Αξίνελα τι Σικλιάς ι Ιεχωβά Ντεβλέσκε

ΜΗΠΩΣ χασαρένα κάτι σημαντικός κατά ζωή; Άμα τζανένα χάνικ πράγματα ι Ντεβλέσκε, σίγουρα χασαρένα κάτι σημαντικός. Σόσκε; Επειδή σαρ τθερένα αγαντό εκατομμύρια τζενέ, κάνα κάποιος σικλιόλα ι Ντεβλές κατά Γραφή τθερέλα σουγκό λατσσιπέ πι ζωγιάτε σο ατσσόλα.

Ο Ιεχωβά Ντεβέλ, οντουβά σο γραφιντάς πι πνευμάσαρ ι Αγία Γραφή, μανγκέλα τι γνωρίνας-λες. Ο ψαλμωδός γραφιντάς: «Τι σικλιόν ο τζενέ ότι σάντε τούι, σο βακερένα τούκε Ιεχωβά, ισινάν Πο Οπρέ σαριλένταρ κι πφουβ». Βοβ τζανέλα ότι ισί ο πο λατσσό αμένγκε τι σικλιάς-λες. «Με, ο Ιεχωβά, ισινόμ το Ντεβέλ, Οντουβά σο σικλιαρέλα-τουτ τι λατσσιμάσκε». Σο λατσσιπέ λάσα κάνα σικλιάσα ι Ιεχωβά Ντεβλές, σο ισί Πο Οπρέ σαριλένταρ;—Ψαλμός 83:18· Ησαΐας 48:17.

Εκ λατσσιπέ σο λάσα ισί ότι σικαβέλα αμένγκε σαρ τι αντιμετωπίνας ο προβλήματα σο τθεράσα κάθε ντιβές, ντέλα-αμέν σίγουρη ελπίδα για το μέλλον ντα ειρήνη αμαρέ γκοντιάτε. Επίσης, επειδή τζανάσα ι Ιεχωβάς λατσσές ανταβά κερέλα-αμέν τι ντικχάς διαφορετικά ο πο σημαντικά ζητήματα ι ζωγιάκε σο αντιμετωπίνενα ο τζενέ αντιβές σαρό κο ντουνιάς. Καλά ισί ανταλά ζητήματα;

Τθερέλα Σκοπός Τουμαρί Ζωή;

Παρόλο σο η τεχνολογία τζάλα μπουτ ανγκλάλ αντιβές, ο τζενέ συνεχίνενα τι κερέν ο ίδιες ερωτήσεις: “Σόσκε υπαρχίντιβαβα; Κάι τζάβα; Σόσκε τζουβντιάβα;” Άμα να κα λελ εκ τζενό λατσσέ απαντήσεις, λέσκι ζωή ναστί τθερέλα σκοπός. Αγαβένα-λες ανταβά ο τζενέ; Εκ έρευνα σο αβιλί κι Γερμανία πασέ κο 2000 σικαντάς ότι ο επκάς οντουλένταρ σο πουτσλέ-λεν νιωθίνενας μπουτ φαρ ότι η ζωή να τθερέλα σκοπός. Μπέκιμ ο ίδιος αβέλα-πες οτθέ σο μπεσένα τουμέν-ντα.

Κάνα εκ τζενό να τθερέλα σκοπός πι ζωγιάτε, ισί μπουτ δύσκολος τι τσσουβέλ στόχους. Για τι νιωθίνεν πο λατσσές μπουτ τζενέ προσπαθίνενα τι αρακχέν εκ μπουτ λατσσί μπουτί ή τι αβέν χουλανέ. Όμως, επειδή να τθερένα σκοπός βασανίντιβενα αντρέ πουμέντε. Ντα μερικά τζενέ βασανίντιβενα αζόμ μπουτ σο μανγκένα τι μερέν. Ανταγιά ισινέ η εμπειρία εκχέ μπουτ σουκάρ τζουβλιάκι σο, σαρ βακερέλα η εφημερίδα Ιντερνάσιοναλ Χέραλντ Τρίμπιουν, μπαριλί «αντρέ κο χουλανιπέ ντα τθερέλας εκ μπουτ λατσσί ζωή». Παρόλο σο τζουβντιόλας αντρέ κο χουλανιπέ, νιωθίνελας κορκορί ντα πακιάλας ότι λάκι ζωή να τθερέλας σκοπός. Πιλάς χάπια σοϊμάσκε ντα αρακχλέ-λα μουλί. Μπέκιμ τουμέν-ντα τζανένα γιαβερέ-ντα τζενέν σο μουλέ μπέτι τροπόσαρ.

Μήπως, όμως, ασουντέν τζενέν τι βακερέν ότι η επιστήμη μπορίνελα τι εξηγίνελ σαρέ ο πράγματα σο τθερένα τι κερέν ι ζωγιάσαρ; Η γερμανική εφημερίδα Ντι Βόχε σο νικιόλα κάθε εβδομάδα βακερέλα: «Παρόλο σο η επιστήμη μπορεί τι ισί αληθινή, κο πνευματικά ζητήματα ισί μπίζουρανι. Η θεωρία της εξέλιξης ντικχίντιβελα πουρανί. Ατζέ-ντα η κβαντομηχανική σο εξηγίνελα αζόμ δύσκολα πράγματα, ναστί λοκχιαρέλα ι τζενέν ούτε ντέλα-λεν σιγουριά». Οντουλά σο αρακχλέ ο επιστήμονες εξηγίνενα μπουτ πράγματα ι ζωγιάκε, για τη φύση ντα σαρ ατσσόλα η ζωή κι πφουβ. Όμως η επιστήμη ναστί βακερέλα αμένγκε σόσκε τζουβντιάσα ντα κάι τζάσα. Άμα στηρίντιβασα σάντε κι επιστήμη, να κα λας απαντήσεις κο ερωτήσεις σο τθερένα τι κερέν με το σκοπός ι ζωγιάκο. Σαρ βακερντάς η εφημερίδα Ζουντόιτσε Τσάιτουνγκ, «ο τζενέ τθερένα ανάγκη τι σικαβέλ λένγκε κάποιος κάι τι τζαν».

Κον μπορίνελα τι σικαβέλ κο τζενέ κάι τι τζαν πο λατσσές κατά Ντεβέλ; Αφού βοβ τσσουντάς ι τζενέν κι πφουβ, πρέπει τι τζανέλ σόσκε ισί ακατέ. Η Γραφή εξηγίνελα ότι ο Ιεχωβά κερντάς ι τζενέν για τι μπεσέν κι πφουβ ντα τι αρακχαβέν-λα. Σο-ντα τι κερένα, ο τζενέ πρέπει σικαβέν λέσκε ιδιότητες, σαρ ισί η δικαιοσύνη, η σοφία ντα η αγάπη. Κάνα αγαβάσα σόσκε κερντάς-αμέν ο Ιεχωβά, αζομάν κα αγαβάς-ντα σόσκε ισινάμ ακατέ.—Γένεση 1:26-28.

Σο Μπορίνενα τι Κερέν;

Σο μπορίνενα τι κερέν άμα να αρακχλέν ατζέ λατσσέ απαντήσεις κο ερωτήσεις: «Σόσκε υπαρχίντιβαβα; Κάι τζάβα; Σόσκε τζουβντιάβα;» Η Γραφή βακερέλα τουμένγκε τι σικλιόν μπουτ λατσσές ι Ντεβλές. Ο Ιησούς βακερντάς: «Ανταβά μανγκέλα τι βακερέλ ζωή για πάντα, τι σικλιόν τούκε, σο σάντε τούι ισινάν ο αληθινός Ντεβέλ, ντα οντουλέσκε σο μπουτσσαντάν, ι Ιησού Χριστόσκε». Επίσης, η Γραφή βακερέλα τουμένγκε τι μπαριαρέν ο ιδιότητες σο τθερέλα ο Ντεβέλ, ντα ατζέ πο μπουτ ι αγάπη, ντα τι τσσουβέν στόχος τι τζουβντιόν κι Βασιλεία κι Ντεβλέσκι σο κα αβέλ βασιλιάς ο Χριστός. Αζομάν κα τζανέν σόσκε τζουβντιόνα ντα κα τθερέν εκ μπουτ σουκάρ ντα σίγουρη ελπίδα οντουλένγκε σο κα αβέν ανγκλά-τουμέντε. Κα τθερέν ι ευκαιρία τι λεν απαντήσεις κο σημαντικές ερωτήσεις σο μέχρι ακανά μπέκιμ να λιντέν.—Ιωάννης 17:3· Εκκλησιαστής 12:13.

Σαρ ανταλά απαντήσεις μπορίνενα τι αλλάνεν τουμαρί ζωή; Ο Χανς ισί εκ τζενό σο τζανέλα-λες ανταβά. a Ανγκλέ πακιάλας απλά ότι ο Ντεβέλ υπαρχίντιβελα, αλλά λέσκι πίστη να επηρεάνελας λέσκι ζωή. Ο Χανς μπεϊντίνελας ο ναρκωτικά, τι τζαλ τζουβλίντζαρ, τι τσορέλ ντα ο μηχανές. «Η ζωή όμως, να ισινέ πφερντί, να τθερέλας νόημας», βακερέλα ο ίδιος. Κάνα ισινέ 25 μπρεσένγκο, λιντάς ι απόφαση τι διαβάνελ με προσοχή ι Γραφή για τι σικλιόλ προσωπικά ι Ντεβλές. Κάνα σικλιλό μπουτ λατσσές ι Ντεβλές ντα αγαντάς σόσκε τζουβντιόλας, ο Χανς κερντάς αλλαγές πι ζωγιάτε ντα μπολντιλό σαρ Μάρτυρας ι Ιεχωβάσκο. Τζάνα ντες μπρεσά ακανά σο κερέλα σκαπανικός. Βοβ βακερέλα: «Ο πο λατσσό τρόπος τι τζουβντιόλ εκ τζενό ισί τι υπηρετίνελ ι Ιεχωβάς. Τίποτα γιαβέρ να πφερέλα αζόμ μπουτ μι ζωή. Επειδή σικλιλόμ ι Ιεχωβάς τζανάβα σόσκε τζουβντιάβα».

Όμως, ο τζενέ να μανγκένα τι σικλιόν σάντε σόσκε τζουβντιάσα. Καζόμ ο ντουνιάς αβέλα πο μπέτι, κάθε ντιβές πο μπουτ τζενέ ανησυχίνενα εκχέ γιαβερέ-ντα πραγμάσκε.

Σόσκε τι Αβέλ-πες Ανταβά;

Κάνα αβένα μπαρέ προβλήματα, ο τζενό σο τθερέλα ο πρόβλημας σκεφτίνελα: Σόσκε τι αβέλ-πες ανταβά; Για τι μπορίνελ εκ τζενό τι νταϊντίνελ κο προβλήματα, κχελέλα μπαρό ρόλος σο απάντηση κα λελ κι ερώτηση ανταγιά. Άμα ο τζενό σο τθερέλα προβλήματα να κα λελ εκ λογική απάντηση, κα συνεχίνελ τι τθερέλ ντουκχ ντα μπέκιμ τι αρχίνελ τι τθερέλ χολί. Κάτι ασακό αβιλό-πες κι Μπρούνι. Ντικχέν λάκο παράδειγμας.

«Πριν μπρεσά μουλί μι χουρντί τσσάι», βακερέλα η Μπρούνι, σο ακανά ισί εκ μπαρί ρομνί. «Πακιάβας κο Ντεβέλ, οτθάρ γκιλόμ εκχέ παπαζίστε για τι λοκχιαρέλ μο γκι. Βοβ βακερντάς μάνγκε ότι ο Ντεβέλ λιντάς την Ζουζάνε κο ουρανός ντα ότι ακανά ισί άγγελος. Όχι σάντε χασαρντόμ ι πφουβ τελάλ μι πιντρένταρ σο μουλί μι τσσάι, αλλά μισιντόμ ι Ντεβλές-ντα σο λιντάς-λα». Η Μπρούνι για μπουτ μπρεσά τθερέλας ντουκχ ντα στεναχώρια. «Σοράν, εκ Μάρτυρας ι Ιεχωβάσκο σικαντάς μάνγκε αντράλ κατά Γραφή ότι να τθεράβας καέκ λόγος τι μισίναβ ι Ντεβλές. Ο Ιεχωβά να λιντάς μι τσσαγιά κο ουρανός, ούτε κερντάς-λα άγγελος. Ο νασφαλιπέ λάκο αβιλό ιτιρί κατά ατέλεια σο τθερένα σαρέ ο τζενέ. Η Ζουζάνε σοβέλα ο σοϊπέ ι μεριμάσκο, ντα μπεσέλα τι τζουβντιαρέλ-λα ο Ιεχωβά. Ατζέκ σικλιλόμ ότι ο Ντεβέλ κερντάς ι τζενέν για τι τζουβντιόν για πάντα κο παράδεισος κι πφουβ, ντα ότι ανταβά κα αβέλ σουγκό. Κάνα αγαντόμ μπαγιά σο Ντεβέλ ισί ο Ιεχωβά, γκιλόμ πο πασέ λέστε ντα μι ντουκχ κοβλιλί».—Ψαλμός 37:29· Πράξεις 24:15· Ρωμαίους 5:12.

Εκατομμύρια τζενέ τθερένα μπουτ ντα διαφορετικά προβλήματα, σαρ ισί ο τζένγκια, η μποκχ ντα ο φυσικές καταστροφές. Κάνα η Μπρούνι ντικχλάς κατά Γραφή ότι ο Ιεχωβά να φταίνελα ι προβληματένγκε, ότι να ισινέ λέσκο σκοπός τι τσσίντεν μπουτ ο τζενέ ντα ότι ατζεχάνικ κα νασκιαρέλ ο γκεραλιπέ, λοκχιλό λάκο γκι. Ο πφιρνιπέ σαρό κο ντουνιάς αβέλα ατζέ πο μπουτ ντα ανταβά ισί σημάδι ότι ακανά τζουβντιάσα «κο τελευταία ντιβεσά» ανταλέ ντουνιάσκε. Ο μπουτ σουκάρ ντιβεσά σο μπεσάσα σαρ σαρ τι αβέν ισί μπουτ πασέ.—2 Τιμόθεο 3:1-5· Ματθαίος 24:7, 8.

Σικλιόν ι Ντεβλές

Ο Χανς ντα η Μπρούνι να τζανένας λατσσές ι Ντεβλές. Πακιάνας κο Ντεβέλ χωρίς τι τζανέν μπουτ πράγματα λέσκε. Κάνα ντινέ πουμαρέ σαατίσταρ για τι σικλιόν λατσσές ι Ιεχωβάς, ο προσπάθειες λένγκε ασταρντέ τθαν. Αρακχλέ λογικές απαντήσεις κο πο σημαντικές ερωτήσεις σο τθερένα ο τζενέ αντιβές. Ανταβά ντινάς-λεν ειρήνη κι γκοντί ντα σίγουρη ελπίδα ι ντιβεσένγκε σο κα αβέν. Εκατομμύρια Μάρτυρες ι Ιεχωβάσκε νακχλέ κάτι ασακό.

Για τι σικλιόλ εκ τζενό λατσσές ι Ιεχωβάς πρέπει τι αρχίνελ τι διαβάνελ προσεκτικά ι Γραφή, σόσκε η Γραφή κερέλα λάφι λέσκε ντα βακερέλα σο μανγκέλα αμένταρ ο Ντεβέλ. Ανταβά κερντέ μερικά τζενέ κο πρώτος αιώνας. Ο ιστορικός Λουκάς σο ισινέ γιατρός-ντα βακερέλα ότι τζενέ κατά Ιουδαϊκή κχανγκιρί κι Βέροια «δεχτιντέ ο λάφι [κατά Παύλος ντα κατά Σίλας] αντράλ πουμαρέ γκίσταρ, ντα διαβάνενας προσεκτικά ο Γραφές κάθε ντιβές για τι ντικχέν άμα ισινέ αντικάς ο πράγματα».—Πράξεις 17:10, 11.

Επίσης, ο Χριστιανοί κο πρώτος αιώνας γκιντίντιβενας κο κχανγκιριά. (Πράξεις 2:41, 42, 46· 1 Κορινθίους 1:1, 2· Γαλάτες 1:1, 2· 2 Θεσσαλονικείς 1:1) Ο ίδιος αβέλα-πες αντιβές-ντα. Ο Μάρτυρες ι Ιεχωβάσκε κο κχανγκιριά σο τθερένα γκιντίντιβενα ντα κερένα συναθροίσεις εκχέ τροπόσαρ σο βοηθίνελα ι τζενέν τι τζαν πο πασέ κο Ιεχωβά ντα τι λεν χαρά καζόμ υπηρετίνενα-λες. Κάνα κεράσα παρέα ι Μαρτυρέντζαρ τθεράσα ατζέκ εκ λατσσιπέ. Αφού προσπαθίνενα μπουτ τι μοιάζεν κο Ντεβέλ σο ντένα λατρεία, ο Μάρτυρες ι Ιεχωβάσκε σικαβένα ο ιδιότητες—παρόλο σο να κερένα-λες ανταβά τέλειε τροπόσαρ—σο σικαβέλα ο Ιεχωβά. Άρα, κάνα τζάσα κο συναθροίσεις βοηθίντιβασα τι σικλιάς ατζέ πο λατσσές ι Ιεχωβάς.—Εβραίους 10:24, 25.

Μήπως για τι σικλιός εκχέ γιαβερές ντικχίντιβελα ότι μανγκέλα μπουτ μπουτί; Σίγουρα πρέπει τι κεράς μπουτ προσπάθεια. Αλλά ανταβά να αβέλα-πες σαρέ κο στόχοι σο τσσουβάσα αμαρέ ζωγιάτε; Σκεφτίνεν ι προσπάθεια σο κερέλα εκ μπαρό αθλητής κι προπόνηση. Για παράδειγμας, ο Γάλλος χρυσός Ολυμπιονίκης κο σκι Ζαν Κλοντ Κιλί βακερέλα σο χρειαζίντιβελα τι κερέλ εκ αθλητής για τι αβέλ μπουτ λατσσό ή επιτυχιμέ σαρό κο ντουνιάς: «Πρέπει τι αρχίνες 10 μπρεσά πο τζανγκλέ ντα τι κερές σχέδια ανταλέσκε για μπρεσά ντα τι σκεφτίνες-λες κάθε ντιβές . . . Ισί εκ μπουτί σο πρέπει τι κερέλ εμ τι γκοντί εμ το σώμας 365 ντιβεσά κο μπρες». Σαρό ανταβά χρόνος ντα η προσπάθεια αβέλα-πες για τι κχελέν εκ αγώνας σο κα ατσσικιαρέλ σάντε ντες λεπτά! Σαρέ οντουλά σο κα αβέν άμα κα σικλιάς ι Ιεχωβάς ισί πο μπουτ ντα ατσσικιαρένα πο μπουτ.

Εκ Φιλία σο Αβέλα Ατζέ πο Ζουρανί

Κον μανγκέλα τι χασαρέλ κάτι σημαντικός πι ζωγιάταρ; Καέκ. Οτθάρ άμα κα νιωθίνεν ότι τουμαρί ζωή να τθερέλα σκοπός ή άμα μανγκένα τι λεν εκ απάντηση κι ερώτηση σόσκε τθεράσα προβλήματα, μανγκέν τι σικλιόν ι Ιεχωβάς, ι Ντεβλές σο βακερέλα η Γραφή. Άμα κα σικλιόν λέσκε μπέκιμ τουμαρί ζωή τι αβέλ πο λατσσί για πάντα.

Κα τσσιναβάς ποτές τι σικλιάς ι Ιεχωβάσκε; Σαρέ οντουλά τζενέ σο υπηρετίνενα ι Ιεχωβάς μπουτ μπρεσά σαστίνενα εμ οντουλέντζαρ σο σικλιλέ λέσκε εμ ι νεβέ πραγματέντζαρ σο συνεχίνενα τι σικλιόν λέσκε. Κάνα σικλιάσα ανταλά πράγματα αβάσα πο ευτυχισμέ ντα ανένα-αμέν πο πασέ λέστε. Μακάρι τι τθεράς αμαρέ γκοντιάτε σαρέ ο λάφια ι Παυλόσκε, σο γραφιντάς: «Ω! καζόμ μπαρέ ισί ο ευλογίες σο ντέλα ντα καζόμ αχόρτ ισί λέσκι σοφία ντα σαρέ οντουλά σο τζανέλα ο Ντεβέλ! Ναστί αρακχάσα λέσκε αποφάσεις ούτε λέσκε ντρομά! “Κον ισί οντουβά σο σικλιλό ι γκοντί ι Ιεχωβάσκι, ή κον ισί οντουβά σο ντέλα-λες συμβουλές;”»—Ρωμαίους 11:33, 34.

[Υποσημείωση]

[Πρόταση σο ξεχωρίνελα]

Ο τζενέ συνεχίνενα τι κερέν ο ίδιες σημαντικές ερωτήσεις: “Σόσκε υπαρχίντιβαβα; Κάι τζάβα; Σόσκε τζουβντιάβα;”

[Πρόταση σο ξεχωρίνελα]

«Κάνα αγαντόμ μπαγιά σο Ντεβέλ ισί ο Ιεχωβά, γκιλόμ πο πασέ λέστε»

[Πρόταση σο ξεχωρίνελα]

«Ο πο λατσσό τρόπος τι τζουβντιόλ εκ τζενό ισί τι υπηρετίνελ ι Ιεχωβάς. Τίποτα γιαβέρ να πφερέλα αζόμ μπουτ μι ζωή. Επειδή σικλιλόμ ι Ιεχωβάς τζανάβα σόσκε τζουβντιάβα»