Есүс төгс хүн байсан учраас жирийн хүний адил бие сэтгэлийн зовлон үзэж байгаагүй. Гэхдээ хүмүүсийг их өрөвддөг байв. Хүмүүсийн төлөө хэрэгтэй байгаа зүйлээс нь ч илүү ихийг хийж, чадах бүхнээ хийхэд бэлэн байв. Өрөвч учраас бусдад тусалдаг байсан. 32, 37, 57, 99-р бүлгийг уншаад үүнийг батлах жишээнүүдийг эргэцүүлэн бодоорой.

Есүс өөрийгөө бусдаас дээгүүр гэж боддоггүй, нөхөрсөг хүн байсан учраас хөгшин ч бай, залуу ч бай, ямар ч насны хүн түүнээс халгаж дөлдөггүй байв. Хайр халамжийг нь мэдэрсэн болохоор тэд Есүстэй хамт байх дуртай байжээ. 25, 27, 95-р бүлгээс энэ тухай үзнэ үү.

Есүс ганцаараа байхдаа ч, хүмүүстэй хамт байхдаа ч Эцэгтээ хандан байнга шаргуу залбирдаг байв. Зөвхөн хоол идэхдээ биш, ямар ч үед залбирдаг байсан. Тэнгэрийн Эцгээ магтаж, талархан, бас чухал шийдвэр гаргахынхаа өмнө удирдамж заавар гуйн залбирдаг байсан юм. 24, 34, 91, 122, 123-р бүлгээс үүний жишээг үзнэ үү.

Заримдаа Есүс амармаар байсан ч гэсэн, тэр цагаа бусдад зориулдаг байсан. Өөрийгөө л хамгийн түрүүнд боддог хандлагатай байгаагүй нь бас бидний дуурайвал зохих сайхан жишээ юм. 19, 41, 52-р бүлгийг уншиж, энэ жишээг нь судлаарай.

Есүс бусдыг уучилж өршөөгөөрэй гэж зааж сургаад зогсохгүй, өөрөө шавь нараа ч бусдыг ч уучилдаг байв. 26, 40, 64, 85, 131-р бүлэгт гардаг жишээг эргэцүүлж бодоорой.

Ихэнх иудейчүүд Есүсийг Мессиа гэж хүлээн зөвшөөрөхгүй, дайснууд нь түүнийг хөнөөнө гэж зөгнөсөн байсан. Тиймд бусдад үйлчлэхдээ биеэ бүрэн дайчлахгүй байж болох л байсан. Гэхдээ хичээл зүтгэл гарган цэвэр шүтлэгийг түгээн дэлгэрүүлсэн юм. Хүмүүс хайхрамжгүй хандах юм уу, эсэргүүцсэн ч гэсэн хичээл зүтгэлээ сулруулахгүй байхын сайхан жишээг шавь нартаа үлгэрлэн үзүүлсэн. 16, 72, 103-р бүлгийг үзнэ үү.

Есүс мэдлэг, мэргэн ухаанаараа ямар ч төгс бус хүнээс хол давуу байсан. Төгс хүн учраас эргэн тойрныхоо хүмүүсээс илүү бяр чадалтай, ухаантай байсан биз ээ. Гэлээ ч даруу байж, бусдад үйлчилдэг байв. 10, 62, 66, 94, 116-р бүлгээс энэ тухай үзнэ үү.

Шавь нар болон бусад хүн жишээг нь дуурайхгүй, хэлж захисныг нь биелүүлэхгүй байсан ч гэсэн Есүс дандаа тэвчээртэй ханддаг байсан. Тэвчээртэйгээр дахин дахин заасны ачаар тэд Еховатай дотно болсон биз ээ. 74, 98, 118, 135-р бүлгээс Есүсийн тэвчээрийн тухай уншиж эргэцүүлж бодоорой.