‘A re Tlišetšeng Jehofa Dimpho’
GE MOTHO yo mongwe a go swara ka botho, o mo leboga bjang? Ela hloko kamoo ditona tša madira tša Isiraele di ilego tša leboga ka gona ka morago ga go fenya Bamidiane. Ntwa ye e bile gona ka morago ga gore Baisiraele ba dire sebe ka go rapela Baali wa Peoro. Modimo o ile a dira gore batho ba gagwe ba fenye gomme dilo tšeo di thopilwego ntweng di ile tša abelwa madira a 12 000 le Baisiraele ka moka. E le ge madira a be a latela tlhahlo ya Jehofa, a ile a abela baperisita tše dingwe tša dilo tšeo gomme Baisiraele ba bangwe ba di abela Balefi.—Num. 31:1-5, 25-30.
Lega go le bjalo, ditona tša madira di ile tša nyaka go dira mo gontši. Di ile tša botša Moše gore: “Rena bahlanka ba xaxo re badile palô ya bahlabani ba re bexo re ba laola, ra hwetša xò sa hlôkêxê le monna o tee wa rena.” Ge ba tlišetša Jehofa dibego, ba ile ba kgetha go tliša dilo tša gauta le dilo tše di fapa-fapanego tša go kgabiša. Boima bja dikgabišo tša gauta bo be bo feta dikhilograma tše 190.—Num. 31:49-54.
Ka tsela e swanago, batho ba bantši lehono ba tutueletšega go bontšha tebogo ya bona bakeng sa seo Jehofa a ba diretšego sona. Go feta moo, ga se bahlanka ba Modimo ba ineetšego feela bao ba lebogago ka tsela e bjalo. Ka mohlala, ela hloko mootledi wa pese yo a bego a iša batho le go ba tšea lebaleng la kopano ya ditšhaba-tšhaba yeo e bego e swaretšwe kua Bologna, Italy, ka 2009. Ka ge a be a otlela ka šedi e bile a e-na le moya wa boipoetšo, bao ba bego ba diriša pese ya gagwe ba ile ba phetha ka gore ba mo ngwalele lengwalo la go leboga le go mo nea tšhelete ya go leboga gotee le kopi ya puku ya Ke Eng Seo ge e le Gabotse Beibele e se Rutago? Ge a hwetša seo, mootledi o ile a re: “Ke amogela karata le puku ye ka diatla tše pedi, eupša ke buša tšhelete ka gobane ke nyaka go neela gore le ka tšwela pele ka modiro woo le o dirago. Gaešita le ge ke se yo mongwe wa Dihlatse tša Jehofa, ke nyaka go neela ka tšhelete ye ka gobane ke bone gore le dira dilo ka ge le e-na le lerato.”
Ge o gapeletšega go leboga dilo tšeo Jehofa a go diretšego tšona, tsela e nngwe yeo o ka bontšhago tebogo yeo ka yona ke ka go neela bakeng sa modiro wa lefase ka bophara wa Dihlatse tša Jehofa. (Mat. 24:14) Ditsela tšeo ba bangwe ba kgethago go neela ka tšona di bontšhitšwe lepokising le le sepedišanago le sehlogo se.
