Tlen techmachistiaj akin kiteijliaj iTlajtol toTajtsin

Biblia melak onechpaleui

JESÚS kijtoua ika kimixmati iborreguitos (Juan 10:14). Tla yakaj kipiya kuajli iyojlo niman kineki ika nochimej mayolseujtokan niman nochimej makinchiuilikan tlen kuajli, kinekis kixmatis Jesús. Niman yejon kichiuas más kuajli manemi niman más mayolpaki. Matikitakan kenon Biblia melak okipaleui se siuatsintli de Bélgica. Yejua techijlia:

“Ijkuak iteixpantijkauan Jehová onechtlajpalotoj melak ninoyolajmanaya niman niknemiliaya ninomiktis. Melak onikuelitak ijkuak onechijlikej ika tlen xkuajli nochiua ipan yejuin tlaltikpaktli ueliskia noyektlalis. San ika, xonikuelitak ijkuak okijtokej ika yejon san toTajtsin ueliskia kiyektlalis. Youejkaujka chikueyi xiuitl ika xniaya teopan pampa xnikuelitaya tlen ompa nochiuaya. San ika, onikitak ika tlen temachtiayaj iteixpantijkauan Jehová melauak katka niman onikasikamat ika melak noneki matechpaleui toTajtsin.

”Sakin ika iteixpantijkauan Jehová yonechtlajpalotoyaj seki tonaltin, xok onikimitak, ijkuakon melak xkuajli oninomachili. Ipan se tonajli nikinpokiya ome cajitas de cigarros niman hasta opeuj nikinkui drogas. Pampa niknekiya niknotsas noabuelo akin yomijka, opeuj nikneki nikmatis itech naualyotl. Niman pampa ijkon onikchiuj, nikmachiliaya ika ijkuak itlayoua katka niman san noselti ninemiya demonios melak nechpajsolouayaj, yejuin ouejkauj seki metstin. Melak nechmojtiaya san noselti ninemis.

”Se tonajli onipaxaloto niman oniajka kampa xkeman niaya, ompa onikimitak sekimej akin kichijchiujtoyaj se ueyi kajli. Melak onechmojkatlachialti ijkuak onikitak ika melak miyekej ompa tekititoyaj, yejua ika, oninonisiui niman onikmat ika yejuamej katkaj iteixpantijkauan Jehová niman ika kichijchiujtoyaj se Kajli kampa tosentlaliaj. Ijkuakon onikilnamik ijkuak nechontlajpalouayaj, niman oniknemili ika melak kuajli yeskia tla nochimej nemiskiaj ijkon ken yejuamej.

”Melak niknekiya oksejpa manechtlajpalotij, ika yejon, onitlajto imiuan sekimej akin ompa tekititoyaj. Oniknots toTajtsin, niman san opanok majtlaktli tonaltin, on tokniuj akin kachtopa iuan oninonojnotska oksejpa onechtlajpaloto. Onechijli ika tla niknekiya oksejpa ninomachtis, niman onikijli ika niknektoya. Nimantsin onechijli ika tla nikuelitaskia nias ipan Kajli kampa nosentlaliaj iTeixpantijkauan Jehová, niman nejua onikijli ika kema. ¡Xkeman itlaj ijkon nikitaya! Nejua nochipa oniknek ninemis imiuan akin yemelak yolpakij niman notlasojtlaj, niman aman yonikinnextijka.

”Desde ijkuakon nochipa niauj tlanechikoltin. Opanok yeyi semanas niman onijkajkauj ika nipokiya. Onikinxinij nolibros itech naualyotl niman nodiscos tlen kinpiaya tlakuikaltin tlen kiueyiteneuayaj Satánas, niman yejuin okichiuj ika demonios maka sa manechpajsolokan. Opeuj nikchiua ijkon ken kuelita Jehová, niman yeyi metstli sakin opeuj nitenojnotsa. Opanok chikuasen metstli oninoapolakti, niman ome tonajli sakin oninochiuj precursora auxiliar.

”Niktlasojkamachilia Jehová ipampa nochi tlen yokichiuj nopampa. Aman kema niyolpaki. Kema, itoka Jehová yeskia kentla se torre yejua ueyi niman kojtik kampa oninopaleui (Proverbios 18:10). Ninomachilia ken salmista akin okijkuilo: ‘¡Más kuajli ninemis se tonajli ipan moyektiopan, xken ninemis se mil tonaltin oksekan! ¡Más kuajli ninemis ken sen nitsakuijlotlapojketl ipan iyektiopan noDios, xken nichantis ne kampa chantij on xompayejyekej!’” (Salmo 84:10).

Yejuin siuatsintli akin yolkuajli yokipaleui tlen temachtia Biblia. Nochimej akin kitejtemouaj Jehová ika kuajli inyojlo, noijki uelis kinpaleuis.