Kumi he Hala he Moana Lahi
Kumi he Hala he Moana Lahi
HA HA he atu Marshall Island molea e 1,200 aelani mo e tau aelani ikiiki, laulahi ne gahoa ni e mita he tokoluga hake he tahi. Na galo vave ka kamata laia ke mamao mai mo e aelani. Ka e, ne maeke e tau tagata o vaka i Marshall he vaha i tuai ke fakahakohako e tau fenoga mai he taha aelani tote ke he taha aelani tote, he kumi e hala ha lautolu he kavi ke he ua e miliona poloka kilomita he Moana Pasifika. Taute fēfē e lautolu? Ne takitaki a lautolu he fakaaoga e “tau mepe” mukamuka ka e aoga lahi, ne fakahigoa ko e tau mepe ka akau.
Mai he fakaaoga, ne iloa he tau kauvaka i Marshall kua tata tuai ke he motu ka kitia e tau fufuta peau ne fakakite e tuaga he aelani ke hokotia ke 30 e kilomita he mamao. Ne loga e fufuta peau ke ako, ti kua eke e tau mepe ka akau mo fakamanatu aki. Ko e mena fēfē e tau mepe ka akau? Tuga he kitia e koe he fakatino, ko e tau ka akau ne moua mai he tau kave he tau hoko fa po ke tau kaniu ne pipipipi tuga na lalaga ke fakakite aki e tau fufuta peau. Ti pipi e tau gati fua pule ke fakamailoga e tuaga he tau aelani.
Ke he tau tau loga, ko e mena fufū e o he moana he fakaaoga e mepe ka akau, fakakite ni ki a lautolu ne fifili pauaki. Fakamahani fēfē mogoia e kauvaka fakaako ke fakaaoga e mepe ka akau? Fakaako ni he fakamahani mo e he fakaaoga. Ne fakamahani he kauvaka lotomatala lahi e kauvaka fakaako hoko laua ni, he liga uta a ia ke he tau aelani tata mai. He iloa e kauvaka foou ke mailoga e tau fufuta peau, ne mauokafua a ia ke he mepe ka akau haana. Fakahiku ai, kua maeke ia ia ke fina atu tokotaha ki moana.
Tatai ai, ko e Kupu he Atua ko e Tohi Tapu, kua maeke ke takitaki a tautolu he fenoga he moui. Fakamua, liga fai tagata ne lagomatai a tautolu ke maama e matapatu manatu he tau Tohiaga Tapu. Ti, he matutaki a tautolu ke fakaako e Kupu he Atua mo e fakagahua e tau matapatu fakaakoaga i ai, kua moua e tautolu e mauokafua ke he tau talahauaga i ai. Ko Iosua, ko e takitaki he tau Isaraela, ne tala age ki ai ke fakatumau ke totou e Kupu he Atua ke maeke ia ia “ke eke ai ke lata mo e tau mena oti kua tohi ai.” “Ti,” tala age e Atua ki a Iosua, to “monuina a koe ke he tau puhala oti ke fano ai a koe, ti monuina ai ni.” (Iosua 1:8) E, maeke e Tohi Tapu ke fakahakohako e puhala mooli mo e monuina ke he tau momoui ha tautolu.
[Fakatino Credit Line he lau 32]
© Greg Vaughn