Melak kuajli tla tikixmatij Jehová

¿TIKMACHILIA ika itlaj mitspoloua niman ijkon tiyolpakis? Kemantika ijkon tomachiliaj pampa xmás tikixmatij toTajtsin. ¿Tleka ijkon tikijtouaj? Pampa miyekej yokitakej ika ijkuak kixmatij toTajtsin más kuajli nemij.

Jehová yejua akin okichiuj manoijkuilo Biblia, niman kineki matikixmatikan. Salmista okijkuilo: “¡Ma kimatikan ika san tejua titeTEKO, san tejua tiUeyixtikaj ipan nochi in tlaltikpaktli!”. ToTajtsin kuajli kimatstika ika melak techpaleuis tla tejuamej tikixmatij. Ika yejon, yejua techijlia: “Nejua ninemoTEKO Dios. Nejua nemechititia tlen kuajli para nemejuamej”. ¿Kenon techpaleuiya tikixmatiskej toTajtsin Jehová akin ueyixtika? (Salmo 83:18; Isaías 48:17).

Techpaleuiya pampa techijlia kenon uelis tikyektlaliskej tlen mojmostla tikixnamikij, kenon uelis kuajli tinemiskej ika tlayekapan niman kenon uelis tiyolseujtoskej. Niman noijki, tla kuajli tikixmatij toTajtsin, techpaleuis matikmatikan tlen miyekpa totlajtoltiaj. ¿Tlenon yejon tlen totlajtoltiaj?

¿Tleka otinemikoj?

Maski aman tlaltikpakchanejkej miyek yokinextijkej, xueli kinextiaj tlen miyekej kimatisnekij: ¿Tleka otinemikoj? ¿Tlenon topan nochiuas ika tlayekapan? Ijkuak xtiknextiaj kenon nonankilia yejuin, uelis peuas tiknemiliskej ika xtlaj ika tepaleuij tonemilis. Kanaj ipan xiuitl 1997, ne Alemania miyekej okintlajtoltijkej tlenon kinemiliayaj itech yejuin, niman tlajkotipan de on akin okintlajtoltijkej okijtojkej ika san nochipa kinemiliayaj ika xtlaj ika tepaleuij tonemilis. Kanaj kampa tichanti miyekej noijki ijkon tlanemiliaj.

Tla tejuamej xtikasikamatij tleka otinemikoj, xuelis tiyolpakiskej. Ika yejon, miyekej kinemiliaj ika tla kipiyaj miyek tomin noso tla melak nomachtiaj para kipiyaskej se kuajli tekitl kampa sajnoye notomintiskej, kanaj uelis yolpakiskej. San ika, maski ijkon, yejuamej xyolpakij. Sekimej sajnoye najmanaj niman hasta xok kinekij nemiskej pampa xkimatij tlenon kichiuaskej ika innemilis. Yejuin tlen ipan onochiuj se kualtsin ichpochtli akin okis ipan periódico International Herald Tribune. Ompa onoteneuj ika yejuin ichpochtli onoskalti ipan se familia akin “kipiayaj miyek tomin niman xtlaj kinpolouaya”. Maski miyek tlemach kipiaya, san iselti nomachiliaya, xyolpakiya niman noyolajmanaya, ika yejon, okintolo miyek pastillas niman ijkon onomikti. Kanaj noijki yotikmat itech oksekimej akin noijki san inselti nomachiliayaj niman noijki yonomiktijkej.

¿Tijkakini ika miyekej kijtouaj ika ciencia uelis techpaleuis matikasikamatikan tleka otinemikoj? Periódico alemán Die Woche kijtoua: “Maski tlen temachtia ciencia melak yotepaleui, xtemachtia itech toTajtsin. Evolución xnochi kuajli kiteititia niman xueli teyolseuiya”. Aman ixtlamatkej yokasikamatkej tleka ueli kiyaui niman kenijki tekiti totlalnakayo. San ika, yejuamej xkimatij tleka otinemikoj niman tlenon topan nochiuas ika tlayekapan. Tla san intech ciencia tiktejtemoskiaj tlen xtikasikamatij, xkeman tikmatiskiaj on tlen totlajtoltiaj. Kuakon, ijkon ken kijtoua periódico Süddeutsche Zeitung, “melak noneki yakaj matechpaleui matikasikamatikan tlen xtikmatij”.

ToTajtsin yejua akin otexchijchiuj, ika yejon, san yejua uelis techijlis tlen xtikasikamatij. Niman pampa yejua okitlali tlaltikpaktli para ipan matichantikan, yejua kimatstika tleka otexchijchiuj. Biblia kijtoua ika Jehová otexchijchiuj para matinemikan ipan yejuin tlaltikpaktli niman matiktlajpiyakan. Niman kinekiya ika tejuamej noijki matitetlasojtlakan, matiktechiuilikan tlen kuajli niman matitlamachilisejkej ijkon ken yejua. Ijkuak tikmatij tleka otexchijchiuj Jehová, tikasikamatij tleka otinemikoj (Génesis 1:26-28).

¿Tlenon uelis tikchiuas?

Biblia kijtoua ika tla kuajli tikixmatij toTajtsin Jehová, uelis tikasikamatiskej tlen kanaj desde yeuejkaui totlajtoltiaj, ken yejuin: ¿tleka otinemikoj, ¿tlenon topan nochiuas ika tlayekapan? Jesús hasta okijto: “In nemilistli yejuan para nochipa se kiselia ijkuak mitsixmati tejua yejuan san moselti melauak tiDios, niman nejua niJesuCristo yejuan otinechajtitlan”. Noijki noneki tikteititis ika titetlasojtla niman ika tikneki tinemis ipan yenkuik tlaltikpaktli ijkuak toTajtsin tlanauatijtos. Tla tejua kuajli tikasikamati tlen miyekpa timotlajtoltia, kichiuas melak xyolpaki aman niman noijki ika tlayekapan (Juan 17:3; Eclesiastés 12:13).

¿Tlenon panoua ijkuak tikixmatij toTajtsin? Se tlakatl akin itoka Hans kuajli kimatstika yejuin. * Yejua achijtsin kimatiya itech toTajtsin, san ika, yejon xtlaj ika kipaleuiaya pampa melak pokiya, kistinemiya iuan miyekej siuamej, tlachtekiya niman kistinemiya ipan moto maski yotlauanka. Yejua kijtoua: “Xtlaj nechyolpaktiaya”. Ijkuak kipiaya 25 xiuitl, Hans okinek kixmatis toTajtsin, ika yejon, opeuj kiamapoua Biblia. Ijkuak opeuj kuajli kixmati Jehová niman okasikamat tleka otinemikoj, okikajkauj tlen xkuajli kichiuaya niman onoapolakti. Aman yejua se iteixpantijkauj Jehová. Youejkauj 10 xiuitl ika kitekichiuilia toTajtsin. Yejua kijtoua: “Tla tiktekichiuilia Jehová melak tiyolpakis. Melak yonechpaleui aman ika yonikixmat Jehová”.

Ken yotikitakej, miyekej kinekij kimatiskej tleka otinemikoj. San ika, ijkuak kitaj nochi tlen panotika noijki kinekij kimatiskej itlaj okse. ¿Tlenon yejon tlen kimatisnekij?

¿Tleka ijkon opanok?

Ijkuak yakaj ipan nochiua tlen xkuajli melak noyolkokoua niman notlajtoltiaj yejuin: ¿tleka ijkon opanok? Para yolseuis yakaj akin tlajyouiya, noneki kuajli kinankiliskej tlen xkasikamati pampa tla xnonankilia tlen notlajtoltia, uelis melak najmanas niman xika iyojlo nemis. Xkita tlenon ipan onochiuj Bruni, akin kipiaya se ichpokauj.

Bruni kijtoua: “Ikipiya seki xiujtin ika omik noichpokatsin, Susanne. Pampa nejua nitlaneltokaya itech toTajtsin, onikitato teopixki para manechyolseui. Yejua onechijli ika toTajtsin okuikak nokoneuj iluikak pampa kinekiya se angelito. Ijkuak omik nokonetsin xsan melak onechyolkoko, noijki opeuj niktlauelita toTajtsin pampa okuikak nokonetsin”. Bruni melak ouejkauj ika noyolkokojtinemiya. Yejua kijtoua: “Satepan, se iteixpantijkauj Jehová onechititi ipan Biblia ika xnonekiya niktlauelitas toTajtsin pampa yejua xokuikaka Susanne nion xokikuep se ángel. Yejua onechijli ika tejuamej tikualoj niman timikij pampa titlajtlakolejkej. Niman noijki onechijli ika noichpokatsin kentla san kochtoskia niman sa kichiatika ika Jehová makitlachialti. Noijki oniuel ika toTajtsin otexchijchiuj para nochipa matinemikan ipan se kualtsin tlaltikpaktli. Ijkuak opeuj kuajli nikixmati toTajtsin Jehová noijki opeuj niktlasojtla niman xok más ninoyolkokouaya” (Salmo 37:29; Hechos 24:15; Romanos 5:12).

Tinochimej titlajyouiyaj. Miyekej tlajyouiyaj pampa ipan nochiua itlaj tlen xkuajli, pampa tlaixpoliui kampa chantij, ipampa guerras noso pampa xkipiyaj tlen kikuaskej. Ijkuak Bruni okasikamat ika Jehová xkinekiya matitlajyouikan niman xyejua kichiua mapano tlen xkuajli, melak oyolseuj. Niman noijki, melak kuajli onomachili ijkuak okimat ika sa achijtsin poliui ijkuak Jehová kipopolos nochi tlen techtlajyouiltia. Nochi tlen aman panotika techititia ika tinemij ipan sa itlamiyan tonaltin. Kema, iyejkotika on tonajli ijkuak xok titlajyouiskej (2 Timoteo 3:​1-5; Mateo 24:​7, 8).

Tlen uelis tikchiuas niman ijkon tikixmatis toTajtsin

Maski Hans niman Bruni kineltokayaj ika nemi se toTajtsin, yejuamej xmás kixmatiyaj. Ijkuak opeujkej nomachtiaj itech toTajtsin, más okixmatkej. Niman yejuin okinpaleui makasikamatikan nochi tlen notlajtoltiayaj. Niman noijki, okimatkej ika toTajtsin kichiuas itlaj tlen kualtsin ika tlayekapan. Ijkon ken yejuamej, miyekej itekipanojkauan Jehová ijkon inpan yonochiuj.

Para tikixmatiskej Jehová, kachtopa noneki kuajli tomachtiskej Biblia pampa ompa tlajtoua itech Jehová niman noijki techijlia tlen yejua kineki matikchiuakan. Ipan kachtopa siglo miyekej ijkon okichiujkej. Tlapajtijketl Lucas, akin onen ipan kachtopa siglo, okijto ika akin nemiyaj ipan tlanechikojli de Berea (Grecia) “más kuajli tlaneltokayaj xken on yejuan chantiyaj Tesalónica. Ikan kuajli inyojlo okiselijkej on temachtijli, niman mojmostla kitejtemouayaj ipan on Yektlajkuilojli para kitaskej tla melauak on tlen kinmijliayaj” (Hechos 17:10, 11).

Noijki, akin kachtopa opeuj kichiuaj ken Cristo nosentlaliayaj niman ijkon nomachtiskej iTlajtol toTajtsin (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Ipan yejuin tonaltin noijki ijkon nochiua. Iteixpantijkauan Jehová nosentlaliaj niman ijkon oksekimej makixmatikan Jehová niman makitekichiuilikan ika nochi inyojlo. ¿Kenijki más mitspaleuis tla kuajli timouika imiuan iteixpantijkauan Jehová? Miyekej kichiuaj ijkon ken akin kiueyichiuaj. Noijki ijkon, iteixpantijkauan Jehová kichiuaj ijkon ken toTajtsin, ika yejon, tla imiuan timouika, mitspaleuis más kuajli xkixmati toTajtsin Jehová (Hebreos 10:24, 25).

¿Tiknemilia ika melak miyek tlen noneki tikchiuas san para tikixmatis yakaj? Kemantika melak noneki tokojtiliskej. ¿Xmelauak ika para tikpiyaskej itlaj tlen tikuelitaj noneki melak tokojtiliskej? San matikonnemilikan kenon nokojtilia yakaj akin kineki teuan notlatlanis ipan se carrera noso se deporte. Se tlakatl akin chanti Francia akin itoka Jean-Claude Killy okitlan se medalla de oro pampa melak ueliya se deporte kampa ika se tabla nopeyauaj ipan nieve, niman yejua kijtoua ika para se uelis tetlanis: “Noneki sajnoye nokojtilis mojmostla nomajmachtis niman noneki miyek xiujtin ijkon kichiuas”. ¡Melak miyek tiempo timomajmachtis san para timotlatlanis seki minutos! Kanaj nonekis melak timokojtilis tikixmatis Jehová, san ika, yejuin xsan mitspaleuis para seki xiujtin, yej mitspaleuis para nochipa.

Uelis más kuajli iuan touikaskej Jehová

Tinochimej tikuelitaskiaj nochipa tiyolpakiskej, san ika, kemantika xtiyolpakij pampa san tiknemilijtokej tleka otinemikoj noso tleka melak nochiua tlen xkuajli. Tla tejua noijki ijkon yotimomachilijka, kuajli xmatsto ika tla timokojtilia más kuajli tikixmatis Jehová, mitspaleuis nochipa xyolpaki.

¿Ajsis se tonajli ijkuak xok nonekis tomachtiskej para tikixmatiskej Jehová? Ka, pampa miyekej akin melak youejkaujkej ika kitekichiuiliaj Jehová ok nomachtiaj Biblia niman yokitakej ika pampa ijkon kichiua más yokixmatkej Jehová. Kuakon, tla tejuamej tokojtiliaj más tikixmatiskej Jehová, más tiyolpakiskej niman más kuajli touikaskej iuan toTajtsin. Nochipa matikilnamikikan tlen okijto apóstol Pablo: “¡Sanoyej ouijtikaj tikajsikamatiskej on iriquezas Dios, de on itlamatkilis niman ikajsikamatilis! Xakaj ueli kiteijlia tline Dios kichiua itlaj, nion xakaj kajsikamati kenijki kichiua on itekiu. On Yektlajkuilojli ijkin kijtoua: ‘¿Akinon kimati on tlen toTEKO Dios kinemilia? Noso, ¿kanon nemi on yejuan ueli kitlakanonotsa toTEKO Dios?’” (Romanos 11:33, 34).

[Nota]

[Comentario]

Desde yeuejkaui miyekej notlajtoltiaj: ¿Tleka otinemikoj? ¿Tlenon topan nochiuas ika tlayekapan?

[Comentario]

“Ijkuak opeuj kuajli nikixmati toTajtsin Jehová noijki opeuj niktlasojtla”

[Comentario]

“Tla tiktekichiuilia Jehová melak tiyolpakis. Melak yonechpaleui aman ika yonikixmat Jehová”