Mphangwa za Nkati

•  Mafala Akutoma 2

•  Mpfuma za Mafala a Mulungu 3-5

  •  Nkhani 3

  •  Mpfuma Zauzimu 4

  •  Kuleri Bhibhlya 5

•  Pfundzisani Mwaluso mu Utumiki 6-14

  •  Kutomesa Makani 7

  •  Kukulisa Cifuno 8

  •  Kucita Anyakupfundza 9

  •  Kufokotoza Pinakhulupira Imwe 10

  •  Nkhani 11

  •  Mphangwa za Makhundu 12

  •  Makhundu 13

  •  Kuphatisira Mavidhyu na Mabukhu 14

•  Kukhala M’maso Ninga Akristu 15-16

  •  Pfundziro ya Bhibhlya ya Mpingo 16

•  Mafala Akumalisa 17

•  Kusimba na Kupereka Uphungu 18

•  Ndzidzi 19

•  Kucedzerwa na Muyang’aniri wa Cisa 20

•  Sumana ya Nsonkhano wa Cisa Peno wa Gawo 21

•  Sumana ya Cikumbuso 22

•  Muyang’aniri wa Nsonkhano wa Umaso Wathu Wacikristu na Utumiki 23

•  Muimiriri wa Nsonkhano wa Umaso Wathu Wacikristu na Utumiki 24

•  Nyakupereka Uphungu 25

•  Sala B 26

•  Mavidhyu 27

1. Pitsogolero pinagumanika mu tsamba ino pinaphedza anthu onsene anafuna kukhala na khundu pa Nsonkhano wa Umaso Wathu Wacikristu na Utumiki. M’bodzi na m’bodzi mbadzati kucita khundu yace, pakutoma asafunika kuleri pitsogolero pinagumanika mu Programu ya Nsonkhano wa Umaso Wathu Wacikristu na Utumiki na mu tsamba ino. Amwazi mphangwa onsene asafunika aphembwe toera apereke madzina awo toera acite makhundu a nyakupfundza. Anthu anango akuti asagumanika pa misonkhano mwakukhonda phonya anakwanisambo kucita khundu ya anyakupfundza khala iwo asakhulupira pipfundziso pya m’Bhibhlya, pontho mbaphatisira mu umaso wawo pinthu pinapfundza iwo. Munthu wakuti adzati kukhala m’mwazi mphangwa angaphemba toera kulembesa pa xikola ineyi, muyang’aniri wa Nsonkhano wa Umaso Wathu Wacikristu asafunika kudinga pitsogolero pinaphembwa toera kuona khala iye athema, buluka penepo mban’dziwisa khala atawiriswa peno nkhabe. Pyenepi pisafunika kucitwa mu ndzidzi wakuti ule anampfundzisa Bhibhlya ali penepo (peno pabodzi na nyakubalace wakuti ndi Nkristu). Ale anafuna kukhala amwazi mphangwa akukhonda kubatizwa asadingwa mukuphatisira pitsogolero pibodzi pyene.—od nsolo 8 ndima 8.

 MAFALA AKUTOMA

2. Mphindi ibodzi. Masumana onsene, pakumala kwa nyimbo na phembero yakutoma, muimiriri wa Nsonkhano wa Umaso Wathu Wacikristu asafunika kulonga mphangwa zinafuna kupfundzwa. Muimiriri asafunikambo kugomezera mphangwa zakuti zinaphedza kakamwe mpingo.

 MPFUMA ZA MAFALA A MULUNGU

  3. Nkhani: Mphindi 10. Programu ya Nsonkhano wa Umaso Wathu Wacikristu na Utumiki iri na nsolo na ntsonga ziwiri peno zitatu zakufunika. Nkhani ineyi isafunika kucitwa na nkulu wa mpingo peno ntumiki wakutumikira wakuthema. Khala bukhu ipswa ya m’Bhibhlya inatoma kupfundzwa pa sumana, panapangizwa vidhyu inafuna kugomezera mphangwa zinagumanika m’bukhu ineyi. Nyakucita nkhani anakwanisa kubveranisa mphangwa zinalongwa mu vidhyu zakuti zisabverana na khundu yace. Mbwenye iye asafunika kufokotoza mwadidi mphangwa zonsene zinagumanika pa khundu yace mu programu ya nsonkhano. Kusiyapo pyenepi, khala ndzidzi ulipo, iye asafunika kuphatisira mwadidi mafoto anagumanika pa programu toera kugomezera mphangwa zinapfundzwa. Iye anakwanisambo kuphatisira mphangwa za m’mabukhu anango anagumanika pa khundu yace toera kugomezera mphangwa za khundu yace.

 4. Mpfuma Zauzimu: Mphindi 10. Khundu ineyi ndi ya mibvundzo na mitawiro, pontho nkhabe funika kukhala na mafala akutoma peno akumalisa. Iyo isafunika kucitwa na nkulu wa mpingo peno ntumiki wakutumikira wakuthema. Nyakutsogolera khundu ineyi asafunika kucita mibvundzo miwiri ene kuna anyakubvesera. Kusiyapo pyenepi, iye anakwanisa kusankhula khala mavesi adaikhwa asafunika kulerwi peno nkhabe. Ale anafuna kutawira asafunika kucita pyenepi m’masegundu 30 peno akucepa.

 5. Kuleri Bhibhlya: Mphindi 4. Khundu ineyi isafunika kucitwa na nyakupfundza wakuti ndi mamuna. Iye asafunika kuleri mavesi adapaswa iye mbakhonda kulonga mafala akutoma peno akumalisa. Muimiriri wa nsonkhano asafunika kuphedza anyakupfundza toera aleri ninga mudalemberwa ipyo, mwakubveka mwadidi, kugomezera mafala akuthema, kucinja-cinja fala, kulimira m’mbuto zakuthema na kuleri mwacibaliro. Nakuti makhundu anango a kuleri Bhibhlya ndi akubvira, pontho anango ndi akulapha, muyang’aniri wa Nsonkhano wa Umaso Wathu Wacikristu asafunika kupereka makhundu kuna nyakupfundza mwakubverana na maluso ace.

 PFUNDZISANI MWALUSO MU UTUMIKI

6. Mphindi 15. Khundu ineyi yakhunganywa toera kuphedza amwazi mphangwa onsene toera kuthimizira maluso awo akucedza na anthu, akumwaza mphangwa na akupfundzisa. M’midzidzi inango, pingafunika, akulu a mpingo anapaswambo makhundu a nyakupfundza. Nyakupfundza m’bodzi na m’bodzi asafunika kukhunganyika na kuphatisira mphangwa za pfundziro ya khundu yace inagumanika m’bhruxura Kupfundzisa peno Funani Anthu yakuti isagumanika m’maparenti dhuzi na khundu idapaswa iye mu Programu ya Nsonkhano wa Umaso Wathu Wacikristu na Utumiki. Midzidzi inango panakhala na khundu ya nkhani yakucedza. Natenepa, khundu ineyi isafunika kucitwa na nkulu wa mpingo peno ntumiki wakutumikira wakuthema.—Onani  ndima 15 yakuti isalonga kuti tinacita tani nkhani yakucedza.

 7. Kutomesa Makani: Khundu ineyi inakwanisa kupaswa nyakupfundza wakuti ndi mamuna peno nkazi. Khala nyakupfundza ndi mamuna, nyakuperekera asafunika kukhala mamuna, peno m’bodzi wa abale ace. Khala nyakupfundza ndi nkazi, nyakuperekera asafunika kukhala nkazi peno m’bodzi wa abale ace. Nyakupfundza na nyakuperekera anakwanisa kukhala pa mpando peno dzololo. Toera kudziwa kuti munagumana kupi mphangwa za khundu ino peno kuti munacita tani khundu ineyi onani  ndima 12 na  13.

 8. Kukulisa Cifuno: Khundu ineyi inakwanisa kupaswa nyakupfundza wakuti ndi mamuna peno nkazi. Khala nyakupfundza ndi mamuna, nyakuperekera asafunika kukhala mamuna. Khala nyakupfundza ndi nkazi, nyakuperekera asafunika kukhala nkazi. (Utumiki Wathu wa Umambo wa Maio 1997 tsa. 2) Nyakupfundza na nyakuperekera anakwanisa kukhala pa mpando peno dzololo. Nyakupfundza asafunika apangize kuti analonganji pakuenda kakulisa cifuno ca mwanaciro nyumba mwakubverana na makani adacedza iwo pa ulendo wakutoma. Toera kudziwa kuti munagumana kupi mphangwa za khundu ino peno kuti munacita tani khundu ineyi onani  ndima 12 na  13.

 9. Kucita Anyakupfundza: Khundu ineyi inakwanisa kupaswa nyakupfundza wakuti ndi mamuna peno nkazi. Khala nyakupfundza ndi mamuna, nyakuperekera asafunika kukhala mamuna. Khala nyakupfundza ndi nkazi, nyakuperekera asafunika kukhala nkazi. (Utumiki Wathu wa Umambo wa Maio 1997 tsamba 2) Nyakupfundza na nyakuperekera anakwanisa kukhala pa mpando peno dzololo. Khundu iyi isafunika kupangiza pfundziro ya Bhibhlya yakuti yatoma kale. Na thangwi ineyi, nkhabe funika kulonga mafala akutoma peno akumalisa, kusiyapo khala khundu ya nyakupfundza isaphemba pyenepi. Midzidzi inango nkhabe funika kuleri ndima zonsene mwakugaluza.

 10. Kufokotoza Pinakhulupira Imwe: Khala khundu ineyi inacitwa ninga nkhani, isafunika kucitwa basi ene na nyakupfundza wakuti ndi mamuna. Khala khundu ineyi inacitwa ninga citsandzo, inakwanisa kupaswa nyakupfundza wakuti ndi mamuna peno nkazi. Khala nyakupfundza ndi mamuna, nyakuperekera asafunika kukhala mamuna, peno m’bodzi wa abale ace. Khala nyakupfundza ndi nkazi, nyakuperekera asafunika kukhala nkazi peno m’bodzi wa abale ace. Nyakupfundza asafunika atawire mbvundzo unagumanika pa khundu yace mwakubveka mwadidi na mwacilemedzo, mbaphatisira mphangwa za m’mabukhu anapangizwa penepo. Nyakupfundza anasankhula khala analonga peno nkhabe kuti mphangwa za khundu yace azibulusa kupi mu ndzidzi unacita iye khundu yace.

 11. Nkhani: Khundu ineyi isafunika kucitwa na nyakupfundza wakuti ndi mamuna, pontho asafunika kuicita ninga nkhani mu mpingo. Khala nkhani ineyi yabuluswa pa khundu inagumanika mu apendise A ya bhruxura Funani Anthu, nyakupfundza asafunika kugomezera kuti tinaphatisira tani vesi peno mavesi anewa mu utumiki. Mwacitsandzo, iye anakwanisa kufokotoza kuti ndi ndzidzi upi wakuthema toera kuphatisira vesi ya m’Bhibhlya, kufokotoza mabvekero a vesi, pontho anakwanisa kufokotoza kuti tinaphatisira tani vesi toera kuphedza munthu. Khala mphangwa za nkhani zabuluswa pa khundu ibodzi ya nsolo unagumanika mu bhruxura Funani Anthu, nyakupfundza asafunika agomezere kuti tinaphatisira tani mphangwa zenezi pakumwaza mphangwa. Khala ndi pyakuthema, iye anakwanisa kugomezera khundu yakutoma ya nsolo peno kugomezera ibodzi mwa mavesi akuthimizirika anagumanika pa khundu ineyi.

   12. Mphangwa za Makhundu: Mphangwa zinagumanika pa ndima ino na ndima inatowera zisafunika kuphatisirwa pa khundu ya “Kutomesa Makani” na “Kukulisa Cifuno.” Kusiyapo khala pali na pitsogolero pinango, cifuniro ca nyakupfundza cisafunika kukhala cakulonga undimomwene wa m’Bhibhlya wakuti munthu anacedza na iye asafuna kakamwe kuudziwa, pontho nyakupfundza asafunika kucita pyenepi munjira yakuti munthu anakhala na cifuno cakupitiriza kucedza mphangwa zenezi angaonana pontho na m’mwazi mphangwa. Nyakupfundza asafunika kusankhula mphangwa zidabuluswa cincino zakuti zinaphedza anthu a pacisa. Iye anasankhula khala anagawira bukhu peno kupangiza vidhyu yakuti isagumanika m’bokosi yathu yakupfundzisa. Mbuto mwakukoya mu nsolo mafala anafuna iwo kulonga, anyakupfundza asafunika kukhunganyika mwadidi toera adzolowere kulonga na anthu, mbapangiza kuti asatsalakana mwadidi anthu, pontho asafunika kulonga mwacibaliro.

   13. Makhundu: Nyakupfundza asafunika kucita khundu idapaswa iye, mbwenye asafunika kuicita mwakubverana na makhaliro apacisa cace. Mwacitsandzo:

1. (1) Nyumba na Nyumba: Khundu ineyi isaphataniza kumwaza mphangwa nyumba na nyumba, na telefoni peno kumwaza mphangwa na matsamba. Pisaphatanizambo kukulisa cifuno ca munthu adamwazira ife mphangwa munjira zenezi zitatu zakuti zisadziwikambo ninga kumwaza mphangwa nyumba na nyumba.

2. (2) Umboni Wantsusukano: Khundu ineyi isapangiza kuti tinabandza tani midzidzi yakuthema iri na ife yakucedza na anthu toera kuamwazira mphangwa zadidi. Pyenepi pisaphataniza kucedza pya lemba ibodzi na anthu anadziwana na ife kubasa, kuxikola, pacisa, nkaru peno mbuto zinango mu ndzidzi unaphata imwe mabasa anu a ntsiku na ntsiku.

3. (3) Umboni Wapakweca: Khundu ineyi isaphataniza kumwaza mphangwa na makarinya, kumwazira mphangwa anthu m’mbuto zawo za basa, kumwaza mphangwa m’miseu, m’maparki, mbuto zinalimira makaru peno mbuto zinango zakuti tinakwanisa kugumana anthu.

 14. Kuphatisira Mavidhyu na Mabukhu: Mwakubverana na makhaliro, nyakupfundza anakwanisa kusankhula kulonga pya vidhyu peno kugawira bukhu. Khundu ya nyakupfundza ingaphemba toera kupangiza vidhyu peno khala nyakupfundza asafuna kufokotoza pya vidhyu ibodzi, iye anakwanisa kulonga pya vidhyu ineyi, mbwenye nee asafunika kuipangiza.

  KUKHALA M’MASO NINGA AKRISTU

15. Pakumala kwa nyimbo, mphindi 15 zinatowera zisakhala na khundu ibodzi peno mawiri akuti akhunganywa toera kuphedza anyakubvesera kuti aphatisire Mafala a Mulungu. Khala nkhabepo pitsogolero pinango, makhundu anewa asafunika kucitwa na nkulu wa mpingo peno ntumiki wakutumikira wakuthema, mbwenye khala ndi khundu ya Pyakufunika pa Mpingo isafunika kucitwa na nkulu wa mpingo. Khala khundu ineyi ndi yakucedza na anyakubvesera, nyakutsogolera anakwanisa kucita mibvundzo inango, kuphatanizambo inagumanika pa programu. Mafala ace akutoma asafunika akhale acigwagwa toera akhale na ndzidzi wakukwana wakugomezera mphangwa zonsene zakufunika, pontho toera azinji akwanise kutawira. Khala pana munthu anafuna kucitwa mibvundzo, pingakwanisika mphyadidi kakamwe acitwe mibvundzo ineyi mu ndzidzi wakuti iye ali ku platifomu, tayu kutawira kubulukira pa mpando udakhala iye.

  16. Pfundziro ya Bhibhlya ya Mpingo: Mphindi 30. Khundu ineyi isafunika kucitwa na nkulu wa mpingo wakuthema. (Mipingo yakuti iri na akulu a mpingo akucepa, atumiki akutumikira akuthema anakwanisambo kuphatisirwa.) Nsoka wa akulu a mpingo unakwanisa kusankhula kuti mbani adathema toera kutsogolera Pfundziro ya Bhibhlya ya Mpingo. Ale adasankhulwa asafunika kutsogolera mwadidi, kugawa mwadidi ndzidzi, kugomezera malemba akufunika kakamwe na kuphedza anyakubvesera onsene toera kuona kuti anaphatisira tani mphangwa zinapfundza iwo. Ale adasankhulwa anaphedzeka kakamwe angapfundza pitsogolero pinalonga kuti tinacitisa tani makhundu akuti asaphataniza mibvundzo na mitawiro. (Ncenjezi wa Abril 2023 tsa. 24, bokosi) Khala mphangwa za pfundziro za sumana zamala kugomezerwa mwadidi, mphyadidi kumalisa pfundziro, mbuto mwakuthimizira mphangwa zinango basi ene toera kumalisa ndzidzi onsene wa khundu ineyi. Pingakwanisika, anyakutsogolera pfundziro na anyakuleri asafunika akhale akusiyana-siyana masumana onsene. Muimiriri wa Nsonkhano wa Umaso Wacikristu na Utumiki angaphemba toera kubweza ndzidzi wa Pfundziro ya Bhibhlya ya Mpingo, nyakucitisa pfundziro asafunika kuona kuti anabweza makhundu api. Panango iye anasankhula kuti ndima zinango zikhonde kulerwi.

  MAFALA AKUMALISA

17. Mphindi 3. Muimiriri wa Nsonkhano wa Umaso Wacikristu na Utumiki asafunika kulonga mwacigwagwa mphangwa zakufunika kakamwe zidapfundzwa pa nsonkhano. Iye asafunikambo alonge mphangwa zinafuna kupfundzwa sumana inatowera. Khala ndzidzi uciripo, iye anakwanisa kulonga madzina a anyakupfundza akuti ali na makhundu sumana inatowera. Kusiyapo khala pana pitsogolero pinango, angamala kulonga mafalace akumalisa, muimiriri asafunika kuleri pidziwiso peno matsamba kuna mpingo. Mphangwa zinalonga pinthu pinacitwa ndzidzi onsene, ninga masasanyiro a basa yakubuluka m’munda na kucenesa Nyumba ya Umambo nee zisafunika kulongwa pa platifomu, mbwenye zisafunika kuikhwa pa kwadhru ya pidziwiso. Khala pana pidziwiso peno matsamba akuti nkhabe kwanisika kualeri mu ndzidzi wa mafala akumalisa, muimiriri asafunika kuphemba abale ali na makhundu pakhundu ya Kukhala M’maso Ninga Akristu toera abweze ndzidzi wa makhundu awo. (Onani  ndima 16 na  19.) Nsonkhano usafunika kumaliswa na nyimbo na phembero.

  KUSIMBA NA KUPEREKA UPHUNGU

18. Khundu ibodzi na ibodzi ya nyakupfundza ingamala kucitwa, muimiriri wa Nsonkhano wa Umaso Wacikristu na Utumiki ali na mphindi ibodzi basi toera kusimba na kupereka uphungu mwakubverana na pfundziro idapaswa nyakupfundza. Muimiriri nkhabe funika kulonga pfundziro idapaswa nyakupfundza mu ndzidzi unancemera iye toera acite khundu yace. Mbwenye nyakupfundza angamala kucita khundu yace, pontho muimiriri angansimba thangwi ya khundu idacita iye, muimiriri angafuna anakwanisa kulonga pfundziro idapaswa nyakupfundza na kulonga kuti thangwi yanji iye acita mwadidi khundu yace, peno kulonga mwaufuni kuti thangwi yanji nyakupfundza asafunika kuleri pontho pfundziro ineyi na kumpanga kuti anacita tani pyenepi. Muimiriri anakwanisambo kulonga mphangwa zinango zakuti zinaphedza nyakupfundza peno anyakubvesera. Muimiriri angafuna, nsonkhano ungamala peno pa ndzidzi unango, anakwanisa kupereka uphungu wakuthimizirika wakubuluswa m’bhruxura Funani Anthu, Kupfundzisa peno m’bukhu Beneficie-se thangwi ya pfundziro idapaswa iye peno mphangwa zinango. Uphungu unoyu usafunika kuperekwa pakhundu. Toera kugumana mphangwa zakuthimizirika zinalonga pya basa iri na muimiriri wa Nsonkhano wa Umaso Wacikristu na Utumiki na basa ya nyakupereka uphungu wa mu Sala B, onani  ndima 19,  24 na  25.

     NDZIDZI

19. Nkhabe funika kupiringana ndzidzi, nee khundu ibodzi. Kuphatanizambo muimiriri wa Nsonkhano wa Umaso Wacikristu na Utumiki, nee asafunika kupiringana ndzidzi. Maseze Programu ya Nsonkhano wa Umaso Wathu Wacikristu na Utumiki iri na ndzidzi wa khundu ibodzi na ibodzi, khala mphangwa za khundu zamala kugomezerwa mwadidi, nkhabe funika kuthimizira mphangwa zinango basi ene toera kumalisa ndzidzi onsene wa khundu ineyi. Khala nyakucita khundu apiringana ndzidzi, iye asafunika kupaswa uphungu na muimiriri wa Nsonkhano wa Umaso Wacikristu na Utumiki peno nyakupereka uphungu. Uphungu unoyu usafunika kuperekwa pakhundu. (Onani  ndima 24 na  25.) Nsonkhano onsene, kuphataniza nyimbo na maphembero usafunika kumaliswa nkati mwa ndzidzi ubodzi na mphindi 45.

 KUCEDZERWA NA MUYANG’ANIRI WA CISA

20. Mpingo ungacedzerwa na muyang’aniri wa cisa, nsonkhano usafunika kucitwa ninga mudalemberwa ipyo mu Programu ya Nsonkhano wa Umaso Wathu Wacikristu na Utumiki kusiyapo pinthu ipi pinatowera: Pfundziro ya Bhibhlya ya Mpingo pa khundu ya Kukhala M’maso Ninga Akristu nee inacitwa, thangwi muyang’aniri wa cisa anacita nkhani ya basa ya mphindi 30. Nkhani ineyi mbidzati kutoma, muimiriri wa Nsonkhano wa Umaso Wathu na Utumiki asafunika kulonga mwacigwagwa pinthu pidapfundzwa, kulonga pinafuna kupfundzwa sumana inatowera, kucita pidziwiso na kuleri matsamba. Buluka penepo asafunika kucemera muyang’aniri wa cisa. Muyang’aniri wa cisa angamala kucita nkhani yace, anadzamalisa nsonkhano na nyimbo idasankhula iye. Iye anakwanisa kucemera m’bale unango toera kucita phembero yakumalisa. Pa sumana yakucedzerwa na muyang’aniri wa cisa nkhabe funika kucitwa makhundu a anyakupfundza mu Sala B. Nsoka wa cilongero cinango usafunika kucita nsonkhano paokha, ngakhale kuti muyang’aniri wa cisa ali kucedzera mpingo wawo. Mbwenye nsoka usafunika kukhala pabodzi na mpingo mu ndzidzi unacitwa nkhani ya basa ya muyang’aniri wa cisa.

 SUMANA YA NSONKHANO WA CISA PENO WA GAWO

21. Sumana ya nsonkhano wa cisa peno wa gawo, nkhabe kucitwa misonkhano ya mpingo. Onsene mu mpingo asafunika kukumbuswa kuti mphangwa za misonkhano za masumana anewa, zisafunika kupfundzwa na munthu paekha peno ninga banja.

 SUMANA YA CIKUMBUSO

22. Cikumbuso cingacitwa pakati pa sumana, nkhabe kudzacitwa Nsonkhano wa Umaso Wathu Wacikristu na Utumiki.

 MUYANG’ANIRI WA NSONKHANO WA UMASO WATHU WACIKRISTU NA UTUMIKI

23. Nsoka wa akulu a mpingo usafunika kusankhula nkulu wa mpingo m’bodzi toera akhale muyang’aniri wa Nsonkhano wa Umaso Wathu Wacikristu na Utumiki. Iye asafunika kuwangisira toera nsonkhano ufambe mwadidi, pontho ucitwe mwakubverana na pitsogolero pidaperekwa. Iye asafunika kubverana mwadidi na nyakupereka uphungu. Umaso Wathu Wacikristu na Utumiki ungabuluswa, muyang’aniri asafunika kuikha madzina a ale anafuna kucita makhundu a miyezi miwiri. Makhundu anewa asaphataniza makhundu a anyakupfundza, aimiriri a nsonkhano wa pakati pa sumana adatawiriswa na nsoka wa akulu a mpingo kuphatanizambo makhundu anango onsene. (Onani  ndima 3-16 na  24.) Pakuikha madzina a anyakupfundza, muyang’aniri wa nsonkhano asafunika kukumbuka thunga na maluso a nyakupfundza, pontho asafunika kuonesesa kuti munthu anafuna kucia khundu ibodzi na ibodzi, anaicita mwakusudzuka, pontho analonga na cinyindiro consene. Iye asafunika kuphatisira pitsogolero pibodzi pyene pakulemba madzina a ale anafuna kucita makhundu anango a nsonkhano. Anyakucita makhundu asafunika kupaswa makhundu awo masumana matatu mbidzati kufika ntsiku ya khundu yawo. Formularyu ya Designação para a Reunião Vida e Ministério Cristãos (S-89) isafunika kuphatisirwa pakugawira makhundu a anyakupfundza. Muyang’aniri wa Nsonkhano wa Umaso Wacikristu na Utumiki asafunika kucita pyonsene pinakwanisa iye toera programu yakudhindwa ya nsonkhano yakuti iri na madzina a anyakucita makhundu onsene iikhwe ku kwadhru ya pidziwiso. Nsoka wa akulu a mpingo unakwanisa kusankhula nkulu wa mpingo unango peno ntumiki wakutumikira toera kuphedzera muyang’aniri wa Nsonkhano wa Umaso Wacikristu na Utumiki. Mbwenye ndi akulu a mpingo basi anafunika kuikha madzina a anyakucita makhundu onsene, kusiyapo makhundu a anyakupfundza.

    MUIMIRIRI WA NSONKHANO WA UMASO WATHU WACIKRISTU NA UTUMIKI

24. Sumana ibodzi na ibodzi, nkulu wa mpingo m’bodzi anadzakhala muimiriri wa Nsonkhano wa Umaso Wacikristu na Utumiki. (Mipingo yakuti iri na akulu a mpingo akucepa, atumiki akutumikira akuthema anakwanisambo kuphatisirwa.) Muimiriri asafunika akhunganyike mafala akutoma na akumalisa. Ndiye anafunika kucemera anthu onsene anafuna kucita makhundu awo pa nsonkhano. Khala akulu a mpingo ndi akucepa, muimiriri wa nsonkhano anakwanisambo kucita makhundu anango a nsonkhano, makamaka makhundu akuti asaphemba kupangiza vidhyu basi yakuti nee inadzakhala na mibvundzo na mitawiro. Mafala anafuna kulonga muimiriri wa nsonkhano ingamala khundu ibodzi na ibodzi asafunika kukhala akucepa kakamwe. Nsoka wa akulu a mpingo usafunika kusankhula akulu a mpingo akuthema toera akhale aimiriri a nsonkhano. Akulu a mpingo akuthema asacinjana-cinjana mwakubwereza-bwereza ninga aimiriri a nsonkhano. Mwakubverana na makhaliro a mpingo, muyang’aniri wa Nsonkhano wa Umaso Wacikristu na Utumiki anakwanisa kuphatisirwa kazinji kene ninga muimiriri wa nsonkhano kupiringana akulu a mpingo anango akuthema. Khala nkulu wa mpingo athema toera kutsogolera Pfundziro ya Bhibhlya ya Mpingo, iye panango athemambo toera kukhala muimiriri wa nsonkhano. Taphata miyendo, kumbukani kuti nkulu wa mpingo anatumikira ninga muimiriri wa nsonkhano asadikhirwa kuti anapereka uphungu wadidi wakuti unaphedza anyakupfundza. Muimiriri asafunikambo kuwangisira kakamwe toera nsonkhano umale pa ndzidzi udakhazikiswa. (Onani  ndima 17 na  19.) Khala pa platifomu pana mbuto, muimiriri angafuna, panaikhwa mikrofoni inango toera alonge khundu inatowera mu ndzidzi wakuti m’bale anafuna kucita khundu inatowera ali kuenda pa platifomu. Muimiriri angafuna anakhala pa mpando pa platifomu mu ndzidzi unacitwa khundu ya Kuleri Bhibhlya na khundu ya Pfundzisani Mwaluso mu Utumiki. Pyenepi pinaphedza toera kukhonda bvunga ndzidzi.

   NYAKUPEREKA UPHUNGU

25. Pingakwanisika, mphyadidi kuphatisira nkulu wa mpingo wakuti asacita mwadidi nkhani toera kukhala nyakupereka uphungu. Basa ya nyakupereka uphungu ndi kupereka uphungu pakhundu. Pingafunika iye anaperekambo uphungu kuna akulu a mpingo na atumiki akutumikira thangwi ya makhundu onsene anacita iwo. Makhundu anewa asaphataniza makhundu pa Nsonkhano wa Umaso na Utumiki, nkhani zapakweca, kutsogolera peno kuleri pfundziro ya Ncenjezi peno Pfundziro ya Bhibhlya ya Mpingo. (Onani  ndima 19.) Khala pa mpingo pana akulu a mpingo azinji akuti asacita mwadidi nkhani, pontho asapfundzisa mwadidi, anakwanisa kucinjana pa caka toera kukhala nyakupereka uphungu. Nee pisafunika kuti nyakupereka uphungu apereke uphungu pakumala kwa khundu ibodzi na ibodzi.

 SALA B

26. Khala mpingo uli na anyakupfundza azinji, panakwanisa kucitwa masasanyiro toera anyakupfundza anango acite makhundu awo mu Sala B. Khala mu Sala B munacitwa makhundu a anyakupfundza, musafunika kukhala na nyakupereka uphungu wakuthema, makamaka nkulu wa mpingo. Pingafunika, atumiki akutumikira akuthema anakwanisa kupaswa basa ineyi. Nsoka wa akulu a mpingo unasankhula kuti mbani adathema toera kucita basa ineyi, pontho nsoka wa akulu a mpingo ndiwo unasankhula khala munthu asafunika akhale m’bodzi ene peno asafunika kucinjana. Nyakupereka uphungu asafunika kutowezera pitsogolero piri pa  ndima 18. Anyakupfundza akuti ali na makhundu mu Sala B, asafunika kuenda mu Sala B pakumala kucitwa khundu ya Mpfuma Zauzimu inagumanika pakhundu ya Mpfuma za Mafala a Mulungu. Anyakupfundza asafunika abwerere m’mbuto zawo pakumala kwa khundu ya Pfundzisani Mwaluso mu Utumiki.

 MAVIDHYU

27. Mavidhyu adasankhulwa kale ndiwo anafunika kuphatisirwa pa nsonkhano unoyu. Mavidhyu a nsonkhano wa pakati pa sumana anaikhwa mu aplikativo JW Library^® toera akwanise kuoniwa m’mitcini yakusiyana-siyana.

© 2023 Watch Tower Bible and Tract Society of Pennsylvania

S-38-SEN 11/23