•  Callari shimicuna 2

•  Bibliapi tiyaj valishca yuyaicuna 3-5

  •  Conferencia 3

  •  Bibliapi curita mashcaj shina mashcashunchij 4

  •  Bibliata liyishunchij 5

•  Alli yachachijcuna cashunchij 6-14

  •  Parlanacushpa callari 7

  •  Revisitacunata rurai 8

  •  Discipulocunata rurai 9

  •  Cambaj crishcacunamanta parlai 10

  •  Conferencia 11

  •  Huillangapaj tema 12

  •  Maipi huillacushcata ricuchi 13

  •  Huillangapaj videocunata ricuchi o publicacioncunata saqui 14

•   Jesús shina causashunchij 15, 16

  •  Tandanacushcacunahuan Bibliata yachashun 16

•   Tucuri shimicuna 17

•  Animachishpa, consejashpa 18

•  Tiempo 19

•  Superintendente de circuito visitacujpi 20

•  Jatun tandanacui tiyajpi 21

•  Jesús huañushcata yuyarina semana cajpi 22

•  Jesús shina causashunchij huillashunchij tandanacuipaj superintendente 23

•  Jesús shina causashunchij huillashunchij tandanacuita pushaj 24

•  Consejero auxiliar 25

•  Uchilla salacuna 26

•  Videocuna 27

1. Cai documentopi tiyaj instruccioncunaca Jesús shina causashunchij huillashunchij tandanacuipi parteta charijcunatami ayudanga. Manaraj shuj asignacionta charishpaca Jesús shina causashunchij huillashunchij tandanacuipi yachana pꞌangapi ima nishcatami repasana can. Cai documentopi tiyaj instruccioncunatapishmi catina can. Tucui publicadorcunatami cai tandanacuipi asignacioncunata charichun animana canchij. Tandanacuicunaman siempre shamujcunapish Bibliapi yachachishcacunata crishpa, Bibliapi mandashca shina causashpaca paicunapish asignacioncunata chari tucunmi. Shuj estudiante manaraj publicador tucushpa Escuela del Ministerio Teocraticopi matricularisha nishpaca Jesús shina causashunchij huillashunchij tandanacuipaj superintendente huauquihuanmi parlana can. Parlangapajca paita yachachij o Diosta sirvij paipaj yaya o mamapishmi compañana can. Manaraj bautizarishca publicador tucungapajca cai mismo requisitocunatajmi pajtachina can (od-S cap. 8 párr. 8).

2. Un minuto. Cantashca qꞌuipa, Diosta mañashca qꞌuipaca tandanacuita pushaj huauquica tandanacuipi imalla yachagrishcatami parlana can. Shinallataj programapaj maijan partecuna huauqui panicunata ashtahuan ayudagrishcatapishmi ricuchina can.

 3. Conferencia (10 minutos). Tandanacuipi yachana pꞌangapimi yachagrishca temapish, ishqui o quimsa yuyaicunapish llujshinga. Shuj anciano o alli yachachij siervo ministerialmi cai partetaca cuna can. Bibliamanta shuj librota liyishpa callaringapajca chai libromanta parlaj shuj videomi llujshinga. Huauquica chai videotami churana can. Chai videomanta parlashpapish Tandanacuipi yachana pꞌangapi llujshishca yuyaicunatami yachachina can. Tiempo tiyajpica fotocunamantapishmi parlana can. Shinallataj chai temamanta ashtahuan intindichisha nishpaca shujtaj informaciontami utilizai tucun.

 4. Bibliapi curita mashcaj shina mashcashunchij (10 minutos). Cai partetaca shuj anciano o alli yachachij siervo ministerialmi pushana can. Tapuicunata rurashpallami yachachina can. Paica ishqui tapuicunatami rurana can. Cai partepi tiyaj versocunata liyichinata o mana liyichinatapishmi ricuna can. Huauqui panicunaca 30 segundos o menospimi comentariocunata cuna can.

 5. Bibliata liyishunchij (4 minutos). Cai asignaciontaca shuj yachacujmi cuna can (cꞌaricunallami cuna can). Liyingapaj asignashca versocunallatami liyina can. Tandanacuita pushaj huauquimi participajcuna ama pandarishpa, alli intindishpa, tonota cambiashpa, pausasta rurashpa, parlacuj laya alajata liyichun ayudana can. Huaquinpica achca versocunata o ashalla versocunata liyina cashcamantami Jesús shina causashunchij huillashunchij tandanacuipaj superintendenteca picuna pajtachi tucushcata ricushpa cai parteta asignana can.

6. Quince minutos. Cai parteca gentecunahuan alli parlanacui callaringapaj, alli huillajcuna, alli yachachijcuna cangapajpishmi ayudan. Minishtirijpica ancianocunapishmi cai asignacioncunataca rurai tucuncuna. Tandanacuipi yachana pꞌangapica cada asignacionpaj ladopimi entre parentesis ima yachaipi trabajana cashca ricurin. Cai yachaica Alli yachachij, Cꞌuyaihuan ayudashunchij nishca folletocunamanta japishcami can. Huaquinpica tapuicunata rurashpa yachachingapajmi shuj parte tiyanga. Cai partetaca shuj anciano o alli yachachij siervo ministerialmi pushana can (cai parte ima shina cuna cashcata yachangapajca cai documentopi  párrafo 15-ta ricui).

 7. Parlanacushpa callari. Cai asignaciontaca ishquipurami cuna can. Cꞌaripura, huarmipurami cuna can. Familia cashpallami shuj cꞌarihuan shuj huarmihuan cui tucun. Shayarishpa o tiyarishpapish cai asignaciontaca cunallami can (caimanta ashtahuan yachasha nishpaca cai documentopi  párrafos 12 y  13-ta ricui).

 8. Revisitacunata rurai. Cai asignaciontaca ishquipurami cuna can. Cꞌaripura, huarmipurami cuna can (km-S 5/97 pág. 2). Shayarishpa o tiyarishpapish cai asignaciontaca cunallami can. Cai partepica yachachijca punta visitapi imamanta parlacushcatami huillashpa catina can (caimanta ashtahuan yachasha nishpaca cai documentopi  párrafos 12 y  13-ta ricui).

 9. Discipulocunata rurai. Cai asignaciontaca ishquipurami cuna can. Cꞌaripura, huarmipurami cuna can (km-S 5/97 pág. 2). Shayarishpa o tiyarishpapish ruranallami can. Cai asignacionpica ña callarishca shuj estudiota ima shina ruranatami ricuchina can. Ima shina parlashpa callarinata, ima shina parlashpa tucuchinata mana ricuchichun nijpica mana ruranachu can. Estudiopi yachacushcata tucuita liyisha nishpapish liyinallami can, pero mana chaita rurana minishtirinchu.

 10. Cambaj crishcacunamanta parlai. Shuj conferencia cajpica cai asignaciontaca shuj cꞌarimi cuna can. Ima shina huillanata ricuchina cajpica cai asignaciontaca cꞌaripura, huarmipura cuna can. Familia cashpallami shuj cꞌarihuan shuj huarmihuan cui tucun. Yachachijca tapuita alli yuyashpa, intindinalla shimicunahuanmi cutichina can. Chai tapuita cutichingapaj maijan publicacionmanta japishcataca huillasha nishpallami huillai tucun.

 11. Conferencia. Cai asignaciontaca shuj huauquica conferenciata cucuj shinami yachachina can. Diosta sirvichun cꞌuyaihuan ayudashunchij nishca folletopaj apéndice A-manta infomación japishca cajpica chaipi tiyaj versocunata huillanapi ima shina utilizanatami ricuchina can. Por ejemplo, shuj verso ima nisha nishcata, chai versota ima horas utilizana cashcata, shujtajcunaman ima shina intindichinatapishmi ricuchina can. Cai folletopi tiyaj yachaicunamanta japishca cajpica huillacushpa ima shina yachachinatami ricuchina can. Munashpaca cada yachaipi tiyaj punto 1-paj ejemplomantami parlai tucun mana cashpaca tucuri partepi tiyaj versocunatapishmi ricuchi tucun.

   12. Huillangapaj tema. Cai instruccioncunaca “Parlanacushpa callari”, “Revisitacunata rurai” nishca partecunapajmi can. Shujtaj instruccionta mana cujpica yachachijca ashtahuan Bibliamanta parlanacushpa catingapajca Bibliamanta intindinalla yachaitami yachachina can. Yachachijca chai ladopi causaj gentecunapi yuyashpami shuj temata agllana can. Huillangapaj publicacioncunapi tiyaj videocunata, librocunata, folletocunata, revistacunata ricuchisha nishpallami ricuchi tucun. Shuj presentacionta de memoria yachanapaj randica gentecunahuan cꞌuyaihuan parlacushca shinami rurana can.

   13. Maipi huillacushcata ricuchi. Yachachijca maipi huillachun ricuchishca shinami huillana can. Por ejemplo:

1.  (1) Huasin huasin huillashpa. Cai partepica yachachijca huasin huasin gentecunaman huillana, huaquinpica telefonopi cayashpa o cartacuna cachashpami huillana can. Shinallataj gentecunapaj huasipi parlanacushpa catingapajca imata rurana cashcatami ricuna can.

2.  (2) Maipi cashpapish. Cai partepica yachachijca trabajopi, escuelapi, pai causan ladopi, buspi, maipi cashpapish Bibliamanta shuj versota ricuchishpami huillana can.

3.  (3) Predicación pública. Cai partepica yachachijca carritocunahuanmi huillana can. Shinallataj negociocunapi, parquecunapi, carrocuna shayarina lugarcunapi, gentecuna tiyaj shujtaj lugarcunapipishmi huillana can.

 14. Huillangapaj videocunata ricuchi o publicacioncunata saqui. Shuj videota ricuchina o shuj publicacionta saquina alli cashcata ricushpami yachachijca chaita ruranata decidi tucun. Presentacionpi shuj videota utilizachun nijpi o yachachij shuj videota utilizanata munashpaca chai videomantami parlai tucun. Shinapish mana churanachu can.

15. Cai partetaca shuj cantohuanmi callarina can. Callari 15 minutocunapica shuj o ishqui partecunami tiyanga. Chaipica Diospaj Shimita ñucanchij causaipi ima shina pajtachinatami yachashun. Mana shujtaj instrucción tiyajpica shuj anciano o alli yachachij siervo ministerialmi cuna can. Pero, congregacionmanta parlashunchij partetaca shuj ancianollami rurana can. Shuj temamanta huauqui panicunapaj comentariocunahuan analizana cajpica cai parteta charij huauquica tucui tiempopimi shujtaj tapuicunata rurai tucun. Importante yuyaicunata intindichingapaj, huauqui panicuna comentariocunata cuchun oportunidadta cungapajmi ashalla shimicunahuan callarina can. Entrevistacuna tiyajpica ñaupajman pasachishpami tapuicunata rurana can.

  16. Tandanacushcacunahuan Bibliata yachashun (30 minutos). Cai partetaca alli yachachij ancianomi pushana can (ashalla ancianocuna tiyajpica alli yachachij siervo ministerialcunami cai parteta pushai tucun). Cuerpo de ancianosmi cai parteta picunalla rurai tucushcata ricuna can. Cai parteta rurachunca alli tiempopi tucuchijcunata, valishca versocunata yachachijcunata, yachacushca yuyaicuna imamanta alli cashcata intindichij huauquicunatami ricuna can. Agllashca huauquica “Tandanacuita alli pushanata yachai” nishca temapi tiyaj instruccioncunatami ricuna can (w23.04 pág. 24, recuadro). Yachacushcata ña alli intindichishpaca 30 minutocunapi tucuchinaca mana minishtirinchu. Suficiente huauquicuna tiyajpica cai parteta pushachun, liyishpa ayudachunpish cada semanami shujtaj shujtaj huauquicunata agllana can. Tandanacuita pushaj huauqui cai partetaca menos tiempopimi rurana can nijpica, cai parteta pushaj huauquimi ima shina menos tiempopi tucuchinata ricuna can. Tal vez huaquin parrafocunatami mana liyina tucunga.

17. Tres minutos. Tandanacuita pushaj huauquimi huaquin valishca yuyaicunata yachashcata yuyachinga. Shinallataj catij semana imata yachagrishcatapishmi ricuchina can. Tiempo tiyajpica catij semana picunalla asignacioncunata charishcatami huillai tucun. Mana shujtaj instrucción tiyajpica tandanacuita pushaj huauquimi cai partepica anunciocunata cuna o cartacunata liyina can. Caita rurangapaj mana tiempo tiyajpica tandanacuita pushaj huauquimi “Jesús shina causashunchij” nishcapi partecunata charijcuna tiempota menorachun mañana can. Huillanaman llujshingapaj horariocunata, picuna pꞌichana cashcata, shujtaj anunciocunatapish tablero de anuncios nishcapimi churana can. Plataformamanta huillanaca mana minishtiringachu ( párrafos 16 y  19-ta ricui). Tandanacuitaca shuj cantota cantashpa, Diosta mañashpami tucuchina can.

18. Cada estudiante paipaj asignacionta tucuchishca huashami tandanacuita pushaj huauquica felicitangapaj, trabajashca puntomanta consejota cungapajpish casi un minutota charin. Estudiantecunata ñaupajman pasachun mañacushpaca maijan yachaita pajtachicushcataca mana huillanachu can. Asignacionta tucuchishca qꞌuipa felicitashpami maijan yachaita pajtachicushcata, imata alli rurashcata o imapi mejorana cashcata cꞌuyaihuan ricuchina can. Asignacionta charijcunata o tucuicunata ayudangapajmi tandanacuita pushaj huauquica shujtaj alli yuyaicunatapish ninalla can. Shinallataj tandanacui qꞌuipa o shujta ratomi, estudiantemanca asignashca yachaimanta o shujtaj yachaimanta Cꞌuyaihuan ayudashunchij, Alli yachachij folletohuan o Benefíciese nishca librohuan animachij consejocunata cuna can (tandanacuita pushaj huauqui y consejero auxiliar huauquica imata rurana cashcata ashtahuan yachangapajca  párrafos 19,  24 y  25-tami ricui tucun).

19. Tandanacuita pushaj huauquipish, asignacionta charijcunapish tiempota mana pasanachu can. Tandanacuipi yachana pꞌangapi cada partepaj mashna tiempota rurangapaj asignashca cajpipish yachacushcata ña alli intindichishpaca menos tiempopi tucuchinallami can. Asignacionta rurajcuna tiempota pasajpica mana pingaipi churashpami chaillapi tucuchichun mañana can. Parteta charij huauquicuna tiempota pasajpica cai tandanacuita pushaj huauqui mana cashpaca consejero auxiliar nishca huauquimi paicunallahuan parlana can ( párrafo 24 y  25-ta ricui). Tucui tandanacuitami cantashcacunandij, Diosta mañashcacunandij 1 hora y 45 minutocunallapi tucuchina can.

20. Superintendente de circuito visitacujpica Tandanacuipi yachana pꞌangapi caj programata caticushpapish, “Tandanacushcacunahuan Bibliata yachashun” nishca partepica superintendentemi shuj conferenciata 30 minutocunapi cunga. Manaraj superintendente de circuito discursota cujpimi tandanacuita pushaj huauquica imalla yachashcata, catij semanapi imalla yachagrishcatapish yuyachina can. Shinallataj anunciocunatami cuna can, cartacunatapish liyina can. Chai qꞌuipami superintendente conferenciata cuchun invitana can. Conferenciata cushca huashaca huauqui superintendenteca pai agllashca cantota cantachishpami tandanacuita tucuchinga. Shuj mañaita rurachunpish shujtaj huauquitami paillataj invitai tucun. Superintendente visitacujpica uchilla salacunapica asignacioncunata mana ruranachu can. Shujtaj shimipi grupocuna tiyashpaca tandanacuitaca paicunapaj shimipi charinallami can. Pero, superintendente conferenciata cuna horasca tucuicunami tandanacuna can.

21. Jatun tandanacui tiyajpica congregacionpi tandanacuicunaca mana tiyangachu. Chai semanapi yachana programata huauqui panicunata cada uno o paipaj familiahuan estudiachunmi animana can.

22. Jesús huañushcata yuyarina tandanacuita chaupi semanapi rurana cajpica Jesús shina causashunchij huillashunchij tandanacuica mana tiyangachu.

23. Cai superintendenteca shuj ancianomi can. Paitaca cuerpo de ancianosmi agllana can. Cai superintendenteca tandanacuicuna alli llujshichun, cai instruccioncunata tucuicuna pajtachichunmi ricuna can. Paica consejero auxiliar huauquihuanmi siempre parlana can. Tandanacuipi yachana pꞌanga llujshijpica chai ishqui quillacunapaj tucui asignacioncunata picuna rurai tucushcatami agllana can. Paicunapaj edadta, paicunapaj experienciata ricushpami asignacioncunata cuna can. Shinallataj cushca temata shungumanta parlai tucushcata o mana parlai tucushcatapishmi ricushpa agllana can. Ña asignacioncunata cugrij estudiantecunata agllashpaca Jesús shina causashunchij huillashunchij tandanacuipaj asignacioncuna (S-89) nishca hojapimi jundachina can. Shinallataj tandanacuipaj superintendente huauquica cuerpo de ancianos aprobashca huauquicunamanta shuj huauquita tandanacuita pushachun, tandanacuipi shujtaj partecunata cuchun huauquicunatapishmi agllana can ( párrafos 3-16 y  24-ta ricui). Tucui asignacioncunataca por lo menos 3 semanas faltajpimi entregana can. Tandanacuipi parteta charijcunapaj programata rurashca qꞌuipaca tablero de anunciospimi churana can. Cuerpo de ancianos huauquicunaca shujtaj ancianota o siervo ministerialta tandanacuipaj superintendente huauquita ayudachunmi agllai tucuncuna. Pero tandanacuipi yachachingapaj partecunata charij huauquicunataca ancianocunallami agllana can.

24. Jesús shina causashunchij huillashunchij tandanacuitaca shuj ancianomi cada semana pushana can (ashalla ancianocuna tiyan congregacioncunapica alli yachachij siervo ministerialcunami pushai tucun). Tandanacuita pushaj huauquica callari shimicunata, tucuri shimicunatami nina can. Cada parteta charijcunatami ñaupajman pasachun invitana can. Ashalla ancianocuna tiyajpica paimi shujtaj partecunatapish rurana can. Ima partecunapi shuj videollata ricuchichun nijpicarin chai partecunatami rurai tucun. Shuj parte tucurishca huasha caishuj parteta rurajta invitangapajca ashallatami rimana can. Cuerpo de ancianosmi picuna tandanacuita pushaj cana cashcata ricuna can. Agllashca ancianocunaca cada semanami shuj shuj tandanacuita pushana can. Minishtirijpica Jesús shina causashunchij huillashunchij tandanacuipaj superintendentemi caishuj ancianocunatapish yalli tandanacuitaca pushana can. “Tandanacushcacunahuan Bibliata yachashun” parteta pushangapaj shuj anciano aprobado cashpaca tandanacuita pushaj cangapajpish aprobadomi cai tucun. Tandanacuita pushaj huauquica shujtajcunata felicitanata, minishtishca cajpi cꞌuyaihuan alli consejanatami yachana can. Paimi tandanacui a tiempo tucurichun ricuna can ( párrafos 17 y  19-ta ricui). Plataformapi espacio tiyajpica, tandanacuita pushaj huauqui munashpaca, shuj pedestalpi microfonota churashpami asignacioncunata charijcunata cayai tucun. Chaicamaca asignacioncunata charijcunaca atril huashapimi ña listos cana can. Tiempota ama pirdingapajpish shuj mesata, shuj sillata churanallami can. Bibliata liyicujpi o “Alli yachachijcuna cashunchij” partepimi tandanacuita pushaj huauquica chaipi tiyari tucun.

25. Huaquinpica conferenciacunata cunapaj experienciata charij huauquitami consejero auxiliar cachun agllana can. Minishtirijpica paimi Jesús shina causashunchij huillashunchij tandanacuipi participajcunaman, conferenciata cujcunaman, Huillaj revistata yachachijcunaman, “Tandanacushcacunahuan Bibliata yachashun” partepi yachachijcunaman o liyishpa ayudajcunaman, ancianocuna cajpi o siervo ministerialcuna cajpipish consejota cunga ( párrafo 19-ta ricui). Tauca alli yachachij, alli conferenciata cuj ancianocuna tiyajpica cada huatami mushuj consejero auxiliarta agllana can. Cada asignación qꞌuipa consejota cunaca mana minishtirinchu.

26. Mashna estudiantecuna tiyashcata ricushpami congregacioncunapica uchilla salacunapipish tandanacuita rurai tucun. Chaipi ayudachunca shuj ancianotami pushaj cachun agllana can. Minishtirijpica shuj alli yachachij siervo ministerialmi pushai tucun. Cuerpo de ancianosmi picuna cashna ayudai tucushcata, turnashpa ayudai tucushcatapish ricuna can. Uchilla salapi pushaj huauquica  párrafo 18-pi nishcatami catina can. Chaipi participajcunataca “Bibliapi curita mashcaj shina mashcashunchij” nishca parteta tucuchishca huashami uchilla salacunaman richun mañana can. “Alli yachachijcuna cashunchij” parte tucurishca qꞌuipaca tucuicunami jatun salaman tigrana can.

27. Entre semana tandanacuipica JW Library^® aplicacionpi llujshij huaquin videocunatami ricushun.

© 2023 Watch Tower Bible and Tract Society of Pennsylvania

S-38-QIC 11/23