“Jesäajent sent dee, dee Gott sien Wuat hieren, un doonen, waut daut sajcht” (Lukas 11:28, De Plautdietsche Bibel).

Doa woat woare Leew en diene Famielje sennen (Efeesa 5:28-29).

En de Famielje woat eena dän aundren achten (Efeesa 5:33).

Aule en de Famielje woaren sikj opp eenaunda veloten kjennen (Markus 10:6-9).

Daut jeft oppet weinichste twee Jrind:

• Gott haft daut Famieljenläwen enjerecht. En de Schreft läs wie, daut Jehova Gott de ieeschte beid Menschen toopfried (1. Mose 2:18-24). Soo neem daut met de Famielje dän Aunfank. Wuarom es daut wichtich, dit to weeten?

  Stal die mol väa, du atst eene scheene Moltiet. Un nu west du weeten, woo daut jemoakt woat. Wäm wurscht du froagen? Gaunz kloa, du wurscht dänjanjen froagen, wäa daut Äten jemoakt haft.

  Biejlikj soo es daut uk met de Famielje. Wan wie weeten wellen, waut doa needich es, om een scheenet Famieljenläwen to haben, wudd daut dan nich daut baste sennen, dänjanjen froagen, wäa daut Famieljenläwen enjerecht haft?

• Gott es om ons bekjemmat. Wuarom es daut goot, wan Famieljes en Gott sien Wuat no Rot sieekjen? En de Schreft sajcht daut von Gott: “Hee sorcht fa junt” (1. Petrus 5:6-7). Jehova well emma daut baste fa ons un sien Rot es fa ons emma toom gooden (Spricha 3:5-6; Jesaja 48:17-18).