Television Ta un Bon Babysitter?

E IDEA di tene bo yiunan contento dor di laga nan sinta wak television mientras cu abo ta haci bo cosnan tin biaha por parce masha bon. Pero ki efecto esaki por tin riba bo yiunan?

Un informe den The New York Times ta bisa cu “mensahenan yena cu sintimento cu television ta transmiti por tin efecto asta riba babynan chikito.” Den un estudio recien haci, nan tabata pasa escenanan cortico pa mucha di un aña di edad den cua un actris ta reacciona den varios manera riba co’i hunga. Segun Times, “ora e actris a reacciona cu miedo riba un co’i hunga, e babynan tabata evita di hunga cu e cos ei y tabata mas inclina pa mustra di ta crepchi, pa trek cara of yora. En cambio, ora e actris tabata entusiasma cu un co’i hunga, e criaturanan tabata mas inclina pa hunga cu ne.”

Ta obvio anto cu television por influencia un baby. Riba termino largo, ki influencia e tin riba mucha? Dr. Naoki Kataoka, profesor di pediatria na e Colegio Medico di Kawasaki na Kurashiki, Japon, a analisa hopi mucha cu ta sumamente keto y cu tin masha poco expresion riba nan cara. Tur a wak television of video pa un tempo largo. Tabatin un mucha di dos aña cu no por a papia masha y e tabatin un vocabulario limita. For di tempo cu e tabatin un aña, tur dia e tabata wak video for di mainta te anochi. Ta despues cu su mama, riba recomendacion di docter, a stop di laga e mucha wak video y a cuminsa hunga cu ne, e mucha su vocabulario a crece gradualmente. Si, mayornan mester comunica y hunga cu nan yiunan.

Yehova Dios, e Originador di e areglo di famia, a enfatisa e importancia di e mihor comunicacion. Hopi tempo pasa el a bisa su pueblo: “Siña [e palabranan di Dios] cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” (Deuteronomio 6:7) Ta mayornan—no television—por instrui yiunan den e mihor manera cu palabra y ehempel, “den e caminda cu [yiunan] mester cana.”—Proverbionan 22:6.