•  Utangulizi 2

•  Hazina za Neno la Mungu 3-5

 Hotuba 3

•  Hazina za Kiroho 4

•  Usomaji wa Biblia 5

•  Boresha Huduma Yako 6-14

•  Kuanzisha Mazungumzo 7

•  Kufuatia Upendezi 8

•  Kufanya Wanafunzi 9

•  Kufafanua Imani Yako 10

•  Hotuba 11

•  Habari ya Kuzungumzia 12

 Vikao 13

•  Kutumia Video na Machapisho 14

•  Maisha ya Mkristo 15-16

•  Funzo la Biblia la Kutaniko 16

•  Umalizio 17

•  Kutoa Shauri na Pongezi 18

•  Wakati 19

•  Ziara ya Mwangalizi wa Mzunguko 20

•  Juma la Kusanyiko la Mzunguko au la Eneo 21

•  Juma la Ukumbusho 22

•  Mwangalizi wa Mkutano wa Huduma na Maisha 23

•  Mwenyekiti wa Mkutano wa Huduma na Maisha 24

•  Mshauri Msaidizi 25

•  Shule za Ziada 26

•  Video 27

1. Maagizo haya yatawasaidia wote walio na sehemu katika Mkutano wa Huduma na Maisha. Walio na migawo wanapaswa kusoma maagizo kwa ajili ya sehemu zao kama yalivyoonyeshwa kwenye Daftari la Mkutano wa Huduma na Maisha na maagizo yafuatayo kabla ya kuandaa sehemu zao. Wahubiri wote wanapaswa kualikwa wajitolee kwa ajili ya migawo ya wanafunzi. Wengine wanaoshirikiana kikamili na kutaniko wanaweza kupewa mgawo ikiwa wanakubali mafundisho ya Biblia na maisha yao yanapatana na kanuni za Kikristo. Mwangalizi wa Mkutano wa Huduma na Maisha anapaswa kuzungumzia mambo yanayohitajiwa ili kuandikishwa kwenye shule na mtu yeyote ambaye si mhubiri na anatamani kuandikishwa na hivyo kumsaidia kujua ikiwa ana sifa za kustahili. Hilo linapaswa kufanyika huku yule anayejifunza pamoja naye akiwepo (au mzazi anayeamini). Matakwa hayo yanafanana na ya wale ambao wanataka kuwa wahubiri ambao hawajabatizwa.—od sura ya 8 fu. 8.

2. Dakika 1. Kila juma, baada ya wimbo na sala ya kufungua, mwenyekiti wa Mkutano wa Huduma na Maisha atatoa maelezo yenye kuchochea hamu kwa ajili ya programu itakayofuata. Mwenyekiti anapaswa kukazia fikira hoja ambazo zitanufaisha kutaniko.

 3. Hotuba: Dakika 10. Kwenye Daftari la Mkutano wa Huduma na Maisha kuna kichwa na muhtasari wa mambo makuu mawili au matatu. Hotuba hii inapaswa kugawiwa mzee au mtumishi wa huduma anayestahili. Ikiwa kitabu kipya cha Biblia kimepangiwa katika usomaji wa Biblia wa kila juma, video ya utangulizi wa kitabu hicho itaonyeshwa. Msemaji anaweza kuhusianisha video na kichwa cha hotuba. Hata hivyo, anapaswa kuhakikisha amezungumzia hoja zilizo kwenye daftari. Pia, wakati ukiruhusu, anapaswa kutumia vizuri picha zilizomo, ambazo zimekusudiwa kufanya habari hiyo ieleweke zaidi. Anaweza kutia ndani habari kutoka kwenye marejeo mengine ya ziada maadamu inachangia hoja zilizo kwenye muhtasari.

 4. Hazina za Kiroho: Dakika 10. Hii ni sehemu ya maswali na majibu bila utangulizi au umalizio. Inapaswa kushughulikiwa na mzee au mtumishi wa huduma anayestahili. Msemaji anapaswa kuwauliza wasikilizaji maswali yote. Pia, anaweza kuamua ikiwa maandiko yaliyoonyeshwa yanahitaji kusomwa au la. Wale wanaopewa nafasi ya kutoa maelezo wanapaswa kutumia muda usiozidi sekunde 30.

 5. Usomaji wa Biblia: Dakika 4. Mgawo huu wa mwanafunzi utashughulikiwa na mwanafunzi wa kiume. Mwanafunzi anapaswa kusoma sehemu aliyogawiwa bila kutoa utangulizi wala umalizio. Mwenyekiti wa mkutano atapendezwa hasa na kuwasaidia wanafunzi kusoma kwa usahihi, kwa njia inayoeleweka, kwa ufasaha, kukazia maana ipasavyo, ubadilifu wa sauti, kutua ifaavyo, na kusoma kwa njia ya kawaida. Kwa kuwa kila mgawo wa usomaji wa Biblia hutofautiana kwa urefu, mwangalizi wa Mkutano wa Huduma na Maisha anapaswa kuzingatia hasa uwezo wa wanafunzi anapopanga migawo hiyo.

6. Dakika 15. Sehemu hii ya mkutano imekusudiwa kuwapa wote fursa ya kujizoeza kwa ajili ya huduma na kuboresha uwezo wao wa kuanzisha mazungumzo na uwezo wa kuhubiri na kufundisha. Wazee wanaweza kupewa migawo ya wanafunzi, kadiri inavyohitajika. Kila mwanafunzi atashughulikia somo kutoka kwenye broshua Kufundisha au Wapende Watu lililoonyeshwa katika mabano baada ya mgawo kwenye Daftari la Mkutano wa Huduma na Maisha ya Mkristo. Pindi nyingine, sehemu ya mazungumzo itawekwa kwenye ratiba. Sehemu hiyo inapaswa kushughulikiwa na mzee au mtumishi wa huduma anayestahili.—Ona  fungu la 15 ili kufahamu jinsi ya kuongoza sehemu ya mazungumzo.

 7. Kuanzisha Mazungumzo: Mgawo huu unaweza kushughulikiwa na mwanafunzi wa kiume au wa kike. Msaidizi anapaswa kuwa wa jinsia moja na mwanafunzi au kuwa mshiriki wa familia. Mwanafunzi na msaidizi wanaweza kuketi au kusimama.

 8. Kufuatia Upendezi: Mgawo huu unaweza kushughulikiwa na mwanafunzi wa kiume au wa kike. Msaidizi anapaswa kuwa wa jinsia moja na mwanafunzi. (km 5/97 uk. 2) Mwanafunzi na msaidizi wanaweza kuketi au kusimama. Mwanafunzi anapaswa kuonyesha jambo tunalopaswa kusema tunapomrudia mtu aliyeonyesha upendezi wakati wa mazungumzo yaliyotangulia.—Ili kufahamu habari ya kuzungumzia na kikao cha mgawo huu, ona fungu la 12 na 13.

 9. Kufanya Wanafunzi: Mgawo huu unaweza kushughulikiwa na mwanafunzi wa kiume au wa kike. Msaidizi anapaswa kuwa wa jinsia moja na mwanafunzi. (km 5/97 p. 2) Mwanafunzi na msaidizi wanaweza kuketi au kusimama. Mgawo huu unapaswa kuonyesha sehemu fupi ya funzo la Biblia ambalo tayari linaendelea. Hakuna haja ya utangulizi wala umalizio isipokuwa mwanafunzi awe anashughulikia kihususa mojawapo ya masomo hayo. Mafungu yote yaliyogawiwa hayahitaji kusomwa kwa sauti, ingawa hilo linaweza kufanywa.

 10. Kufafanua Imani Yako: Ikiwa sehemu hii itakuwa ni hotuba, itatolewa na mwanafunzi wa kiume. Ikiwa ni onyesho, linaweza kushughulikiwa na mwanafunzi wa kiume au wa kike. Msaidizi anapaswa kuwa wa jinsia moja na mwanafunzi au mtu wa familia yake. Mwanafunzi anapaswa kujibu kwa njia iliyo wazi na kwa fadhili swali lililoulizwa akitumia habari zilizo kwenye rejeo alilopewa. Mwanafunzi anaweza kuamua ikiwa atarejelea chapisho alilopewa au la anapotoa sehemu yake.

 11. Hotuba: Mgawo huu utashughulikiwa na mwanafunzi wa kiume na utatolewa kama hotuba kwa kutaniko. Hotuba inapotegemea habari zilizo kwenye nyongeza A ya broshua Wapende Watu, mwanafunzi anapaswa kuzungumzia jinsi mstari au mistari hiyo inavyoweza kutumiwa katika huduma. Kwa mfano, anaweza kueleza kuhusu wakati ambapo mstari au mistari hiyo inaweza kutumiwa, maana ya mstari huo, na jinsi ya kusababu na mtu kwa kutumia mstari huo. Hotuba inapotegemea moja kati ya masomo kutoka kwenye broshua Wapende Watu, mwanafunzi anapaswa kukazia jinsi ya kutumia habari hizo katika huduma. Anaweza kuzungumzia mfano uliowekwa kwenye jambo kuu la 1 la somo au kuzungumzia mistari ya ziada iliyo katika somo husika, ikiwa inasaidia.

 12. Habari ya Kuzungumzia: Habari zilizo katika fungu hili na linalofuata zinatumika kuhusiana na mgawo wa “Kuanzisha Mazungumzo” na “Fuatia Upendezi.” Isipokuwa Daftari liwe na maagizo tofauti, lengo la mwanafunzi linapaswa kuwa kushiriki kweli rahisi za Biblia zinazomfaa mtu anayezungumza naye na kuweka msingi kwa ajili ya mazungumzo ya wakati ujao. Mwanafunzi anapaswa kuteua habari inayofaana na wakati na mahitaji ya watu wa eneo lake. Anaweza kuamua ikiwa atatoa chapisho au kuonyesha video kutoka kwenye Sanduku la Vifaa vya Kufundishia au la. Badala ya kutumia utoaji ambao amekariri, mwanafunzi anapaswa kujizoeza kuanzisha mazungumzo, kama vile kumwonyesha mtu upendezi wa kibinafsi na kuzungumza kwa njia ya kawaida.

 13. Vikao: Mwanafunzi anapaswa kutumia kikao alichopewa kupatana na hali za eneo lake. Kwa mfano:

1.  (1) Nyumba kwa Nyumba: Kikao hiki kinahusisha kuhubiri mlango kwa mlango—iwe ni uso kwa uso, kupitia simu, au kupitia barua—na kumrudia mtu ambaye tulizungumza naye awali tuliposhiriki huduma ya nyumba kwa nyumba.

2.  (2) Mahubiri Yasiyo Rasmi: Kikao hiki kinakazia kubadili mazungumzo ya kawaida kuwa fursa ya kutoa ushahidi. Inaweza kutia ndani kushiriki wazo la Kimaandiko pamoja na wale tunaokutana nao kazini, shuleni, katika ujirani, katika usafiri wa umma, au kwingineko tunapoendelea na utendaji wako wa kila siku.

3.  (3) Mahubiri ya Umma: Kikao hiki kinatia ndani mahubiri ya kigari, kuwahubiria watu katika maeneo ya biashara, kuhubiri mtaani, au kuhubiri mbugani, eneo la maegesho ya magari, au mahali popote ambapo watu wanaweza kupatikana.

 14. Kutumia Video na Machapisho: Ikitegemea hali, mwanafunzi anaweza kuamua kutumia video au chapisho. Ikiwa mgawo wa mwanafunzi unatia ndani video au ikiwa mwanafunzi ataamua kutumia video, anapaswa kutaja na kuzungumzia video hiyo lakini hapaswi kuionyesha.

15. Baada ya wimbo, dakika 15 zinazofuata za Maisha ya Mkristo zitatia ndani sehemu moja au mbili ambazo zimekusudiwa kuwasaidia wasikilizaji watumie Neno la Mungu. Isipokuwa kuwe na maagizo tofauti, sehemu hizo zinaweza kugawiwa wazee au watumishi wa huduma wanaostahili. Hata hivyo, sehemu ya mahitaji ya kutaniko inapaswa kushughulikiwa na mzee. Sehemu inapoonyeshwa kuwa ni ya mazungumzo, msemaji anaweza kuuliza maswali wakati wa sehemu yote kutia ndani maswali yaliyotayarishwa. Anapaswa kutoa utangulizi mfupi ili kuwe na muda wa kutosha kushughulikia mawazo makuu na pia ili kuwapa wasikilizaji nafasi ya kushiriki. Ikiwa sehemu hiyo inatia ndani mahojiano, basi inafaa kwamba yule atakayehojiwa atoe maelezo yake akiwa jukwaani badala ya kuzungumza akiwa amekaa kwenye kiti, ikiwezekana.

 16. Funzo la Biblia la Kutaniko: Dakika 30. Sehemu hii inapaswa kugawiwa mzee anayestahili. (Ikiwa wazee ni wachache, watumishi wa huduma wanaostahili wanaweza kupewa mgawo huu, ikihitajika.) Baraza la wazee linapaswa kuamua ni nani anayestahili kuongoza Funzo la Biblia la Kutaniko. Wale wanaoidhinishwa wanapaswa kuongoza kwa njia inayofaa ili funzo limalizike kwa wakati, wakazie maandiko ya msingi, na kuwasaidia wote wathamini matumizi ya hoja zinazozungumziwa. Wale walioidhinishwa watanufaika kwa kupitia tena mwelekezo uliochapishwa kuhusu jinsi ya kuongoza sehemu ya maswali na majibu. (w23.04 uk. 24, sanduku) Baada ya kuzungumzia kikamili sehemu iliyoratibiwa kwa ajili ya juma, hakuna haja ya kurefusha funzo. Ikiwa inawezekana, viongozi na wasomaji tofauti-tofauti wanapaswa kutumiwa kila juma. Ikiwa mwenyekiti wa Mkutano wa Huduma na Maisha ataelekeza kwamba funzo lifupishwe, kiongozi ndiye atakayeamua jinsi funzo hilo litakavyofupishwa. Anaweza kuamua mafungu fulani yasisomwe.

17. Dakika 3. Mwenyekiti wa Mkutano wa Huduma na Maisha atapitia hasa mambo muhimu mliyojifunza mkutanoni. Anapaswa pia kupitia kwa ufupi habari za juma linalofuata, labda kwa kutaja swali moja litakalojibiwa. Wakati ukiruhusu, anaweza kutaja majina ya wanafunzi waliogawiwa sehemu za juma lijalo. Isipokuwa kuwe na maagizo tofauti, mwenyekiti atasoma matangazo yoyote muhimu na barua zozote muhimu katika maelezo yake ya kumalizia. Matangazo ya kawaida, kama vile mipango ya utumishi wa shambani na ratiba ya usafi, hayapaswi kusomwa jukwaani bali yawekwe kwenye ubao wa matangazo. Ikiwa muda uliopangiwa sehemu ya umalizio hautoshi kutoa matangazo au kusoma barua, mwenyekiti anapaswa kuwaomba ndugu walio na sehemu katika Maisha ya Mkristo wafupishe sehemu zao ipasavyo. (Ona fungu la 16 na la  19.) Mkutano utamalizika kwa wimbo na sala.

18. Baada ya kila mgawo wa mwanafunzi, mwenyekiti wa Mkutano wa Huduma na Maisha ana dakika moja hivi ya kutoa pongezi na shauri linalotegemea somo alilogawiwa. Mwenyekiti anapomkaribisha mwanafunzi kwa ajili ya mgawo, hatatangaza somo. Hata hivyo, baada ya mwanafunzi kumaliza mgawo na kumpongeza ipasavyo, mwenyekiti anaweza kutangaza somo na kutaja kwa nini mwanafunzi alifanya vema katika somo hilo au kueleza kwa fadhili kwa nini na jinsi gani mwanafunzi anapaswa kukazia uangalifu zaidi somo hilo hususa. Mwenyekiti anaweza pia kutaja mambo mengine kuhusu onyesho hilo akihisi kwamba kufanya hivyo kutamnufaisha mwanafunzi au wasikilizaji. Shauri la ziada lenye kujenga linalotegemea broshua Wapende Watu, broshua Kufundisha, au kitabu Shule ya Huduma linaweza kutolewa faraghani baada ya mkutano au wakati mwingine, labda kuhusiana na somo alilogawiwa au somo lingine tofauti.—Kwa habari zaidi kuhusu jukumu la mwenyekiti wa Mkutano wa Huduma na Maisha na jukumu la mshauri msaidizi, ona  fungu la 19, 24, na 25.

19. Hakuna sehemu inayopaswa kupitisha wakati, vilevile maelezo ya mwenyekiti wa Mkutano wa Huduma na Maisha hayapaswi kupita wakati. Ingawa Daftari la Mkutano wa Huduma na Maisha linaonyesha muda uliotengwa kwa ajili ya kila sehemu hakuna haja ya kurefusha sehemu ikiwa habari imezungumziwa vya kutosha chini ya muda uliowekwa. Ikiwa sehemu zimepitisha wakati, mwenyekiti wa Mkutano wa Huduma na Maisha au mshauri msaidizi anapaswa kutoa shauri la faraghani. (Ona fungu la 24 na  25.) Mkutano wote, kutia ndani nyimbo na sala, unapaswa kuchukua muda wa saa 1 na dakika 45.

20. Kutaniko linapokuwa na ziara ya mwangalizi wa mzunguko, programu itafuata utaratibu unaoonyeshwa kwenye Daftari la Mkutano wa Huduma na Maisha isipokuwa mambo yafuatayo: Badala ya kufanya Funzo la Biblia la Kutaniko katika sehemu ya Maisha ya Mkristo kutakuwa na hotuba ya utumishi ya dakika 30 itakayotolewa na mwangalizi wa mzunguko. Kabla ya hotuba ya utumishi, mwenyekiti wa Mkutano wa Huduma na Maisha atapitia programu iliyomalizika, apitie kifupi programu ya juma linalofuata, asome matangazo yoyote muhimu, asome barua zozote muhimu, kisha amkaribishe mwangalizi wa mzunguko. Baada ya hotuba ya utumishi, mwangalizi wa mzunguko atamalizia mkutano kwa wimbo atakaochagua mwenyewe. Anaweza kumkaribisha ndugu mwingine amalizie kwa sala. Hakuna shule za ziada katika lugha ya kutaniko zinazopaswa kufanywa wakati wa ziara ya mwangalizi wa mzunguko. Kikundi kinaweza kufanya mikutano kivyake hata wakati ambapo mwangalizi wa mzunguko anazungukia kutaniko simamizi. Hata hivyo, kikundi kinapaswa kujiunga na kutaniko simamizi wakati wa hotuba ya utumishi ya mwangalizi wa mzunguko.

21. Katika juma la kusanyiko la mzunguko au la eneo, hakuna mikutano ya kutaniko inayofanywa. Kutaniko linapaswa kukumbushwa kwamba habari zilizoratibiwa kwa ajili ya mikutano katika majuma hayo zinapaswa kusomwa kibinafsi au kama familia.

22. Ikiwa Ukumbusho utafanyika katikati ya juma, hakuna Mkutano wa Huduma na Maisha utakaoratibiwa.

23. Mzee aliyeteuliwa na baraza la wazee atatumikia akiwa mwangalizi wa Mkutano wa Huduma na Maisha. Ana jukumu la kuhakikisha kwamba mkutano huu umepangwa vizuri na kushughulikiwa kulingana na maagizo haya. Anapaswa kudumisha mawasiliano mazuri pamoja na mshauri msaidizi. Mara tu Daftari la Mkutano wa Huduma na Maisha linapopatikana, mwangalizi wa Mkutano wa Huduma na Maisha atatayarisha migawo ya mkutano wote wa katikati ya juma kwa ajili ya miezi hiyo miwili. Hilo linatia ndani sehemu ambazo si za wanafunzi pamoja na sehemu ya mwenyekiti wa katikati ya juma kutokana na wale walioidhinishwa na baraza la wazee na pia sehemu za wanafunzi. (Ona fungu la 3-16 na 24.) Anapopanga migawo ya wanafunzi, anapaswa kuzingatia umri wa mwanafunzi, uzoefu wake, na uhuru wake wa kusema kuhusiana na habari inayozungumziwa. Anapaswa kutumia utambuzi huohuo anapopanga migawo ya sehemu nyingine zote za mkutano. Kila mgawo unapaswa kusambazwa angalau majuma matatu kabla ya tarehe ya mgawo. Fomu ya Mgawo wa Mkutano wa Huduma na Maisha Yetu ya Kikristo (S-89) inapaswa kutumiwa kwa ajili ya migawo ya wanafunzi. Mwangalizi wa Mkutano wa Huduma na Maisha anapaswa kuhakikisha nakala ya ratiba ya migawo imewekwa kwenye ubao wa matangazo. Baraza la wazee linaweza kumpa mgawo mzee mwingine au mtumishi wa huduma kumsaidia. Hata hivyo, wazee peke yao ndio wanaopaswa kutumiwa kupanga migawo ambayo si ya wanafunzi.

24. Kila juma, mzee mmoja atatumikia akiwa mwenyekiti wa Mkutano wa Huduma na Maisha. (Ikiwa wazee ni wachache, watumishi wa huduma wanaostahili wanaweza kupewa jukumu hili, ikihitajika.) Ana jukumu la kutayarisha maelezo ya utangulizi na umalizio. Pia, ataalika sehemu zote jukwaani, na ikitegemea ukubwa wa baraza la wazee, anaweza kushughulikia sehemu nyingine katika mkutano huo, hasa sehemu zinazohusu kuonyesha video tu bila mazungumzo ya ziada. Maelezo yake baada ya kila sehemu yanapaswa kuwa mafupi sana. Baraza la wazee litaamua ni wazee gani wanaostahili kupewa daraka hili. Wazee hao wanaostahili watakuwa wenyekiti kwa zamu. Ikitegemea hali za kutaniko, mwangalizi wa Mkutano wa Huduma na Maisha anaweza kuwa mwenyekiti mara nyingi zaidi ya wale wazee wengine wanaostahili. Ikiwa mzee anastahili kuongoza Funzo la Biblia la Kutaniko, huenda pia anastahili kuwa mwenyekiti wa mkutano huu. Hata hivyo, tafadhali kumbukeni kwamba, mzee anayetumikia akiwa mwenyekiti anahitaji kutoa pongezi na shauri la upendo litakalowasaidia wale walio na migawo ya mwanafunzi. Mwenyekiti pia ana jukumu la kuhakikisha kwamba mkutano huu unamalizika kwa wakati. (Ona  fungu la 17 na  19.) Mwenyekiti akipenda na ikiwa kuna nafasi ya kutosha, maikrofoni nyingine inaweza kusimamishwa jukwaani upande unaofaa kwa ajili ya kualika sehemu mbalimbali huku ndugu aliye na sehemu anapojitayarisha kwenye kinara cha msemaji. Hali kadhalika, mwenyekiti akipenda anaweza kuamua kuketi hapo jukwaani wanafunzi wanaposhughulikia usomaji wa Biblia na kutoa sehemu za Boresha Huduma Yako. Hilo linaweza kuokoa wakati.

25. Ikiwa inawezekana, ingefaa kutumia mzee aliye msemaji mwenye uzoefu atimize daraka hili. Jukumu la mshauri msaidizi ni kuwapa shauri la faraghani, ikihitajika, wazee na watumishi wa huduma kuhusiana na migawo yoyote ya ufundishaji wanayoshughulikia, kutia ndani sehemu za Mkutano wa Huduma na Maisha, hotuba za watu wote, na kuongoza au kusoma katika Funzo la Mnara wa Mlinzi au Funzo la Biblia la Kutaniko. (Ona  fungu la 19.) Ikiwa kuna wazee kadhaa kutanikoni ambao ni wasemaji na walimu stadi, basi mzee tofauti anayestahili anaweza kutumikia akiwa mshauri msaidizi kila mwaka. Mshauri msaidizi hahitaji kutoa shauri baada ya kila mgawo.

26. Ikitegemea idadi ya wanafunzi, makutaniko yanaweza kuwa na shule za ziada kwa ajili ya hotuba za wanafunzi. Kila shule ya ziada inapaswa kuwa na mshauri anayestahili, ikiwezekana mzee. Ikiwa inafaa, mtumishi wa huduma anayestahili kabisa anaweza kupewa jukumu hili. Baraza la wazee linapaswa kuamua ni nani anayeweza kutumikia katika wadhifa huu na ikiwa mgawo huo unapaswa kufanywa kwa zamu. Mshauri anapaswa kufuata utaratibu unaotajwa kwenye fungu la 18. Ikiwa kuna shule ya ziada, wanafunzi wanapaswa kuombwa waende kwenye chumba cha ziada baada ya sehemu Hazina za Kiroho katika Hazina za Neno la Mungu. Wanapaswa kujiunga na wengine kwenye jumba kuu baada ya mgawo wa mwisho wa mwanafunzi kwenye mkutano.

27. Video zilizoteuliwa zitatumika katika mkutano huu. Video za mkutano wa katikati ya juma zitaandaliwa kupitia programu ya JW Library ^® na kupakuliwa kwenye vifaa mbalimbali.

© 2023 Watch Tower Bible and Tract Society of Pennsylvania

S-38-SW 11/23