1. Gentecunaca ¿brujeriapica crinllu?

La Religión tradicional africana nishca libropica “África llactapica tucuicunallatami brujocuna tiajtaca crin” ninmi. “Paicunapaca brujeriapi crinaca importantepachami can” ninmi. Chai llactapica liinata na yachaj gentecunamanda callarishpa ninan estudiashca gentecunacamanmi brujeriapica crin. Y huaquinbica religiongunata ñaupaman pushaj gentecunapashmi brujeriapica crin.

2. Gentecunaca espiritucunamanga ¿pi poderta cui ushashcatata crin?

² África llactapica gentecunaca espiritucuna y huañushcacunapa espiritucuna poderta charishcatami crin. Chai podertaca Taita Diosmi paicunamanga cun ninmi. Huaquin gentecunapashmi cai podertaca alita rurangapaj o nalita rurangapaj utilizai ushashcata crin.

3. Brujushpaca ¿ima pasai ushashcatata gentecunaca crin?

³ Gentecunaca paicunapa contracunata daño rurangapaj nishpami brujeriata ruran. Shinallata brujushpaca gentecunata daño rurachun animalcunatapash cachai ushashcatami crin. Brujushcamandami shuj personaca shujcunahuan macanajuita, talvez unguita o huañuitapash ushan nishpami gentecunaca crin.

4. ¿Brujacunahuan ima pasan cashcatata gentecunaca crin? Brujeriata ruran cashca gentecunaca ¿imatata nishca?

⁴ Brujushpaca magiata rurajun cuendallatami can. Brujacunapa espíritu llujshishpa rishpa shuj gentecunata daño rurangapaj, shuj brujacunahuan tandanajun cashcatami gentecunaca crin. Ashtahuanbash brujacunapa cuerpocunaca paicunapa camacunapi puñunajushcatami crin. Brujocuna o brujacuna imacunatalla rurashcataca jovengunami ashtahuanbacha parlan. Por ejemplo, shuj revistapica bruja cashca jovenguna ima nishcatami churashca. Shuj jovenga nishcami “ciento cincuenta gentecunatami carrocunapi chocachishpa huañuchishcani”, cutin shujca “cinco huahuacunapa yahuarta tucuringacaman chupashpami huañuchishcani” nishcami. Shinallata shujca “ñuca charishca noviocunamandaca ñucata saquishcamandami quimsapurata huañuchishcani” nishcami.

5. Huaquingunaca ¿ima yuyaihuanda brujurin? Chaipaca ¿imacunatallata ruran?

⁵ Gentecunaca suerteta charingapaj o nalicunamanda cuidaringapaj brujuri ushashcatapashmi crin. Chaita crij gentecunaca pulseracunata, anillocunata, o imapash jambicunatami ufian, na cashpaca chai jambicunataca cuerpopimi jabirin. Shinallata paicunaca paicunapa huasicunapi o alpa ucucunapimi paicunata cuidachun nishpa imatapash pambashpa saquin. Shinallata huaquingunaca suerteta charingapaj nishpami Corán libropa o Bibliapa versiculocunata escribishpa aparia purin.

6. Satanaspash, ayacunapash ¿imacunatallata rurai ushan? Chaicunamandaca ¿yapata preocuparinachu canchi?

⁶ Satanaspash, ayacunapash gentecunata llaquichingapaj munajtaca yachanchimi. Ayacunaca gentecunata llaquichingapaj munashpami imacunatapash rurashca. Por ejemplo, punda tiempocunapicarin gentecunapa cuerpocunaman o animalcunapa cuerpocunaman yaicushpami llaquichin carca (Mateo 12:​43-​45). Ayacunaca poderta charinmi. Shinapash ayacuna imata rurai ushashcacunapillaca na yapata preocuparinachu canchi.

7. Satanasca ¿imata crichingapata munan? Shuj ejemplomanda parlapai.

⁷ Satanasca gentecuna pai ashtaca poderta charishcata crichunmi munan. Shinapash chaica na ciertochu can. Por ejemplo, África llactapica soldadocunaca contra soldadocunata manllachishpa mishangapami munarca. Chaimandami paicunaca disparanajujta o bombacunata cacharinajujta crichun paicunamanga grabashcata churashpa bullayachirca. Chaimi contra soldadocunaca ciertopacha paicunata atacanajushcata crirca. Soldadocuna contra soldadocunata umachishcashnallatami Satanaspash tucuipa ushaita charishcata ñucanchicunaman crichingapaj munan. Satanasca gentecuna Jehovata cazunapa randi paita cazuchun munaimandami shina llullan. Satanás ima llullacunahuan umachingapaj munajta ricupashunchi.

8. Satanasca ¿ima llullacunatata crichingapaj munan?

⁸ Imapash nali pasajpica, na yangamanda pasan cashcata crichunmi Satanasca munan. Ashtahuangarin pipash dañota rurashcamanda shina pasashcanga yashpa crichunmi munan. Por ejemplo, shuj huahuaguca malaria unguihuan huañushcanman. Chai huahuagupa mamaca, zancudocunashna chuspicuna picashcamanda malaria ungui japijtaca alimi yachan. Shinapash chai mamaca pipash brujujpimi chai chuspica paipa huahuata picashcanga yashpami pensan.

9. Llaquicunamandaca ¿imatata Bibliapica nin?

⁹ Gentecunata llaquinchingapaj Satanás poderta charijpipash, Satanaspa culpamandami tucui llaquicunaca tian nishpaca na pensanachu canchi. Bibliapica: ‘calpashpa mishanaca, na alipacha calpajcunapajllachu. Jatun macanajuipipash, na ninan shinllicunalla mishanajunllu. Micunatapash, na alipacha yachajushca runacunalla micunllu. Charij tucunapash, na aliguta yarishpa causajcunapajllachu Cushijushpa chasquinapash, na juyaillaguta rimaj runacunapajllachu’. Ashtahuangarin ima punlla tucuicuna ima tucunatapash na yachanllu ninmi (Eclesiastés 9:​11). Shuj persona alipacha calpanata yachashcamanda carrerata gananga nishpaca na seguro caita ushanchichu. Huaquinbica calpajujpi nitijashcamanda o imapash pasajpica perdinmanllami. Ima tucunatapash na yachai usharinllu. Llaquicunapica urmarinllami. Chaimandami imapash llaquicunapi cashpaca Satanás imatapash rurashcamanda o brujushcamandami shina pasan nishpaca na pensana canchi.

10. Brujacuna ¿imata ruran cashcatata gentecunaca crin? Pero chai na cierto cashcataca ¿imashinata yachai ushanchi?

¹⁰ Brujacuna puñunajujpi paicunapa espíritu cuerpomanda llujshishpa shuj brujacunapa espiritucunahuan tandanajushpa gentecunata llaquichingapaj munan cashcatami Satanasca crichun munan. Chai ciertopacha cajpica brujacunapa cuerpocunamandaca ¿imashi llujshijunman? Imashinami ña ricupashcanchi Bibliapi alma nishpaca gentecunamandallatami parlajun. Gentecunamanda imapash llujshinataimanga na parlajunllu. Shinallata Bibliapica espíritu nishpaca causaita cuj samaigumandallami parlajun. Chai samai cuerpomanda llujshishpa imatapash rurai ushana cashcataimanga na nijunllu.

11. Brujacunapa espíritu paicunapa cuerpocunamanda na llujshijtaca ¿imashinata yachanchi? Quiquinga ¿imata yuyapangui?

¹¹ Almaca ñucanchillatami canchi. Shinallata espiritupash causaita cuj samaigullami can. Chaimandami ñucanchi cuerpomanda ima llujshinapash na tian. Shinaca brujacunapa cuerpomandaca imapash na llujshinllu. Brujacuna imata rurashcanchi nishcapash na ciertochu.

12. Ciertopacha pasashcatashna gentecuna crichunga Diabloca ¿imacunatata ruran?

¹² Pundacuna brujeriata rurashpa causashca gentecunaca ¿imamandata caita o chaitami pasashcani nin? Satanasmi gentecuna imatapash pasashcatashna o ricushcatashna crichun imacunatapash ruran. Shina rurashpami gentecunata Jehová Diosmanda caruyachishpa, Bibliapa nishcacunapash na cierto cashcata crichingapaj munan.

13. a) Daño rurashcapi imapash ama pasachun nishpa brujurinaca ¿alichu can? b) Brujurinamandaca Bibliapica ¿imatata nin?

¹³ Daño rurashcapi imapash ama pasachun nishpa brujurina ali cashcata crichunmi Diabloca munan. Shinapash Bibliapica chai tucui ruraicunaca nalipacha cashcatami nin. Chaimandami Bibliapica, Israel llactaman brujurinamanda o brujocuna canamanda Jehová Dios imata nishcata ricuchin:

• “Cangunaca, brujocunapash, yachajcunapash, na tucunachu canguichi” (Levítico 19:26).

• ‘Jari cashpa, huarmi cashpapash, huañushcacunahuan rimangapaj cayashpa, na cashpaca maijambash yachaj tucushpaca, rumicunahuanmi huañuchi tucunga’ (Levítico 20:27).

• “Canguna purapica [...] yachaj cangapaj, brujo cangapaj, jipa punlla ima tucunata yachaj cangapaj, yumbu cangapaj yachajuj runapash na tianachu. Yumbu canata, yachaj canata, ayacunata mañaj canata [...] yachajuj runapash na tianachu” (Deuteronomio 18:​10-​14).

14. Jehová Diosca ¿imamandata brujeriataca napacha ruranachu can nishpa mandarca?

¹⁴ Cai mandashcacunaca Jehová Dios paita sirvijcuna brujeriata napacha rurachun munashcatami ricuchin. Jehová Diosca cai leycunata cushpaca paita sirvijcunata ninanda juyashcatami ricuchirca. Jehová Diosca paita sirvijcuna ayacunata manllashpa causachunga na munarcachu.

15. Jehová Dios Satanasta yali poderta charishcataca Bibliapica ¿imashinata ricuchin?

¹⁵ Bibliapica Satanás imacunatalla rurai ushashcataca na ricuchinllu. Pero Jehová Dios Satanastapash, ayacunatapash yali ushaita charishcatami ricuchin. Chaimandami Jehová Diosca Satanastaca cielomanda cai alpaman shitamurca (Apocalipsis 12:​9). Satanasca Jehová Diostami Jobta llaquichichun saquihuai nishpa nirca. Shina nijpica paipa causaitalla ama tacaringui nishpami Jehová Diosca mandarca y chai mandashcata Satanás cazushcatami Bibliapica ricuchin (Job 2:​4-6).

16. Satanasmanda y ayacunamanda cuidaringapaca ¿pipa ayudatata mascana capanchi?

¹⁶ Proverbios 18:10​pica: “Mandaj Diospaj shutica, shinlli torreshnami. Imatapash cashcatapacha ruraj runa paipajman calpajpica, ayudangallami” ninmi. Shinaca Jehová Dios ñucanchita cuidachun munashpaca paimanmi quimirina canchi. Jehovata sirvijcunaca Satanás o ayacuna ama imatapash rurachun nishpaca na imacunatapash ufianllu o suerteta cuj nishca cosascunataca na charinllu. Shinallata brujushpa imapash daño ruranga yashpaca na manllanllu. Jehovata sirvijcunaca Bibliapi nishcatami crin. Bibliapica: “Mandaj Diosca ima pandatapash na yarij shunguhuan, paita cazujcunaman alita rurashpa paipa tucui ushaita ricuchingapajmi tucui cai pachata ricuriajun” ninmi (2 Crónicas 16:​9).

17. Santiago 4:​7​pica ¿imatata nin? Chaipaca ¿imatata rurana capanchi?

¹⁷ Santiago 4:7​pica: “Taita Diostalla cazushpa causashpa, diablohuanga shinllita macanajuichi. Chashna causajpimi, cangunamandaca diabloca anchuringa” ninmi. Shinaca Jehová Diosta sirvishpa tucui shungu cazushpaca, Jehová Dios quiquinda cuidanataca seguromi caita ushapangui.