Ia Talia Pea Aʻoaʻiga a Ieova

“Aua le faatauvaa iā te oe le aʻoaʻiga a Ieova.”—FAATAOTO 3:11.

1. Aiseā e tatau ai ona tatou talia aʻoaʻiga mai le Atua?

UA TAʻU mai e le tupu o Solomona iā i tatou se uunaʻiga lelei e tatau ai ona tatou talia aʻoaʻiga mai le Atua. Ua ia faapea mai: “Loʻu atalii e, aua le faatauvaa iā te oe le aʻoaʻiga a Ieova; aua foʻi e te ʻinoʻino pe a aʻoaʻiina oe e ia. Auā o lē ua alofagia e Ieova, e aʻoaʻiina o ia e ia; e pei o le tamā ona aʻoaʻiina o lona atalii ua ia fiafia i ai.” (Faataoto 3:11, 12) E aʻoaʻi mai lou Tamā faalelagi iā te oe, auā e alofa o ia iā te oe.

2. O le ā e faasino atu i ai “aʻoaʻiga,” ma e faapefea ona maua e se tasi ni aʻoaʻiga?

² O “aʻoaʻiga” e faasino atu i se faasalaga, o faasaʻoga, faatonuga, ma aʻoaʻoga. Na tusi mai Paulo: “O aʻoaʻiga uma foʻi a o i ai, e lē manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai ē ua aʻoaʻoina ai.” (Eperu 12:11) O lou talia ma faatatau aʻoaʻiga mai iā Ieova, o le a fesoasoani iā te oe e te ola ai i se olaga amiotonu, ma atili ai ona māfana le lua faiā ma Ieova, le Atua paia. (Salamo 99:5) E ono faaoo mai faasaʻoga e isi ou uso talitonu, pe ala mai i mea o loo e aʻoaʻoina i sauniga faa-Kerisiano, po o lou suʻesuʻeina foʻi o le Afioga a le Atua ma lomiga mai ‘le auauna faamaoni.’ (Luka 12:42-44) E tatau ona e loto faafetai pe a faailoa mai iā te oe se mea e manaʻomia ona toe fetuunaʻi pe toe faasaʻo. Ae o le ā le ituaiga o aʻoaʻiga e manaʻomia pe afai ua faia se agasala matuiā?

Le Pogai ua Faateʻaina ai Nisi

3. O fea le taimi e faateʻaina ai se tasi?

³ E suʻesuʻeina e auauna a le Atua le Tusi Paia ma lomiga faale-Tusi Paia. O loo talanoaina tapulaa a Ieova i a latou sauniga, o fonotaga, ma tauaofiaga. O lona uiga la, ua iloa lelei e Kerisiano mea o loo faafinagaloina e Ieova mai iā i latou. E faatoʻā faateʻaina lava se tasi mai le faapotopotoga, pe afai na te faia ma le lē salamō se agasala matuiā.

4, 5. O le ā le faaaʻoaʻoga o i le Tusi Paia o se tasi na faateʻaina, ma aiseā na fautuaina ai le faapotopotoga ia toe faaaʻe lenā tagata?

 ⁴ Seʻi manatu i se faaaʻoaʻoga o i le Tusi Paia, o se tasi na faateʻaina. Sa leʻi faia e le faapotopotoga i Korinito se gaoioiga i se ituaiga o ‘faitaaga sa leʻi taʻua i nuu ese, o le toe faiavā lea o se tasi i le avā a lona lava tamā.’ Ona faatonuina lea e Paulo le faapotopotoga i Korinito, e ‘tuuina atu lē ua faapea iā Satani, ina ia fano ai le tino, ae ia faasaoina le agaga.’ (1 Korinito 5:1-5) Pe a faateʻa le tagata agasala ma tuuina atu iā Satani, ona toe avea lea o ia ma vaega o le lalolagi a le Tiapolo. (1 Ioane 5:19) O lona faateʻaina, ua ave ese ai se taaʻiga leaga mai le faapotopotoga, ae puipuia le “agaga” po o le tulaga masani o le faapotopotoga, ina ia faaauau pea ona atagia mai ai uiga o le Atua.—2 Timoteo 4:22; 1 Korinito 5:11-13.

⁵ E leʻi leva tele ae toe fautuaina e Paulo le ʻauuso i Korinito ia toe faaaʻe lē na faia le mea sesē. Aiseā? Ina ia lē ‘ʻoleʻolegia e Satani’ i latou. E manino mai ua salamō lenā tagata, ma ua ola nei i se olaga mamā. (2 Korinito 2:8-11) Ana faapea sa mumusu le faapotopotoga i Korinito e toe faaaʻe le tagata ua salamō, semanū la e ʻoleʻolegia i latou e Satani, ma latou lē lagona ai se alofa ma se loto faamagalo; o uiga o loo manaʻo le Tiapolo ia latou maua. E foliga mai, sa leʻi umi ae latou “faamagalo atu ma faamāfanafana” i lea tagata ua salamō.—2 Korinito 2:5-7.

6. O le ā se aogā o le faateʻaina?

⁶ O le ā se aogā o le faateʻaina? Ina ia lē faalumaina pe taʻuleagaina ai le suafa paia o Ieova, ma puipuia ai foʻi le talaaga lelei o ona tagata. (1 Peteru 1:14-16) O le tuuesea mai le faapotopotoga o se tagata fai mea sesē e lē salamō, o le a tausisia ai pea tapulaa a le Atua, ma puipuia ai le mamā faaleagaga o le faapotopotoga. E mafai ai foʻi ona toe tomānatu le tagata lē salamō i le matuiā o lana agasala.

E Tāua Tele le Salamō

7. O ā aafiaga na oo iā Tavita ona o le lē faailoaina o lana agasala?

⁷ O le toʻatele o i latou e faia agasala matuiā ae ua salamō moni, e lē faateʻaina mai le faapotopotoga. E lē faigofie mo nisi ona salamō moni. Seʻi manatu foʻi i le tulaga o Tavita le tupu o Isaraelu, o lē na fatuina le Salamo 32. E taʻu mai e upu o lenā salamo e faapea, na iai sina taimi o nofo pea Tavita e lē faailoaina lana agasala matuiā lea na fai ma Patesepa. O le mea na iʻu i ai, ua avea ona lagona tigā i lana agasala, ma itu na liua pe mou ese ai lona malosi, e pei o le vevela o se aso mugālā ona iʻu ina mago ai ma mātūtū se laau. Na mafatia Tavita i lona tino ma lona mafaufau. Peitaʻi ina ua ia ‘faaali lana solitulafono, ona aveese lea o le leaga o lana agasala.’ (Salamo 32:3-5) Ona ia pese ai lea: “Amuia le tagata e lē taʻusalaina e Ieova.” (Salamo 32:1, 2) Maʻeu le matagofie o le tofo i le mutimutivale o le alofa o le Atua!

8, 9. E faapefea ona faaalia le salamō, ma o le ā lona tāua i le toe faaaʻe o se tagata na faateʻaina?

⁸ O lona uiga la, e tatau i se tagata ua faia se agasala ona salamō, pe a manaʻo e tofo i le alofa mutimutivale o Ieova. Ae peitaʻi, o le salamō e lē o le mā po o le fefe ina neʻi iloa e isi le agasala ua fai. O le salamō, e faauiga atu i le suia e se tasi o lona mafaufau e tusa ai o se amio leaga na fai, ona ua faanoanoa i lona faia o lea mea leaga. O le tagata ua salamō e iā te ia se “loto momomo ma le nutimomoia” ma ua manaʻo e toe faasaʻo le mea na sesē.—Salamo 51:17; 2 Korinito 7:11.

⁹ O le salamō o se vala tāua tele i le toe faaaʻe mai o se tasi i le faapotopotoga. E lē otometi lava ona toe faaaʻe se tagata, ina ua mavae se vaitaimi patino na faateʻaina ai. A o leʻi toe faaaʻe, e ao ona faia ni suiga tetele i lona loto. E tatau ona ia iloa le matuiā o lana agasala, ma lona faalumaina o Ieova ma le faapotopotoga. E tatau ona ia salamō, ia tatalo naunautaʻi iā Ieova mo se faamagaloga, ma ia gauaʻi i tapulaa amiotonu a le Atua. Pe afai o le a ia talosaga atu ina ia toe faaaʻe, e tatau ona iai ni faamaoniga e mautinoa ai ua salamō, ma ia fuaina atu “amio e tatau ma le salamō.”—Galuega 26:20.

 Aiseā e Faailoa ai Agasala?

10, 11. Aiseā e lē tatau ai ona tatou taumafai e natia se agasala?

¹⁰ E ono manatu nisi ua faia ni agasala: ‘Afai ou te faailoa laʻu agasala i se tasi, o lona uiga e tatau ona ou tali atu i ni fesili ou te matuā māsiasi ai, ma atonu foʻi o le a faateʻaina ai aʻu. Ae afai ou te lē pisa fua, ona lē tupu lea o lenā mea, ona leai lava lea o se tasi i le faapotopotoga na te iloa.’ O ituaiga manatu faapena e taʻu mai ai, o loo iai ni vala tāua e lē o tau i ai le mafaufau. O ā nei vala?

¹¹ O Ieova o “le Atua alofa mutimutivale ma le alofa fua, e telegese lona toʻasā, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foʻi i le amiolētonu ma le solitulafono ma le agasala.” Peitaʻi, e na te faasaʻoina ana auauna i se tulaga e “aʻoaʻi faatatau.” (Esoto 34:6, 7; Ieremia 30:11) Afai e te faia se agasala matuiā, o le a faapefea la ona alofa mutimutivale le Atua iā te oe, pe afai e te taumafai e natia lau agasala? O loo sisila mai fofoga o Ieova, ma e lē o lilo iā te ia mea sesē uma o loo fai.—Faataoto 15:3; Sapakuka 1:13.

12, 13. O le ā e iʻu i ai le taumafai e natia se agasala?

¹² Afai ua e faia se agasala matuiā, e fesoasoani lou faailoaina o lenā agasala, e toe lelei ai lou lotofuatiaifo. (1 Timoteo 1:18-20) Pe a lē faailoaina lau agasala, e oo ina vaivai lou lotofuatiaifo, ma faigofie ai foʻi ona e toe faia se isi agasala. Ia e manatua, o lau agasala ua lē na o se agasala i se tagata po o se faapotopotoga. O lenā foʻi ua e agasala i le Atua. Na pese le faisalamo: “O Ieova o loo i le lagi lona nofoālii; e silasila mai ona fofoga, e tofotofo le fanau a tagata e ona laufofoga. E tofotofo e Ieova i lē ua amiotonu; a ua inosia e lona finagalo lē fai amio leaga.”—Salamo 11:4, 5.

¹³ E lē taitai faamanuia mai Ieova i se tasi na te natia sana agasala matuiā, ma taumafai pea e avea ma vaega o le faapotopotoga mamā faa-Kerisiano. (Iakopo 4:6) Afai ua e toʻilalo i le agasala ma e manaʻo e fai le mea saʻo, aua e te faatalatū e faailoa lau agasala ma le faamaoni. Auā o le mea e tupu, o le a ōia pea lou lotofuatiaifo, aemaise i taimi e te faitau pe faalogo ai i ni fautuaga e faatatau i ni mataupu, e tai tutusa ma lau agasala matuiā lea na fai. O ā fā oe, pe a aveesea e Ieova lona agaga mai iā te oe, e pei ona sa ia faia i le tupu o Saulo? (1 Samuelu 16:14) Pe a aunoa ma oe le agaga o le Atua, e mafai foʻi ona e toe faia se isi agasala e sili atu ona matuiā.

Tuu Atu Lou Faatuatuaga i Toeaina

14. Aiseā e tatau ai i se tasi ua agasala, ona utagia le fautuaga a le Iakopo 5:14, 15?

¹⁴ O le ā la, e tatau ona faia e le tagata na agasala ae ua salamō? “Inā aami atu ia i toeaina o le ekalesia, ia latou tatalo mo ia, pe a uma ona faauu iā te ia i le suāuu i le suafa o le Alii. O le tatalo foʻi e faia i le faatuatua e faaolaina ai le maʻi, e faatūina foʻi o ia e le Alii.” (Iakopo 5:14, 15) O le talanoa atu i toeaina, o se tasi lenā auala e mafai ai e le tagata ua faia se agasala ona “fua mai ni fua e tatau ma le salamō.” (Mataio 3:8) O le a faia e nei tane faatuatua ma le alolofa ‘se tatalo mo ia, ma faauu iā te ia i le suāuu i le suafa o Ieova.’ O a latou fautuaga mai le Tusi Paia o le a pei o se suāuu mālū, e avea ma faamāfanafanaga i so o se tasi ua salamō moni.—Ieremia 8:22.

15, 16. Ua faapefea ona faataʻitaʻi atu toeaina Kerisiano i le faaaʻoaʻoga na faataatia e Ieova, e pei ona taʻua i le Esekielu 34:15, 16?

¹⁵ Na faataatia e lo tatou Leoleo Mamoe o Ieova se faaaʻoaʻoga matagofie, ina ua ia faasaʻoloto sa Iutā mai le nofo pologa i Papelonia i le 537 T.L.M. E faapena foʻi ina ua ia toe faasaʻoloto le Isaraelu faaleagaga mai iā “Papelonia le aai tele” i le 1919 T.A. (Faaaliga 17:3-5; Kalatia 6:16) Ua ia faataunuu ai lana folafolaga: “Ou te fagaina laʻu lafu, o aʻu foʻi e taooto ai i latou . . . Ou te saʻilia foʻi lē ua sē, ou te aumaia lē ua tulia, ou te fusia lē ua gau, ou te faamalosia lē ua vaivai.”—Esekielu 34:15, 16.

¹⁶ Na fafaga e Ieova ana mamoe faafaatusa, na ia faataooto iā i latou ina ia malupuipuia, ma saʻili i mamoe na sē. E faapena foʻi leoleo mamoe Kerisiano. E latou te faamautinoa o loo lelei ona fafaga faaleagaga ma malupuipuia le lafu mamoe a le Atua. E saʻili atu toeaina mo  mamoe ua amata ona see ese mai le faapotopotoga. E pei lava ona fusifusia e le Atua se mamoe ua gau, e faapena foʻi i toeaina ona latou “fusia” mamoe ua manunuʻa ona o ni tala na faia e se tasi, pe ona o ni a latou lava gaoioiga na fai. Ma e pei ona ‘faamalosia e le Atua lē ua vaivai,’ e faapena foʻi ona fesoasoani toeaina i ē ua mamaʻi faaleagaga, atonu ona o ni a latou lava mea sesē ua fai.

Le Auala e Fesoasoani Mai ai Leoleo Mamoe

17. Aiseā e lē tatau ai ona tatou faatalatū e saʻili atu i le fesoasoani faaleagaga a toeaina?

¹⁷ O loo usitaia e toeaina lenei fautuaga: “Ia faaola iā i latou ma le mataʻu.” (Iuta 23) Ua faia e nisi Kerisiano ni agasala matuiā, ona ua lolo atu i amioga lē mamā faaleituaiga. Ae afai e salamō moni, e mafai ona latou mauaina le tausiga alofa mai toeaina, o ē naunau e aumai le fesoasoani faaleagaga iā i latou. Na faaaofia e Paulo o ia i lana faamatalaga e faatatau i na tane e faapea: “E leai so matou fia pule i lo outou faatuatua, a o fesoasoani i matou i lo outou olioli.” (2 Korinito 1:24) O lea la, aua lava neʻi e faatalatū e saʻili atu i la latou fesoasoani faaleagaga.

18. E faapefea ona feutagaʻi toeaina ma ni uso talitonu ua faia ni mea sesē?

¹⁸ Afai ua e faia se agasala matuiā, aiseā e mafai ai ona e faatuatuaina le ʻautoeaina? O le māfuaaga autū, o toeaina o leoleo mamoe o le lafu mamoe a le Atua. (1 Peteru 5:1-4) E leai se leoleo mamoe alofa e vaai atu i si mamoe o loo tagi mai ona ua manuʻa, ae toe alu atu ma sasa. O lona uiga, afai e feutagaʻi toeaina ma se uso talitonu ua faia se mea sesē, e lē manatu i ai o se mataupu tau soligatulafono e tatau i ai se faasalaga. Na i lo lea, o se agasala, ma e manaʻomia ona uaʻi atu i ai, ina ia toe faamalosia faaleagaga. (Iakopo 5:13-20) E tatau ona amiotonu filifiliga e faia e toeaina, ma ia latou “faasaoina le lafu mamoe” i se uiga faapelepele. (Galuega 20:29, 30; Isaia 32:1, 2) E tutusa toeaina ma isi uma Kerisiano, e tatau ona latou ‘fai le amiotonu, ia naunau i le alofa, ma ia feooaʻi ma le Atua ma le loto faamaulalo.’ (Mika 6:8) E tāua tele nei uiga pe a faia ni filifiliga e aafia ai le ola ma le auaunaga paia a ‘le lafu mamoe ua fagaina a Ieova.’—Salamo 100:3.

19. O le ā le uiga e ao ona iai i toeaina Kerisiano a o taumafai e toe faasagatonu le tulaga faaleagaga o se tasi?

¹⁹ Ua tofia e le agaga paia leoleo mamoe Kerisiano, o lea latou te taumafai ai ina ia taʻitaʻia i latou e lea agaga. “Afai e maua se tagata i se tasi agasala”—e peiseaʻī ua puʻea faamanu i ofaga—e taumafai tane ua agavaa faaleagaga e ‘toe faafoʻi mai lenā tagata ma le loto agamalu.’  (Kalatia 6:1; Galuega 20:28) E taumafai toeaina i se uiga agamalu ae maumauaʻi mo tapulaa a le Atua, ina ia toe faasagatonu mafaufauga o lea tagata, e pei lava ona taumafai ma le faaeteete se fomaʻi, e toe faasaʻo se vaega o le tino ua gau. O le faia faapea e ʻalofia ai ni tigā e lē tatau ona iai, ae foʻia le faafitauli. (Kolose 3:12) O le a faalagolago toeaina i a latou tatalo ma le Tusi Paia i le faia o se faaiʻuga pe tatau ona faaalia le alofa mutimutivale. E tatau i le latou faaiʻuga ona atagia mai ai le silafaga a Ieova i na mataupu.—Mataio 18:18.

20. O afea e ono talafeagai ai ona faasilasila atu i le faapotopotoga faapea, ua aʻoaʻia nei se tasi?

²⁰ Afai ua iloa uma e le toʻatele le agasala, pe mautinoa foʻi o le a iloa, e talafeagai la pe a faia se faasilasilaga i le faapotopotoga, ina ia puipuia le tulaga taʻuleleia o le faapotopotoga. O nisi foʻi taimi atonu o le a faia se faasilasilaga, pe afai e manaʻomia ona faailoa i le faapotopotoga. I le taimi lea e taumafai ai se tasi na aʻoaʻia faafaamasinoga e toe malosi faaleagaga, e tai pei o se tagata o loo tau faapē se manuʻa o lona tino; e iai nisi o mea e lē mafai ona ia toe faatinoina i lenā vaitaimi. Atonu i lenā taimi, e sili atu mo lē ua salamō ona tau ina faalogologo na i lo le faia o ni ana tali i sauniga. Atonu e faatulaga e toeaina se tasi e toe faia se suʻesuʻega faale-Tusi Paia ma lenā tagata, ina ia faaleleia se mea na vaivai ai, ma toe mafai ona “faamaoni i le faatuatua.” (Tito 2:2) O nei mea uma e faia ona o le alofa, ae lē o se faasalaga mo se tasi na faia se mea sesē.

21. E faapefea ona taulima nisi mea sesē e faia?

²¹ E eseese auala e mafai e toeaina ona saunia ai le fesoasoani faaleagaga. Mo se faataʻitaʻiga, atonu o se uso sa avea muamua ma ona faafitauli le inutele i le ʻava malosi, ae ua toe inutele foʻi pe faatasi pe faalua, a o inu na o ia i lona fale. Po o se tasi ua leva ona lafoaʻi lana ulaula, ae ua toe ulaula faananā pe faatasi pe faalua ona ua tau vaivai. E ui ina tatalo lenā tagata, ma e talitonu ua faamagaloina o ia e Ieova, ae tatau pea ona saʻili atu i se toeaina mo se fesoasoani, ina ia lē toe avea lenā agasala e fai ma masaniga. E taulimaina e se toeaina se toʻatasi pe toʻalua lea tulaga. Peitaʻi, o le a faailoa atu pea e le toeaina po o toeaina lenei mataupu i le ovasia taʻimua, talu ai atonu e iai nisi vala e ono aofia ai.

Ia Talia Pea Aʻoaʻiga Mai le Atua

22, 23. Aiseā e tatau ai pea ona e talia aʻoaʻiga mai le Atua?

²² Ina ia talia lelei i tatou e Ieova, e ao ona tatou taʻitoʻatasi ma uaʻi atu i ana aʻoaʻiga. (1 Timoteo 5:20) O lea, ia utagia so o se faasaʻoga e te maua a o suʻesuʻeina le Tusi Paia ma lomiga faale-Tusi Paia, pe e te faalogo foʻi i ni fautuaga mai sauniga, o fonotaga, ma tauaofiaga a tagata o Ieova. Ia e naunau e fai le finagalo o Ieova. Ona fesoasoani ai lea o aʻoaʻiga a Ieova iā te oe, ina ia malosi lou itu faaleagaga—ia pei o se pā malosi e mafai ona puipuia ai oe mai le paʻū atu e fai le agasala.

²³ O lou taliaina o aʻoaʻiga mai le Atua o le a e tumau ai foʻi i lona alofa. O le mea moni, ua iai nisi ua faateʻaina mai le faapotopotoga Kerisiano. Peitaʻi e lē tatau fua ona tupu lenei mea iā te oe, pe afai e te ‘leoleoina lou loto’ ma ‘savali faapei o le tagata poto.’ (Faataoto 4:23; Efeso 5:15) Peitaʻi, afai o lenā e te faateʻaina, aiseā e te lē faia ai loa ni gaoioiga mo le toe faaaʻe mai? E finagalo le Atua iā i latou uma lava ua tuuina atu iā te ia, ina ia tapuaʻi atu ma le faamaoni, ma le ‘loto fiafia.’ (Teuteronome 28:47) E mafai ona e faia lenā mea e faavavau, pe a fai ma au masani le talia o aʻoaʻiga a Ieova.—Salamo 100:2.

O le a Faapefea Ona E Tali?

• Aiseā e faateʻaina ai nisi mai le faapotopotoga Kerisiano?

• O le ā e aofia i le salamō moni?

• Aiseā e tatau ai ona faailoa atu agasala matuiā?

• O ā auala e fesoasoani ai toeaina Kerisiano iā i latou na faia mea sesē ae ua salamō?

[Fesili mo le Suʻesuʻega]

[Ata i le itulau 26]

Aiseā na avatu ai e Paulo faatonuga i Kerisiano i Korinito, e faatatau i le faateʻaina?

[Ata i le itulau 29]

I le pei o leoleo mamoe anamua, ua faapena foʻi i toeaina Kerisiano ona latou ‘fusifusia’ mamoe ua faamanuʻalia a le Atua