Huklaw llaqtakunamantam willakamunku

Llakisqam karqani, kunanqa kusisqañam kawsakuni

JESUSQA ovejankunataqa maskachkanmi (Juan 10:14). Pipas allin sunquyuq kaspa hinaspa kusisqa kawsakuyta munaspaqa Jesuspa qatiqnin kaytam munan. Chayna kawsakuyta munaqmi karqa Belgica nacionniyuq huk warmi. Paymanta yachaykusun:

“Huk kutipim llumpay llakisqa kaspa wañuyllataña munarqani chayna kachkaptiymi Jehova Diospa testigonkuna punkuyta takaykamurqaku, hinaspam imanasqa sasachakuykuna kasqanmanta sumaqta yachaykachiwarqa. Ichaqa Jehova Dioslla chay sasachakuykunata allichananmanta niykuwaptinmi hukmanyarurqani. Pusaq watam manaña iglesiaman rirqaniñachu chaypi runakuna iskay uya kasqankuta qawaspay. Chayna kaptinpas cuentatam qukurqani Jehova Diospa testigonkunapa willakusqanku allin kasqanta, yacharurqanim Diosta riqsispalla allin kawsakuy atisqanchikta.

Iskay kimsa kutikama tupaykusqaykumantaqa manañam tuparqanikuchu. Hinalla llumpay llakisqa kaspaymi sapa punchaw iskay cajetilla cigarrota pitarqani, drogakuytapas qallaykurqanim. Wañukuq abuelitoywan parlayta munaspaymi layqakunaman rirqani. Chaykunaman risqayraykum sapa tuta sapallay kaspayqa mana puñuytapas atiqchu kani demoniokuna manchachiwaptin. Chaynam karqani achka killakuna chaymi tutaykamuptinqa manchakuqña kani.

Huk kutipim mana purinay ñanninta richkaspay tuparurqani wasi ruwaywan, chay wasitam Jehova Diospa testigonkuna huñunakunankupaq ruwachkasqaku. Achkallaña runakunam llamkachkasqaku, chaymi nirqani: ‘¡Mayna sumaqraq kanman llapallan runakuna paykuna hina kaptinkuqa!’, nispay. Hinaspam yuyarirurqani bibliamanta parlapayawanankupaq ñawpaqta wasiyman hamusqankuta.

Kaqmanta wasiyman hamunankuta munaspaymi chaypi huknin llamkaqta nirqani watumuwananpaq. Diostam mañakurqani, chaymi chunka punchawmanta watukamuwarqa. Chaypim niykuwarqa kaqmanta bibliamanta yachanaykupaq chaymi ñuqapas ‘arí’, niykurqani. Huñunakuyman rinaypaq niykuwaptinmi chaylla riyta qallaykurqani. ¡Chay huñunakuyta hinaqa manam maypipas rikurqanichu! Maynatam munarqani kuyakuq hinaspa kusisqa runakunawan tupaykuyta, chayna runakunatam tarirurqani.

Chaymantapacham llapallan huñunakuykunaman riyta qallaykurqani. Kimsa semanamantam manaña cigarrotapas pitarqaniñachu. Brujokunapa libronta hinaspa uyarinapaq disconkunatapas wikaparurqanim chaymi manaña demoniokunaqa manchachiwarqañachu. Chaymantam Jehova Diospa kamachikuyninman hinaña kawsakuspay kimsa killamantaqa Diosmanta willakuytaña qallaykurqani. Suqta killamanta bautizakuruspaymi iskay punchawmantaqa 50 hora masninta Diosmanta willakunaypaq tantiakururqani.

Maynatam Jehova Diosta agradecekuni yanapawasqanmanta. Chayraqmi kusisqa kawsakuni. Arí, Jehova Diospa sutinmanta yachayqa ‘mana tuñichiy atina torre hinam’ (Proverbios 18:10). * Salmos librota qillqaq hinam ñuqallayqa tarikullani. Paymi nirqa: ‘Waranqantin punchaw huklawpi kanaymantaqa chulla punchawllapas patioykim aswan allinqa. Huchallikuqllapa kasqanpi kanaymantaqa’, nispa”.

Kay Belgica nacionniyuq warmiqa Diosta riqsisqaymantaqa kusisqañam kawsakun. Chaynam pipas Diosta sunqumanta maskaspaqa kusisqa tarikunqa.

[Willakuy]