О Иегова, Дэл, савэс трэбуй тэ уӷанэс

НА УМЭКЭС ту андэ жызня варисо важно? Если ту ӷанэс пала Дэл совсем набут, тоди умэкэс. Васо? Важ кода кай ужэ милионоря мануша полинэ, кай кала уӷанэс пала Дэл анда Библия, када анэн бут лашимос андэ жызня. Кадэва лашимос и мануша диқэн андэ пэстири жызня сразу жэ, во лэнца кадяжэ и май дур.

И Библия лэ Дэвлэстар лэ Иеговастар, и во камэл, кай амэ тэ ӷанас лэс. Андэ Псалмы запистромэ: «Кай и мануша тэ ӷанэн, кай ту, каско алав Иегова, ту ек Всевышнё па вся ԥув». О Дэл ӷанэн, кай када важ амари жэ польза, тэ уӷанас пала лэстэ. Во ԥэнэн: «Мэ, о Иегова, тумаро Дэл, мэ сытярав тумэн, кай тумэнди тэ авэл драго [лашимос]». Саво лашимос амэнди кодэлэстар, кай амэ уӷанас пала Всевышнё Дэл Иегова? (Псалом 83:18; Исаия 48:17).

Лашимос андэ кода, например, кай о Дэл сытярэл, сар тэ ришысарас варисавэ трудности, савэ амэндэ исин кажно дес, ай кадяжэ дэл спокойство андо ди и тэ аштярас англэ о лашимос. Инке, кала амэ май драго уӷанас лэ Иеговас, амэ на лас тэ пэрэжываем пала кодэла вопросоря, пала савэ пэрэжывает адес о миро па вся и ԥув. Савэ када вопросоря?

Васо амэ жувас?

Хоть и мануша и линэ май бут тэ полэн андэ наука и андэ техника, вонэ всаек задэн важни вопросоря. Васо мэ жував? Со аштярэл ман англэ? Состэ и жызня? Если кай о мануш на авэна атветоря пэ кадэла вопросоря, лэсти най каринг со тэ цырдэлпэ и васо тэ жувэл. Полэн и мануша, кай лэнди на хутилэл лэ Дэвлэс? Андэ Германия андэ девяности бэрша бут мануша ԥэндэ, кай вонэ часто или дэкала гиндон, кай на ӷанэн, васо вонэ жувэн. Можэт котэ, кай тумэ жувэн, кай и мануша кацавэ жэ гиндоря.

Кала о мануш на ӷанэн, васо во жувэл, во на полэл, сар тэ жувэл англэ. Важ када бут ко стон вся и жызня, кай тэ ашэн барэ манушэнца или тэ затерэн баро барвалимос. Дэко важ кода кай на ӷанэн, васо вонэ жувэн, дожан каринг кода, кай лэнди ужэ на камэлпэ тэ жувэн. Кадя сас еқа тэрня шукарня жувляса, пала сави сас пистромэ андэ ӷазета «Интернэшнл геральд трибюн». Жы бэятостар «латэ сас баро барвалимос и барэ возможности». Хоть кадэя жувли жувэлас андо барвалимос, по ди латэ сас, кай вой екжэни и вой на диқэлас, васо трэбуй тэ жувэл. Вой пиля снотворно, и ла виарақлэ муля. Можэт тумэ ӷанэн и аврэ манушэн, савэ кадяжэ мулинэ.

Можэт тумэ ашундэсас кацаво, кай кабута и наука дэла тэ полас вся пала жызня? Но шон сама, со ԥэнэнпэ андо немецко журнало «Вохе»: «И наука дажэ котэ кай вой точно, нэ можэт тэ дэл атветоря пэ важни вопросоря важ и жызня. О гиндо, кай вся появисайля корко пэстар, здэлпэ найдоԥэндо. И дажэ и наука пала квантово физика нэ можэт тэ терэл май вушэро по ди и тэ дэл тэ аштярэн англэ о лашимос». И наука дя тэ полас, со када жызня, сар вой жал, со ла подритярэл и сар развиваеца и жызня. Но и наука нащи обьясний, васо амэ жувас и со аштярэл амэн англэ. Пока амэ шас сама кати пэ наука, амэ на виарақаса атвето по вопросо, васо амэ жувас. Кадяжэ андэ ӷазета «Зюддойче цайтунг» сас запистромэ кацавэ алава: «Па вся и ԥув дицол, кай лэ манушэн трэбуй варико тэ сытярэл».

Ко можэт тэ сытярэл май фэдэр, чем амаро Создателё? Важ кода кай во дя и жызня лэ манушэнди пэ ԥув, во и трэбуй тэ ӷанэн, васо амэ жувас. Андэ Библия ԥэнэнпэ, кай о Иегова создал лэ манушэн, кай вонэ тэ жувэн па вся и ԥув, тэ диқэн пала латэ и тэ фэрин ла. Андэ любо дила и мануша трэбуй сас тэ андярэн пэс, сар и о Дэл, тэ авэн справедливи, мудри и тэ любин. Кала амэ уӷанас пэр со о Иегова амэн создал, амэ май драго полас, васо амэ жувас (Бытие 1:26—28).

Со ту можэш тэ стерэс?

Со, если ту на виарақэсас атветоря пэ кацавэ вопросоря. Васо мэ жував? Со ман аштярэл англэ? Состэ и жызня? Андэ Библия ԥэнэнпэ тэ уӷанэс май драго лэ Дэвлэс. О Иисусо екжэно ԥэндя: «Кай тэ авэл вечно жызня, трэбуй тэ уӷанэн тут, еқэ чачунэ Дэвлэс, и лэ Иисусос Христос, савэс ту бишалдян». Инке андэ Библия ԥэнэнпэ, кай о мануш тэ сытёл тэ андярэл пэс кадя, сар чалёл лэ Дэвлэсти. Но инке май фартэ, тэ сытёл тэ любий аврэн, ай кадяжэ тэ терэл вся, кай тэ жувэл андэ время, кала правия лэ Дэвлэско Царство. Если ту лэса кадя тэ жувэс, тоди тутэ авэла кода, васо ту жувэс и ту састэс ӷанэса, кай англэ тут аштярэл о лашимос. И тутэ авэна атветоря пэ кодэла важни вопросоря, савэ тутэ сас (Иоанна 17:3; Экклезиаст 12:13).

Чаче када кадя важно? Пала када можэт тэ росԥэнэн о Хансо *. Варикала, хоть лэстэ и сас дэсави вера андо Дэл, када нисар на дицолас па лэстири жызня. О Хансо любияс наркотикоря, найлашэ жувлян и мотоцыклоря, ай кадяжэ терэлас найбарэ преступлении. Во росԥэнэн: «Мэ евья проандяравас и жызня, па чачимастэ нисо на анэнас лош». Кала лэсти сас варикай 25 бэрш, во закамля май драго тэ уӷанэн лэ Дэвлэс, и ля внимательно тэ адиной и Библия. О Хансо драго уӷангля лэ Иеговас, поля, васо трэбуй тэ жувэл, во парудя пэстири жызня, болделя и ашэля лэ Иеговастирэ свидетелёса. Акана во ужэ дэш бэрш служый лэ Иеговасти сар пианеро. Инке во росԥэнэн: «И служэния лэ Иеговасти, када со май лашо андэ мэрни жызня. Када нисоса на сыстояпэ. Кала мэ уӷанглэм лэ Иеговас, мэ полэм, васо мэ жував».

Канешно о вопросо пала кода, васо амэ жувас, када инке най вся, со камэн тэ уӷанэн и мануша. Важ кода кай андэ люма ашэл вся май ԥарэс, инке май бут мануша лэн тэ задэн авэр важно вопросо.

Васо терэнпэ и биды?

Кала терэлпэ бида, о мануш задэл вопросо, васо кадя тердяпэ? Важ кода кай лэсти дэна правильно атвето пэ кадэва вопросо, лэсти авэла май вушэро тэ виритярэл кадэя бида. Если лэ манушэстэ нинай чачуно атвето, лэсти ашэл фартэ ԥарэс и во можэт дажэ тэ ашэл холинако. Акэ со росԥэнэн и манушни, савя ақарэн Бруни.

«Дэсавэ бэрша палпалэ на ашэля мэрня бэятица. Мэ патявас андо Дэл и важ кода кай манди тэ ашэл май вушэро, мэ жылэм кай о рашай. Во ԥэндя, кай о Дэл заля мэрня бэята по нэбо, кай вой тэ ашэл анӷелочкоса. Через кода, кай на ашэля мэрня бэята, вся мэрни жызня пэрэрисайля, тай инке через лэ рашастирэ алава мэ холяйлэм по Дэл, кай во заля мэрня бэята». Бут бэрша кай и Бруни сас фартэ ԥарэс по ди. Инке вой росԥэнэн: «Андэ кодэя время ек лэ Иеговастири свидетельница сыкадя манди па Библия, кай най васо тэ холявав по Дэл. О Иегова на заля мэрня бэята по нэбо и вой на ашэля анӷелоса. Мэрни бэята совэл и аштярэл и время, кала о Иегова ла ваздэла. Мэ кадяжэ уӷанглэм, кай о Дэл создал лэ манушэн, кай вонэ вечно тэ жувэн андо раё пэ ԥув и кай кода, со во камэл ӥто стерэла. Кала мэ лэм тэ полав, саво о Иегова, мэ ашэлэм май пашэ лэса и мэрно ԥаримос по оди ля тэ ужал» (Псалом 36:29; Деяния 24:15; Римлянам 5:12).

Кай и милионоря мануша ԥаримос, важ кода кай лэндэ андэ жызня терэнпэ биды, ай кадяжэ через и войны, боқалимос и биды андэ природа. Кай и Бруни ашэля май вушэро по ди, кала вой уӷангля анда Библия, кай о Иегова найдошало андэ амарэ биды, кай во никала на камэлас, кай лэ манушэндэ тэ авэл ԥаримос и кай ӥто улэла вся о найлашимос. Кода, кай о найлашимос ашэл май бут, сыкавэл, кай амэ жувас андэ «послидни деса» кадэла люмати. И бахтали время, сави амэ всаворэ аштярас, ужэ фартэ пашэ (2 Тимофею 3:1—5; Матфея 24:7, 8).

Сар тэ уӷанэс лэ Дэвлэс?

О Хансо и Бруни най фартэ ӷанэнас лэ Дэвлэс. Вонэ патянас андэр лэстэ и ӷанэнас пала лэстэ совсем набут. Но кала вонэ линэ тэ отстон время пэ кода, кай май точно тэ уӷанэн пала Иегова, лэнди када андя лашимос. Вонэ виарақлэ понятни атветоря пэ со май важни вопросоря андэ амари время. Через када лэнди ашэля вушэро по ди и вонэ уӷанглэ, кай англэ лэн аштярэл райкани жызня. И кацаво по ди кай и милионоря мануша, ко ашэлэ лэ Иеговастирэ свидетелёнэнца.

Если амэ камас тэ уӷанас лэ Иеговас, трэбуй тэ лас тэ терас када па Библия. Андэр латэ ԥэнэнпэ, ко во и со во аштярэл амэндар. Кадя стердэ дэсавэ мануша андо пэрво вико. О историко и врачо Лука росԥэндя, кай и евреёря андэ Верия (Греция) «прилинэ о алав [лэ Павлостар и лэ Силастар] всаворэ одеса. Вонэ кажно дес стонас зор, кай тэ уӷанэн, со пистромэ андэ Писания, кай тэ полэн, кадя када чи най» (Деяния 17:10, 11).

И христианоря андо пэрво вико кадяжэ стидэнаспэ и проандярэнас и собрании (Деяния 2:41, 42, 46; 1 Коринфянам 1:1, 2; Галатам 1:1, 2; 2 Фессалоникийцам 1:1). Кода жэ терэн и андэ амарэ деса. Лэ Иеговастирэ свидетеля проандярэн кацавэ собрании, кай тэ дэн помощь лэ манушэнди тэ пашон каринг о Иегова и тэ служын лэсти анда вся оди. Ай тэ проандярэс и время лэ свидетелёнэнца, савэ жувэн паша тутэ, анэна инке и авэр лашимос. Важ кода кай и мануша па дэсави время вся май бут лэн тэ шонпэ по Дэл, савэсти вонэ тэлён, лэ Иеговастирэ свидетеля, пэ скати када возможно, лэн тэ андярэн пэс кадя, сар тердоп екжэно о Иегова. Важ када, кала проандярэс и время лэ свидетелёнэнца, када дэл помощь инке май драго тэ уӷанэс лэ Иеговас (Евреям 10:24, 25).

Можэт ту гиндос: «Скати трэбуй тэ стос зор, кай тэ уӷанэс лэ Дэвлэс!» Тэ стос зор канешно жэ трэбуй. Но хэба на трэбуй тэ стос зор, кала камэс тэ стерэс варисо авэр? Погиндосар, скати зор стон пэ тренировки и ашунглэ спорцменоря. Например, о Жан-Клодо Кили, о французско лыжнико, саво ля и сомнакуни наӷрада пэ олимпийски иӷры, росԥэндя, со дэл возможность тэ победий пэ международни соревновании: «Трэбуй тэ лэс тэ ӷотовишся важ дэш бэрш англа соревнования, тэ планируеш када бэрш бэршэстар, тэ гиндос пала када кажно дес... [...] када бари бути важ и годи и тила всаворэ 365 дес андо бэрш». Скати время и зор трэбуй, кай тэ попэрэс пэ кадэя соревнавания, сави можэт жала кати 10 минут! Пэ скати жэ дэ бут можно тэ домардёс, кала уӷанэс пала Иегова!

Дружба, сави ашэл май лащи кажно дес

Ко камэла тэ умэкэл андэ жызня варисо важно? Нико. Важ када, если ту гиндос, кай андэ тири жызня нинай кода, васо па чачимастэ ашэл тэ жувэс, или если, ту камэс тэ уӷанэс, васо терэнпэ и биды, тоди трэбуй састэс тэ лэспэ тэ уӷанэс лэ Дэвлэс лэ Иеговас, пала саво ԥэнэн и Библия. Кала уӷанэс пала лэстэ, када парувэл тири жызня и о лашимос авэла вся и время.

Парашаса амэ варикала тэ уӷанас пала Иегова? Кодэла, ко тэлён лэсти ужэ бут бэрша, идоси удивинпэ кодэлэсти, со вонэ ужэ уӷанглэ пала лэстэ и кодэлэсти, со инке уӷанэна. Кодэлэстар, кай амэ уӷанас лэс, амэ ашас май бахталэ и амэ ашас инке май пашэ лэ Дэвлэса. Амэндэ андо ди кадя жэ, сар ԥэндя о апостоло Павло: «Сар дэ бут дэл лашимос о Дэл! Со дэ бари лэстири мудрость и знания! Нэвозможно андэ вся тэ полэс лэстирэ ришэния и тэ уӷанэс лэстирэ дрома! „Ко поля лэ Иеговастирэ гиндоря и ко можэт тэ подԥэнэн лэсти?“» (Римлянам 11:33, 34).

[Сноска]

[Вставка]

Кай и мануша кадяжэ ашэнпэ кацавэ важни вопросоря, васо мэ жував? Со аштярэл ман англэ? Пэр со и жызня?

[Вставка]

«Кала мэ лэм тэ полав, саво о Иегова, мэ ашэлэм май пашэ лэса».

[Вставка]

«Тэ тэлёс лэ Иеговасти, када со май лашо, со исин андэ жызня. Када нисоса на сыстоса. Кала мэ уӷанглэм лэ Иеговас, мэ полэм, васо мэ жував».