Biblia kiijtoua nochi maseualmej titlajtlakolejkej. Kiampa tijchiuaj pampa Adán, katli elki nopa achtoui maseuali, tlajtlakolchijki. Yeka kemantika tijchiuaj tlamantli tlen amo kuali uan teipa timoiljuiaj amo kiampa tijchijtoskiaj. Jesucristo katli eli toTeotsij ikone motemaktilik uan kiampa uelki techmakixtia tlen totlajtlakoljuaj. Yeka toTeotsij ueli techtlapojpoljuia. Tlen Jesús kichijki eli se nemaktli tlen toTeotsij techmakatok ( xijpoua Romanos 3:​23, 24).

Se keskij maseualmej kichijtokej uejueyi tlajtlakoli uan yeka moiljuiaj toTeotsij amo kema kintlapojpoljuis. Maske kiampa moiljuiaj, Biblia kiijtoua: “Ieso Jesucristo, iKone toTeko, techyolpajpaktinemis tlen nochi tlajtlakoli” (1 Juan 1:⁠7). Tlaj timoyolkuepaj ika nochi toyolo, Jehová techtlapojpoljuis nochi totlajtlakoljuaj maske tlauel uejueyi ( xijpoua Isaías 1:18).

Tlaj tijnekij Jehová ma techtlapojpoljui moneki tikixmatisej: tijmatisej kenijkatsa eli, tlen techtlajtolmaka uan itlanauatiljuaj (Juan 17:⁠3). Jehová kintlapojpoljuia ika pakilistli katli moyolkuepaj uan kichiuaj kampeka kipatlasej kej monejnemiltiaj ( xijpoua Hechos 3:19).

Nochi uelis tijyolpakiltisej toTeotsij. Uan ya kimati onka se keski tlamantli tlen techyoltilana ma titlajtlakolchiuakaj. Maske kiampa, ya kipia ueyi iyolo touaya uan tlauel techtlasojtla. ¿Mitsyololinia ni tlamantli nojua tijmatis kenijkatsa uelis tijyolpakiltis? (Xijpoua Salmo 103:13, 14).