Ɛnee Gyisɛse di munli, ɔti yeannwu amaneɛ dɔɔnwo kɛ mɔɔ alesama nwu ye ɛnɛ la. Noko akee, ɛnee ɔdwenle menli nwo kpalɛ. Ɛnee ɔfi ye ɛhulolɛ nu ɔyɛ menli boɛ ɔmaa ɔbo mɔɔ bɛ nye la zo la. Nɔhalɛ nu, ɔvile anwunvɔnezelɛ nu ɔboale awie mɔ.

Menli kɔsɔɔti mɔɔ ngakula nee mgbanyinli boka nwo la ɛnee kola bikye Gyisɛse ɔluakɛ ɔlɛ bɛ nwo alagye yɛɛ ɔmbu ɔ nwo somaa. Menli nwunle kɛ Gyisɛse dwenle bɛ nwo kpalɛ ɔti bɛanzulo kɛ bɛbabikye ye.

Gyisɛse yɛle asɔne hilele ye Papa dahuu, wɔ mekɛ mɔɔ yeha ɔ ngome anzɛɛ ɔ nee nɔhalɛ azonvolɛ lua la. Tɛ mekɛ mɔɔ ɔlɛdi aleɛ la angome a ɛnee ɔyɛ asɔne a, emomu mekɛ kɔsɔɔti. Ɔyɛle asɔne ɔlale ye Papa ase, ɔyele ye ayɛlɛ na ɔbizale ye ɛkɛ adehilelɛ kolaa na yeazi kpɔkɛ ngakyile mɔɔ nwolɛ hyia la.

Mekɛ mɔɔ ɛnee Gyisɛse ɛvɛ na ɔwɔ kɛ ɔdie ɔ menle bɔbɔ la, ɔboale menli. Ɛnee ɔndwenle ɔ ngomekye ɔ nwo. Ɔgyakyile yɛ neazo kɛ yɛli ɔ gyakɛ anzi kpalɛ.

Gyisɛse anva ɔ nloa mgbane anga kɛ yɛva ɛtane yɛhyɛ. Ɔvale ye ɛdoavolɛma nee awie mɔ gyɛne ɛtane ɔhyɛle bɛ.

Bɛhanle bɛdole ɛkɛ ne kɛ Dwuuma dɔɔnwo bakpo Mɛzaya ne na ye agbɔvolɛ ahu ye. Ɔti anrɛɛ Gyisɛse bahola ahwenlehwenle ɔ bo aze wɔ mɔɔ ɔbahola yeayɛ yeamaa menli la anwo. Noko ɔbɔle mɔdenle ɔkpogyale nɔhalɛ ɛzonlenlɛ zo. Ɔyɛle neazo kpalɛ ɔmaanle ye ɛdoavolɛma mɔɔ bɛmbu bɛ anzɛɛ bɛdwazo bɛtia bɛ la.

Wɔ ndenle dɔɔnwo anu, ɛnee Gyisɛse kpogya tɛla alesama mɔɔ ɛnli munli la wɔ ndelebɛbo nee nrɛlɛbɛ nu. Ɛnee Gyisɛse di munli wɔ nwonane nee adwenle nu, ɔti awie biala nee ye ɛnzɛ. Noko ɔbɛlɛle ɔ nwo aze.

Gyisɛse zile abotane wɔ ye ɛdoavolɛma nee menli gyɛne anwo wɔ mekɛ mɔɔ bɛangola bɛanzukoa ye anzɛɛ bɛanva mɔɔ ɔhanle la bɛanyɛ gyima la. Ɔzile abotane na ɔzile ɛzukoalɛdeɛ mɔɔ bɛhyia nwo na bɛahola bɛazonle Gyihova la azo.