Televise—Se Tausi Tama Lelei?

O NISI taimi, e manatu ai o se mea lelei le faafiafia o tamaiti laiti e ala i le faataga o i latou e matamata i le televise a o faia feʻau masani o le aso. Peitaʻi, e mafai faapefea ona aafia ai lau fanau i lenei mea?

Na faapea mai se lipoti a le New York Times: “E oo lava i pepe, e mafai ona aafia i mea o loo faaalia mai i le televise.” I se suʻesuʻega talu ai nei, na faamatamata ai ni tamaiti ua taʻitasi tausaga le matutua i ni ata pupuu o se tamaʻitaʻi, o loo fesuisuiaʻi ona foliga vaaia po o uiga vaaia e faaalia atu i se pepe meataalo. Na faapea mai le Times: “Ina ua faaalia e le tamaʻitaʻi foliga e fefe i le meataalo, na lē fia taaalo ai foʻi tamaiti i le meataalo ma vaaia o latou foliga popole, faaʻūʻū, lē fiafia, pe fetagisi foʻi. Ae ina ua faaalia e le tamaʻitaʻi lona naunau i le meataalo, sa vaaia ai foʻi le naunau o tamaiti e fia taaalo ai.”

E manino la, o mea e vaaia i le televise e mafai ona aafia ai tamaiti laiti. Ae faapefea ni āuga tumau i le fanau iti? Ua mātauina e le alii fomaʻi o Naoki Kataoka, o se polofesa i maʻi o tamaiti i le Kolisi Faafomaʻi a Kawasaki i le aai o Kurashiki i Iapani, le toʻatele o tamaiti e matuā filemu ma e tau leai ni uiga faaalia i o latou foliga vaaia. O tamaiti nei, sa matamata i le televise po o ata vitiō mo ni taimi uumi. O se tasi o tamaitiiti e lua ona tausaga e lē mafai ona talanoa i tagata mo se taimi umi ona e lē tele ni upu na ia iloaina. O lenei tamaitiiti, e matamata vitiō mai lava i le taeao seʻia oo i le afiafi i aso uma talu ona atoa lona tausaga. Na faatoʻā faasolosolo ina lelei le tautala a lenei tamaitiiti, ina ua taofia e lona tinā le matamata vitiō ona o le fautuaga a le fomaʻi, ma amata ai loa ona faifai mea faatasi o ia ma lana tama. Ioe, e manaʻomia e mātua ona faaalu le taimi ma a latou fanau.

Na faamamafa mai e Ieova le Atua, Lē na faatulagaina le aiga, le tāua o le faifai mea faatasi. Na ia taʻu atu i ona tagata anamuā lava: “Ia e matuā aʻoaʻo soo ai [upu a le Atua] i lau fanau, ma ia e tautalatala aʻi, pe a ē nofo i lou fale, pe a ē savali foʻi i le ala, pe a ē taoto, pe a ē tulaʻi foʻi.” (Teuteronome 6:7) O mātua ae lē o le televise, e mafai ona aʻoaʻoina le fanau e ala i upu ma faataʻitaʻiga, “e tusa ma lona ala.”—Faataoto 22:6.