Vekjindja berechten

Nu haud äa Läwen eenen Senn

JESUS säd, hee kjand siene Schop (Johanes 10:14). Wan een Mensch een goodet Hoat haft un Fräd un Jerajchtichkjeit leeft, dan woat dee wellen met Jesus siene Nofolja toop sennen. Soon Mensch woat dan eenen Senn em Läwen haben. Soo jinkj eene Fru en Belgien daut. Dit es äare Jeschicht:

“To dee Tiet, aus Jehova siene Zeijen aun miene Däa puttaden, wia ekj met miene Narfen sea rauf un wull mau rajcht met mien Läwen een Enj moaken. Ekj jleicht daut, waut de Zeijen säden äwa de Leesunk von aul de Trubbels von dise schlajchte Welt, oba ekj jleicht daut nich, daut Gott doa noch sull waut met to doonen haben. Ekj wia aul fa acht Joa nich mea enne Kjoakj jewast, wäajens ekj de Heichlarie doa soo schlajcht lieden kunn. Oba daut, waut de Zeijen säden, hieed sikj mie gaunz rajcht un ekj must uk toostonen, daut et sea schwoa wia, onen Gott to läwen.

Daut schode wia, daut ekj no een poa Mol nich mea met de Zeijen räden kunn. Mie jinkj daut jraslich sea schlajcht. Ekj schmieekjt twee Pakjes Zegoaren dän Dach un funk uk aun Droggs to brucken. Ekj wull uk met miene Groospape räden, waut aul jestorwen wia, un soo funk ekj met Zaubarie aun. Doawäajen haud ekj de Nacht, wan ekj auleen wia, sea angst un de beese Jeista wullen mie aunjriepen. Mie jinkj daut moonatenlank soo. Jieda Zeowes haud ekj grulich sea angst, bloos doaraun to denkjen, daut ekj auleen wia.

Dan eenen Dach jinkj ekj buten rom un neem eenen aundren Wajch aus jeweenlich un ekj sach doa een grootet Buwoakj. Ekj wia gaunz vewundat, daut doa soo väl Menschen wieren. Aus ekj noda kjeem, sach ekj, daut et Jehova siene Zeijen wieren, waut jroz een Vesaumlungshus buden. Dan foll mie daut wada bie, woo de Zeijen ea emma no mie kjeemen. Un ekj docht soo: Woo scheen wudd daut nich sennen, wan aule Menschen oppe Welt soo läwden aus dise Menschen.

Ekj wenscht mie sea, daut de Zeijen wada no mie kjeemen mie besieekjen un doawäajen räd ekj doa met eenje, waut doa bie daut Vesaumlungshus schauften. Ekj bäd to Gott un tieen Doag lota wia dee Maun, wua ekj ea mol met jerät haud, bie miene Däa. Hee säd, daut wudd goot sennen, wieda de Schreft to studieren un ekj freid mie doatoo. Hee kroagd mie uk fuaz no de Toopkomes biem Vesaumlungshus un ekj jinkj. Soont haud ekj noch kjeenmol ea jeseenen, woo daut doa wia! Ekj haud aul soo lang no soone Menschen jesocht, waut Leew unjarenaunda hauden un werkjlich schaftich wieren. Un hia wieren dee!

Von dan aun wankt ekj no aule Toopkomes. Rom dree Wäakj lota hieed ekj uk opp met schmieekjen. Ekj schmeet aule Bieekja wajch, waut met Zaubarie to doonen hauden, un uk aul daut Spell, waut met dän Soton to doonen haud. Un ekj kunn uk späaren, daut de beese Jeista nich mea soo väl aun mie doonen kunnen. Ekj stald mien Läwen soo en, aus Jehova daut en de Schreft haft loten oppschriewen un dree Moonat lota funk ekj aun, de goode Norecht to prädjen. Sas Moonat lota leet ekj mie deepen. Twee Doag no miene Doop funk ekj aun, Pioniahelpa to sennen.

Ekj sie Jehova soo dankboa fa aul daut goode, waut hee fa mie jedonen haft. Nu haft mien Läwen werkjlich eenen Senn. Jo, Jehova sien Nomen es een stoakja Torm, wua ekj hab Schutz jefungen (Spricha 18:10). Mie jeit daut krakjt soo, aus de Psalmenschriewa schreef en Psalm 84:11 (PB): ‘Een Dach en diene Väahäw es bäta aus 1.000 sestwua. Ekj wudd leewa bie mien Gott sien Hus aun dee Däa oppaussen, aus en de gottloose äare Hiesa wonen’”.

Dise Fru, waut een goodet Hoat haud, funk eenen Senn en äa Läwen. Un soo kaun daut jiedrem eenen gonen, waut Jehova sieekjt un een goodet Hoat haft.