¿Imaraykun Jehová Diosta reqsinanchis?

¿KAUSAYNIYKIPI ch’usaq sonqo jinachu sientekunki? Sichus pisillata Diosmanta yachanki chayqa, chhaynapaschá kashanki. Diosta reqsiyqa askha runakunatan yanaparqan, chay jinatan qantapas yanapasunkiman. Chayqa allinninchispaqmi, ichaqa manan juj tiempollapaqchu aswanpas wiñaypaqmi.

Jehová Diosqa munanmi payta reqsinanchista. Bibliaqa kay jinatan niwashanchis: “Diosman achhuykuychis, jinan paypas qankunaman achhuykamusunkichis”, nispa (Santiago 4:8). Diosqa yachanmi payta reqsiyqa allinninchispaq kasqanta. Chaymi niwanchis: “Ñoqan Diosniyki Señor Diosqa kani, ñoqan allinniykipaq yachachiyki, ñoqan purinayki ñantapas pusayki”, nispa (Isaías 48:17, Diospa Simin Qelqa). *

¿Imakunapin Diosta reqsiy yanapawanchis? Kausayninchispi sasachakuykunata allichanapaqmi yanapawanchis, jamuq tiempopaq sumaq suyakuyta qowanchis, thaj kaytataq qowanchis. Chaymantapas imapaqchus runakuna kausasqanchistan Bibliaqa sut’ita explicawanchis, chaymi allin yuyaywan kausayninchista qhawarinchis. Chaymanta astawan rimasun.

¿Imapaqmi kausanchis?

Kay tiempopiqa tukuy imapas imaymanapiña ñauparin chaypas, runakunaqa tapukushallankun imapaqchus kausanchis chayta. Sichus mana allintachu yachanchis chay tapuyman kutichiyta chayqa, yanqapaqpas kausayninchis kanman jinatan qhawarisunman. ¿Chay jinatachu runakuna piensanku? Alemania nacionpin 1997 watapi jina juj encuestata ruwarqanku. Chaypin tapusqa runakunamanta kuskannin nirqanku: “Piensasqayman jinaqa kausayninchisqa yanqan”, nispa. Yaqapaschá chay jinata tiyasqayki llaqtapi runakunapas piensanku.

Imapaq kausasqanchista mana allintachu yachanchis chayqa, manan faciltachu ima ruwaytapas aparisunman. Chay tapuyta mana yachasqankuraykun wakinqa profesional kaypi otaq qhapaq kaykuna maskhaypi yuyayninkuta churanku. Kausayninkupi imapas pusariq mana kaqtinmi wakinqa manapuniña kausayta munankuñachu. Chay jinapin juj munay sipas tarikurqan, chaytan juj periódico willarqan: “Payqa nishu qhapaq wasipin wiñarqan, ima ruwaypas makillanpin karqan, allin reqsisqataqmi karqanpas. Chhaynapiña tiyashapapas, sapanmi sientekuq, mana imapaq valeqta jinataqmi vidantaqa qhawariq. Chaymi wañuchikapurqan barbitúricos nisqa pastillakunata nishuta tomaspa”, nispa (International Herald Tribune). Yaqapaschá jujkunamantapas uyarirqanki chay jinata wañuchikapusqankuta.

Uyarirqankichu: “¿Kausayninchismanta ima tapuymanpas ciencian llapanta willawasunman” nisqa rimayta? Alemania nacionmanta Die Woche periodicon nirqan: “Cienciaq nisqanqa cheqaqña chaypas, manan imayna kausananchispaq yanapawanchischu, evolución yachachikuyqa manan sut’ichu, física cúantica nisqapas imaymanataña yachachin chaypas, manan consuelota qonchu, nitaqmi thajpi kausanapaqpas yanapakunchu”, nispa. Cientificokunaq tarisqankuraykun yacharqanchis kausaqkunamanta, jinallataq muyuriqninchispi tukuy kaqkunapas imayna kasqanta. Ichaqa cienciaqa manan explicanchu imapaqchus runakuna kausasqanchistaqa. Sichus cienciaq niwananchista suyakusunman chayqa, manan kausayninchismanta tapukuyninchikunaman kutichiyta tarisunmanchu. Juj periodicoq nisqan jina: “Lliu runan orientasqa kayta necesitan” (Süddeutsche Zeitung).

¿Pillan kausayninchispi aswan allinta pusariwasunman? Kamaqnillanchismi, paymi kay pachaman runakunata churarqan, chhaynaqa paymi yachan imarayku kaypi kasqanchista. Biblian willan Jehová Diosqa kay pachaman junt’aykunankupaq,kay pachata cuidanankupaqwan runakunata kamasqanta. Runakunaqa tukuy ruwasqankupin rikuchinanku karqan Dios jina sumaq sonqo kayta. Chanin kayta, yachayniyoq kayta, munakuytapas. Imapaq Dios kamawasqanchista entiendespaqa imapaq kausasqanchistan yachanchis (Génesis 1:26-28).

¿Imatan ruwawaq?

Sichus ñaupaqqa mana sut’itachu yacharqanki tapukusqaykikunamanta, yaqapaschá imapaq kausasqanchismanta chayqa, Biblian kallpachasunki Jehová Diosta allinta reqsinaykipaq. Chaymi Jesuspas nirqan: “Paykuna wiñay kausayta chaskinankupaqqa qan sapallan cheqaq Diostan reqsinanku”, nispa. Chaymantapas sumaq sonqo kanaykipaqmi kallpachakunayki, munakuq kanaykipaq. Kallpachakuwaqmi Diospa gobiernon kay pachata kamachiqtin chaypi tiyanaykipaq. Chhaynapin kusisqa kausanki, sumaq suyakuyniyoqtaq kausankipas. Tukuy tapukusqaykikunatapas sut’itan yachanki (Juan 17:3; Eclesiastés 12:13).

¿Yanapasunkimanchu tapukuyniykikunaman kutichisqayki? Hans sutiyoq runataqa yanaparqanmi. * Ñaupaq watakunapiqa manan Diosmanta yacharqanchu. Payqa drogakuspan puriq, warmikunawan puriq, juj mana allin ruwaykunapi ima. Paymi nin: “Manan yacharqanichu imapaq kausasqanchista, ch’usaq sonqon sientekuq kani”, nispa. Ichaqa 25 watanpi kashaspan Diosmanta yacharqan pay kikin Bibliata leespa. Chhaynapin Dioswan amigontin kapurqan, entienderqantaqmi imapaq kausasqanchista. Chaymi imayna kausasqanta cambiapuyta munarqan, Jehová Diospa testigon jinataq bautizakapurqan. Kay último chunka watakunapiqa runakunaman Diosmanta yachachispan llank’asharqan. Paymi nin: “Jehová Diosta serviyqa manan imawanpas tupanmanchu. Diosta reqsispan kunanqa kusisqa kausani”, nispa.

Ichaqa manan imapaq kausasqallanchismantachu runakunaqa tapukunku. Kay pachapi kausay sasa kapushasqanraykun askha runakuna jujta tapukullankutaq.

¿Imaraykun desgraciakuna kan?

Ima desgraciapas pasaqtinqa k’irisqa runaqa, “¿imaraykun chay pasarqan” nispan tapukun. Llakikuyninchista atipanapaqqa yachananchismi imarayku desgraciakuna kasqanta. Sichus chayta mana yachanchischu chayqa, kaqllatan sufrinchis chaymi pipas phiñasqa kausanman. Ejemplopaq yachasun Bruni sutiyoq warmimanta.

Bruni nin: “Qayna watakunallan waway Susanne wañukapurqan. Noqaqa creenitaq Diospi chayqa, sacerdotemanmi rirqani sonqoypi k’irisqa tarikuspay. Sacerdoteqa niwarqanmi: Diosmi wawaykitaqa cieloman apakapun, chaypi juj ángel kananpaq, nispa. Waway wañukapuqtinqa, sinchi llakisqan kasharqani. Ichaqa Diostapas cheqnikurqanin wawayta apakusqanmanta”, nispa. Bruniqa askha watakunan chhayna sientekurqan. Paymi nillantaq qhepaman pasasqanta: “Jehová Diospa jujnin testigonmi Bibliapi rikuchiwarqan waway wañupusqanmantaqa mana Dioschu juchayoq kasqanta. Jehová Diosqa manan cielomanqa apakapusqachu, nitaq angelmanpas tukuchisqachu. Wawayqa juchayoq runa kasqanchisraykun onqopusqa, jinaspa puñushanmanpas jina wañusqa kashan. Wawayqa Dios kausarichimpunantan suyakushan. Chaymantapas yacharqanin Diosqa runakunata kay pachapi sumaq paraisopi tiyanankupaq kamasqanta, chayqa pisillamantan cumplikunqa. Imaynachus Jehová Dios kasqanta entiendespan, payman astawan asuykurqani, manañan sonqoypas k’irisqachu kasharqan”, nispa (Salmo 37:29; Hechos 24:15; Romanos 5:12).

Millonninpi runakunan ima desgraciapipas tarikunku. Yaqapaschá guerra kaqtin, yarqay kaqtin, otaq imapas pasaqtin. Bruniqa thajmi sientekurqan desgraciakunamanta mana Dioschu juchayoq kasqanta Bibliapi yachaspa. Jehová Diosqa manan jayk’aqpas munarqanchu runakuna sufrinantaqa, payqa pisillamantan millay kausayta chinkachipunqa. Millay kausay astawan yapakusqanmi rikuchin, kay millay tiempoq “tukukunan p’unchaykunapiña” tiyashasqanchista. Jujpaqkama kay millay kausay tukukapunanpaq tiempoqa chayaramushanñan (2 Timoteo 3:1-5; Mateo 24:7, 8).

¿Imaynatan Diosta reqsisunman?

Hanspas Brunipas creerqankun Diospi, ichaqa manan allintachu paymanta yacharqanku. Chaymi tiempota jap’ispa paymanta allinta yachaqtinkuqa allinpuni karqan. Imaymana tapukuyninkumanmi kutichiyta tarirqanku, chaymi thaj sientekurqanku, jamuq tiempopaqpas sumaq suyakuyniyoq karqanku. Millonninpi Dios serviqkunapas chay jinapin tarikurqanku.

Jehová Diosta allinta reqsinapaqqa allintan Bibliata t’aqwirinanchis, chay libroqa paymantan riman, jinallataq imatachus mañawasqanchismanta. Chaytan ruwarqanku apostolkunaq tiemponpi runakunapas. Chay tiempopi kausaq médico Lucasmi willarqan Berea (Grecia) iñiq t’aqamanta judiokunaqa “chay yachasqanku cheqaqpunichus kashan icha manachus chayta yachanankupaq sapa p’unchay Diospa simin qelqata allintapuni estudiasqankuta” (Hechos 17:10, 11).

Apostolkunaq tiemponpi cristianokunapas kuskan iñiq t’aqakunapi juñunakuqku (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Kay tiempopipas kaqllataqmi. Jehová Diospa testigonkunaq iñiq t’aqankunapiqa juñunakuykunatan aparinku, chay juñunakuykunaqa runakuna Diosman asuykunankupaqmi astawanqa apakun. Llaqtanchispi tiyaq Testigokunawan juñunakuyqa allinpunin. Paykunaqa sapa kutillan astawanraq adorasqanku Diosman rijch’akunku, manaña pay jinapunichu kanku chaypas. Chhaynaqa Testigokunawan juñunakuyqa yanapawanchismi Jehová Diosta aswan allinta reqsinanchispaq (Hebreos 10:24, 25).

Yaqapaschá niwaq: “Kallpachakunaymá Diosta reqsinaypaqqa”, nispa. Arí, kallpachakunchismi. Ichaqa juj ruwaykunapaqpas chay jinatan kallpachakunchis. Piensariy carrerapi phawaq runakunaq imachus ruwasqankupi. Jean-Claude Killy runaqa qorimanta medallatan ganarqan, paymi askha nacionkunawan atipanakuspa phawasqa, nin: “Gananaykipaqqa 10 wata ñaupaqtaraqmi entrenayta qallarinayki [...]. Chayllapiñan sapa p’unchaypas watantin piensanayki, preparakunaykin yuyayniykipi, cuerpoykiwanpas”, nispa. Tukuy chay ruwayqa carrerapi 10 minuto jina phawanallapaqmi. Chhaynaqa Jehová Diosta reqsinapaqqa astawanraqmi kallpachakunanchis, chayqa imaymanapin allinninchispaq kanqa.

Diosmanqa astawanraqmi asuykunki

Manan pipas munasunmanchu kausayninchispi importante kaqta pierdekuytaqa, ¿riki? Chhaynaqa, sichus reparanki kausayniykipi imapas faltasqanta, imarayku ñak’ariykuna kasqantapas tapukinki chayqa, kallpachakunaykin Jehová Diosta reqsinaykipaq. Paymanta astawan yachanki chayqa vidaykin aswan allinman cambiapunqa, chayqa wiñaypaqmi kanqapas.

¿Atisunmanchu Jehová Diosmanta llapanta yachayta? Unay watakunaña Jehová Diosta serviqkunaqa ancha admirasqan kashanku imaymanata Jehová Diosmanta yachasqankumanta, jinaspapas yachashallankun paymanta. Jehová Diosta astawan reqsispaqa kusisqan kausasunchis, astawanmi payman asuykusunchis. Chaymi noqanchispas apóstol Pablo jina nisunman, paymi nirqan: “¡May jatunpunin Diospa qokuyninpas, yachayninpas, yuyayninpas! ¡Manapunin pipas llapantaqa yachanmanchu imachus piensasqantaqa, manataqmi pipas llapantaqa entiendenmanchu imachus ruwasqankunatapas! ¿Pipas Jehová Diospa yuyayninta reqsinmanchu? ¿Pipas yuyaychaqnin kanmanchu?”, nispa (Romanos 11:33, 34).

[Willakuykuna]

[Willakuy]

Runakunaqa tapukushallankun imapaqchus kausanchis chayta

[Willakuy]

“Imaynachus Jehová Dios kasqanta entiendespan, payman astawan asuykurqani”

[Willakuy]

“Jehová Diosta serviyqa manan imawanpas tupanmanchu. Diosta reqsispan kunanqa kusisqa kausani”