Kia Talia Tumau e Akonakiaga a Iehova
Kia Talia Tumau e Akonakiaga a Iehova
“Aua neke fakateaga a koe ke he akonakiaga a Iehova.”—TAU FAKATAI 3:11.
1. Ko e ha kua lata ia tautolu ke talia e akonaki faka-Atua?
KUA foaki he Patuiki ko Solomona ha Isaraela i tuai ki a tautolu takitokotaha e kakano mitaki ke talia e akonakiaga he Atua. “Haku tama na e aua neke fakateaga a koe [ke he] akonakiaga a Iehova,” he talahau e Solomona, “ti ua fakaatukehe foki a koe ka akonaki e ia a koe. Ha ko ia kua ofania e Iehova, kua akonaki e ia a ia; tuga he akonaki he matua tane e tama tane kua fiafia ki ai a ia.” (Tau Fakatai 3:11, 12) E, kua akonaki he haau a Matua he lagi a koe ha kua ofania e ia a koe.
2. Fakamaama fēfē e “akonakiaga,” ti ko e puhala fe ka akonaki ai e tagata?
2 Kua hagaao e “akonakiaga” ke he fakahala, fakahako, hatakiaga, mo e fakaakoaga. “Ko e tau akonakiaga oti kana kua nakai manatu a tautolu ke he vaha ia ko e mena ke fiafia ki ai, ka ko e mena ke momoko ai,” he tohia he aposetolo ko Paulo, “ati oti ka e fua mai e fua he tututonu ke monuina ai a lautolu kua akonaki ai.” (Heperu 12:11) He talia mo e fakagahuahua e akonaki faka-Atua ka lagomatai a koe ke tutuli e puhala tututonu ti fakatata atu a koe ke he Atua tapu, ko Iehova. (Salamo 99:5) Kua liga fakahako mai puhala he tau matakainaga talitonu, he tau mena ne ako he tau feleveiaaga Kerisiano, mo e he fakaakoaga haau he Kupu he Atua mo e tau tohi he “fekafekau pule, kua fakamoli.” (Luka 12:42-44) Kua fakaaue mooli a koe he magaaho ka talaatu ki a koe kua fai mena ne kua lata ke fakahako! Ka ko e heigoa e akonakiaga kua lata kaeke kua taute e agahala kelea muitui?
Kakano ne Tuku ki Tua e Falu
3. Magaaho fe ka tuku ki tua?
3 Ko e tau fekafekau he Atua kua fakaako e Tohi Tapu mo e tau tohi faka-Kerisiano. Ko e tau tutuaga a Iehova kua fakatutala ki ai he tau feleveiaaga, tau toloaga, mo e tau fonoaga ha lautolu. Ti kua iloa he tau Kerisiano e tau mena ne manako e Atua ke taute e lautolu. Ti taute ni e tuku ki tua kaeke kua nakai tokihala e tagata he fakapotopotoaga mai he agahala kelea muitui.
4, 5. Ko e heigoa e fakafifitakiaga ne fakakite mai he Tohi Tapu, ti ko e ha ne tomatoma ke he fakapotopotoaga ke liu talia e tagata hēhē?
4 Mailoga e fakafifitakiaga he Tohi Tapu ke he tagata ne tuku ki tua. Ne tokaholo he fakapotopotoaga i Korinito e “feuaki pihia foki [ne] nakai talahaua ke he tau motu kehe, [ne] eke taha e hoana he hana matua tane.” Ne tomatoma e Paulo e tau Korinito “ke tuku atu a ia kua pihia kia Satani kia malaia ai e tino, ka kia hao e agaga.” (1 Korinito 5:1-5) He magaaho ka tuku ki tua mo e age ki a Satani, kua liu tuai e tagata agahala ke eke mo vala he lalolagi he Tiapolo. (1 Ioane 5:19) Ne tuku a ia ki tua ke utakehe e fakaohoohoaga kelea he fakapotopotoaga mo e ke puipui e “agaga” mahani Atua, po ke aga malolō.—2 Timoteo 4:22; 1 Korinito 5:11-13.
5 Nakaila leva lahi e mole, ne tomatoma e Paulo e tau Kerisiano i Korinito ke liu talia mai e tagata taute mena hēhē. Ko e ha? Kua pihia ai ‘neke fakavai e Satani’ a lautolu, he talahau he aposetolo. Ne tokihala mooli e tagata agahala ti fakameā e moui haana. (2 Korinito 2:8-11) Kaeke nakai mahalo e tau Korinito ke liu talia e tagata tokihala, to fakavai e Satani a lautolu ti maō kikiha a lautolu mo e nakai fakamagalo atu, ko e mena ne loto e Tiapolo ke taute e lautolu. Ka e tuga kua nakai leva ti ‘fakamagalo mo e fakamafana’ e lautolu e tagata tokihala.—2 Korinito 2:5-7.
6. Ko e heigoa ka moua mai he tuku ki tua?
6 Ko e heigoa ka moua he tuku ki tua? Kua leveki ai e higoa tapu ha Iehova neke ekefakakelea mo e puipui e higoa mitaki he tau tagata haana. (1 Peteru 1:14-16) He utakehe e tagata taute mena hēhē ne nakai tokihala he fakapotopotoaga ka fakatokoluga e tau tutūaga he Atua mo e puipui e meā fakaagaaga he fakapotopotoaga. Ti liga lagomatai e tagata nakai tokihala ke matala e loto.
Aoga Lahi e Fakatokihala
7. Lauia fēfē a Tavita he magaaho ne kaumahala ke talahau e tau holifono haana?
7 Ko e tokologa ne agahala kelea lahi mahaki ti tokihala mooli kua nakai tuku ki tua he fakapotopotoaga. Ti kua nakai mukamuka ai ke tokihala mooli. Kia mailoga e Patuiki ko Tavita ha Isaraela, ne fati e Salamo 32. Ne fakakite he lologo ia kua fai magaaho ne nakai talahau e Tavita e tau agahala kelea lahi mahaki haana, tuga ne taute mo Patesepa. Ko e fua, ne lolelole e malolō haana ha kua tupetupe ke he agahala, tuga e vevela he vahā mafana ne mimiti e pahahū he akau. Ne mamahi a Tavita ke he tino mo e manamanatuaga, ka e he magaaho ne ‘talahau e ia e tau holifono haana, ne fakamagalo e Iehova a ia.’ (Salamo 32:3-5) Ti lologo a Tavita: “Uhoaki e tagata kua nakai talahaua e Iehova kua hala.” (Salamo 32:1, 2) Ko e homo ue atu ha ia ke logona e fakaalofa noa he Atua!
8, 9. Kua mailoga fēfē e tokihala, ti aoga fēfē ai kaeke ke liu talia e tagata ne tuku ki tua?
8 Kitia maali ai, kua lata e tagata agahala ke tokihala kaeke ke moua e ia e fakaalofa noa. Ko e tokihala mogoia, nakai ko e mena fakamā po ke mena ke matakutaku ai neke iloa e haana agahala. “Ke tokihala” kua kakano “ke hiki e manamanatuaga” mai he mahani kelea ha kua momoko ke he mena ia ne taute. Kua “loto malipilipi mo e pehia” e tagata tokihala ti manako ke “fakahako e hēhē” ka maeke ia ia.—Salamo 51:17; 2 Korinito 7:11.
9 Kua aoga lahi ke tokihala ke maeke ke liu talia ki loto he fakapotopotoaga. Ko e tagata ne tuku ki tua kua nakai amanaki ti liu talia ke he fakapotopotoaga kaeke kua fai magaaho he mole. Ato liu talia a ia, kua lata ke fai hikiaga lahi e tuaga he loto haana. Kua lata ia ia ke mailoga e mamafa he agahala haana mo e ekefakakelea ne tamai e ia ki a Iehova mo e fakapotopotoaga. Kua lata e tagata agahala ke tokihala, liogi fakamakamaka ma e fakamagaloaga, ti fakalautatai atu ke he tau poaki tututonu he Atua. Ka ole ke liu talia, kua lata a ia ke fakamooli kua tokihala tuai mo e hane ‘eke foki e tau mahani ke lata mo e tokihala.’—Gahua 26:20.
Ko e Ha ne Talahau e Hēhē?
10, 11. Ko e ha kua nakai lata ke fufū e agahala?
10 Liga manatu falu ne fitā e agahala: ‘Ka tala age e au ke he taha tagata e agahala haaku, to liga tali e au e tau hūhū fakamā ti liga tuku ki tua. Ka e ka fakanono au, to nakai tupu ha mena pihia mo e nakai fai tagata i loto he fakapotopotoaga ka iloa.’ Kua kaumahala e manamanatuaga pihia ke mailoga e tau mena kua aoga. Ko e heigoa e tau mena nei?
11 Ko Iehova ko e “Atua fakaalofa hofihofi noa mo e fakaalofa noa, fakatuai ke ita mo e lahi e fakaalofa-totonu mo e kupu mooli, kua puipui e fakaalofa-totonu ma e tokoafe, kua fakamagalo e hepehepe mo e holifono mo e hala.” Pete ia, ne fakahako mooli e ia e tau tagata haana ke he ‘akonakiaga kua fakalata.’ (Esoto 34:6, 7, NW; Ieremia 30:11) Kaeke ke taute e koe e agahala kelea lahi mahaki, maeke fēfē mogoia ia koe ke moua e fakaalofa hofihofi noa he Atua kaeke ke lali a koe ke fufū e hala? Kua fita he iloa e Iehova, ti nakai fakaheu noa e ia e mena hēhē ne taute.—Tau Fakatai 15:3; Hapakuka 1:13.
12, 13. Ko e heigoa ka tupu mai he lali ke fufū e tau hēhē?
12 Kaeke kua taute e koe e agahala kelea lahi mahaki, ti talahau mogoia e agahala haau ka lagomatai a koe ke liu moua e loto manamanatu mitaki. (1 Timoteo 1:18-20) Ka e he kaumahala ke talahau e lekua ia ka fua mai e loto manamanatu kelea ti takitaki atu ke taute e tau agahala loga. Manatu kua nakai agahala hokoia a koe ke he tagata po ke ke he fakapotopotoaga. Kua agahala ke he Atua. Ne lologo e salamo: “Ha ha he lagi e nofoaiki a Iehova; kua kitekite mai hana na fofoga, kua kamatamata e fanau he tagata he hana tau tuamata. To kamatamata e Iehova a ia ne tututonu; . . . katoa mo ia kua fiafia ke he favale.”—Salamo 11:4, 5.
13 To nakai fakamonuina e Iehova ha tagata ne fufū e agahala kelea muitui mo e lali ke nofo he fakapotopotoaga Kerisiano meā. (Iakopo 4:6) Ti kaeke ke agahala a koe ti manako ke taute e mena kua hako, kia nakai fakauaua ke talahau fakamooli e agahala haau. Ka nakai pihia, to agahala e loto manamanatu haau, mua atu he magaaho ka totou po ke logona e koe e fakatonuaga hagaao ke he tau agahala kelea lahi mahaki pihia. Ka e kua ka utakehe e Iehova e agaaga haana mai ia koe tuga ne taute e ia ke he Patuiki ko Saulo? (1 Samuela 16:14) Ka utakehe e agaaga he Atua, to liga taute e koe e tau agahala loga atu foki ne kelea lahi mahaki.
Falanaki ke he Tau Matakainaga Taane Tua Fakamooli ha Mutolu
14. Ko e ha kua lata he tagata taute mena hēhē ke fanogonogo ke he fakatonuaga ia Iakopo 5:14, 15?
14 Ti ko e heigoa mogoia kua lata ke taute he tagata taute mena hēhē ne tokihala? “Kia ui atu a ia ke he tau patu he ekalesia, kia liogi a lautolu mo ia, mo e fakatākai a ia ke he magalolo ke he higoa [a Iehova]. To fakamoui e tagata gagao ke he liogi kua eke mo e tua, to fakatu foki [e Iehova] a ia.” (Iakopo 5:14, 15) Ko e taha puhala a ia ma e tagata ke finatu ke he tau motua ke maeke ke ‘fua mai e tau fua ke lata mo e tokihala.’ (Mataio 3:8) Ko e tau tagata taane tua fakamooli mo e loto totonu nei to ‘liogi mo ia mo e fakatākai a ia ke he magalolo ke he higoa a Iehova.’ Ke tuga e lolo mulu, to eke e fakatonuaga faka-Tohi Tapu ha lautolu mo fakamafanaaga ke he ha tagata ni ne tokihala mooli.—Ieremia 8:22.
15, 16. Muitua fēfē e tau motua Kerisiano ke he fakafifitakiaga ne fakatoka he Atua, tuga ne fakamau ia Esekielu 34:15, 16?
15 Ko e fakafifitakiaga fakaalofa ha ia ne fakatoka he Leveki ha tautolu, ko Iehova, he magaaho ne fakatokanoa e ia e tau Iutaia mai he paea i Papelonia he 537 F.V.N. mo e magaaho ne fakatokanoa e ia a Isaraela fakaagaaga mai i ‘Papelonia Lahi’ he 1919 V.N.! (Fakakiteaga 17:3-5; Kalatia 6:16) Ne fakamooli ai e ia e maveheaga haana: “To fagai e au haku a tau mamoe, ko au foki ke tatakoto ai a lautolu . . . To kumi foki e au a ia ne galo, to liu aki mai e au a ia ne vega kehe, to pipi e au a ia ne mafatifati, to fakamalolo e au a ia ne lolelole.”—Esekielu 34:15, 16.
16 Ne fagai e Iehova e tau mamoe fakatai haana, taute a lautolu ke tatakoto ke he mena haohao mitaki, mo e kumi a lautolu ne galo. Kua mataala tumau foki e tau leveki Kerisiano ke fagai mo e iloa kua haohao mitaki fakaagaaga e fuifui he Atua. Ne kumi he tau motua e mamoe ne tafea kehe he fakapotopotoaga. Tuga ne ‘pipi he Atua a ia ne mafatifati,’ ne “pipi” he tau leveki e tau mamoe ne hukia he tau kupu he falu po ke he tau gahua ni ha lautolu. Ti tuga he ‘fakamalolo he Atua a ia ne lolelole,’ ne lagomatai he tau motua a lautolu kua gagao fakaagaaga, liga ha kua taute e tau mena hēhē fakatagata.
Puhala ne Foaki he Tau Leveki e Lagomatai
17. Ko e ha kua nakai lata ia tautolu ke fakauaua ke kumi e lagomatai fakaagaaga mai he tau motua?
17 Kua fiafia e tau motua ke omaoma e fakatonuaga nei: “Fakatumau ke fakakite e fakaalofa noa . . . , ti taute ai mo e matakutaku.” (Iuta 23, NW) He mokulu ke he mahani feuaki ne agahala kelea lahi mahaki e falu Kerisiano. Ka e, ka tokihala mooli a lautolu to maeke ia lautolu ke amanaki ke moua e fakamalolōaga fakaalofa noa he tau motua ne makai ke lagomatai fakaagaaga a lautolu. Ki a ia ni foki, ne pehē a Paulo hagaao ke he falu tagata pihia: “Nakai ko e mena fia pule a mautolu ke he ha mutolu a tua, ka ko e tau lagomatai a mautolu ke he ha mutolu a fiafia.” (2 Korinito 1:24) Ko e mena ia ua fakauaua ke kumi ki a lautolu ma e lagomatai fakaagaaga.
18. Fehagai fēfē e tau motua mo e tau matakainaga talitonu ne hēhē?
18 Kaeke kua agahala kelea lahi mahaki a koe, kua maeke he ha a koe ke mauokafua ke he tau motua? Kakano ko e tau leveki pauaki a lautolu he fuifui he Atua. (1 Peteru 5:1-4) Kua nakai fai leveki fakaalofa ne fakahala e punua mamoe totonu ne tagi he pakia a ia. Ti, ka fehagai e tau motua mo e tau matakainaga talitonu ne hēhē, to nakai hagaaki atu a lautolu ke he holifono mo e fakahala, ka e ke he agahala mo e ke liuaki mai fakaagaaga. (Iakopo 5:13-20) Kua lata e tau motua ke fakafili tututonu mo e “fakahelehele e fuifui mamoe.” (Gahua 20:29, 30; Isaia 32:1, 2) Ke tuga falu Kerisiano oti, kua lata e tau motua ke ‘fakagahuahua e fakafili tonu, fakaalofa totonu, mo e ke fakalatalata he o fano mo e Atua.’ (Mika 6:8, NW) Kua aoga lahi e tau mahani pihia he magaaho ka taute e tau fifiliaga hagaao ke he moui mo e fekafekauaga tapu ‘he fuifui mamoe ne fagai e Iehova.’—Salamo 100:3.
19. Ko e heigoa e aga he tau motua Kerisiano he lali a lautolu ke liuaki mai e tagata hēhē?
19 Kua kotofa he agaaga tapu e tau leveki Kerisiano ti lali a lautolu ke takitaki he agaaga tapu ia. “Pete ni foki kua taute he taha tagata e falu lakaaga hēhē ato iloa ai e ia”—tuga kua nakai mautali—ko e tau tagata fakaagaaga ne lotomatala kua lali a lautolu ke “liuaki mai e tagata pihia mo e agaaga molu.” (Kalatia 6:1, NW; Gahua 20:28) He mahani molū mo e pipiki ke he tau tutūaga faka-Atua, ne lali e tau motua ke hiki e manamanatuaga haana, tuga ni e toketā ne tului fakatekiteki e alaga ne mapaki neke mamahi ti tului agaia e lekua. (Kolose 3:12) Ha kua fakavē e fakaalofa noa ke he liogi mo e tau Tohiaga Tapu, to fakaata he fifiliaga he tau motua e onoonoaga he Atua ke he lekua ia.—Mataio 18:18.
20. He magaaho fe ka lata ke fakailoa ke he fakapotopotoaga kua akonaki tuai taha tagata?
20 Kaeke kua iloa lahi po ke to iloa mooli e agahala, kua lata ke fakailoa ke he fakapotopotoaga ke maeke ke puipui aki e higoa mitaki i ai. To fai fakailoaaga foki ka lata he fakapotopotoaga ke iloa. He magahala ne malolō fakaagaaga mai e tagata ne akonaki he fakafiliaga, kua liga fakatatai a ia ke he tagata ne malolō mai he pakia, ko e mena ne fakakaupā fakakū ai e gahua haana. Fai magaaho he mole, kua liga aoga mogoia ma e tagata ne tokihala ke fanogonogo ka e nakai tali he tau feleveiaaga. Liga pulega e tau motua ma e taha tagata ke fakaako e Tohi Tapu mo ia ke fakamalolō ke he mena ne lolelole ai ti maeke ia ia ke liu foki “malolo ke he tua.” (Tito 2:2) Kua taute e tau mena oti nei mo e fakaalofa ti kua nakai taute ke fakahala aki e tagata taute mena hēhē.
21. Liga fehagai fēfē ke he falu mena hēhē ne taute?
21 Maeke he tau motua ke foaki e tau lagomatai fakaagaaga ke he tau puhala kehekehe. Tuga anei, ko e matakainaga ne lekua fakamua ke he kava kua liga inu lahi e kava ke lagataha po ke lagaua he magaaho ka nofo tokotaha a ia i kaina. Po ke liga ko ia ne tiaki e ula tapaka ka e ula tokotaha ke lagataha po ke lagaua he magaaho ne lolelole a ia. Pete kua fitā e liogi mo e talitonu to fakamagalo he Atua a ia, kua lata ia ia ke kumi e lagomatai he motua ke nakai eke e agahala ia mo mena taute mau. Liga tokotaha po ke tokoua e motua ka fehagai mo e tuaga nei. Pete ia, kua lata he (tau) motua ke fakailoa ke he leveki fakapotopotoaga neke fai matalekua foki ka putoia ki ai.
Fakatumau ke Talia e Akonaki Faka-Atua
22, 23. Ko e ha kua lata ia koe ke talia tumau e akonaki faka-Atua?
22 Ke moua e talia he Atua, kua lata he tau Kerisiano takitokotaha ke omaoma e akonakiaga a Iehova. (1 Timoteo 5:20) Kia tokaloto ā e tau puhala hako ne moua he kumikumi e tau Tohiaga Tapu mo e tau tohi faka-Kerisiano po ke he magaaho ka logona e koe e fakatonuaga mai he tau feleveiaaga, tau toloaga, mo e tau fonoaga he tau tagata a Iehova. Kia tumau ke fakamalolō he taute e finagalo a Iehova. Ti lagomatai mogoia he akonaki faka-Atua a koe ke taofi mau e puipuiaga fakaagaaga—ne tuga e kaupā malolō ke totoko ke he agahala.
23 He talia e akonaki faka-Atua ka taute a koe ke tumau ke he fakaalofa he Atua. Mooli, kua fitā falu he tuku ki tua he fakapotopotoaga Kerisiano, ka e nakai lata e mena nei ke tupu ki a koe kaeke ke “leveki e koe e loto hāu” mo e ‘fano tuga e tagata iloilo.’ (Tau Fakatai 4:23; Efeso 5:15) Kaeke ko koe kua tuku ki tua mogonei, ko e ha he taute e koe e tau lakaaga ke liu talia ke he fakapotopotoaga? Kua manako e Atua ma e tau tagata oti ne tukulele ki a ia ke tapuaki a ia mo e tua fakamooli katoa mo e “olioli ke he loto.” (Teutaronome 28:47) Kua maeke ai ke taute tukulagi e koe kaeke ke talia tumau e koe e akonakiaga a Iehova.—Salamo 100:2.
To Tali Fēfē e Koe?
• Ko e ha kua tuku ki tua e falu he fakapotopotoaga Kerisiano?
• Ko e heigoa ne putoia ke he tokihala mooli?
• Ko e ha kua lata ke talahau e tau agahala kelea lahi mahaki?
• Ko e heigoa e tau puhala ne lagomatai he tau motua Kerisiano e tau tagata taute mena hēhē?
[Tau Hūhū he Fakaakoaga]
[Fakatino he lau 8]
Ko e ha ne fakafano he aposetolo ko Paulo ke he tau Korinito e tau hatakiaga hagaao ke he tuku ki tua?
[Fakatino he lau 11]
Tuga e tau leveki i tuai, kua “pipi” he tau motua Kerisiano e tau mamoe he Atua ne pakia