IBhayibhili lisitshela ukuthi bonke abantu balesono. Isono esilaso sasithatha emuntwini wokuqala u-Adamu. Yikho ngezinye izikhathi senza izinto ezimbi besesizisola ngalokho esiyabe sikwenzile. INdodana kaNkulunkulu uJesu Khristu, yasibhadalela izono zethu ngokusifela. Inhlawulo kaJesu yenza ukuthi senelise ukuthethelelwa izono. Iyisipho esivela kuNkulunkulu.—Bala uRoma 3:23, 24.

Abanye abantu abenza izono ezinkulu babona angani uNkulunkulu ngeke abathethelele. Kodwa iLizwi likaNkulunkulu lithi: “Igazi likaJesu iNdodana yakhe liyasihlambulula kuzo zonke izono.” (U-1 Johane 1:7) UJehova uzimisele ukusithethelela ngitsho lezono ezinkulu nxa sitshengisa ukuthi sesiphenduke ngenhliziyo yonke.—Bala u-Isaya 1:18.

Nxa sifuna ukuthi uJehova uNkulunkulu asithethelele kumele sifunde ngaye, sizwisise izindlela zakhe, izeluleko zakhe kanye lalokho akufunayo. (UJohane 17:3) UJehova uyabathethelela labo abaphendukayo batshiye okubi abebekwenza.—Bala imiSebenzi 3:19.

Akunzima ukuthi sithokozise uNkulunkulu. UJehova uyazwisisa ukuthi silesono yikho siphambanisa ngezinye izikhathi. Ulesihawu lomusa. Akuthandabuzwa ukuthi uthando lwakhe lwenza ufune ukufunda okunengi ngokuthi ungamthokozisa njani.—Bala iHubo 103:13, 14.