“Cada nunam ruranampaq kaqtaqa ruranan”
“Cada nunam ruranampaq kaqtaqa ruranan”
“Parlanqantsikpita y ruranqantsikpitam, Teyta Diosqa cada ünuta juzgamäshun” (ROMÄNUS 14:12).
1. ¿Imatataq kiman hebreukuna decidiyänan karqan?
BABILONIACHÖ täraq kimaq o kimsaq jövinkunam, kawar sïguiyänampaq o wanuyänampaq kaqta decidiyänan karqan. Pëkunaqa, ¿tsë nacionchö ley mandakunqanta cäsukurtsuraq monumentuta adorayanman karqan? O ¿mana adorëta munartsuraq achachashqa hornuman jitashqa kayanman karqan? Sadrac, Mesac y Abednëgupaqqa manam tiempu karqantsu pitapis tapuyänampaq y manam necesitäyarqantsu pitapis tapuyta. Kë kiman hebreukunaqa imata rurayänampaq kaqtam kikinkuna decidiyänan karqan. Pëkunaqa këtam cläru niyarqan: “[Diosnïkuna] mana salvayämänan kaptimpis, diosnikikunataqa manam sirwiyäshaqtsu ni ruratsinqëki örupita monumentutapis manam adorayäshaqtsu” (Daniel 3:1-18).
2. ¿Pilätu decidinampa rantin pikunatan decidiyarqan? ¿Pilätuqa mana culpannaqku karqan?
2 Tsë tiempupita seiscientus watakunanöna pasarishqanchömi, Ponciu Pilätu jutiyoq gobernador juk nunata acusayanqanta wiyarqan, y acusayanqan nuna culpannaq kanqantam cuentata qokurqan. Peru nunakunaqa tsë acusayanqan nunata wanutsiyänampaqmi niyarqan. Tsë gobernadorqa manam munarqantsu wanutsiyänanta, peru kutin kutin wanutsiyänampaq niyaptinmi, tsë nunata wanutsiyänampaq decidirqan. Tsë gobernadorqa makinta yakuwan paqakurir o awikurirmi kënö nin: “Noqaqa kë nunapa yawarnimpita culpannaqmi kä”. Tsënö nirmi qeruman clavayänampaq entregarqan. Tsënö ruranqanmi rikätsikun gobernador Ponciu Pilätuqa Jesucristupaq imatapis kikin decidinampa rantin, nunakuna pëpa rantin decidiyänanta dejanqanta. Makinta yakuwan awikurpis Jesusta condenanqampitaqa kikinmi culpayoq karqan (Mateu 27:11-26; Lücas 23:13-25).
3. ¿Imanirtan jukkuna noqantsikpaq decidiyänanta dejanantsiktsu?
3 Imatapis decidirqa, ¿kiman hebreukunanöku kikiki decidinki o jukkuna decidiyänantaku dejanki? Imatapis decidiqa manam fäciltsu, alli decidinapaqqa poqu nunaran kanantsik. Tsëmi papäkunaqa pishi wamrankunapaq imatapis kikinkuna decidiyänan. Imatapis decidiqa manam fäciltsu, tsëmi imatapis decidinapaqqa alliraq pensanantsik. Peru tsënö kaptimpis, kikintsikmi decidinantsik. “Diospa kaqchö alli këkaqkunaqa” imëkachömi yanapamënintsikta puëdiyan, peru imatapis decidinantsik kaptinqa manam pëkunaqa noqantsikrëkur decidita puëdiyantsu (Gälatas 6:1, 2). “Parlanqantsikpita y ruranqantsikpitam, Teyta Diosqa cada ünuta juzgamäshun” (Romänus 14:12). Y, “cada nunam ruranampaq kaqtaqa ruranan, manam juktsu”, tsëtam Bibliachö nin (Gälatas 6:5). Tsëqa, ¿imanötan vïdantsikchö alli decidishwan? Puntataqa llapanta musyëta o rurëta mana puëdinqantsiktam yarpänantsik.
¿Imatan alli decidinapaq yanapamäshun?
4. Adanwan Ëva mana alli decidiyanqampitaqa, ¿imatataq yachakuntsik?
4 Punta nunakuna Adanwan Ëvaqa, mana allita decidirmi nunakunata mana allikunaman chätsiyashqa. Pëkunaqa ima alli kanqanta y ima mana alli kanqanta musyatsikoq plantapa frütantam mikuyarqan (Genesis 2:16, 17). ¿Imanirtan tsëta decidiyarqan? Bibliachömi kënö nin: “Warmiqa tsë plantapa frütanta[m] rikärirqan, y mikunapaqnö kanqanta y munapëpaq kanqantam cuentata qokurirqan. Awmi, tsë plantaqa shumaqmi rikakoq. Tsëmi warmiqa tsë plantapa frütanta pallaskir mikurirqan. Tsëpitanam, qowanwan o runanwan juntu këkarnin, pëtapis tsë frütata qararqan, y pëpis mikurqanmi” (Genesis 3:6). Tsënömi Ëvaqa, kikinllaman pensar mana allita decidirqan y Adanpis tsëtam rurarqan. Tsëta decidiyanqampitam “jutsaqa kë munduchö nunakunaman charqan” y tsërëkurmi nunakunaman wanuy charqan (Romänus 5:12). Adanwan Ëva mana cäsukuyanqampitam yachakuntsik, Teyta Diosta mana cäsukurqa mana alli decidinapaq kaqta.
5. Alli decidinapaqqa, ¿imanötan Jehovä yanapamantsik?, y ¿imatataq ruranantsik?
5 ¡Alläpam kushikuntsik Jehovä Dios Palabran Bibliawan yanapamanqantsikpita! Bibliachömi kënö nin: “Derëcha lädupa o izquierda lädupa ëwarpis, qepëkikunapita kënö niyäshunqëkitam wiyayanki: ’Këmi näniqa, këpa ëwayë‘” (Isaïas 30:21). Jehoväqa Palabran Bibliawanmi parlapämantsik, tsëmi ‘chukru mikuyta poqu nunakuna mikoqnö’ alli estudianantsik y entiendinantsik, tsënö rurarqa imatapis allim decidishun. Y ‘ima alli kanqanta y ima mana alli kanqantam mas musyashun’, tsënöpam Bibliachö yachakunqantsiknö rurashun (Hebrëus 5:14).
6. ¿Imatataq ruranantsik concienciantsik alli kanampaq?
6 Imatapis alli decidinapaqqa alli concienciayoq kanqantsikmi yanapamantsik. Concienciantsikqa acusashqa o perdonashqa kanapaqmi yanapamantsik (Romänus 2:14, 15). Concienciantsik alli yanapamänapaqqa Diospa Palabran Bibliapitam alli yachakunantsik, y yachakunqantsikmannömi imatapis ruranantsik. Concienciantsik mana alli kaptinqa, rasmi o sasmi mana alli costumbrikunata o nunakuna rurayanqanta rurëkushwan. Amïguntsikkuna, familiantsikkuna y jukkuna niyanqanta cäsukurmi höraqa mana alli decidirishwan. Concienciantsikta mana cäsushqa y Dios mandakunqanta mana wiyakushqaqa, ¿imaraq pasakunman? Tiempuwanqa fiërruwan marcashqanömi concienciantsik tikrakurinman, y manam ima mana alli kanqanta cuentata qokushunnatsu (1 Timoteu 4:2). Peru Bibliata estudiar concienciantsikta alli yachatsishqaqa, alli decidinapaqmi yanapamäshun.
7. ¿Imatataq alli decidinantsikpaq ruranantsik?
7 Rikanqantsiknömi imatapis alli decidinapaqqa Bibliata alli estudianantsik, y tsëchö ninqanta ruranapaqmi kallpachakunantsik. Imatapis manaraq ras o sas decidirmi Bibliachö consëjukunaman alli pensanantsik. Diospa Palabranchö rasumpa kaqta alli yachakushqa karqa concienciantsik yanapamashqam Sadrac, Mesac y Abednëgunö imatapis alli decidishun. Këchöqa poqu cristiänukuna imatapis fäcil-lla decidiyanqantam yachakushun.
¿Pikunatan amïguntsikkuna kayan?
8, 9. (1) ¿Bibliachö mëqan consëjukunatan mana alli amïgukunapita cuidakunapaq yanapamantsik? (2) Alli portakurpis mana Diosta sirweqkunaqa, ¿alli amïguku kayan?, y ¿imanirtan tsënö ninki?
8 Apostol Pablum kënö qellqarqan: “Ama engañakuyëtsu. Mana alli nunakunawan juntakuyqa, alli costumbrikunatam oqratsikun” (1 Corintius 15:33). Y Jesucristupis discïpulunkunatam nirqan kë munduchö nunakunanö mana kayänampaq (Juan 15:19). Kë textukunata leyirmi musyantsik oqllanakur melanëpaqkunata ruraqkunawan, mana majanwan oqllanakoqkunawan, machakoqkunawan o imatapis mana allita ruraqkunawan mana amïgu kanapaq (1 Corintius 6:9, 10). Bibliata alli yachakurmi cuentata qokuntsik televisionchö, Internetchö o librukunata leyirpis mana allita ruraq nunakunawan mana juntakunapaq kaqta. Tsënöllam Internetchöpis alli tukoq y “ulikoq o llullakoq” nunakunawanqa parlanantsiktsu (Salmus 26:4).
9 ¿Teyta Diosta mana sirwiyaptimpis alli portakoqkunawanqa amïgu kashwanku? Bibliachömi kënö nin: “Kë munduchö nunakunaqa Diablupa poderninchömi këkäyan” (1 Juan 5:19). Mana alli amïgukunaqa manam mana allita ruraqkunallatsu kayan. Tsëmi Jehoväta kuyaqkunallawan amïguqa kanantsik.
10. ¿Imatan yanapamäshun Diosta mana sirweq nunakunawan mana alläpa juntakunapaq?
10 Peru manam pasëpaqa Diosta mana sirweq nunakunapita rakikëta puëdintsiktsu (Juan 17:15). Diospita yachatsikunqantsikchö, colegiuchö o trabäjuchöqa mana Diosta sirweq nunakunawanmi tinkuntsik. Y Diosta mana sirweq nunayoq o warmiyoq kaqkunanäqa, capazchi höraqa jukkunapitapis masraq Diosta mana sirweq nunakunawan juntu kayanqa. Bibliata leyir alli pensëta yachakushqa karqa, musyashunmi Diosta mana sirweq nunakunawan mana alläpa juntakunapaq kaqta (Santiägu 4:4). Tsënöpam colegiuntsikchö pukllayänampaq juntakuyaptin o juk fiestakunata rurayaptin ëwanapaq o mana ëwanapaq kaqta alli decidishun.
Trabäjuta alli akrashun
11. ¿Imatataq puntataqa rikänantsik juk trabäjuchö manaraq trabajar?
11 Poqu cristiänu karqa, Bibliachö consejamanqantsiknöllam familiantsikta manteninantsikrëkur imachö trabajanapaq kaqta alli decidishun (1 Timoteu 5:8). Puntataqa imata rurar trabajanapaq kaqtam alli rikänantsik. Bibliachö yachatsikunqampa contran trabäjuchöqa manam trabajanantsiktsu. Tsëmi Diosta sirweqkunaqa trabajantsiktsu santukuna rurëchö, imatapis suwakur trabajayanqanchö o jampikur yawarta utilizäyanqanchö. Y trabajanqantsikchö patronnintsik ulikunapaq o llullakunapaq nimashqapis manam engañakuntsiktsu (Hëchus 15:29; Apocalipsis 21:8).
12, 13. ¿Imatataq rurankiman ima trabäjuchöpis trabajanëkipaq manaraq decidirnin?
12 Juk trabäjuchö ima rurëpis Bibliachö ninqampa mana contran kaptimpis, peru ¿tsë trabäju mana allipaq kaptinqa? Bibliapita mas yachakunqantsikmannömi alli pensëta yachakushun y imata decidinapaq kaqta alli rikäshun. Këman pensarishun, ¿trabajashwanku qellëpaq pukllayanqan sitiuchö telëfunuta contestar? Wayikunata pintar trabajaq cristiänuqa, ¿mana alli religionpa iglesianta pintanampaq änikunmantsuraq? (2 Corintius 6:14-16). Imachö trabajanantsik kaptimpis, alliran pensanantsik pagamänantsikpaq qellë mëpita shamunqanman y mëchö y imapaq trabajanantsikpaq kaqman.
13 Mana alli religionpa iglesianta pintatsinampaq patronniki conträtuta rurashqa kaptinqa, ¿imataraq rurankiman? Tsë cäsuchöqa cada cristiänum tsë trabäjuchö ima carguyoq kanampaq kaqta o imanö trabajanampaq kaqta alli pensanan. Citacionta o documentukunata wayinkunaman aparnin trabajarqa, ¿allitsuraq kanman mana allita rurayanqan sitiukunaman apanqan? Tsëpaqqa Mateu 5:45 textu ninqanman pensanqanmi yanapanqa. Y cuentachömi katsinan tsë sitiuman seguïdu ëwaptin conciencian imanö kanampaq kaqta (Hebrëus 13:18). Familiantsikta manteninapaq ima trabäjuchö trabajanapaq kaqtaqa kikintsikmi alli decidinantsik, peru tsëpaqqa alli pensëtam yachakunantsik y Diospa Palabranta estudiarmi concienciantsikta alli yachatsinantsik.
“Imata rurarpis, [Diostaraq] puntata yarpanki munanqannö ruranëkipaq”
14. ¿Imatataq ruranantsik imatapis manaraq decidir?
14 Imata estudianëkipaq kaqta y qeshyarnin imanö jampikunëkipaq kaqtaqa, ¿imanötan alli decidinkiman? Tsëpaqqa imatapis manaraq decidirmi Bibliachö ima ninqanta cuentachö katsinëki y Bibliachö ninqannömi alli pensëkur decidinëki. Alläpa yachaq gobernanti Salomonmi kënö nirqan: “Ama kikiki yachanqëkillamanqa confiakuytsu, sinöqa, Teyta Jehoväman llapan shonquykiwan confiakuy. Imata rurarpis, pëtaraq puntata yarpanki munanqannö ruranëkipaq. Tsëta ruraptikiqa, alli kawakunëkipaqmi yanapashunki” (Proverbius 3:5, 6).
15. ¿Imatataq yachakuntsik punta cristiänukuna imatapis manaraq decidir imata rurayanqampita?
15 Imatapis decidinqantsikqa jukkunapaqpis allipaq o mana allipaqpis kanmanmi, tsëtam imëpis cuentaman churanantsik imatapis manaraq decidir. Këllaman pensarishun, punta cristiänukunaqa mikuy asuntupaq Moises qellqanqan Leyta manam cäsukuyänannatsu karqan. Pëkunaqa Ley michäkunqan mikuykunataqa mikuyta puëdiyaqnam. Tsënö kaptimpis apostol Pabluqa kënömi nirqan: “Mikunqä creikoq mayïta mana alliman chätsiptinqa, creikoq mayïta mana alliman mana chätsinäpaq[mi], imëpis ëtsata mikushaqnatsu” (1 Corintius 8:11-13). Pabluqa punta cristiänukunata nirqan jukkunapa concienciankunata cuentachö katsiyänampaqmi, tsënöpa pitapis mana alliman mana chätsiyänampaq. Tsënöllam imata decidinqantsikpis jukkunapaq “ishkitsikoq ruminö mana” kanampaq cuidakunantsik (1 Corintius 10:29, 32).
Teyta Diospita yachakushun
16. ¿Imanötan Diosman mañakunqantsikqa yanapamantsik alli decidinapaq?
16 Imatapis manaraq decidir Diosman mañakunqantsikqa yanapamäshunmi. Jesuspa qateqnin Santiägum kënö nirqan: “Qamkunachö pipapis yachënin pishiptinqa, Teyta Diosta kutin kutin mañakutsun, y chaskinqam. Pëqa llapankunatam mana medipashpa qaran, y manam qarakunqampita imatapis nikuntsu” (Santiägu 1:5). Imatapis alli decidinapaqqa, Jehovämanmi yanapamänapaq imë hörapis mañakuyta puëdintsik. Llapan yarpachakunqantsikta willashqa y yanapamänapaq mañakushqaqa, Teyta Diosqa santu espïritunwanmi yanapamäshun Palabran Bibliata alli entiendinapaq y yachakunqantsikta yarpänapaq.
17. ¿Imanötan jukkuna alli decidinapaq yanapamashwan?
17 ¿Jukkunaqa alli decidinapaq yanapamënintsikta puëdiyanku? Awmi, Teyta Jehoväta kuyaq y respetaq wawqi panikunam yanapamënintsikta puëdiyan (Efesius 4:11, 12). Imatapis decidinapaq fäcil mana kaptinqa, pëkunatam tapuyta puëdintsik. Kë wawqi panikunaqa unëpana Jehoväta sirwirmi Bibliachö ninqanta mas entiendiyan, tsëmi ima textukuna yanapamänapaq kaqta nimënintsikta puëdiyan, y “imakuna mas väleq kanqanta” musyanapaqmi yanapamënintsikta puëdiyan (Filipensis 1:9, 10). Tsënö karpis, cada cristiänum imata ruranampaq kaqta kikin decidinan y manam juktsu.
Alli decidiqa yanapakunmi
18. Allita decidishqapis, ¿imaraq pasakunman?
18 ¿Teyta Diospa Palabran Biblia ninqannölla imatapis decidishqaqa, llapanku allilla yarqunqa? Tiempu pasaptinqa allipaqmi kanqa. Peru tsë höra alli decidishqapis capaz mana allikunapa pasashun. Sadrac, Mesac y Abednëgu musyayarqanmi tsë monumentuta mana adorayaptinqa wanutsiyänampaq o wañutsiyänampaq kaqta (Daniel 3:16-19). Apostolkunapis judïukunapa Jatun Cortinchö “nunakunata cäsuyänäpa rantinqa, gobernaq Teyta Diostam” cäsukuyäshaq niyaptinmi, maqar usharir ëwakuyänampaq dejariyarqan (Hëchus 5:27-29, 40). Y ‘mana pensanqantsik höra imëka mana allikunapa pasashqam’ höraqa imatapis decidinqantsik mana alli yarqunman (Eclesiastes 9:11). Allita decidirpis höraqa sufrishunmi, peru Jehoväqa yanapamäshunmi aguantanapaq y bendicimäshunmi (2 Corintius 4:7).
19. ¿Imanötan cada nuna imata ruranampaq kaqta decidinan?
19 Yachakurinqantsiknöpis, imatapis decidirqa Bibliachö consëjukunatam ashinantsik, tsëmanmi pensanantsik y tsëchö ninqannömi ruranantsik. ¡Alläpam Jehoväta agradecikuntsik santu espïrituwan y poqu wawqi panikunawan yanapamanqantsikpita! Këchö yachakunqantsiknö rurashun y llapan yarqamushqa kaqkunata alli utilizäshun, tsënöpam cada ünu imata ruranapaq kaqta decidishun.
¿Imatataq yachakurqunki?
• ¿Imatataq rurashwan imatapis alli decidinapaq?
• Amïguntsikkunaqa, ¿imanötan poqu cristiänu kanapaq yanapamantsik?
• ¿Imatataq cuentachö katsinantsik juk trabäjuchö trabajanapaq kaqta manaraq decidir?
• ¿Imakunatan yanapamäshun alli decidinapaq?
[Yachakunapaq kaqpa tapukïninkuna]
[Fötu]
Adanwan Ëva mana cäsukuyanqampitaqa, ¿imatataq yachakuntsik?
[Fötu]
Imatapis manaraq decidir Bibliachö consëjukunata ashishun