•  Mazritu Ya Ku Pfula 2

•  Wukosi Lebyi Nga Bibeleni 3-5

  •  Wukaneli 3

  •  Tindzralama Ta Moya 4

  •  Ku Dondzra Ka Bibele 5

•  Tihite A Ntizrweni Wa Nsimu 6-14

  •  Ku Sungula Mabulu 7

  •  Ku Hamba Timpinda 8

  •  Ku Yentxa Vadondzrisiwa 9

  •  Ku Tlhamuxela Leswi U Kholwaka ka Swone 10

  •  Wukaneli 11

  •  Leswi Kumekaka Ndzreni 12

  •  Swiyimu 13

  •  Tizrisa Mavhidiyu Ni Mabuku 14

•  Ku Hanya Swanga Vakriste 15-16

  •  Dondzro Ya Bibele Ya Bandla 16

•  Mazritu Ya Ku Pfala 17

•  Ku Kulungela Ni Swilayu 18

•  Nkama 19

•  Liyendzro Dzra Mulaviseli Wa Muganga 20

•  Vhiki Dzra Sembleya Kumbe Dzra Kongresu 21

•  Vhiki Dzra Xidzrimuxo 22

•  Mulaviseli Wa Ntlhanganu Wa Wutomi Ni Wutizreli 23

•  Mufambisi Wa Ntlhanganu Wa Wutomi Ni Wutizreli 24

•  Mulayi Wa Ku Pfunisa 25

•  Masala Man’wana 26

•  Mavhidiyu 27

1. 1. A minkongomiso leyi longoloxiwiki ka papela ledzri yi ta pfuna hinkwavu lava nga ni swiyenge ka Ntlhanganu wa Wutomi ni Wutizreli Byezru Bya Wukriste. Mun’wana ni mun’wana a fanela ku vona minkongomiso leyi yi yelanaka ni xiyenge xake hi lani swi kombisiwaka ha kone ka Xibukwana Xa Ntlhanganu Wa Wutomi Ni Wutizreli Byezru Bya Wukriste ni hi ku ya hi swileleto leswi longoloxiwiki lani na a nga si na sungula ku lulamisela xiyenge xake. Vazrezri hinkwavu va fanela ku zrambiwa akuva va titsralisa leswaku va ta nyikela swiyenge swa swidondzri. Van’wana lava hlengelaka ni bandla nkama hinkwawu na vone va nga titsralisa loko va pfumelelana ni tindondzro ta Bibele va tlhela va hanya hi pfumelelana ni milawu ya wukriste. A mulaviseli wa Ntlhanganu wa Wutomi ni Wutizreli a fanela ku vulavula hi leswi swi vilelekaka ni lweyi a nge ke muzrezri kambe a navelaka ku va ni swiyenge a va a mu byela loko a faneleka. Leswo swi fanela ku yentxiwa na ku ni lweyi a mu fambiselaka xidondzro xa Bibele (kumbe na ku ni mupswali lweyi a nga mukriste). Leswi vilelekaka akuva mhunu a sungula ku va ni swiyenge ka ntlhanganu lowu swa fana ni leswi swi vilelekaka loko mhunu a djula ku va muzrezri lweyi a kalaka a nga babatisiwanga.—od chap. 8 par. 8.

2. 1 minutu. Ka vhiki dzrin’wana ni dzrin’wana, ntsrhaku ka lisimu dzra ku pfula ni xikhongoto xa kone, mufambisi wa Ntlhanganu wa Wutomi ni Wutizreli a ta yentxa leswaku vayingiseti va navela ku twa leswi ntlhanganu wu tameliki swone. Mufambisi a fanela ku tlakuxa tinhla leti taka pfuna bandla.

 3. Wukaneli: 10 wa maminutu. A nhlokomhaka ya wukaneli lebyi yi ni tinhla tibidzri kumbe tizrazru ta lisima, leti buyaka ka Xibukwana Xa Ntlhanganu Wa Wutomi Ni Wutizreli. Wukaneli lebyi byi fanela ku yaveliwa nkulu wa bandla kumbe nandzra wa wutizreli lweyi a fanelekaka. Loko ku sunguliwa buku ledzrimpshwa dzra Bibele ka ku dondzra ka Bibele ka vhiki ledzro, xikaneli xi nga kombisa ndlela leyi vhidiyu ni nhlokomhaka swi fambisanaka ha yone. Nambitanu, xikaneli xi fanela ku tlhamuxela tinhla hinkwatu leti ti longoloxiwiki ka xibukwana. Handle ka leswo, loko nkama wu pfumela, xikaneli xi fanela ku ma londzrovota ha hombe mafoto lawa ma na nga ka xibukwana xa ntlhanganu, lawa ma lulamiseliwiki akuva ma khanyisa dzrungula ledzri ku khaneliwaka ha dzrone. Xikaneli xi nga ha yengesela swin’wana, kambe ntsena loko swi fambisana ni mhaka leyi ku buliwaka ha yone.

 4. Tindzralama Ta Moya: 10 wa maminutu. Lexi i xiyenge xa swivutiso ni tinhlamulo, lexi ngeke na masungulela kumbe mahetelela. Xiyenge lexi xi fanela ku nyikeliwa hi nkulu kumbe nandzra wa wutizreli lweyi a fanelekaka. Xikaneli xi fanela ku hamba swivutiso hinkwaswu ka vayingiseti. Hi tlhelo dzrin’wana, xi nga hlawula leswaku tindzrimana leti tsrhahiwiki ti nga dondzriwa kumbe im-him. Lava nyiketiwaka akuva va hlamula, va fanela ku yentxa leswo hi 30 wa masegundu.

 5. Ku Dondzra Ka Bibele: 4 wa maminutu. Xiyenge lexi xa swidondzri xi fanela ku yaveliwa swidondzri swa xinuna. Xidondzri xi fanela ku dondzra tindzrimana leti xi yaveliwiki tone na xi nga hlayi masungulela kumbe mahetelela. Mufambisi wa ntlhanganu a fanela ku pfuna swidondzri akuva swi dondzra hi ndlela leyi nga yone, hi ndlela leyi twisisekaka, swi nga nghanghameteki, swi tlakuxa tinhla ta lisima, swi txintxatxintxa zritu, swi hefemula lani swi fanelaka swi tlhela swi dondzra hi ndlela ya ntumbuluku.

6. 15 wa maminutu. Xiyenge lexi xa ntlhanganu xi yentxeliwe ku nyika hinkwavu mukhandlu wa kuva va wupfisiwa a ntizrweni wa nsimu hi ku yampswisa wuswikoti byavu bya ku sungula mabulu, ku zrezre ni ku dondzrisa. Vakulu va nga nyikiwa swiyavelo swa swidondzri loko swi vileleka. Xidondzri xin’wana ni xin’wana xi fanela ku tizrela ka dondzro leyi kumekaka ka xibukwana lexi liki Tihite Ku Dondzreni kumbe lexi liki Zrandzra Vhanu—Yentxa Vadondzrisiwa. A dondzro ya kone yi tsraliwe ka maparenti kusuhi ni xiyavelo. Minkama yin’wana ku ta va ni xiyenge lexi taka patsra ku bulisana ni vayingiseti. A xiyenge lexi xi fanela ku fambisiwa hi nkulu wa bandla kumbe nandzra wa wutizreli lweyi a fanelekaka.—Vona  yava  15 ledzri kombisaka ndlela ya ku hetisisa swiyavelo.

 7. Ku Sungula Mabulu: Xiyenge lexi xa swidondzri xi nga ha yaveliwa xidondzri xa xinuna kumbe xa xisati. Lweyi a yaveliwaka ku va mupfunisi wa xidondzri a fanela ku va wa limbewu ledzri fanaka kumbe a va xizro xa ndangu wa xidondzri. A xidondzri ni mupfunisi wa xone va nga ha tsrhama kumbe va nyima nkama lowu va hambaka xiyenge xavu. Akuva u kuma dzrungula ledzri yengetelekiki mayelanu ni xiyavelo lexi kun’we ni swiyimu leswi swi nga tizrisiwaka ka xone vona  mayava  12 ni  13.

 8. Ku Hamba Timpinda: Xiyenge lexi xa swidondzri xi nga ha yaveliwa xidondzri xa xinuna kumbe xa xisati. Lweyi a yaveliwaka ku va mupfunisi wa xidondzri, a fanela ku va wa limbewu ledzri fanaka. (Vutirheli Bya Mfumo 5/97 p. 3) A xidondzri ni mupfunisi wa xone va nga ha tsrhama kumbe va nyima nkama lowu va hambaka xiyenge xavu. Xidondzri xi fanela ku kombisa leswi nga hlayiwaka loko ku hambiwa mpinda ka akuva xi yisa mahlweni mabulu ya khambi ledzri khalutiki. Akuva u kuma dzrungula ledzri yengetelekiki mayelanu ni xiyavelo lexi kun’we ni swiyimu leswi swi nga tizrisiwaka ka xone vona  mayava  12 ni  13.

 9. Ku Yentxa Vadondzrisiwa: Xiyenge lexi xa swidondzri xi nga ha yaveliwa xidondzri xa xinuna kumbe xa xisati. Lweyi a yaveliwaka ku va mupfunisi wa xidondzri, a fanela ku va wa limbewu ledzri fanaka. (Vutirheli Bya Mfumo 5/97 p. 3) A xidondzri ni mupfunisi wa xone va nga ha tsrhama kumbe va nyima nkama lowu va hambaka xiyenge xavu. A xiyenge lexi xi fanela ku kombisa mafambisela ya xidondzro xa Bibele lexi xi nga ku fambisiweni. A swi vileleki leswaku ku va ni masungulela kumbe mahetelela, handle ka loko xidondzri xi yaveliwe ku tizrela ka swoleswo. A swi sindzrisi kuva dzrungula ledzri u yaveliwiki dzrone dzri dondzriwa dzri twiwa, nambileswi leswo swi nga ha yentxiwaka.

 10. Ku Tlhamuxela Leswi U Kholwaka Ka Swone: Loko xiyenge lexi a li wukaneli, xi fanela ku hambiwa hi xidondzri xa xinuna. Loko a li nkombiso, xi nga ha hambiwa hi xidondzri xa xinuna kumbe xa xisati. Lweyi a yaveliwaka ku va mupfunisi wa xidondzri, a fanela ku va wa limbewu ledzri fanaka kumbe a va xizro xa ndangu wa xidondzri. A xidondzri xi fanela ku hlamula xivutiso xa nhlokomhaka hi ndlela ya ku twisiseka ni ya wutlhazri na xi tizrisa dzrungula ledzri xi nyikiwiki dzrone. A xidondzri xi ta tihlawulela leswaku xi ta hlaya lomu mhaka yi susiwiki kone kumbe im-him.

 11. Wukaneli: Xiyenge lexi xa swidondzri xi ta yaveliwa xidondzri xa xinuna nakone xi fanela ku nyikela wukaneli lebyi kongomisiwaka ka bandla. Loko wukaneli byi susiwe ka Xiyengetelo A, ka xibukwana lexi liki Zrandzra Vhanu, a xidondzri xi fanela ku khanyisa ndlela leyi matsralwa wolawu ma nga tizrisiwaka ha yone a ku zrezreni. Hi xikombiso, xi nga ha tlhamuxela leswaku tsralwa dzra kukazri dzri nga tizrisiwa ka xiyimu muni, leswi dzri tlhamuxelaka swone ni ndlela ya ku yanakanyisisa ha dzrone ni mhunu. Loko mhaka ya wukaneli yi susiwe ka xibukwana lexi liki Zrandzra Vhanu, a xidondzri xi fanela ku yanakanyisisa hi ndlela ya ku tizrisa ndzrima leyo a nsin’wini. Xidondzri xi nga khanyisa xikombiso lexi xi kombisiwaka ka yinhla ya ku sungula ka ndzrima yoleyo kumbe yin’we ya tindzrimana leti yengetelekiki leti kombisiwaka ka dondzro yoleyo, loko leswo swi ta pfuna.

   12. Leswi Kumekaka Ndzreni: A dzrungula ledzri kumekaka ka yava ledzri ni le ka ledzri dzri landzrelaka, ma tizra ka swiyavelo leswi liki “Ku Sungula Mabulu” ni “Ku Hamba Timpinda”. Handle ka loko ku kombisiwe swin’wana, a kongometo wa xidondzri i ku yavela ntiyiso wa Bibele lowu nabyaliki kambe wu nga wa lisima ka mhunu lweyi a bulaka na yene ni ku pfula mukhandlu wa kuva va tlhela va bula. A xidondzri xi nga ha hlawula mhaka leyi nga yinene ka vhanu hi kama wolowo nakone yi taka pfuna swinene a mugangeni. Xidondzri xi nga ha hlawula leswaku xi ta tizrisa vhidiyu kumbe buku dzra kukazri ka Switizro Swa ku Dondzrisa ha Swone. A swidondzri swi fanela txutxela wuswikoti bya ku bulisana ni vhanu hi ku va swi kombisa matsrhamela ya ku fana ni ku zron’weka hi van’wana ni ku vulavula hi ndlela ya ntumbuluku, a matsrhan’wini ya ku tikazratela ku beka swingheniso a nhlokweni.

   13. Swiyimu: A xidondzri xi fanela ku hamba nkombiso hi ku landzra xiyimu lexi xi yaveliwiki xone xi va xi wu twananisa ni xiyimu xa lomu xi tsrhamaka kone. Hi xikombiso:

1.  (1) Hi Muti Ni Muti: Lani ku patsreka ku zrezra hi muti ni muti, hi telefone kumbe hi ku tizrisa makarta. Ku tlhela ku patsreka ku phindhelela lava va kumiwiki ka swiyimu leswi swizrazru, leswi tekiwaka swanga nsimu ya muti ni muti.

2.  (2) Ku Zrezra Hi Xitxhuketa: Lani ku kombisiwa ndlela ya ku londzrovota mabulu lawa ma tolovelekiki akuva u nyikela wumboni. Swi nga ha patsra ku yavelana ni vhanu van’wana dzrungula dzra kukazri dzra Bibele ku nga ha va a ntizrweni, a xikole, a mugangeni, a maxapeni kumbe mimbangwini yimbeni lani ku yentxiwaka mintizro ya siku ni siku.

3.  (3) Ku Nyikela Wumboni Bya Le Livaleni: Lani ku patsreka ku zrezra hi xikarinyana ni ku bulisana ni vhanu lava va nga ku xaviseni, a switaratwini, a majardim, lomu ku bekiwaka kone mimovha kumbe kun’wana ni kun’wana lani ku kumekaka vhanu.

 14. Tizrisa Mavhidiyu Ni Mabuku: A xidondzri xi nga ha hlawula ku kombisa vhidiyu kumbe ku tizrisa buku dzra kukazri, hi ku ya hi swiyimu. Loko xiyavelo xa xidondzri ni patsra vhidiyu kumbe xidondzri xi tihlawulela ku tizrisa vhidiyu xi nga vulavula hi vhidiyu kambe a xi fanelanga xi dzri txhaya.

15. Ntsrhaku ka lisimu, ku landzrela xiyenge xa 15 wa maminutu lexi xi taka va ni wukaneli byin’we kumbe byibidzri lebyi lulamiseliwiki ku pfuna vayingiseti ku tizrisa Zritu dzra Xikwembu Nkulukumba. Handle ka loko swi kombisiwe swin’wana, wukaneli lebyi byi nga ha yaveliwa vakulu va bandla kumbe malandzra ya wutizreli lawa ma fanelekaka kambe a swivileleko swa bandla swi fanela ku nyikeliwa hi vakulu va bandla ntsena. Loko xiyenge xa kukazri xi patsra ku bulisana ni vayingiseti, a makwezru lweyi a nga ni xiyenge lexo a nga ha hamba swivutiso swa le tlhelweni, ku tlhantekela ka leswi swi nga ka xiyenge xake. A fanela ku hamba xingheniso xa ku goma akuva a va ni nkama lowu yaneliki wa kuva a khanyisa tinhla ta lisima ni ku nyika vayingiseti nkama wa ku hlengela ka xiyenge lexo. Loko ku ni intrevhixta swi nga va swinene kuva lweyi a nga ni xiyenge lexi a ya hlamula swivutiso na a li plataforma, loko swi koteka.

  16. Dondzro Ya Bibele Ya Bandla: 30 wa maminutu. Xiyenge lexi xi fanela ku yaveliwa nkulu lweyi a fanelekaka. (Loko nhlayu ya vakulu yi li yitsrongo, malandzra ya wutizreli lawa ma fanelekaka ma nga ha yaveliwa xiyenge lexi loko swi vileleka.) A huvo ya vakulu yi fanela ku hlawula leswaku i vamani lava fanelaka ku fambisa Dondzro ya Bibele ya Bandla. Lava va hlawuliwiki va fanela ku fambisa dondzro hi ndlela leyinene va wu hlela ha hombe nkama, va khanyisa matsralwa lawa ma khomiki mhaka ni ku pfuna hinkwavu leswaku va twisisa ndlela ya ku tizrisa leswi ku buliwaka ha swone. Lava va hlawuliwiki akuva va fambisa xidondzro lexi va ta pfuneka loko va pfuxeta minkongomiso leyi humesiwiki mayelanu ni ku fambisa swiyenge leswi nga ni swivutiso ni tinhlamulo. (w23.04 p. 24, bokisi) Loko xiyenge lexi dondzriwaka vhiki ledzro xi helile, mufambisi wa dondzro a fanela ku gama, a ku na xivangelo xa kuva a ha tama a lehisa mhaka. Loko swi koteka, a xiyenge lexi kun’we ni xa ku dondzra mayava swi fanela ku yaveliwa vamakwezru va ku hambanahambana vhiki dzrin’wana ni dzrin’wana. Loko mufambisi wa Ntlhanganu wa Wutomi ni Wutizreli a kombisa leswaku a dondzro yi fanela ku gomisiwa, mufambisi wa Dondzro ya Bibele ya Bandla a ta vona leswaku a nga yentxisa kuyini akuva a tizrela ka nkama lowu a kombeliwiki wone. A nga ha vona swi yampswa kuva mayava man’wana ma nga dondzriwi.

17. 3 wa maminutu. A mufambisi wa Ntlhanganu wa Wutomi ni Wutizreli a ta hamba nkatsrakanyu wa tinhla ta lisima ta ntlhanganu. A fanela ku hlayanyana leswi taka dondzriwa ka vhiki ledzri landzrelaka. A nga ha tivisa mavito ya swidondzri leswi yaveliwiki swiyenge ka vhiki ledzri landzrelaka, loko nkama wu pfumela. Handle ka loko ku kombisiwe swin’wana, loko ku ni switiviso leswi fanelaka ku hambiwa kumbe papela ledzri fanela ku dondzriwa, a mufambisi wa ntlhanganu a fanela ku yentxa leswo ka xiyenge lexi. Switiviso leswi tolovelekiki, swa ku fana ni malulamiselo ya nsimu ni wubasisi, a swi fanelanga swi nyikeliwa a plataforma, kambe swi fanela ku namaketiwa ka kwadru dzra switiviso. Loko nkama wa mazritu ya ku pfala wu nge ti dzringana akuva ku hambiwa switiviso kumbe ku dondzriwa mapapela, mufambisi wa ntlhanganu a fanela ku kombela vamakwezru lava nga ni wukaneli ka xiyenge lexi liki Ku Hanya Swanga Vakriste leswaku va gomisa swiyenge swavu hi lani swi djulekaka ha kone. (Vona  mayava  16 ni  19.) Ntlhanganu wu fanela ku hela hi lisimu ni xikhongoto.

18. Ntsrhaku ka loko xidondzri xin’wana ni xin’wana xi hetisisile xiyavelo xa xone, mufambisi wa Ntlhanganu wa Wutomi ni Wutizreli a ni 1 minutu leswaku a kulungela ni ku nyikela xilayu lexi seketeliwiki ka xiyenge lexi xidondzri xi yaveliwiki xone. Loko mufambisi a tivisa xiyavelo xa xidondzri, a nge ti tivisa yinhla ya dondzro leyi xi tizrelaka ka yone. Nambitanu, loko xidondzri xi hetile xiyavelo xa xone ni loko mufambisi a xi kulungelile, a nga tivisa yinhla ya dondzro leyi a xi tizrela ka yone a va a hlaya leswaku ha yini xidondzri xi hambe ha hombe kumbe a xi tlhamuxela hi ndlela leyinene leswaku ha yini xi fanela ku yampswisa ka yinhla yoleyo ni leswaku xi nga yampswisa hi ndlela yini. A mufambisi wa ntlhanganu a nga tlhela a hlaya swin’wana mayelanu ni nkombiso wa xidondzri loko a vona leswaku swi ta pfuna xidondzri kumbe vayingiseti. Swilayu swin’wana leswi taka pfuna swi nga nyikiwa xidondzri a xihundleni ntsrhaku ka ntlhanganu kumbe hi nkama wun’wana, na swi seketeliwa ka broxura ledzri liki Zrandzra Vhanu, xibukwana lexi liki Ku Dondzriseni kumbe ka buku ledzri liki Xikolo Xa Vutirheli. Swilayu leswo swi nga seketeliwa ka yinhla ya dondzro leyi yaveliwiki xidondzri kumbe yin’wana, vona  mayava  19,  24, ni  25 akuva u kuma swileleto leswi yengetelekiki mayelanu ni wutiyanguleli bya mulaviseli wa Ntlhanganu wa Wutomi ni Wutizreli ni wutiyanguleli bya mupfunisi mulayi wa vakulu ni malandzra ya wutizreli.

19. A ku na xiyenge ni xin’we lexi fanelaka ku khaluta nkama lowu bekiwiki, nambi ku li mazritu ya mufambisi wa Ntlhanganu wa Wutomi ni Wutizreli. Nambileswi ka xiyenge xin’wana ni xin’wana ku kombisiwaka nkama lowu u fanelaka ku tizrela ndzreni ka wone, a ku na xivangelo xa kuva u yengesela dzrungula dzrin’wana akuva u yaneta nkama lowu u nyikiwiki wone. Loko makwezru wa kukazri a khalutisa nkama lowu a nyikiwiki wone, a fanela ku layiwa a xihundleni hi mufambisi wa Ntlhanganu wa Wutomi ni Wutizreli kumbe mulayi lweyi a pfunisaka. (Vona  mayava  24 ni  25.) Ntlhanganu hinkwawu, ku patsra ni tinsimu ni swikhongoto, wu fanela ku heta wora dzrin’we ni 45 wa maminutu.

20. Loko bandla dzri yendzreliwe hi mulaviseli wa muganga, ntlhanganu wu fanela ku fambisiwa hi lani swi kombisiwiki ha kone ka Xibukwana Xa Ntlhanganu Wa Wutomi Ni Wutizreli, handle ka leswi landzrelaka: Dondzro ya Bibele ya Bandla, hansi ka xiyenge lexi liki Ku Hanya Swanga Vakriste, yi ta siviwa hi wukaneli bya ntizro bya 30 wa maminutu lebyi taka bekiwa hi mulaviseli wa muganga. Na wukaneli bya mulaviseli wa muganga byi nga si na sungula, mufambisi wa Ntlhanganu wa Wutomi ni Wutizreli a ta katsrakanya leswi dondzriwiki a tlhela a hlayanyana leswi taka dondzriwa ka vhiki ledzri landzrelaka. A ta tlhela a hamba switiviso leswi nga kone, a dondzra mapapela loko swi fanela, a gama a vitana mulaviseli wa muganga. Ntsrhaku ka wukaneli bya ntizro, a mulaviseli wa muganga a ta pfala ntlhanganu hi lisimu ledzri a taka va a dzri hlawulile, a nga ha zramba makwezru mun’wana akuva a pfala hi xikhongoto. Ka liyendzro dzra mulaviseli wa muganga, a ku fanelanga ku tizra masala man’wana hi lidzrimi dzra bandla. A ntlawa wu nga va ni mintlhanganu nambiloko mulaviseli wa muganga a yendzrela bandla ledzri dzri laviselaka ntlawa wolowo. Nambitanu, a ntlawa wu fanela ku tipatsra ni bandla ledzri dzri wu laviselaka akuva wu twa wukaneli bya ntizro lebyi taka nyikeliwa hi mulaviseli wa muganga.

21. Ndzreni ka vhiki dzra sembleya kumbe dzra kongresu, a ku nge ti va ni mintlhanganu ya bandla. Tindondzro leti a ti ta dondzriwa ka mintlhanganu ya vhiki ledzro ti fanela ku dondzriwa ka wugandzreli bya ndangu kumbe dondzro ya ximhunu.

22. Loko xidzrimuxo xi va xikazri ka vhiki, a ku nge ti va ni Ntlhanganu wa Wutomi ni Wutizreli vhiki dzroledzro.

23. A vakulu va ta hlawula nkulu lweyi a taka va mulaviseli wa Ntlhanganu Wa Wutomi Ni Wutizreli. A nkulu lweyo a ni wutiyanguleli bya ku yentxa leswaku a ntlhanganu wu famba hi ku hleleka ni hi ku landzra minkongomiso leyi longoloxiwiki ka papela ledzri. Yene kun’we ni mulayi wa vakulu ni malandzra ya wutizreli, va fanela ku bulisana ha hombe. Neti Xibukwana Xa Ntlhanganu Wa Wutomi Ni Wutizreli xi tlhasa, mulaviseli wa Ntlhanganu wa Wutomi ni Wutizreli a ta yavela swiyenge hinkwaswu swa mintlhanganu ya le xikazri ka vhiki swa tihweti toleto tibidzri. Leswo swi patsra swiyavelo swa swidondzri, swiyavelo swa mufambisi wa ntlhanganu wa le xikazri ka vhiki ni swiyavelo swa lava kalaka va nga li swidondzri, ka vamakwezru lava va pfumeleliwiki hi huvo ya vakulu va bandla. (Vona  mayava  3-16 ni  24.) Loko a nyikela swiyavelo swa swidondzri a fanela ku yanakanyisisa hi ntanga wuswikoti ni ntsrhunxeko lowu swi nga na wone wa ku vulavula hi mhaka ya kukazri. A fanela ku yentxa leswi fanaka ni loko a yavela swiyenge swimbeni swa ntlhanganu. Lava va nga ni swiyavelo va fanela ku swi yamukela na ka ha sale mavhiki mazrazru. A Papela Dzra Xiyavelo Xa Ntlhanganu Wa Wutomi Ni Wutizreli Byezru Bya Wukriste (S-89) dzri fanela ku tizrisiwa ka swiyavelo swa swidondzri. A mulaviseli wa Ntlhanganu wa Wutomi ni Wutizreli a fanela ku hamba malulamiselo ya leswaku a papela dzra xiyimiso xa swiyavelo swa ntlhanganu hinkwawu dzri bekiwa ka kwadru dzra switiviso. A huvo ya vakulu yi nga ha hlawula nkulu mumbeni kumbe nandzra wa wutizreli akuva a mu pfuna. Nambitanu lava va fanelaka ku nyikela swiyavelo swa lava va kalaka va nga li swidondzri i vakulu va bandla ntsena.

24. Vhiki dzrin’wana ni dzrin’wana, nkulu mun’we a ta yaveliwa ku va mufambisi wa Ntlhanganu wa Wutomi ni Wutizreli. (Lani nhlayu ya vakulu yi nga yitsrongo, malandzra ya wutizreli lawa ma fanelekaka ma nga ha yaveliwa xiyenge lexi loko swi vileleka.) Mufambisi a fanela ku lulamisela mazritu ya ku pfula ni ya ku pfala. A tlhela a tivisa nhlokomhaka ya wukaneli byin’wana ni byin’wana lebyi taka bekiwa, nakone hi ku ya hi nhlayu ya vakulu lava nga kone, a nga ha tamela swiyenge swin’wana swa ntlhanganu, ngopfungopfu swiyenge leswi ku to ko txhayiwa mavhidiyu ntsena na ku nge na ku bulisana ni vayingiseti. A mazritu a ma fanelanga ma va manyingi loko a tivisa wukaneli lebyi taka landzrela. A huvo ya vakulu hi yone yi hlawulaka leswaku i vamani vakulu lava va fanelekaka kuva va yamukela xiyenge lexi. Vakulu lava fanelekaka va ta pfa va yaveliwa xiyenge lexi xa ku va mufambisi wa ntlhanganu. Hi ku ya hi swiyimu swa kolanu, mulaviseli wa Ntlhanganu wa Wutomi ni Wutizreli a nga ha yaveliwa xiyenge hi ku phindhaphindha ku tlula vakulu lavan’wana. Loko nkulu a faneleka ku fambisa Dondzro Ya Bibele Ya Bandla, swi le livaleni leswaku awa faneleka ku va mufambisi wa ntlhanganu. Nambitanu, dzrimukani leswaku nkulu lweyi a nga mufambisi wa ntlhanganu a fanela ku kulungela swidondzri hi lizrandzru a tlhela a nyikela xilayu hi lizrandzru. Mufambisi wa ntlhanganu a ni wutiyanguleli bya ku yentxa leswaku ntlhanganu wu hela hi nkama wa kone. (Vona  mayava  17 ni  19.) Loko mufambisi wa ntlhanganu a swi nyonxela ni loko ku ni mbangu lowu dzringanaka, ku nga ha yimisiwa a mikrofoni a plataforma leswaku a ta vitana makwezru lweyi a landzrelaka, na kasi makwezru yelweyo kutani a yimisekile akuva a ku nyikela xiyenge xake. Hi ndlela leyi fanaka, mufambisi wa ntlhanganu a nga ha djula ku tsrhama a plataforma ka menza loko xiyenge xa ku Dondzra ka Bibele xi famba ni loko swiyenge swa Tihite a Ntizrweni wa Nsimu swi famba. Leswi swi nga yentxa leswaku nkama wu londzrovotiwa ha hombe.

25. Loko swi koteka, swi nga va swinene ku hlawula nkulu lweyi a nga xikaneli lexi nga ni mfambu akuva a hetisisa xiyenge lexi. Mulayi wa ku pfunisa a ni wutiyanguleli bya ku nyika swilayu vakulu ni malandzra ya wutizreli, a xihundleni, mayelanu ni swiyavelo swin’wana ni swin’wana swa ku patsra ni swa Ntlhanganu wa Wutomi ni Wutizreli, wukaneli bya le livaleni, ku fambisa kumbe ku dondzra mayava ka Dondzro ya Xihondzro Xa Ku Zrindzra kumbe ka Dondzro ya Bibele ya Bandla, loko swi vileleka. (Vona  yava  19.) Loko bandla dzri ni vakulu va ku hlawa lava va nga swikaneli ni va vadondzrisi lava va nga ni mfambu, lembe dzrin’wana ni dzrin’wana vakulu lavo va nga txintxana ka xiyenge lexi. A swi sindzrisi leswaku mulayi wa vakulu ni malandzra ya wutizreli a nyikela xilayu ka wukaneli byin’wana ni byin’wana lebyi nyikeliwaka.

26. Hi ku ya hi nhlayu ya swidondzri, mabandla ma nga va ni masala man’wana ka swiyavelo swa swidondzri. Ka sala dzrin’wana ni dzrin’wana ku fanela ku va ni mulayi na a li nkulu loko swi koteka. Loko swi sindzrisa, nandzra wa wutizreli lwa fanelekaka a nga ha tamelisiwa xiyenge lexi. A huvo ya vakulu yi fanela ku hlawula leswaku i mani a nga tizraka ka xiyenge lexi ni leswaku ku ta hamba ku va ni ku txintxatxintxana kumbe im-him. Mulayi a fanela ku landzra mayentxela lama tlhamuxeliwiki ka  yava  18. Loko ku ni masala man’wana, swidondzri swi fanela ku kombeliwa leswaku swi ya kone ntsrhaku ka xiyenge lexi liki Tindzralama ta Moya ni xa Wukosi Lebyi Nga Bibeleni. Swidondzri swi fanela ku tlhela swi tipatsra ni bandla ntsrhaku ka xiyenge lexi liki Tihite a Ntizrweni wa Nsimu.

27. Ku ta tizrisiwa mavhidiyu lawa ma hlawuliki, lawa ma fambisanaka ni ntlhanganu lowu. Mavhidiyu ya ntlhanganu wa xikazri ka vhiki ma kumeka ka JW Library® nakone swi nga koteka ku tikumela wone hi ku tizrisa switizrisiwa swa ku hambanahambana.

© 2023 Watch Tower Bible and Tract Society of Pennsylvania

S-38-RN 12/23