Kasin Maabig a Pankomis ed Ugugaw so Telebisyon?

NO MAMINSAN et ompatnag a marakep so pangipaarap ed imano na ugugaw diad pambantay na telebisyon legan mon gagawaen so arum a kimey mo. Balet anto so epekto na satan ed ananak mo?

“Anggan saray kapangiyanak ni et naapektoan la na saray emosyonal a mensahe a nipapasabi panamegley na telebisyon,” so inreport na The New York Times. Diad agano nin impansukimat, walaray manedad na sakey taon a pinambantay na antikey a programa ed telebisyon, a ditan et nandurumay reaksion na artista ed sakey a galawgalaw. “Sanen natatakot so artista ed galawgalaw,” so kuan na Times, “aglabay itan a panggalawan na saray ugugaw tan maseguron ompatnag a naaburido, akakuliseng, akakubibit odino onakis ira. Sano panlikliketan na artista so galawgalaw, labalabay itan a panggalawan na ugugaw.”

Mabitabitar a makaapekto ed angkelag nin ugugaw so telebisyon. Komusta balet so manbayag ya epekto na satan ed ugugaw? Naobserbaan nen Dr. Naoki Kataoka, sakey a propesor na pediatrics diad Kawasaki Medical College ed Kurashiki, Japan, so dakel ya ugugaw ya agmasmasel tan anggapoy napatnagan ya emosyon ed kalupaan da. Amin da so akapambantay na TV odino video ed andukey lan panaon. Say sakey a duay taon ya ugaw a laki et agto sarag so mitongtong tan dagdaiset so bokabularyo to. Sikatoy inagew-agew a manbabantay na video manlapud kabuasan ya anggad labi sanen sikatoy manedad na sakey taon. Sanen tinumbok na ina so imbaga na doktor ya agto la pambabantayen so anak to na saray video tan ginapoan toy migalaw ed sikato, kalkalnan dinmakel so bokabularyo na anak to. On, nepeg a miulop tan mitongtong iray ateng ed ananak da.

Si Jehova a Dios, say Autor na uksoyan na pamilya, so angidanet ed kaimportantian na sankaabigan a piuulop tan pitotongtong. Oniay abayag lan imbaga to ed totoo to: “Nepeg mo ya ibangat [iray salita na Dios] a sankakulian ed saray anak mo, tan nepeg mo ra a tongtongen kapagno manyurong ka ed abung mo, tan kapagno manakar ka ed dalan, tan kapagno mandukdukol ka tan kapagno ombangon ka.” (Deuteronomio 6:7) Saray atateng, aliwan say telebisyon, so sankaabigan a makapangibangat ed ananak diad salita tan alimbawa, unong ed ‘dalan a nepeg dan laen.’—Uliran 22:6.