• OMWAKA OBU NAAZAARWA: 1963

• EIHANGA RY’OBUZAARWA: BRITAIN

• EBY’ENYIMA: NKABA NYINE OMURIMO GW’EKITIINISA

EBI NAARABIREMU:

Nkazaarirwa omuri Croydon, South London, ndi omwana wa mukaaga ahari mwenda. Abazaire bangye bakafuruka aha kirwa kya Caribbean ekya St. Vincent. Maawe akaba naaza omu kanisa y’Abamesodokisi. Nkaba ntaine kihika ky’okwega ahari Ruhanga, n’obu ndaabe naabaire nyine ekyetengo ky’amaani eky’okwenda kumanya. Ebihuumuro byangye nkaba mbimara aha nyanja, ndikushoma ebitabo ebi naabaire nintiiza omu mabiikiro g’ebitabo.

Bwanyima y’emyaka mperize kushoma, nkamanya ngu nkaba niinyenda kuhwera abantu abatarikwebaasa. Nkatandika kukora n’abataine buraaro n’abaine oburemeezi omu kwega. Bwanyima nkaza aha yunivasite kwega eishomo eririkukwata aha magara. Ku naahendeire emishomo, nkatunga emirimo y’ekitiinisa, kandi nkongyera kutuura omu mbeera z’okujarama. Ahabw’okugira nkaba ninyekoresa, kandi ndi omucondooza ou abantu barikwebuuzaho, eki naabaire niinyenda kyonka ni kompyuta ya laptop na Intaneeti. Nkaba nza omu mahanga agandi kumara saabiiti nyingi, ndaara omu mahoteeri, ndeeba emyanya mirungi, kandi nza n’omu myanya y’okutendeka omubiri kubaasa kuguma nyine amagara marungi. Nkaba ninteekateeka ngu buri kimwe kiri gye. Kwonka ntindeebirwe ekigyendererwa kyangye eky’okuhwera abaine oburemeezi.

OKU BAIBULI YAAHINDWIRE EMITWARIZE YANGYE:

Kumara emyaka nkaba niinyebuuza, ‘ahabw’enki turiho, kandi ekigyendererwa ky’okubaho niki?’ Kwonka tindateireho kusherura eby’okugarukamu omu Baibuli. Eizooba rimwe omuri 1999, murumuna wangye Margaret, owaabaire ahindukire Omujurizi wa Yehova, akantaayaayira na munywani we Omujurizi wa Yehova owaayorekire ngu naanfaho. Nkashanga naikiriize kwega Baibuli ndikuhwerwa munywani wa murumuna wangye, kwonka nkaba nintunguuka mpora ahabw’okugira ngu omurimo gwangye n’eby’okweshemeza bikaba nibintwarira obwire bwingi.

Omu 2002, nkaza omu kicweka kya southwest England. Nkatungirayo diguri endiijo omu by’okucondooza aha mituurire y’abantu nyine ekigyendererwa ky’okutunga ekitiinisa kya dokita. Nkatandika kuza omu nteerane aha Kyombeko ky’Obukama omu kicweka ekyo ndi na mutabani wangye omuto. N’obu ndaabe naabaire ninkunda obwegyese bw’ahaiguru, okwega Baibuli kukaba kuriyo nikumpwera kumanya ahabw’enki hariho oburemeezi n’oku burikwija kuhwaho. Nketegyereza amazima agari omuri Matayo 6:24, aharikugira ngu torikubaasa kuheereza abakama babiri. Nooba oine kuheereza Ruhanga nari eby’obugaiga. Nkamanya ngu nyine kucwamu eki ndayebembeze.

Emyaka ey’enyima nkaba ninza omu guruupu y’okwega Baibuli ey’Abajurizi ba Yehova abaabaire nibeega ekitabo Is There a Creator Who Cares About You? * Nkahamiza kimwe ngu Ruhanga waitu wenka Yehova niwe arikwija kugonjoora oburemeezi bw’abantu. Kandi aha yunivasite nkaba niinyegyesibwa ngu okumanya ekigyendererwa ky’okubaho tikirikutwariramu okwikiririza omu Muhangi. Eki kikangwisa kubi. Bwanyima y’ameezi abiri, nkarekyera aho eishomo ryangye aha yunivasite, naacwamu kuha eby’omwoyo obwire bwingi.

Ekyahandiikirwe ekyampigire kukora empinduka omu ntwaza yangye n’Enfumu 3:5, 6: ‘Oyesigye [Yehova] n’omutima gwawe gwona, orekye kwegamira okwetegyereza kwawe ahabwawe. [Omumanye] omu mitwarize yaawe yoona, nawe naija kuguma naatebeekanisa emihanda yaawe yoona.’ Okwega ahari Ruhanga waitu owa rukundo kikarugamu ebirungi kukira eby’obugaiga n’ekitiinisa ky’okwetwa dokita. Oku naabaire nyongyera kwega aha kigyendererwa kya Yehova eki ainiire ensi n’omwanya ogu Yesu aine ahabw’okuhayo amagara ge ahabwaitu, nikwo naabaire ngira ekihika ky’okwenda kwehayo aha Muhangi waitu. Nkabatizibwa omu Kwakana 2003. Bwanyima nkatandika kworobya embeera zangye mporampora.

OKU NGASIIRWE:

Okugira omukago murungi na Yehova n’eky’obuguzi bwingi. Ntungire obugwa gye obwabuzima ahabw’okumumanya. Kandi nkatunga n’okushemererwa kwingi ahabw’okushashaanuka n’abaheereza ba Ruhanga ab’amazima.

Eiriho ryangye ry’okwenda kumanya nirikugumizamu kwigutsibwa kurabira omu kwega Baibuli n’enteerane z’Ekikristaayo. Ninkunda kugambira abandi aha kwikiriza kwangye. Ogu guhindukire omurimo gwangye, ogu ndikurabiramu kuhwera abantu kugira embeera nungi hati, n’amatsiko g’okugira amagara marungi omu nsi ensya. Kuruga Okwamukaaga 2008, ntwire ndi omu buheereza bw’obutwire, nshemereirwe munonga kandi mmazirwe kukira ira. Mbaasize kumanya ekigyendererwa ky’okubaho, kandi eki ninkisiimira Yehova munonga.

• OMWAKA OBU NAAZAARWA: 1973

• EIHANGA RY’OBUZAARWA: AUSTRIA

• EBY’ENYIMA: OMUTEEZI WA ZAARA

EBI NAARABIREMU:

Nkakurira omu tauni nkye eya Braunau, omuri Austria. Omwanya ogu gukaba gutunguukire, gutarimu buhenda biragiro bwingi. Eka yangye ekaba eri ey’Abanyakaturiki ediini ei naakuriiremu.

Ekyambaireho nkiri muto kikankwataho munonga. Omuri 1984, obu naabaire nyine emyaka nka 11, niinyijuka ndikuzaana omupiira n’omwe ahari banywani bangye ab’aha mara. Eihangwe eryo ryenyini, akafeera omuri butandu y’emotoka. Okufa kwa munywani wangye ogwo kukatenganisa munonga. Kumara emyaka bwanyima ya butandu egyo, nkaba niinyebuuza ekiririkubaho twafa.

Ku naaherize kushoma, nkatandika kukora omu by’amashanyarazi. N’obu ndaabe naabaire nyine omuze gw’okuteera zaara y’esente nyingi, nkaba ntaine buremeezi bw’esente. Nkaba nimmara obwire bwingi omu by’emizaano, kandi nkakunda n’ebyeshongoro by’obushaarizi. Nkaba nduga omu disiko ndikuza omu ndiijo, nduga aha mukoro ndikuza aha gundi. Nkaba ninsherura eby’okweshemeza ebirimu obuhwanshoni, ekyandeeteire kuhurira nyine eki mbuzirweho.

OKU BAIBULI YAAHINDWIRE EMITWARIZE YANGYE:

Omuri 1995, omugurusi Omujurizi wa Yehova akaiguza aha rwigi rwangye yaampa ekitabo book ekyabaire nikigarukamu ekibuuzo, niki ekirikubaho omuntu yaafa? Nkaba ninkiteganisibwa okufa kwa munywani wangye, n’ahabw’ekyo nkaikiriza ekitabo eki. Tindashomire eshuura eyaabaire neekwata aha kufa yonka, beitu ekitabo kyona!

Ebi naashomire bikagarukamu ebibuuzo ebirikukwata aha kufa. Kwonka nkeega n’ebindi bingi. Ahabw’okugira ngu nkakura ndi Omunyakaturiki, okwikiriza kwangye kukaba nikwegamira aha kwebembeza Yesu. Kwonka, okushwijuma gye Baibuli kukampwera kugira omukago murungi na Ishe wa Yesu, Yehova Ruhanga. Nkashemererwa kumanya ngu Yehova tarikusherekyereza, beitu ngu naayemanyisa abarikumusherura. (Matayo 7:7-11) Nkeega ngu Yehova aine enyehurira. Kandi nkeega ngu naahikiriza eki arikugamba. Eki kikampwera kukunda munonga obunabi bwa Baibuli n’okucondooza obu buriyo nibuhikiirira. Ebi naacondorize bikahamya okwikiriza kwangye omuri Ruhanga.

Nkarahuka kwetegyereza ngu Abajurizi ba Yehova nibo bonka abaabaire nibafayo kuhwera abantu kwetegyereza Baibuli. Nkaba ndeeba ebyahandiikirwe ebiri omu bitabo by’Abajurizi ba Yehova reero mbishwijuma omu Baibuli yangye ey’Abanyakaturiki. Ku naagumire nincondooza, naamanya ngu mboine amazima.

Omu kwega kwangye Baibuli nkakimanya ngu Yehova naayenda ngyendere aha mitindo ye. Kurugiirira aha bi naashomire omu Abaefeso 4:22-24, nketegyereza ngu nyine ’kujuura omuntu owa ira’ owaabaire aine emitwarize ey’enyima, reero njware ’omuntu omusya owaahangirwe’ nk’oku Ruhanga arikwenda. N’ahabw’ekyo nkareka emitwarize yangye y’obuhwanshoni. Nkareeba ngu nikyetengyesa n’okureka omuze gw’okuteera zaara, obu omuze ogu nigwimutsya okukunda ebintu n’omururu. (1 Abakorinso 6:9, 10) Nkaba nimmanya ngu kubaasa kukora empinduka ezi, nkaba nyine kurekyera aho kureeba banywani bangye aba ira, nsherure abasya abaine emitindo nk’eyangye.

Okukora empinduka ezi kikaba kitoorobi. Kwonka nkatandika kuza omu nteerane n’Abajurizi ba Yehova aha Kyombeko ky’Obukama, naatandika kutunga abanywani abasya omu kibiina. Kandi nkagumizamu niinyeyegyesa Baibuli n’obwegyendesereza. Amadaara aga gakampwera kuhindura ebyeshongoro, ebigyendererwa, n’okuboneza endeebeka yangye. Omuri 1995, nkabatizibwa naaba omwe aha Bajurizi ba Yehova.

OKU NGASIIRWE:

Hati nyine emiteekateekyere ehikire aha sente n’okugira ebintu. Nkaba nindahuka kugira ekiniga, kwonka hati ntuurize. Kandi hati ntinkyerarikirira munonga ahari nyentsya.

Ninkunda kuba omwe aha bantu abarikuheereza Yehova omu nsi yoona. Omuribo nindeebamu abantu abaine oburemeezi kwonka nibaheereza Ruhanga omu bwesigwa. Ninshemererwa munonga kureeba ngu ninkoresa amaani gangye n’obwire bwangye, kutari kwigutsya ebyetengo byangye, beitu kuramya Yehova n’okukorera abandi ebirungi.

• OMWAKA OBU NAAZAARWA: 1963

• EIHANGA RY’OBUZAARWA: ENGLAND

• EBY’ENYIMA: NKABA NTAMIRWE AMAGARA

EBI NAARABIREMU:

Nkazaarirwa omuri England, kwonka obu naabaire nyine emyaka mushanju, ab’eka yangye bakafuruka baaza Australia. Tukatandika kutuura omuri Gold Coast, omwanya gw’eby’oburambuzi omuri Queensland, Australia. N’obu eka yangye yaabaire etari ngaiga, butoosha tukaba nitutunga ebi turikwenda.

N’obu ndaabe naakuziibwe gye, nkaba ntaine kushemererwa, nkaba ntaine kushemererwa okwabuzima. Nkahika naatamwa amagara. Tata akaba ari omusinzi munonga. Nkaba ntarikumukunda munonga, na munonga ahabw’esindo ye n’oku yaabaire naatwariza maawe. Bwanyima nkaija naamanya ebi yaabiremu obu yaabaire ari omuserukare omuri Malaya, naayetegyereza ahabw’enki yaabaire naatwaza ati.

Kandika kuvumba amaarwa obu naabaire niinshoma omu siniya. Aha myaka 16, nkaruga omu ishomero naaza omu mahe. Nkatandika kukoresa emibazi, kandi naagira omuze gw’okukoresa etaabo. Kandi nkongyererera kimwe kubaisibwaho amaarwa. Nkaruga aha kuvumba amaarwa buri wiikenda, naatandika kugavumba buri izooba.

Omu bushogoyo bwangye nyine emyaka nka 20, nkatandika kubangaanisa yaaba Ruhanga ariho. Nkaba niinyebuuza nti: ‘Buzima Ruhanga ku araabe ariho, ahabw’enki naareka abantu kubonabona n’okufa?’ Nkahandiika n’ekikwato ndikucwera Ruhanga orubanja ahabw’ebintu bibi ebiri omu nsi.

Nkaruga omu mahe aha myaka 23. Bwanyima y’ekyo, nkakora emirimo eteri emwe n’emwe, naatandika n’okurambura amahanga omwaka aha gundi, kwonka tihaine ekiihireho okwetamwa kwangye. Nkaba ntaine kigyendererwa ky’okutaho ebigyendererwa kandi nkabihikiiriza. Nkaba ntarikushemezibwa kintu kyona. Ekigyendererwa ky’okugira enju, omurimo murungi, n’okukuzibwa aha murimo byona bikabura amakuru. Okuhuumurizibwa kwangye kwonka kukaba kuri okunywa amaara n’okuhurikiza ebyeshongoro.

Niinyijuka obwire bwenyini obu naagira ekyetengo ky’amaani eky’okwenda kumanya ekigyendererwa ky’okubaho. Nkaba ndi omuri Poland, ndi omu nkambi y’empungi omuri Auschwitz. Nkashoma aha bwinazi obwabaireho. Kwonka ku naareebire obuhango bw’enkambi y’empungi egyo, nkakwatwaho munonga. Nkaba ntarikubaasa kwetegyereza ahabw’enki abantu nibainaza bagyenzi baabo. Niinyijuka ndikugyendagyenda omu nkambi egyo amarira garikwitururuka omu maisho gangye, ndikwebuuza ’ahabw’enki?’

OKU BAIBULI YAAHINDWIRE EMBEERA ZANGYE:

Omuri 1993, naaheza kuruga omu mahanga kutaayaaya, nkatandika kushoma Baibuli n’okusherura eby’okugarukamu by’ebibuuzo byangye. Ahonaaho bwanyima, Abajurizi ba Yehova babiri bakaiguza aha rwigi rwangye baanyeta aha ruteerane oruhango orwabaire niruza kuba omu kishaayi haihi n’owaangye. Nkacwamu kuzayo.

Nkaba mperize kuruga aha kishaayi ekyo ameezi makye kureeba omupiira, kwonka oruteerane oru rukaba nirutaanira kimwe. Abajurizi ba Yehova bakaba nibatwaza gye, bajwaire gye, kandi abaana baabo nabo bakaba baine emitwarize mirungi. Kandi nkatangaara ahabw’eki naareebire omu bwire bwa kyamushana. Ebikumi n’ebikumu by’Abajurizi ba Yehova bakariira kyamushana omu kishaayi, kwonka ku baagarukiremu omu myanya yaabo, tindabaasize kureeba ekisasiro na kimwe omu ekyatsigara omu kishaayi! Kandi ekikuru, abantu aba, boona bakaba nibareebeka nk’abamazirwe, baine obusingye, ekintu eki naabaire ntwire ninsherura. Tindikwijuka orubazo na rumwe aha zaahairwe eizooba eryo, kwonka entwaza y’Abajurizi ba Yehova ekanguma omu biteekateeko.

Omwabazyo ogwo, nkateekateeka aha munyabuzaare wangye owaabaire naayega Baibuli, kandi arikwega n’ediini nyingi. Emyaka enyima, akaba yaagambiire ngu Yesu akagira ngu omuntu naabaasa kumanya ediini ey’amazima arikureeba ebyana byabo. (Matayo 7:15-20) Nkagira ngu ninza kwetegyereza Abajurizi ba Yehova ndeebe ekirikubataanisa aha bandi. Omurundi gw’okubanza omu magara gangye, nkaba endeebera birungi naagira n’amatsiko.

Saabiiti eyaakuratsireho, Abajurizi babiri ba Yehova abaanyetsire aha ruteerane oruhango bakagaruka. Bakaanshaba kunyegyesa Baibuli, naikiriza. Nkatandika n’okuza omu nteerane z’Ekikristaayo nabo.

Ku naagumiizemu niinyega Baibuli, emiteekateekyere ei naabaire nyine ahari Ruhanga ekahindukira kimwe. Nkeega ngu tiwe arikureetaho okubonabona n’ebintu bibi, kandi nawe naaguubwa kubi abandi baakora ebintu bibi. (Okutandika 6:6; Zaaburi 78:40, 41) Nkamariirira kutagwisa kubi Yehova. Niinyenda kureetera omutima gwe kushemererwa. (Enfumu 27:11) Nkarekyera aho okunywa ekirenga n’okukoresa etaabe, kandi nkareka n’ebikorwa by’obuhwanshoni. Omu Kwakashatu 1994, nkabatizibwa naaba omwe aha Bajurizi ba Yehova.

OKU NGASIIRWE:

Nyine okushemererwa n’okumarwa. Tinkiteeraho kumaraho oburemeezi bwangye ndikunywa amaarwa. Kureka, nkeega kutambira Yehova oburemeezi bwangye.—Zaaburi 55:22.

Emyaka ikumi ehingwire, ntwire ndi omu bushwere n’Omujurizi wa Yehova mugyenzi wangye Karen, kandi turi hamwe na muhara Karen orikwetwa Nella. Itwe bashatu nitukunda kumara hamwe obwire omu buheereza, turikuhwera abandi kwega amazima agarikukwata ahari Ruhanga. Empereruka, hati nyine ekigyendererwa.