Testigo de Jehovacunapa experienciacuna

Ali causaitami tarirca

JESUSCA paita catijcunataca alimi rijsini nircami (Juan 10:14). Maijanbash ali shunguta charishpaca ali causaita, ali ruraicunata juyashpaca Jesuspa catijcunata ricushpa ashtahuan yachajungapa munashpaca ali causaita taringami. Bélgica llactamanda shuj huarmiguhuanga shinami pasarca. Paimanda parlashcata ricupashunchi: Llaqui llaqui caimanda ñucamandallata huañuchiringapa munajujpipachami testigo de Jehovacunaca ñuca huasiman shamurca. Paicuna shamushpa cai mundomanda llaquicunaca tucuringami nijtaca alicachircanimi. Pero ña ocho huatacunatami ñucaca ñana iglesiaman rishca carcani. Punda ñuca iglesiapi purishpaca ashtaca nalicunata ricushca caimandami Taita Diosllami llaquicunataca tucuchinga nijtaca na alicachircani. Pero testigo de Jehovacuna ciertotapacha ninajushcata sintishpami Taita Diostaca cazushpapacha causana cashcata intindircani.

Shinapash shuj tiempo jipaca, Testigocunahuanga ñana tupari usharcanichu. Llaquillapacha sintirijuimandami tabacotapash punllapi ishcai cajetillata chupan carcani. Shinallata drogaritapashmi drogari callarircani. Ñucapa huañushca abuelitohuan parlangapa munaita charimandami brujeriatapash rurai callarircani. Chaita ruranaca nalipachami carca. Cada tutami ayacunaca manllachishpa llaquichihuan carca. Huaquin quillacunatami chashna pasahuarca. Chaimandami tutayanataca manllaita manllan carcani.

Shuj punlla puringapa rishpami shuj jatun huasita ashtaca gentecuna construccionbi trabajanajujta ricurcani. Chai construccionbi ashtaca gentecuna trabajanajujta ricushpaca manllarishcami quedarcani. Chai construccionman quimirishpaca Salón del Reinota testigo de Jehovacuna ruranajushcatami cuenta urmarcani. Chaita ricushpaca, shuj tiempo Testigocuna ñuca huasiman visitangapaj shamushcatami ñapash yarircani. Tucui gentecuna paicunashna tandanajushpa chashna caushashpaca alichari canman yarcanimi.

Bibliamanda cutin estudiangapa munashpami chai construccionbi trabajanajuj huaquin Testigocunahuan parlarcani. Taita Diosta ñuca mañashcamanda diez punllacuna jipaca, primera vez ñucaman Bibliamanda parlahuarca paillatami cutin ñuca huasiman shamushpa Bibliata cutin estudiachun animahuarca. Chaimi cutin Bibliata estudiangapa quidarcani. Shinallata Salón del Reinopi tandanajuicunamanbashmi invitahuarca. Chashna tandanajuicunataca nunca na ricushcarcanichu. Ashtaca tiempotami shina randimanda juyarishpa cushilla causaj gentecunata rijsingapa munashcani. Paicunata rijsishpaca ninandami cushijurcani.

Chai horasmandami tandanajuicunamanga siempre ri callarircani. Quimsa semana jipami tabacota chupaitapash saquishpa brujeriata rurana librocunata, nali musicacunapa cidicunatapash shitashpa saquircani. Chai cosascunata shitashca horasmandami ayacunapash ñana molestashpa catihuarca. Chai horasmandami Jehová Diosta cazushpa causanata dicidircani. Quimsa quilla jipaca publicadora tucushpami villachi callarircani. Seis quillacuna jipaca bautizarishpami ishcai punllahuanga precursora auxiliar tucurcani.

Jehová Diosmi ñucataca cuidahuashca. Chaimandami Jehovataca ninanda agradicini. ‘Taita Diospa shutica shinlli torreshnami. Alita ruraj runa paipaman calpajpica ayudangallami’ (Proverbios 18:10). Ñucapashmi salmista runagushna sintirini. ‘Paica huaranga punllacunata canllapi canapa randica shuj punllatallapash camba huasi patiocunapi purijunami ashtahuan ali. Nalicuna causanajuj huasicunapi causanapa randica ñuca Taita Diospa huasi pungupi canatami agllaiman nircami’.

Ali shunguta charij cai huarmiguca paipa causaipi cushilla causangapa imata rurana cashcatami yachajurca. Shinallata shuj gentecunapash Jehová Diosta mascashpa paimanda yachajuspaca cushillami causaita ushanga.