш дене ышта.

Иегова йокрокланымыжлан кӧра огыл чылажымат ыштен. Каваште да мландыште ушан личность-влакым — тудын азапланымыжым ужын да аклен моштышо-влакым — ышташ тудым йӧратымаш таратен. Тудо Мландым айдеме тукымлан чапле илыме вер семын пуэн. Юмо еҥ-влак верч кызытат тырша. «Осал-влакланат, поро-влакланат Тудо шке кечыжым луктеш, чын ыштышыланат, чын огыл ыштышыланат йӱрым колта» (Матфейын 5:45).

Тыгак, Иегова «чот чаманыше да поро» (Иаковын 5:11). Тудым уло шӱм дене пален налаш да тудын дек лишемаш тыршыше-влакым Юмо чот акла. Кажне тыгай айдеме Юмылан шергакан. Иегова «мемнан кокла гыч икте дечат тораште огыл» манын Библий ӱшандара (Апост. пашашт 17:27).

Юмын йӧратымашыж деч мыланна могай пайдаже? Мыланна мотор кас ӱжарам ончаш чот келша. Мемнан кумылнам йочан воштылмыжо нӧлта. Ме лишылна-влакын йӧратымыштым аклена. Чыла тиддеч посна ме илен кертына ыле, но тидлан кӧра илышна мыланна шукырак куаным конда.

А эше Юмын йӧратымыжым тудлан кумалаш йӧным пуымыж гыч ужаш лиеш. Библий тарата: «Нимо нергенат ида тургыжлане, а, кумалын, тауштен да сӧрвален, йодмыдам чыла годымат Юмылан палдарыза». Йӧратыше ача семын Юмо мемнан деч чыла тургыжланымашна нерген тудлан ойлымынам вуча. Вашеш Иегова мыланна «кеч-могай уш деч кӱшнӧ шогышо тыныслыкшым» пуаш сӧра (Филиппысе-влаклан 4:6, 7).

Ме Юмын ныл тӱҥ койышыжым ончен лекна. Ме пален налынна: тудо виян, уш-акылан, чын ыштыше да йӧратыше. Тиде статья тыланда Юмын могай улмыжым пален налаш полшен мо? Иегова тендан дек эше лишылрак лийже манын, айста пален налына, мом тудо мыланна ыштен да мом ончыкыжым эше ышта.